Folasaga i le Evagelia e Tusa ai ma Sagato Mataio
Aisea e suesueina ai lenei tusi?
O nisi o fuaitau pele o le Tusi Paia o loo maua i le Mataio e aofia ai le Lauga i luga o le Mauga ma le tele o faataoto, aoaoga, ma vavega a Iesu Keriso. O le suesueina o lenei tusi e mafai ona fesoasoani e faamasani ai tagata aoga i le galuega ma upu a Iesu keriso ma mafai ai ona faamalolosia a latou molimau ia Iesu keriso o le Faaola o le lalolagi ma le Mesia Folafolaina na ta’ua e perofeta paia uma.
O ai na tusiaina lenei tusi?
O Mataio, lea foi e igoa ia Levi, le atalii o Alefaio, o le tusitala o le tusi lenei. O ia o se telona, po o se ao lafoga, a o lei suia lona olaga e faavavau ina ua ia tali atu i le valaaulia a Iesu Keriso e mulimuli atu ia te Ia. (Tagai Mataio 9:9; Mareko 2:14; Luka 5:27–28; Bible Dictionary, “Matthew.”) Ina ua mavae lona liua, na avea Mataio ma se tasi o Aposetolo e Toasefululua a le Faaola (tagai Mataio 10:2–4). I le avea ai o se Aposetolo, o Mataio o se molimau vaaitino i le tele o mea na tutupu o loo faamatalaina i lana faamaumauga. O loo lagolagoina lea i le ulutala na tuuina i lana Evagelia i le Faaliliuga a Iosefa Samita: “O Le Molimau a Sagato Mataio.”
O anafea ma o fea foi na tusia ai lenei tusi?
Tatou te le iloa tonu pe o anafea na tusia ai le tusi a Mataio, ae e foliga mai na tusia i le afa lona lua o le seneturi muamuaT.L.M Tatou te le iloa po o fea na tusia ai e Mataio lenei tusi.
O ai na tusia i ai lenei tusi, ma pe aisea foi?
E foliga mai na tusi atu Mataio i se aofia Iutaia e faaali atu ai O Iesu Keriso na faataunuuina ia valoaga a le Feagaiga Tuai e faatatau i le Mesia (tagai Bible Dictionary, “Matthew”). A o toe tusia e Mataio le soifuaga, upu, ma galuega a Iesu Keriso, e masani ona ia faasino i valoaga i le Feagaiga Tuai ma faaaoga ai fasifuaitau “ina ia faataunuuina’ (mo se faataitaiga, tagai Mataio 4:14; 8:17; 13:35; 21:4).
I lana Evagelia, e 12 taimi sa faaaoga ai e Mataio le faaupuga “Alo o Tavita” e fai ma molimau faapea o Iesu Keriso o le suli moni i le nofoalii o le Tupu o Tavita ma o le faataunuuga o valoaga faalemesia. O le gafa o Iesu Keriso na tusia e Mataio o loo tosi atu ai Lona tupuaga ia Tavita, Iuta, ma Aperaamo (tagai Mataio 1:1–3), e faapupula ai le aia tatau a Iesu e pulea ma Lana matafaioi o le faataunuuga o folafolaga a le Atua ia Isaraelu.
O a nisi o vaaiga iloga o lenei tusi?
E ui o se vaega tele o anomea a Mataio o loo maua foi i le Mareko ma le Luka, ae pe tusa ma le 42 pasene o le Evagelia a Mataio e tulagaese lava. O se autu iloga i le Mataio o le, na afio mai Iesu Keriso e faavae Lona malo. Sa faatele ona ta’ua e Mataio “o le malo o le lagi”, ma e na o ia le tusi Evagelia ua faaaofiaina aoaoga a Iesu o loo ta’ua ai le “ekalesia” (tagai Mataio 16:18; 18:17).
Ua fesoasoani le Evagelia a Mataio tatou te vaai ai i le ogatusa o galuega a Mose ma Iesu Keriso. Mo se faataitaiga, na laveaiina uma i latou o ni tama meamea mai taumafaiga a se tupu e fasiotia i la’ua (tagai Esoto 2:1–10; Mataio 2:13–18), na o mai uma i la’ua mai Aikupito, na taufai molimoliina atu le tulafono a le Atua i luga o se mauga (tagai Esoto 19–20; Mataio 5–7), ma na taufai o mai uma foi i la’ua e laveai o la tagata.
Otootoga
Mataio 1–4Na aumaia e Mataio le gafa ma le fanau mai o Iesu Keriso. Ua sailia e le Au Makoi le Tupu o Iutaia. Ina ua taialaina e miti, sa ave ai Maria ma le tamaitiiti o Iesu e Iosefa i Aikupito ma mulimuli ane i Nasareta. Sa folafola e Ioane le Papatiso le talalelei o le salamo ma sa papatisoina Iesu Keriso. Sa faaosoosoina le Faaola i le vao. Na Ia amataina Lana galuega i le olaga nei i le aoao atu ma le faamaloloina.
Mataio 5–7Ua tuuina atu e Iesu Keriso le Lauga i luga o le Mauga.
Mataio 8–12Sa faamalolo e le Faaola se lepela, faatoafilemu se afa, tuliesea temoni, faatu mai le afafine o Iairo mai le oti, ma faapupula i e tauaso. Sa tuuina atu e Iesu Keriso i Aposetolo e Toasefululua le pule e faia ai e pei ona Ia faia, ma auina atu i latou e folafola le talalelei. Ua folafola atu e Iesu o Ioane le Papatiso e le na o se perofeta. Ua faamalolo e le Faaola ma’i i le Sapati.
Mataio 13–15 Ua aoao atu Iesu e faaaoga ai faataoto. Ua Fasiotia Ioane le Papatiso Ina uma ona fagaina le lima afe, sa savavali Iesu ma Peteru i luga o le Sami o Kalilaia. Sa fesiliga e le au Tusiupu ma le au Faresaio ia Iesu.
Mataio 16–18Ina ua uma ona molimau atu Peteru o Iesu o le Mesia, sa ta’u atu e le Faaola o le a Ia tuuina atu ki o le malo o le Atua ia Peteru ma le Toasefululua. Ua liua Iesu Keriso i luga o se mauga, lea sa talia ai e Peteru, Iakopo, ma Ioane ia ki o le perisitua. Ua tuu atu e Iesu ia faatonuga i Ona soo i le ala e taiala ai le Ekalesia ma aoao atu faapea o le a le faamagaloina e le Atua i tatou pe afai tatou te le faamagalo atu i isi.
Mataio 19–23Ua aoao atu le Faaola e uiga i le natura faavavau o le faaipoipoga. Sa ulu atu o Ia i Ierusalema ma faamama le malumalu. E ala i le faaaogaina o faataoto, na folasia atu ai e Iesu faamoemoega leaga o taitai Iutaia o e sa tetee ia te Ia. Sa Ia faanoanoa ona o le faatafunaga o Ierusalema i le lumanai.
Mataio 24–25; Iosefa Samita—MataioUa vavalo Iesu Keriso i le faatafunaga o Ierusalema. Sa Ia aoao atu le ala e mafai ai e Ona soo ona saunia mo Lona toe afio mai.
Mataio 26–27Ua taumafa Iesu i le talisuaga o le Paseka faatasi ma Ona soo ma folasia atu i ai le faamanatuga. Ua mafatia o Ia i le Faatoaga o Ketesemane ma ua faalataina, pue faapagotaina, faamasinoina i luma o taitai o Iutaia ma Roma, ma sa faasatauroina. Ua maliu o Ia ma ua tanumia.
Mataio 28Ua faaali atu le Faaola Toetu i Ona soo. Ua poloaiina e Iesu le au Aposetolo ia auina atu Lana talalelei i malo uma.