Folasaga i le Tusi a Paulo i Kolose
Aisea e suesue ai lenei tusi?
Na tusia e Paulo lana Tusi i Kolose ona o se lipoti faapea ua latou pauu atu i se sese matuia (tagai Bible Dictionary, “Pauline Epistles”). O aoaoga ma faiga sese i Kolose sa faatosinaina ai le Au Paia iina ma faamatauina ai lo latou faatuatua. O uunaiga faaleaganuu faapena ua afua ai luitau mo tagata o le Ekalesia i aso nei. O se vaega o le taua o lenei tusi o loo taoto i le auala na ia faailoa mai ai ma aliali mai ai mea pepelo a o faamamafa atu le paia o Iesu Keriso ma le galuega laveai. O le suesueina o le tusi o Kolose, e mafai ai e le vasega ona faalolotoina lo latou liua i le Faaola ma maua ai le puipuiga mai le taufaasese ma le agasala.
O ai na tusiaina lenei tusi?
O le Tusi i tagata Kolose sa auina atu e Paulo ma Timoteo (tagai Colossians 1:1, 23; 4:18). E manino lava na tusilima e Paulo lana lava faafeiloaiga i le faaiuga o le tusi (tagai Kolose 4:18), e tau mai ai o se tusiupu, atonu o Timoteo, sa fesoasoani ia te ia i le tusiaina o le tino o le tusi.
O anafea ma o fea foi na tusia ai lenei tusi?
Na tusia e Paulo lenei tusi i le taimi o lona uluai faafalepuipuiina i Roma, pe tusa o le T.A. 60–62 (tagai Taiala i Tusitusiga Paia, “Pauline Epistles,” scriptures.lds.org). Atonu na tusia e Paulo le Tusi i Kolose pe tusa o le taimi lava lea na ia tusi ai i Filipi, Efeso, ma Filemoni.
O ai na faatatau i ai le tusiaina o lenei tusi, ma pe aisea foi?
Na tusia lenei tusi i le Au Paia faamaoni i Kolose, o se nofoaga i le mea lea ua taua nei o Take. Sa faatonuina e Paulo le Au Paia i Kolose e faasoa mai le tusi i tagata o le Ekalesia i le nuu tuaoi o Laotikaia (tagai Kolose 4:16).
Na tusia e Paulo le tusi lenei “ina ua uma ona asia o ia e Epafara, o le peteriaka o le Ekalesia i [Kolose ] [tagai Kolose 1:7–8]. Sa tau atu e Epafara ia Paulo o Kolose ua pauu ese atu i le sese matuia—sa latou manatu ua sili atu i latou nai lo isi tagata aua sa latou tausia ma le faaeteete ni sauniga patino i fafo atu [tagai Kolose 2:16], sa faafitia i latou lava ni manaoga faaletino patino, ma sa tapuai i agelu [tagai Kolose 2:18]. O nei faiga na afua ai ona lagona e tagata Kolose o i latou ua faapaiaina. Sa latou lagonaina foi ua latou malamalama i mealilo o le atulaulau e sili atu nai lo isi tagata o le Ekalesia. I lana tusi, sa faasaoina e Paulo i latou e ala i le aoao atu o le togiolaina e na o Keriso e maua mai ai ma e tatau ona tatou popoto ma auauna atu ia te Ia” (Taiala i Tusitusiga Paia, “Colossians, Epistle to,” scriptures.lds.org).
O a nisi o vaaiga iloga o lenei tusi?
I le Tusi ia Kolose, sa ia talanoa tetee atu ai i aoaoga sese i Kolose e ala i le faamamafaina o le misiona paia, faaola, ma le silisili ese o Iesu Keriso (tagai Kolose 1:15–23). Sa ia aoao atu o Keriso o le faatusa tonu lava lea o le Atua le Tama, o le Foafoa, ma o le Ao o le Ekalesia, o le na muamua toetu, ma le Togiola. O ia “o le ulu o alii sili uma lava atoa ma faipule” (Kolose 2:10), ma ua Ia faataunuuina Lana misiona paia i lalo o le taitaiga a le Tama (tagaiKolose 1:19; 3:1).
Sa lapatai e Paulo mai ia i latou o e sa aoao atu faapea sa maua le faaleagaga e ala i sauniga faapitoa, tausamiga, ma mea e aai ai (tagai Kolose 2:16–18, 20, 23). Na ia aoao atu faapea o le matua faaleagaga ma le poto o le Atua e faaalia a ala i le faatuina “o o tatou lagona i mea mai luga” (Kolose 3:2), aveese uiga le sao (tagai Kolose 3:5–9), ma atiina ae uiga faaKeriso (tagai Kolose 3:12–17). sa fautuaina e Paulo lana aufaitau ia “faavaeina ma mausali” i le talalelei (Kolose 1:23) faapea foi ona “mauaa ma atiina ae ia [Iesu Keriso], ia faatumauina i le faatuatua” (Kolose 2:7).
Otootoga
Kolose 1:1–23Ua faafeiloai e Paulo le Au Paia i Kolose ma tautino atu ai o Iesu Keriso o le Togiola, o le Ulumatua o foafoaga uma, o le Foafoa, ma o le Alii o le atoatoaga uma faalelagi, o le faaleleiga o le atulaulau. Ua apoapoai atu e Paulo le Au Paia e faavae lo latou faatuatua ia Iesu Keriso.
Kolose 1:24–2:23o loo lapataia ai e Paulo mai le talitonu i soo se filosofia sese po o uputuu a tagata, e aofia ai le tapuai atu i agelu ma le soona faafitia o le tagata lava ia o manaoga faaletino e avea ma ituaiga o aoaiga faaleagaga.
Kolose 3:1–4:18na apoapoai atu ai Paulo i le Au Paia e tuu o latou loto i mea o i luga, ia lafoai le agasala o o latou olaga muamua, ma ia alofa mutimutivale le tasi i le isi. Ua ia tuuina atu faatonuga i le ala e tatau ona tapuai ai le Au Paia ona tuu atu ai lea o fautuaga i ava, o tane, fanau, matua, auauna, ma matai. Ua ia tapunia le Tusi i Kolose ma le faamalo, faafeiloaiga, ma faatonuga faaiu ma faamanuiaga.