Lesona 126

Kolose

Folasaga

Na aoao atu e Paulo le silisiliese o Iesu Keriso (puleaoao, maoae, po o le silisili) ma lapatai faasaga i aoaoga faavae sese. Sa ia fautuaina le Au Paia i Kolose e faatulaga lo latou alofa molitino i mea faalelagi ma atiina ae uiga o Keriso. Sa faatonu foi i latou e Paulo ia tauagafau ma ia atamamai ia latou fegalegaleaiga ma isi.

Fautuaga mo le Aoaoina Atu

Kolose 1–2

Ua aoao atu e Paulo le silisiliese o Iesu Keriso ma lapatai mai e faasaga i aoaoga faavae sese

Faaaogaina o le laupapa

O le faaaoga lelei o le laupapa i le taimi o se lesona e mafai ona saunia ai tamaiti aoga e aoao ma mafai ona valaaulia ai le auai anoa, aemaise lava i latou o e aoao i le vaai. I luga o le laupapa, e mafai e se faiaoga ona otooto ai itu taua po o mataupu faavae o le lesona, tusi se ata o se aoaoga faavae, tusi faafanua, atinae se siata faasolo, faaali pe tusi ai ata o mea e maua i mau, ma faia se anoanoai o isi gaoioiga e faalautele ai le aoaoina.

Tusi le ata lenei i luga o le laupapa.

• Afai e oo mai se matagi matautia, o le fea o nei laau o le a tauau ina pau? Aisea?

Valaaulia se tagata o le vasega e faitau le saunoaga lenei a Elder Neil L. Andersen o le Korama a Aposetolo e Toasefululua. Fai i le vasega e faalogologo mo asiosio e tatau ona tatou nofouta i ai.

“O mea e sili atu ona popole i ai nai lo o mafuie ma taua [o aso e gata ai] sa valoia, o asiosio faaleagaga e mafai ona liaieseina oe mai lou faavae faaleagaga ma tuuina lou agaga i tulaga e te le i mafaufauina e mafai, ma o nisi taimi e te tau lei iloaina ua sii ese oe mai lou faavae faaleagaga” (“O Asiosio Faaleagaga,” Ensign po o le Liahona, Me 2014, 18).

• O a ni faataitaiga o asiosio faaleagaga e mafai ona liaiina ai pe aveesea i tatou mai lo tatou faatuatua ia Iesu Keriso? (Atonu e te manao e valaaulia le vasega e lisi a latou tali i le laupapa i autafa o le atatusi o le asiosio.)

• Aisea e mafai ai e nei asiosio faaleagaga ona sili atu le faapopoleina ai nai lo luitau faaletino, e pei o mafuie po o taua?

Valaaulia le vasega e mafaufau pe o a asiosio faaleagaga e mafai ona aafia ai i latou.

Faamatala na tusia e Paulo se tusi i tagata o le Ekalesia i Kolose (e faasino i tagata Kolose) ina ua uma ona aoao e uiga i faatosinaga ma aoaoga sese iina ua faamatauina ai le liaiina o i latou mai lo latou faatuatua ia Iesu Keriso. (Atonu e te manao e valaaulia le vasega e sue Laotikaia“O Le Malaga Faafaifeautalai a le Aposetolo o Paulo.”) Valaaulia le vasega e vaavaai ao latou suesueina le Kolose pe na faapefea ona sailia e Paulo e faamalolosia le faatuatua o tagata o le Ekalesia ia Keriso ma mo faamanuiaga o le faatuatua ua mauaa loloto ia Keriso.

Otooto le Kolose 1:1–11i le faamatala atu faapea ina ua uma ona faafeiloai atu i le Au Paia i Kolose, sa faailoa atu e Paulo lo latou faamaoni ma faamatala atu o le talalelei e aumaia ai fua, po o faamanuiaga, i olaga o i latou o e taliaina ma ola ai. Ona aoao atu ai lea e Paulo e uiga ia Iesu Keriso.

Valaaulia ni nai tamaiti aoga e feauaua’i i le faitauina leotele mai o le Kolose 1:12–19. Fai atu i le vasega ia mulimuli i le faitauga, ma vaavaai mo mea na aoao mai e Paulo e uiga ia Iesu Keriso. (Atonu e te manao e faamatala o le upu “le vaaia” fuaiupu 15 e faaliliuina mai le upu Eleni o le aoratos, e mafai foi ona faauigaina o le “le mavaaia.” Matau o le Eperu 11:27 o loo tau mai ai na vaai Mose ia te “ia e le o vaaia,” o lona uiga e masani lava ona le vaaia [tagai foi MF&F 67:11].)

• O le a le mea na aoao atu e Paulo e uiga ia Iesu Keriso? (I le faaaogaina o upu a le vasega, tusi le upumoni lea i luga o le laupapa i lalo o le laau e loloto ona aa: O Iesu Keriso o le Togiola, o le ulumatua o fanau agaga a le Tama Faalelagi, o le Foafoa o mea uma, o le ao o le Ekalesia, ma le uluai tamalii na toetu.

• Aisea e te manatu e taua ona tatou iloa ma talitonu i nei upumoni e uiga ia Iesu Keriso? E mafai faapefea e le iloaina ma talitonu i nei upumoni ona faamalolosia lo tatou faatuatua ia te Ia?

Faasino i le upuTogiolai le faamatalaga o i le laupapa, ma faamatala na faamanatu atu e Paulo i le Au Paia i Kolose le mafuaaga na latou manaomia ai se Togiola.

Valaaulia se tamaitiiti aoga e faitau leotele le Kolose 1:20–22. Fai i le vasega e mulimuli ai, ma vaavaai mo mea na aoao atu e Paulo i le Au Paia i Kolose e uiga i le manaomia o le i ai o se Togiola.

• E tusa ai ma le fuaiupu 21, e faapefea e se tasi ona faaesea pe tuueseese mai le Atua?

• O le a le uiga o le upu faaleleia i le fuaiupu 20? (Ia malilie pe ogatusa.)

• E tusa ai ma le fuaiupu 20 ma le 22, na faapefea ona faaleleia e Iesu Keriso i tatou ma le Atua? (Faamatala o le fasifuaitau “ia lelei ia te ia lava i le toto o lona satauro” e faasino i le Togiola a Iesu Keriso.)

Faamatala o le faamanuiaga o le faaleleia ma le Atua e i ai tuutuuga. Tusi le fasifuaitai lenei i luga o le laupapa: E mafai ona tatou faalelei ma le Atua e ala i le Togiola a Iesu Keriso pe afai …

Valaaulia se tamaitiiti aoga e faitau leotele le Kolose 1:23. Fai atu i le vasega e mulimuli i le faitauga, ma vaavaai po o a mea e manaomia ina ia faalelei ai ma le Atua.

• O le a le o manaomia ona tatou faia e faalelei ai ma le Atua?

• O le a le uiga mo i tatou ia “tutumau i le faatuatua o faavaeina ma mausali”? (Ia tumau mausali i lo tatou faatuatua ia Iesu Keriso.)

• E faavae i mea ua tatou aoao mai le fuaiupu e 23–46, e faapefea ona e faaumaina le faamatalaga o loo i luga o le laupapa? (Faaaoga upu a le vasega, faamaea le mataupu faavae o i le laupapa faapea: E mafai ona tatou faalelei ma le Atua e ala i le Togiola a Iesu Keriso pe afai tatou te tumau ona faavae ma mausali i lo tatou faatuatua.

Tatai atu mafaufau o tamaiti aoga i le ata o loo i luga o le laupapa, ma fesili.

• O ai e te iloa e pei o le laau e i ai aa loloto—ua faavae ma mausali i lona faatuatua ia Keriso?

• O faapefea ona avea lana faataitaiga ma se faamanuiaga ia te oe?

Valaaulia le vasega e faitau lemu le Kolose 2:4, 8, ma vaavaai mo asiosio faaleagaga na faamatauina ai ma liaia i luga le Au Paia i Kolose.

• O a asiosio faaleagaga na faamatauina ai ma liaia i luga le Au Paia i Kolose? (Faamatala sa tele ni filosofia ma tu masani sa aoaoina e nisi sa taumafai e faaitiitia le taua o Iesu Keriso.)

• E avea faapefea le talitonu i aoaoga sese, e aofia ai aoaoga e faaitiitia ai le taua o Iesu Keriso, ma mea e faigofie ai i se tasi ona liaiina i luga faaleagaga?

Valaaulia se tamaitiiti aoga e faitau leotele le Kolose 2:5–7 . Fai i le vasega e mulimuli ai, ma vaavaai mo le fautuaga na tuu atu e Paulo e fesoasoani ai i le Au Paia ia aloese mai le taitaiseseina i filosofia ma uputuu a le lalolagi.

• O le a se mea o aoao mai e le Kolose 2:5–7e mafai ona fesoasoani ia i tatou e aloese ai mai le taitaiseseina e filosofia sese o le lalolagi, aoaoga faalelotu, po o uputuu? (E mafai e le vasega ona faaaoga a latou lava upu e faailoa mai ai se mataupu faavae e pei o lea: O le mauaa ma fausia ia Iesu Keriso, e mafai ai ona tatou aloese mai le taitaiseseina e filosofia o le lalolagi ma uputuu.

Tusi fesili nei i luga o le laupapa:

O le a se mea o e talitonu i ai o se tasi o mea aupito taua e mafai ona tatou faia e mauaa ai ma fausia ia Iesu Keriso? Aisea e te talitonu ai o lena mea e tasi e taua tele?

Vaevae le vasega i ni vaega taitoatolu pe taitoafa. Valaaulia tagata taitoatasi e faamatala mai ana tali i fesili o i le laupapa i tagata o lana vaega. A uma ua lava le taimi, valaaulia ni nai tagata aoga e lipoti mai ni mea ua latou aoaoina mai tagata o a latou vaega.

Valaaulia le vasega e toe iloilo ia asiosio faaleagaga faaletagata lava ia sa latou mafaufau i ai i le amataga o le vasega. Valaaulia i latou e tusi i a latou api talaaga mo le suesueina o tusitusiga paia mea o le a latou faia e tumau mausali ai ma fausia ia Iesu Keriso ma aloese ai mai le liaiina i asiosio faaleagaga.

Kolose 3–4

Ua fautuaina e Paulo ia Kolose e tuu o latou faanaunauga alofa i mea faalelagi ma ia atamamai

Otooto le Kolose 3–4 i le faamatala atu faapea na apoapoai atu Paulo i le Au Paia i Kolose e tuu le amioletonu ma ia atiina ae uiga o Iesu Keriso. Na ia fautuaina foi i latou ia loto tatalo ma ia atamamai, aemaise ia latou fegalegaleaiga ma tagata e le o ni Kerisiano. Ona ia molimoli atu lea o alofaaga a nisi o ona uso a auauna, e aofia ai ma Luka.

Ia faasoa atu lau molimau o le upumoni na talanoaina i le lesona lenei.

Tala ma Faamatalaga o Talaaga

Kolose 1:15, 18. O Iesu Keriso o le Ulumatua

O le fasifuaitau “o le ulumatua o mea uma lava ua faia” Kolose 1:15o loo molimau mai o Iesu Keriso o le ulumatua o fanau agaga uma a le Tama Faalelagi. Na faamautu mai le Au Peresitene Sili:

“I fanau agaga a Elohima [le Atua le Tama] o le ulumatua o ma o Ieova po o Iesu Keriso lea e laiti uma ai isi” “O Le Tama ma le Alo: “O le Tama ma le Alo: O Se Faamalamalamaga Faamataupu Faavae a le Au Peresitene Sili ma le Korama a Aposetolo e Toasefululua,” Liahona, Ape. 2002, 18–18).

O le fasifuaitau “o le ulumatua o e ua oti” i le fuaiupu 18o lona uiga o Iesu Keriso o le uluai tagata o lenei lalolagi na toetu mai. Ua faaigoa foi o Ia “o le uluai fua o i latou uma na momoe” (1 Korinito 15:20).

Kolose 1:16–17. E ala mai ia Iesu Keriso “na faia mea uma lava”

Na faamatala e Elder Dallin H. Oaks o le Korama a Aposetolo e Toasefululua e faapea o Iesu Keriso o le Foafoa ma o loo i ai le mana e pulea ai mea uma o Ana foafoaga:

“I lalo o le taitaiga ma le fuafuaga a le Atua le Tama, o Iesu Keriso o Le Foafoa, o le puna o le malamalama ma le ola o mea uma. E ala mai i faaaliga i ona po nei ua tatou maua ai le molimau a Ioane, o le molimau mai o Iesu Keriso o ‘le malamalama ma le Togiola o le lalolagi, o le Agaga o le upumoni, o le na afio mai i le lalolagi, aua o le lalolagi na faia e ia, ma ia te ia o i ai le ola o tagata ma le malamalama o tagata.

“‘O lalolagi na faia e ia; o tagata na faia e ia; o mea uma na faia e ia, ma e ala mai ia te ia ma ia te ia’ (MF&F 93:9–10)” (“O Le Malamalama a le Ola o le Lalolagi,” Ensign, Nov. 1987, 63; tagai foi Ioane 1:1–3; Eperu 1:2; MF&F 76:24; Mose 1:33).

Kolose 2:9. “O le tumu uma lava o le itu Atua ua i lona tino”

I le talanoa ai e uiga ia Iesu Keriso, sa molimau atu ai Paulo, “Aua o loo mau i totonu ia te ia le tumu uma lava o le itu Atua ua i lona tino.” Ua tau e lenei fasifuaitau o Iesu Keriso e paia atoatoa ma o loo i ai le mana atoa faaleatua (tagai foi Mataio 28:18).

Manatu Faaopoopo mo le Aoaoina Atu

Kolose 3. Ua fautuaina e Paulo ia Kolose e tuu atu o latou faanaunauga alofa i mea faalelagi

Tusi le atalea i le laupapa, ia lava se tele ina ia mafai ai e tamaiti ona tusitusi i totonu o ata taitasi. Tusi le Tuu ese i luga ae o le tasi ata, ae tusi le Oofu i luga ae o le isi ata.

Faamatala e pei ona tusia i le Kolose 3:1–4,sa apoapoai atu Paulo i le Au Paia e taulai atu la latou gauai i mea faalelagi nai lo mea faalelalolagi, ma aoao atu o le a afio mai Iesu Keriso i le mamalu i Lona Afio Mai Faalua.

• Pe afai e te i ai i le taimi e afio mai ai le Faaola i le mamalu, o a ni ofu e te manao e fai?

• O le a sou manatu o le a le mea e sili ona taua nai lo ofu e te ofuina?

Faamatala o le Kolose 3:5–15, na aoao atu ai e Paulo le Au Paia i Kolose i mea e tatau ona latou “tuu ese” (fuaiupu 8) ma mea e tatau ona latou “oofu” (fuaiupu 10) o ni soo o Iesu Keriso. Vaelua le vasega, ma valaaulia le tasi afa o le vasega e faitau le Kolose 3:5–9, ma vaavaai mo mea na aoao mai e Paulo ua tatau ona tuu ese. Valaaulia le isi afa o le vasega e faitau le Kolose 3:10–15, ma vaavaai mo mea na aoao mai Paulo e tatau ona tatou oofu ai. (Atonu e manaomia lou faauigaina o mea nei: faitaaga [feusuaiga le mama], faanaunauga alofa e le talafeagai [tuinanau], ma le naunauga leaga [manaoga faatiapolo].)

A uma ua lava se taimi, valaaulia ni nai tagata e tusi i le laupapa i totonu o ata talafeagai ia mea na taua e Paulo e tuu ese pe oofu ai.

Tatai le gauai a le vasega i le ata ua faaigoa “Tuu ese,” ma fesili:

• O le a sou manatu i le uiga o le tuu ese o nei mea?

• Mata o a ni lagona o se tagata na faia nei agasala ma e lei salamo ai, pe a i ai le Faaola? (Tagai foi i le Mamona 9:3–4.)

Tatai le gauai a le vasega i le ata ua faaigoa “Oofu,” ma fesili:

• E faapefea lagona o se tagata ua ofu i nei uiga pe a i ai le Faaola?

• Ao ofu se tagata i nei uiga, o ai ua soo i ai? (Iesu Keriso [tagai Kolose 3:10]. Tusi le mataupu faavae lenei i le laupapa: A o tatou tuu ese le amioletonu ma taumafai e oofu i uiga o Iesu Keriso, e avea i tatou ma tagata fou ua pei o Ia.

• E mafai faapefea ona tatou atiina ae ia uiga o Iesu Keriso?

Fai i le vasega e mafaufau i se tagata latou te iloa o loo taumafai e ofu i uiga o Iesu Keriso. Fuafua e fai i nai tagata e faasoa mai pe na faapefea e le tagata lea ona atiina ae na uiga.

Valaaulia le vasega e mafaufau pe o a agasala e manaomia ona latou tuu ese ma pe o a uiga o Iesu Keriso e manaomia ona oofu ai. Fai i le vasega e fai se sini e tuu ese ia agasala patino ma oofu i uiga patino o Keriso. Valaaulia le vasega e tusi a latou sini ia latou api talaaga mo le suesueina o tusitusiga paia po o se fasipepa.

Faamatala e pei ona tusia i le Kolose 3:16–25, na tuu atu e Paulo i le Au Paia i Kolose ia faatonuga o le a fesoasoani ia i latou ia avea atili faapei o Keriso ma ia maua se filemu sili atu i o latou olaga.

Kolose 4:16. Ua faatonuina e Paulo le Au Paia i Kolose e faitau se tusi mai Laotikaia

Faamatala i ona po o Paulo, sa faitauina leotele e lala o le Ekalesia ia tusi a Paulo ia latou faapotopotoga. O tusi i le lala e tasi o nisi taimi sa pasi atu isi ina ia mafai e le toatele o tagata o le ekalesia ona faalogo i aoaoga ma fautuaga a Paulo. Valaaulia se tamaitiiti aoga e faitau leotele le Kolose 4:16. Fai i le vasega e mulimuli ai, ma vaavaai mo tusi eseese e lua na tusia e Paulo. Fai atu i tagata o le vasega e lipoti mai mea ua latou mauaina.

Faamatala o le Tusi Paia o loo aofia ai tusi na tusia e Paulo i Kolose, ae o le tusi mai Laotikaia lea na taua e Paulo ua leiloa nei ma e le o maua i le Tusi Paia i aso nei, faatasi ai ma isi tusi a Paulo (tagai 1 Korinito 5:9; Efeso 3:3). E tau mai i i o le Tusi Paia o aso nei e le o i ai ia tusi paia uma na tusia e perofeta ma aposetolo a le Alii.