Lesona 139
Eperu 12–13
Folasaga
Sa fautuaina e Paulo tagata Iutaia o le Ekalesia e tamomo’e i le taufetuliga o le avea ma soo i le mulimuli lea i faataitaiga a Iesu Keriso. Sa ia faamatala atu foi faamanuiaga o le mauaina o le aoaiga a le Alii. Sa tima’i e Paulo le Au Paia e fai le finagalo o le Atua ina ia mafai ona faaatoatoaina i latou e ala i le Togiola a Iesu Keriso.
Manatua: O le lesona 140 e maua ai se avanoa mo ni tamaiti aoga se toalua e aoao atu. Filifili mamao ni tamaiti aoga se toalua ma tuu atu ia i laua ni kopi o vaega atofaina mo le lesona 140 ina ia mafai ona la tapena ai. Uunaia i laua e suesue ma le agaga tatalo i mea o le lesona ma saili le taitaiga a le Agaga Paia i a laua tapenaga ma aoaoga.
Fautuaga mo le Aoaoina Atu
Eperu 12
Ua fautuaina e Paulo le Au Paia e tamomo’e ma le faatuatua ma le onosai i le taufetuliga o le olaga
I luga o le laupapa, tusi ai se ata tosi faigofie o se tagata tamo’e. Fai atu i le vasega e faamatala mai ni faigata e ono fetaia’i ma le tagata tamo’e a’o tamo’e o ia i se tuuga mamao. (E mafai foi ona e fesili atu pe i ai ni tamaiti aoga i le vasega na taufetuli i ni tuuga mamao, ona fai atu lea i se tamaitiiti aoga sa tamo’e, po o a ni faafitauli sa oo ia te ia i le taimi na tamo’e ai i se tuuga mamao.)
-
O le a se mea e faaosofia ai se tagata tamo’e ia faaauau pea ona tamo’e pe a fetaia’i ma le vaivai po o isi faafitauli?
-
O a ni itu e pei ai le olaga o se soo o Iesu Keriso o le onosaia o se tuuga ?
-
O a ni faafitauli tatou te ono fetaia’i i le avea ai ma soo o Iesu Keriso?
Fai atu i tamaiti aoga e mafaufau po o a ni faafitauli latou te feagai (pe sa latou feagai) i le avea ai ma ni soo o Iesu Keriso. Valaaulia tamaiti aoga e vaavaai mo ni upumoni a’o latou suesue i le Eperu 12 e mafai ona fesoasoani ia tumau ai ona latou mulimuli ia Iesu Keriso e tusa lava pe oo ina faigata.
Valaaulia se tamaitiiti aoga e faitau leotele le Eperu 12:1 . Fai atu i le vasega e mulimuli i le faitauga, ma vaavaai mo le mea na ta’u atu e Paulo i le Au Paia e tatau ona latou faia e faamanuiaina ai i le taufetuliga o le avea ma soo.
-
O le a le mea na ta’u atu e Paulo i le Au Paia e tatau ona latou faia e faamanuiaina ai i le taufetuliga o le avea ma soo.
Valaaulia se tamaitiiti aoga i luma o le vasega, ma tuu atu ia te ia se atofaafafa e fafa. Faatumu le atofaafafa i maa, ona fai atu lea i tamaiti aoga e faamatala pe o le a faapefea ona aafia se tagata tamo’e i le fafaina o se atofaafafa e tumu i maa.
-
O a ni auala e pei ai a tatou agasala o se atofaafafa e tumu i maa?
Fai atu i le tamaitiiti aoga e aveese le atofaafafa, ma toe foi i lona nofoaga.
-
O le a le uiga o le tamo’e ma le onosai i le taufetuliga o le avea ma soo?
Valaaulia se tamaitiiti aoga e faitau leotele le Eperu 12:2–4 . Fai atu i le vasega e mulimuli i le faitauga, ma vaavaai mo le mea na ta’u atu e Paulo i le Au Paia e fai, o le a fesoasoani ia i latou e faataatiaese ai a latou agasala ae onosai ma le faapalepale i teteega. Faamalamalama atu o le upu faatuiese i le fuaiupu 3 e faatatau i teteega (tagai fuaiupu 3, vaefaamatalaga a).
-
E faavae i mea na aoao atu e Paulo i le Au Paia, o le a se mea e mafai ona fesoasoani tatou te faataatiaese ai a tatou agasala ae onosai ma le faapalepale i teteega? (Atonu e faaaoga e tamaiti aoga ni upu eseese, ae ia mautinoa latou te faailoa mai se mataupu faavae e tutusa ma lenei: A’o tatou vaai atu i le faataitaiga a Iesu Keriso, e mafai ona tatou maua le malosiaga e faataatiaese ai a tatou agasala ae onosai ma le faapalepale i teteega.)
-
E tusa ai ma le fuaiupu 2, o le a le mea na fai e Iesu Keriso lea sa ta’u atu e Paulo i le Au Paia e vaavaai i ai o se faataitaiga?
Faaali atu le ata O Le Faasatauroga (Tusi Ata o le Talalelei [2009], nu. 57; tagai foi LDS.org), ma faamatala atu, sa tau atu e Paulo i le Au Paia, sa malie Iesu Keriso e tigaina i le oti i luga o le satauro ma onosaia le faalumaina e le lalolagi ona sa Ia silafia le olioli o le a Ia maua pe afai e tumau Lona faatuatua i le Tama Faalelagi.
-
O a ni auala e te manatu, e mafai ai e le vaavaai atu i le faataitaiga a Iesu Keriso ona fesoasoani ia i tatou pe a tatou feagai ma puapuaga ma faafitauli?
Fai atu i tamaiti aoga e mafaufau i o latou luitau i le taimi nei ma pe mafai faapefea e le vaavaai atu i le faataitaiga a Iesu Keriso ona fesoasoani ia i latou i na luitau.
Valaaulia se tamaitiiti aoga e faitau le saunoaga lenei a Elder Jeffrey R. Holland o le Korama a Aposetolo e Toasefululua. Fai atu i le vasega e faalogologo mo auala e mafai ai e le faataitaiga a Iesu Keriso ona fesoasoani tatou te faataatiaese ai a tatou agasala ae faaauau pea ma le onosai.
“Mo Lana Togiola ina ia le iu ma faavavau, sa tatau ona Ia silafia pe faapei le oti e le gata i le faaletino ae faapea foi i le faaleagaga, ia lagona pe faapei le aveesea o le Agaga o le Atua, ae tuua toatasi ai le tagata ma lagona matuai le fiafia, ua leai se faamoemoe.
“Ae sa onosai pea Iesu. Sa finafinau pea o Ia. O Lona agalelei sa faatagaina ai le faatuatua e manumalo e ui lava i se tulaga o le ogaoga o tiga. O le faatuatua sa Ia soifua ai, sa ta’uina atu ia te Ia e ui lava i Ona lagona, ae e le o aluese lava le agaalofa faalelagi, e faamaoni le Atua i taimi uma, ma e le solaese pe tuua i tatou e Ia” (“None Were with Him,” Ensign po o le Liahona, Me 2009, 88).
Uunai tamaiti aoga e faataatiaese se taimi o aso taitasi, atonu o se vaega o a latou suesuega o tusitusiga paia, e vaavaai atu ai i le faataitaiga a Iesu Keriso ina ia mafai ona latou maua le malosiaga e faataatiaese ai a tatou agasala ma onosai ma le faapalepale i teteega.
Ina ia saunia tamaiti aoga e faailoa mai se isi mataupu faavae na aoao mai e Paulo i le Eperu 12, valaaulia i latou e mafaufau i se taimi na faasa’oina ai i latou e se tagata. Fai atu ia i latou e faamatala mai le ala na latou tali atu ai i lena faasa’oga.
-
Aisea e mafai ona faigata ai ona talia le faasa’oga mai se tagata?
-
O a nisi o mafuaaga e te manatu, e ono saili ai tagata e faasa’o i tatou, ae maise lava pe iloa e na tagata tatou te ono le fiafia i a latou faasa’oga?
Faamalamalama atu, a’o tatou tamomo’e i le taufetuliga o le avea ma soo, e mafai ona tatou manatu e aoaiina, pe faasa’oina. Valaaulia se tamaitiiti aoga e faitau leotele le Eperu 12:6–9 . Fai atu i le vasega e mulimuli i le faitauga, ma vaavaai po o ai o le a faasa’oa i tatou ma aisea? I le anotusi lenei, o le upu tama to i fale i le fuaiupu 8 o lona uiga o i latou e fananau i ulugalii faapouliuli, o e sa le’i manatulia o ni suli faaletulafono.
-
O ai o le a faasa’oa i tatou a’o tatou tamomo’e i le taufetuliga o le avea ma soo?
-
E tusa ai ma le faamatalaga a Paulo, aisea e aoai, pe faasa’o ai i tatou e le Tama Faalelagi?
-
O a ni auala e avea ai le aoaiga a le Tama Faalelagi o se faailoaga o Lona alofa i Lana fanau?
Valaaulia tamaiti aoga e faaalu se 30 sekone e tusi ai i a latou api o le vasega po o api talaaga mo le suesueina o tusitusiga paia nisi o auala e ono faasa’o ai i tatou e le Tama Faalelagi. Fai atu i ni nai tamaiti aoga e lipoti mai i le vasega mea na latou tusia. Ia mautinoa e malamalama tamaiti aoga, e ui lava o aoaiga e tele auala e mafai ona oo mai ai, ae e le o tofotofoga po o puapuaga uma tatou te oo i ai e sau mai i le Atua.
-
I le fuaiupu 9, o le a le mea na fai mai Paulo e tatau ona tatou faia pe a faasa’o pe aoai i tatou e le Tama Faalelagi?
-
O le a le uiga o le “usiusitai i le,” po o le gauai atu, i le Tama Faalelagi? (Ia lotomaualalo, aoaogofie, ma naunau e fai ni suiga i o tatou olaga ia ogatasi ai ma Lona finagalo.)
Tusi le fuaitau le uma lenei i luga o le laupapa: Afai tatou te usitai i le aoaiga mai le Tama Faalelagi, o le a tatou …
Faamatala atu, i le fuaiupu 10, na faailoa mai ai e Paulo e faapea, atonu e i ai ni taimi e aoai ai i tatou e o tatou tama faalelalolagi i se auala e le atoatoa, ae o le aoaiga a le Tama Faalelagi e atoatoa ma ua fuafuaina e aoga mo i tatou. Valaaulia se tamaitiiti aoga e faitau leotele le Eperu 12:10–11 . Fai atu i le vasega e mulimuli i le faitauga, ma vaavaai mo le mea na aoao mai e Paulo o le a tupu pe afai tatou te usitai i le aoaiga mai le Tama Faalelagi. Faamalamalama atu o le fuaitau “tofusia …i lana amio lelei” i le fuaiupu 10 e faatatau i le avea atili faapei o le Atua.
-
E faapefea ona faamatalaina e upu a Paulo i le fuaiupu 11 le ala tatou te ono manatu muamua ai pe a aoaiina i tatou?
-
E tusa ai ma fuaiupu 10–11, o le a le mea o le a tupu pe a tatou usitai i le aoaiga mai le Tama Faalelagi? (A uma ona tali mai tamaiti aoga, faauma faapenei le faamatalaga o loo i le laupapa: Afai tatou te usitai i le aoaiga mai le Tama Faalealgi, o le a avea atili i tatou e pei o Ia ma maua le filemu lea e sau mai i le amiotonu.)
Mafaufau e faasoa atu se aafiaga o se taimi na e usitaia ai le aoaiga mai le Tama Faalelagi ma lagona ai le faamanuiaina ona o le faia o lena mea. (Ia mautinoa e aua le faasoaina atu se mea e paia pe patino tele.) Valaaulia tamaiti aoga e mafaufau loloto i se taimi na latou lagonaina ai na aoaiina i latou e le Tama Faalelagi. Fai atu ia i latou e mafaufau pe na faapefea ona latou tali atu i lena faasa’oga. Uunai tamaiti aoga e filifili nei loa e usitai i le aoaiga a le Tama Faalelagi latou te ono maua i le lumanai.
Aotele le Eperu 12:12–29 i le faamatala atu, sa uunaia e Paulo le Au Paia e faamalosi atu i isi tagata o le Ekalesia e i le faatuatuaga. Sa ia tima’ia i latou ia taofia mai le [faia] o le agasala ina ia latou le faaleaogaina faamanuiaga a le Atua e pei ona sa faia e Esau, ma e pei ona sa faia e le fanauga a Isaraelu i le Mauga o Sinai. Sa faamalamalama mai e Paulo e faapea, o le Au Paia o e tumau faamaoni ma auauna i le Atua o le a maua le mamalu e le mafaatusalia ma se nofoaga i Lona malo.
Eperu 13
Ua tuuina atu e Paulo ni fautuaga eseese i le Au Paia
Faamatala atu sa faaiuina e Paulo lana tusi i le Au Paia i Eperu i le tuuina atu ia i latou o le fautuaga e uiga i ni mataupu eseese. Vaevae tamaiti aoga i ni vaega taitoalua pe taitoatolu. Valaaulia i latou e faitau faatasi le Eperu 13:1–9, 17, ma vaavaai mo le fautuaga na tuuina atu e Paulo i le Au Paia. Faatonu tamaiti aoga e talanoa fesili nei i a latou vaega pe a uma le latou faitauga. Atonu e te manao e tusi nei fesili i luga o le laupapa.
-
O le fea o fautuaga e te manatu e sili ona manaomia i o tatou aso? Aisea?
A ua lava loa se taimi, valaaulia ni nai tamaiti aoga e lipoti mai pe na faapefea ona latou taliina ia fesili. Valaaulia tamaiti aoga e mafaufau po o le fea o vaega o le fautuaga a Paulo e mafai ona latou faaaogaina lelei i o latou lava olaga.
Aotele le Eperu 13:10–12 i le faamatala atu na aoao mai Paulo e faapea, i le taimi o le Feagaiga Tuai, o meaola sa ositaulagaina o ni taulaga mo agasala, sa susunuina i fafo o le tolauapiga a Isaraelu. O le ala lava lea e tasi, sa ositaulagaina ai Iesu Keriso i fafo o le aai o Ierusalema. Faamalamalama atu, ina ua faamaeaina e Iesu Keriso le Togiola, sa le toe manaomia loa ni taulaga e faia i meaola (tagai 3 Nifae 9:18–20).
Valaaulia se tamaitiiti aoga e faitau leotele le Eperu 13:13–16 . Fai atu i le vasega e mulimuli i le faitauga, ma vaavaai po o a taulaga na fai mai Paulo e tatau ona faia e le Au Paia ae le o meaola. Mafaufau e valaaulia tamaiti aoga e faailoga mea ua latou maua.
-
O a taulaga na fai mai Paulo e tatau ona tatou faia?
-
Aisea e te manatu o le a fiafia ai le Atua i na taulaga?
Aotele le Eperu 13:17–25 i le faamatala atu, sa fautuaina e Paulo le Au Paia e usitai i o latou taitai faaleagaga ma tatalo mo i latou. Sa tatalo Paulo ina ia tuu atu e le Atua i le Au Paia mea uma e alagatatau mo i latou e faataunuu ai Lona finagalo.
Atonu e te manao e faaiu i le molimau atu i upumoni na faailoa mai e tamaiti aoga i le Eperu 12–13.
Mau Tauloto—Eperu 12:9
Fesoasoani i tamaiti aoga e tauloto le Eperu 12:9 i le valaaulia o i latou e tusi le mataitusi muamua o upu taitasi o le fuaiupu i luga o se fasipepa. Toe faamanatu faafia le mau ma au tamaiti aoga seia oo ina mafai ona latou taulotoa le fuaiupu e faaaoga ai le mataitusi muamua o upu taitasi.
-
O le a le aoaoga faavae e mafai ona tatou aoao mai i lenei fuaiupu e uiga i la tatou sootaga ma lo tatou Tama Faalelagi? (E tatau ona faailoa mai e tamaiti aoga le aoaoga faavae lenei: O le Tama Faalelagi o le tama o o tatou agaga.)
-
Aisea e taua ai le talitonu o i tatou o fanau a le Atua?
Molimau atu o i tatou o fanau moni a le Atua.
Tala ma Faamatalaga o Talaaga
Eperu 12:6–11. O le aoaiga a le Alii
Na faamalamalama mai e Elder D. Todd Christofferson o le Korama a Aposetolo e Toasefululua le mea lenei e uiga i le aoaiga a le Alii:
“E taua tele aoa’iga pe afai o le a tatou suia o tatou olaga ‘i se tagata atoatoa, [o lona uiga], e oo atu i le fuataga o le tulaga o le atoatoa o Keriso’ (Efeso 4:13). Na talanoa Paulo e uiga i le faasa’oga faalelagi po o le aoa’iina, ‘Aua o le ua alofagia e le Alii, ua aoai atu o ia ia te ia’ (Eperu 12:6). E ui lava e masani ona faigata ona onosaia, ae o le mea moni e tatau ona tatou olioli ua manatu mai le Atua ia i tatou lea ua aoga ai le taimi ma faafitauli e faasa’o ai” (“Ou te Aoai Atu ma Sasa ia i Latou Uma Ou te Alofa I Ai,” Ensign po o le Liahona, Me 2011, 97–98).
Eperu 12:9. “O Le Tama o o tatou agaga”
Na aoao mai Peresitene Boyd K. Packer o le Korama a Aposetolo e Toasefululua, o le agaga o tagata taitoatasi o se atalii/afafine o le Tama Faalelagi:
“O oe o se atalii/afafine o le Atua. O Ia o le Tama o lou agaga. I le faaleagaga, ua e fanau mai i se [tupuaga] tautupu, o le tama a le Tupu o le Lagi. Tuu lena upumoni i lou mafaufau ma taofi mau i ai. E tusa lava po o le a le tele o tupulaga i lou tupuaga i le olaga nei, e tusa lava po o le a le atunuu po o le nuu ua fai ai oe ma sui, o le faasologa o le gafa o lou agaga e mafai ona tusia i luga o se laina e tasi. O oe o se atalii/afafine o le Atua!” (“To Young Women and Men,” Ensign, Me 1989, 54).
Na faamamafa mai e Elder Dallin H. Oaks o le Korama a Aposetolo e Toasefululua, le taua o le malamalama o i tatou o fanau a le Atua:
“Mafaufau i le mamana o le manatu o loo aoaoina i la tatou pese peleina, ‘O au se Atalii o Le Atua’ (Viiga, 1985, nu. 184). … O le tali lea i se fesili tele o le olaga, ‘O ai au?’ O au o se atalii o le Atua e i ai se faasologa o le gafa [o lou] agaga i ni matua faalelagi. O lena tulaga faamatua ua faailoa mai ai o tatou agavaa e faavavau. O lena manatu mamana o se faatosinaga malosi lea e puipuia ai i tatou mai le faalotovaivaia. E mafai ona faamalosia ai i tatou taitoatasi e faia filifiliga amiotonu ma sailia mea sili o loo i totonu ia i tatou. Ia tuu i le mafaufau o se tagata talavou le manatu mamana e faapea, o ia o se atalii po o se afafine o le Atua, ma ua e tuuina atu le faaaloalo i le tagata lava ia ma le mafuaaga e galue faasaga ai i faafitauli o le olaga” (“Powerful Ideas,” Ensign, Nov. 1995, 25).
Eperu 12:23. “Ekalesia o le ulumatua”
“O le aoaoga a Paulo e faapea, o le Au Paia faaolaina e auai i le ‘ekalesia o le ulumatua’ (Eperu 12:23) ua na o le pau lea o le vaega o le tusi paia o loo i ai lenei fuaitau. I faaaliga i aso e gata ai, na iloa ai e le Perofeta o Iosefa Samita o le Ekalesia a le Ulumatua e faatatau i le Ekalesia faalelagi a Keriso, lea e i ai le Au Paia faamaoni, ma faaeaina i le malo selesitila (tagai MF&F 76:54; 88:4–5). ‘O Iesu o le ulumatua o fanau agaga a lo tatou Tama Faalelagi, o le Toatasi na Fanaua e le Tama i la le tino, ma o le na muamua tulai mai i le oti i le toetutu (Kolo. 1:13–18). O le Au Paia o e faamaoni e avea i latou ma tagata o le Ekalesia a le Ulumatua i le faavavau (MF&F 93:21–22)’ (Taiala i Tusitusiga Paia, “Ulumatua,” scriptures.lds.org)” (New Testament Student Manual [Church Educational System manual, 2014], 489). O nei Au Paia o “suli faatasi ma Keriso” (Roma 8:17) ma faapea ona mautofi ai i “mea uma ua i ai i [le] Tamā” (MF&F 84:38).