Lesona 53: Luka 15

Lesona 53

Luka 15

Folasaga

Na faitio le au Faresaio ma le au tusiupu e uiga i le mafuta o le Faaola ma telona ma e agasala. Sa tali atu le Faaola e ala i le tuuina atu o faataoto i le mamoe na se, o le tupe na leiloa, ma le atalii faamaumau oa.

Fautuaga mo le Aoaoina Atu

Luka 15:1–10

Ua tuu atu e Iesu ia faataoto i le mamoe na se ma le tupe na leiloa

Amata le vasega i le fesili atu i le vasega pe na i ai se taimi na leiloa ai se mea sa taua ia i latou.

O le a se mea na e naunau e fai ina ia maua ai? Aisea?
O le a sou manatu o le a le uiga i se tagata o le “leiloa” faaleagaga? (Fesoasoani ia malamalama le vasega e mafai ona faatatau lenei mea ia i latou o e e lei mauaina le talalelei toefuataiina a Iesu Keriso pe le o ola foi i le taimi nei e tusa ma aoaoga o le talalelei.)

Valaaulia le vasega e mafaufau i se tasi latou te iloa atonu o leiloa faaleagaga. Fai iai e mafaufau pe o a o latou lagona i lea tagata.

Faamatala o le Luka 15o loo i ai ia aoaoga a le Faaola e uiga ia i latou ua leiloloa faaleagaga. Valaaulia le vasega e vaavaai mo upumoni Luka 15

Fai i se tamaitiiti aoga e faitau leotele le Luka 15:1–2. Valaaulia le vasega e mulimuli ai, ma vaavaai po o ai na faalatalata atu ia Iesu ma pe o a mea na faitio ai le au Faresaio ma le au tusiupu.

O ai na faalatalata atu i le Faaola? Aisea na faitio ai le au Faresaio ma le au tusiupu?
O le a le mea na alia’i mai i lenei faitioga a le au Faresaio ma le au tusiupu?

Faamatala na tali atu le Faaola i le tuuina atu o faataoto e tolu: o le tasi i le mamoe na se, o le isi o se tupe na leiloa, ma le isi o se atalii na leiloa. O nei faataoto na avatu ina ia maua ai e le tagata agasala le faamoemoe faapea foi ona tausalaina ai le pepelo ma le faafia amiotonu o le au tusiupu ma le au Faresaio. Fautuaina le vasega e gauai atu i le mafuaaga na avea ai le leiloa ma le faapefea ona maua ma autu o faataoto taitasi.

Kopi le siata lea i luga o le laupapa pe tuu atu i le vasega o se tufaaga. Fai paga le vasega, ona tofi lea o se tagata se tasi e suesue le Luka 15:3–7 ae suesue e le isi le Luka 15:8–10. Valaaulia le vasega e faitau a latou faataoto na tofi atu i ai, ma vaavaai mo tali i fesili o i le koluma tauagavale. (O le a talanoaina le faataoto lona tolu i se taimi mulimuli ole lesona.)

Faataoto i le Mamoe na Se, Tupe, ma le Atalii

Tusi lesona a le Faiaoga Seminare o le Feagaiga Fou

	Luka 15:3–7 (tagai foi fuaiupu 4, vaefaamatalaga a pe afai o maua i le lomiga o tusi paia)	Luka 15:8–10	Luka 15:11–32
O le a le mea na leiloa?
Aisea na leiloa ai?
Na faapefea ona maua?
O a upu po o fasifuaitau o loo faamatala ai le tali atu ina ua maua?

A uma ua lava se taimi, fai i le vasega e faamatala a latou faataoto na tofi atu iai ma lipoti mai a latou tali i fesili i le siata i a latou paga. A uma ia tagata o vaega taitasi, valaaulia ni nai tagata e o mai i le laupapa e faatumu le siata i a latou tali pe (afai e te lei tusia le siata i le laupapa) e faasoa mai i le vasega a latou tali.

O le a le eseesega o le ala na leiloa ai le mamoe ma le tupe? (Na se le mamoe e le ona o sona lava sasi, a ole tupe na leiloa ona o le faatamala o lona pule [tagai David O. McKay, i le Conference Report, Apr. 1945, 120, 121–22].)
E tusa ai ma lefuaiupu 7 ma le 10, o a mea e faatusa i ai le tupe ma le mamoe ua maua? (E faatusa i se tagata agasala ua salamo ma ua toe foi atu i le Atua.)
O le a lo tatou tiutetauave mo i latou o e ua leiloloa, e le afaina pe na faapefea ona leiloloa?

Tusi le faamatalaga le uma lenei i luga o le laupapa: A tatou fesoasoani i isi ia lagonaina se manao ia salamo …

E fua i tali a i latou o e na mauaina le mea na leiloa, e faapefea ona e faamaeaina le faamatalaga o i luga o le laupapa? (E tatau i le vasega ona faailoa mai se mataupu faavae e pei o lenei: A tatou fesoasoani i isi ia lagonaina se manao e salamo, tatou te lagonaina le olioli ma e fiafia le lagi. Faauma le mataupu faavae o lo o i luga o le laupapa. Atonu e te manao e valaaulia tamaiti e tusi lenei upumoni ia latou tusitusiga paia i autafa o le Luka 15:1–10.)
Na faapefea ona e fesoasoani po o se tasi e te iloa ona fesoasoani i se tagata sa leiloa faaleagaga ia lagonaina se manao e faalatalata atu i le Tama Faalelagi? O le a se taimi na fesoasoani atu ai se tasi ia te oe? (Faamanatu atu i tagata o le vasega e le tatau ona latou faasoa mai ni aafiaga e patino lava ma e le faalauaiteleina.)

Luka 15:11–32

Ua tuu atu e Iesu le faataoto i le atalii faamaumau oa

Valaaulia le vasega e mafaufau i le tulaga lenei: Ua faia e se tamaitai talavou ni agasala matuia ma ua le toe tatalo ma ua le toe sau i le lotu. Ua ia lagonaina se manao e toe amata ona tatalo ma ola i tulaga faatonuina a le Alii, ae ua popole o ia o le a le toe manao o Ia e toe sau.

Fai i le vasega e toe mafaufau pe latou te iloa se tasi atonu o pei o le tagata o i lea tulaga. Faamatala o le faataoto lona tolu i le Luka 15o le tala i se atalii faamaumau oa (o lona uiga e faatamala ma soonafai), o lona uso matua, ma lo la tama. Valaaulia le vasega e vaavaai mo upumoni a o latou suesueina lenei faataoto ia e mafai ona fesoasoani i le tagata atonu o lagonaina ua leiloa ma ua leai se faamoemoe.

Fuafua e vaevae le vasega i ni vaega e taitoatolu. Tuu atu i paga taitasi se kopi o le tufaaga lea. Valaaulia i latou e faitau leotele le Luka 15:11–32 ia latou vaega. Tofi se tagata se toatasi e mafaufau i le faataoto mai le vaaiga a le atalii faamaumau oa, o le tagata lona lua e mafaufau i ai mai le vaaiga a le tama, ma le tagata lona tolu e mafaufau i ai mai le vaaiga a le uso matua.

A uma ona faitau e tagata, ona fai lea i ai e talanoaina ia fesili o i le tufaagai a latou vaega.

O Le Faataoto i le Atalii Faamaumau Oa

Tusi lesona a le Faiaoga Seminare o le Feagaiga Fou

O Le Atalii Faamaumau Oa

O le a se mea na fesoasoani ia te oe e te toe atamai ai, pe iloa ai le tulaga leaga sa e iai?
O le a se mea na e faamoemoe mai lou tama ina ua e toe foi i le fale?
Mata o a ni ou lagona ma ni ou mafaufauga ina ua fai e lou tama le mea sa ia faia?

O Le Tama

Mata o a ni ou lagona ma mafaufauga ina ua alu lou atalii laitiiti?
Aisea e te faafeiloaia ai lou atalii faamaumau oa e pei ona e faia?
Ina ua le fiafia lou atalii matua i le ala na e faia ai lona uso laitiiti, na faapefea ona e fesoasoani ia malamalama o ia i mea na e faia?

O Le Uso Matua Atu

Mata o a ni ou lagona ma mafaufauga a o alu lou uso?
Aisea na faigata ai ona e fiafia i le toe foi mai o lou uso?
O a ni faamanuiaga ua e maua ona o lou faamaoni i lou tama?

Fesili i le vasega pe faapefea ona faatumu le koluma lona tolu (Luka 15:11–32) o le siata o i le laupapa pe o le tufaaga muamua. Tusi tali a le vasega i le laupapa, pe valaaulia tagata e tusi a latou tali i luga o tufaaga.

Aisea na leiloa ai le atalii faamaumau oa? (I se faatusatusaga i le mamoe ma le tupe, na leiloa le atalii faamaumau oa ona o lona lava fouvale.)
I le malamalama ai o le tama i lenei faataoto e faatusa i le Tama Faalelagi, o le a se mea e mafai ona tatou aoao mai e uiga i le ala e tali mai ai le Tama Faalelagi ia i latou o e toe foi atu ia te ia e ala i le salamo? (E tatau i le vasega ona faailoa mai se mataupu faavae e pei o lea: Afai tatou te toe foi atu i le Tama Faalelagi e ala i le salamo ma le sailia o Lana faamagaloga, o le a fiafia o Ia ma toe talia i tatou i aao mafola. Tusi lenei mataupu faavae i le laupapa.)
E mafai faapefea ona fesoasoani lenei mataupu faavae ia i latou e manatu ua leiloloa faaleagaga?

Valaaulia se tamaitiiti aoga e faitau leotele le saunoaga lenei a Elder Jeffrey R. Holland o le Korama a Aposetolo e Toasefululua:

“O foliga lelei ma le naunautai ma le faamaoni o le tama o lenei tamaitiiti na tamoe mai e faafetaiai ia te ia ma sogi atu ia te ia o se tasi lea o vaaiga faamomoiloto i totonu o tusitusiga paia uma. O loo faamatala mai ai faapea o fanau uma lava a le Atua, pe amio faaletatau pe leai, le matuai pulunaunau o le Atua ina ia tatou toe foi atu i le puipuiga a Ona aao” ( “Le Isi Atalii Faamaimau Oa,” Ensign, Me 2002, 62).

Faamanatu i le vasega le uso matua i le faataoto.

Aisea e te manatu ai na ita le uso matua?

Valaaulia se tagata e faitau leotele le saunoaga lea a Elder Holland, ma fai i le vasega e faalogologo mo se malamalamaaga pe aisea na ita ai le uso matua:

“O lenei atalii e le o ita tele o ia ona ua foi mai le isi a ua ita ona o loo fiafia i ai ona matua. O le lagonaina o le le talisapaiaina ma atonu faapea ma sina inoino, o lenei atalii usiusitai—ma e faapitoa lava lona usiusitai—ua galo mo sina taimi aua e lei oo lava o ia i se tulaga o le taugaeleelea po o le faanoanoa, o le fefe po o le inoino ia te ia lava. Ua galo ia te ia mo sina taimi o tamai povi uma lava o loo i ai i le faatoaga o ana ia faapea ma ofu talaloa uma o loo teuina i le fale ma mama uma o i le pusatoso. Ua galo ia te ia mo sina taimi o le faamaoni o le a tauia pea. …

“… E lei oo ia te ia le alofa ma le alofa mutimutivale, o le lautele o le alofa moni o se vaaiga mamao, e iloa ai o lenei toe foi mai e le o se faasagatau mai. O lona lava uso. …

“E mautinoa lava o lenei uso laitiiti sa avea ma se pagota—o se pagota o le agasala, faavalevalea ma se saipuaa. Ae o le uso matua o loo ola foi i se tulaga saisaitia. E le’i mafaia e ia ona tatalaina o ia mai manatu o loo saisaitia ai o ia. Sa matuai lofituina o ia i le loto leaga” O Le Isi Atalii Faamaumau Oa,“ 63).

E tusa ai ma le saunoaga a Elder Holland, aisea na ita ai le uso matua?
Aisea e tatau ai ona tatou manatua pe a tatou vaai atu ua alofa mutimutivale le Atua ma faamanuia i latou o e ua salamo ma toe foi atu ia te ia?
O le a se mataupu faavae e mafai ona tatou aoao mai lenei faataoto e uiga i le avea atili e faapei o lo tatou Tama i le Lagi? (E tatau i tagata ona faailoa mai se mataupu faavae e pei o lea: E mafai ona tatou avea e faapei o lo tatou Tama i le Lagi i le tali atu ma le agaalofa ma le olioli pe a salamo isi.

Toe iloilo ia mataupu faavae na aoao e le vasega mai faataoto i le Luka 15. Fai i le vasega e faamatala mai pe mafai faapefea ona latou faaaogaina nei mataupu faavae e tali atu ai i le au Faresaio ma le au tusiupu sa faitio ina ua aai faatasi Iesu ma e agasala.

Faamanatu i le vasega le tagata na latou mafaufau i ai i le amataga o le vasega o e atonu ua leiloloa faaleagaga. Fautuaina i latou e mafaufau ma le agaga tatalo pe mafai faapefea ona latou fesoasoani i lena tagata ia salamo ma faalatalata atili atu i le Tama Faalelagi. Valaaulia tagata o le vasega e tusi tali i fesili nei i a latou api o le vasega po o api talaaga mo le suesueina o tusitusiga paia.

O le a se ala se tasi o le a e faaaogaina ai mea sa e aoaoina i le aso?

Tala ma Faamatalaga o Talaaga

Luka 15. “O Faataoto i e ua Leiloloa”

O faataoto o loo tusia i le Luka 15 o ni lu’i a le Faaola i le au Faresaio ma le au tusiupu ina ua latou tausalaina o Ia i le aai ma feinu faatasi ma e agasala. I le vaaia i lenei matalalaga, o nei faataoto o loo i ai e le gata i upu o le faamoemoe mo le tagata agasala ua salamo ae o se aoaiga malosi foi mai le faafia-amiotonu. E mafai ona vaaia lea aoaiga i le fetalaiga a le Faaola faapea e sili atu le olioli i le lagi i se tagata agasala e toatasi e salamo nai lo le 99 o tagata amiotonu e le manaomia ona salamo. O le ta’ua ai e le Faaola o “tagata amiotonu, e le tusa ai le salamo” Luka 15:7 e le o faapea mai ai e le manaomia e le au Faresaio ma le au tusiupu ona salamo. Ae, o se faatusa talafeauga lelei o le manatu faualuga faapito o le au Faresaio ma le au tusiupu ma lo latou le faailoaina o lo latou lava manaomia ona salamo. O le isi tausalaga o ia ituaiga o uiga e ono vaaia i faatinoga a le uso matua i le faataoto i le atalii faamaumauoa. E faapei o Faresaio ma tusiupu sa faitio ina ua talia e Iesu tagata agasala, na tali atu le uso matua i le faataoto ma le faalii faafia-amiotonu nai lo le agaalofa ina ua toe faafeiloai fiafia e lona tama le uso le faautauta.

Luka 15:1–32. O le mamoe, o le tupe, ma le atalii faamaimau oa na eseese auala na leiloloa ai.

Na saunoa Peresitene Tavita O. MaKei i mafuaaga na leiloloa ai nisi:

“Ou te fia ta’ua ia tulaga na saofaga i ’le mamoe, o le tupe, ma le atalii faamaumau oa] na leiloloa. …

“Ou te fesili atu ia te outou i le po nei, na faapefea ona leiloa le mamoe? Sa le’i fouvale o ia. Afai tou te mulimuli i le faatusatusaga, sa saili atu le tamai mamoe mo le mea e ola ai i se tulaga e talafeagai lelei, ae a le o le faavalevalea, atonu o le lei mafaufauina, na mulimuli atu ai i le faatosinaga a le laufanua, o le faamoemoe mo le vao e sili atu seia oo ina alu ese atu ai mai le lafu ma leiloa ai.

“O lea tatou te maua i latou i le Ekalesia, o alii talavou ma tamaitai talavou, o e feofeoai ese atu mai le lafu i ni ala e lelei atoatoa. Latou te saili manuia, manuia i pisinisi, manuia i a latou galuega, ma e le pine ae le toe fiafia i le Lotu ma iu ai lava ina momotu ese mai le lafu; ua latou le iloa le ala le mea tonu e igoa o le manuia, atonu pe o le faavalevalea, atonu e lei mafaufauina, i nisi taimi, atonu e faia ma le naunautai. Ua faatauasoina i le mea e maua ai le manuia moni. …

“I [le tulaga o le tupe na leiloa] o le mea na leiloa e le o sona lava faatamala. O le na tuu i ai lena tupe, e ala i le faatamala po o le faatalale, na le iloa ai le mea na tuu ai pe na pau ai. E i ai le eseesega, ma o le tasi vaetolu lenei, lea ou te manatu e faatatau ia i tatou i le po nei. O lo tatou tiutetauave e le ona o tupe, ae o agaga o fanau, talavou, ma le au matutua. O o tatou tiutetauave na. O nisi o i latou atonu o feofeoai i le po nei ona o le faatalale o faiaoga o le uarota. …

“[E tusa ai ma le atalii faamaumau oa:] O se tulaga lea o le faaiuga tamau, o se filifiliga, o se filifiliga toto’a. O i, i se isi itu, o le fouvale i le pule. O le a le mea sa ia faia? Sa ia faaaluina ana mea i se olaga soona fai, sa ia faamaimauina lana vaega i fafine talitane. O le ala lena ua leiloloa ai.

“O talavou o e amata ona aga atu e faamalie o latou manaoga ma tuinanauga ua i ai i le ala e agai atu i lalo i le liliuese e pei ona moni o le oso ae o le la i sasae. Ou te le o faapito na o le autalavou; soo se alii po o se tamaitai ua amata agai atu i lena ala o le soona fai, o le ola taataanoa o le a faaesea ia lava mai le lafu ma le le mavaoia e faapei ona mulimuli mai le pogisa i le ao” (i le Conference Report, Apr. 1945, 120, 121–22, 123).

Luka 15:1–32. O faataoto i le mamoe na se, o le tupe na leiloa, ma le atalii faamaimau oa

Na tusia e Elder James E. Talmage o le Korama a Aposetolo e Toasefululua e faapea:

“O faataoto e tolu … e tasi i le faaalia mai o le olioli tele i le lagi i le toe maua mai o se agaga na faitaulia faatasi ma e ua leiloloa, pe o lena agaga e sili ona faatusa i se mamoe na mamao le mea na taataa ai, o se tupe sa pau ona o le faatamala o le ona ia, po o se atalii sa motusia ma le toto’a o ia lava mai le aiga ma le lagi. E leai se tauamiotonuina mo le faaiuga faapea e tatau ona tuu atu i se tagata agasala ua salamo se faamuamua nai lo se tagata amiotonu na teena e fai le agasala. … E ui ina tiga e pei o le agasala, ae e taua le tagata agasala i fofoga o le Tama, ona o le tulaga e mafai ai ona salamo ma toe foi atu i le amiotonu. O le leiloa o se agaga e moni lava ma o se leiloa tele i le Atua. O lea e tiga ma faanoanoa o Ia, aua o lona finagalo ia le fano se agaga e toatasi” (Jesus the Christ, 3rd ed. [1916], 461).

Luka 15:3–7. O le mamoe na se

“Na saunoa le Perofeta o Iosefa Samita (1805–44) o se tasi faaliliuga o le faataoto o le ’o mamoe e selau e faatusa i le selau Satukaio ma Faresaio’ ma talu ai latou te lei taliaina ma mulimuli i aoaoga a le Faaola, o lea o le a alu atu ai o Ia i fafo atu o le lafumamoe e saili mo ’ni nai tagata, po o se telona mativa e toatasi, lea e inosia e le au Faresaio ma le au Satukaio.’ Ina ua Ia maua le ’mamoe na leiloa’ o le a salamo ma talia o Ia, o le a latou maua le ’olioli i le lagi’ (i le History of the Church, 5:262). Ua fesoasoani lenei faaliliuga tatou te malamalama ai o upu a le Faaola o se aoaiga e fesoasoani ai i le au Faresaio ma le au tusiupu ia iloa latou te manaomia ona salamo’ (MF&F 133:16; tagai foi Roma 3:23; 1 Ioane 1:8; MF&F 18:9, 42)” (Tusi lesona a le Tagata Aoga o le Feagaiga Fou [Church Educational System manual, 2014], 168–69).

Luka 15:11–32 O atalii faamaumau oa”

E faasino i le faataoto i le atalii faamaumau oa, sa uunaia ai e Peresitene Gordon B. Hinckley:

“Ou te tatalo atu ia te outou ia faitau lena tala. E tatau i matua uma ona faitau ma saga faitau i ai. E lava lona tele e siosiomia ai aiga uma, ma e lava lona tele nai lo lea e siosiomia ai tagata uma, aua pe le o i tatou uma ea o ni atalii ma ni afafine faamaumau oa o e e manaomia ona salamo ma aai ma feinu i le alofa mutimutivale faamagalo o lo tatou Tama Faalelagi ona mulimuli lea i Lana faataitaiga?” (“A o outou e tatau ona faamagalo atu i tagata uma,” Ensign, Nov. 1991, 5).

Na saunoa foi Peresitene Hinckley:

“O loo i ai nisi o o tatou lava tagata … o tagi mai i le tiga ma le mafatia ma le faanoanoa i le nofotoatasi ma le fefe. O la tatou galuega o se tiute maoae ma paia, o le aapa atu lea ma fesoasoani ia i latou, e siitia i latou, e fafaga i latou pe afai o fia aai, e tausia o latou agaga pe afai o galala mo le upumoni ma le amiotonu. …

“… O loo i ai i latou sa mafanafana ile faatuatua, ae ua maalilili nei lo latou faatuatua. O le toatele o i latou ua mananao e toe foi mai, ae ua le iloa pe faapefea ona fai. Ua latou manaomia ni lima faauo e aapa atu ia i latou. O se taumafaiga itiiti lava, e mafai ai ona toe taumamafa i le laoai a le Alii.

“Ou uso ma tuafafine e, ou te faamoemoe lava, ou te tatalo foi, o i tatou taitoatasi … o le a faia se faaiuga e saili i latou o loo manaomia le fesoasoani, o e o i ai i tulaga atuatuvale ma faigata, ma siitia i latou i le agaga alofa i totonu o le li’o o le Ekalesia, lea o le a faafiafiaina ai i latou e lima malolosi ma loto e alolofa, faamafanafanaina ai, lagolagoina ai, ma tuu atu ai i latou i le ala o le fiafia ma ni olaga faamanuiaina” (“Aapa Atu ma se Lima Laveai,” Ensign, Nov. 1996, 86).