Sa uunaia e Iakopo le Au Paia e aapa atu i e puapuagatia ma aoao mai, o soo moni o Iesu Keriso e le tatau ona faasili i e mauoa nai lo e matitiva. Na aoao mai foi Iakopo e uiga i le sootaga i le va o le faatuatua ma galuega.
Ua aoao e Iakopo soo o Keriso e aua ne’i faaali atu le faailoga tagata i e mauoa
Ia filifili soo se tamaitiiti aoga, ma tuu atu ia te ia se mea itiiti ia fiafia ai. Tau atu i le vasega sa e tuuina atu i lenei tamaitiiti aoga se mea itiiti ia fiafia ai ona o se mafuaaga sa e filifilia e oe lava ia (mo se faataitaiga, ona sa ofuina e lena tamaitiiti aoga le lanu e sili ona e fiafia i ai, pe ona sa ia aumaia se meafaitino faapitoa i le vasega).
O a ni lagona o outou uma ona o le auala na ou faia ai lenei tamaitiiti aoga?
Aisea e faaali ai e tagata i nisi o taimi le faailoga tagata?
Fai atu i tamaiti aoga e mafaufau i nisi o taimi na latou vaai ai o sili atu le faiga o se isi tagata nai lo isi, ma ia mafaufau pe faapei ni o latou lagona sa i ai.
Valaaulia se tamaitiiti aoga e faitau leotele le Iakopo 2:1–4. Fai atu i le tamaitiiti aoga lenei e faitau foi ma le vaefaamatalaga a i le Iakopo 2:1, lea o loo aofia ai se isi faaliliuga mai le faaEleni faapea foi ma Faaliliuga a Iosefa Samita o le Iakopo 2:1. Fai atu i le vasega e mulimuli i le faitauga, ma vaavaai po o le a le mea na lapataiina ai e Iakopo le Au Paia.
O le a le mea na lapataia ai e Iakopo le Au Paia?
Faailoa atu o le “faailoga tagata” (Faaliliuga a Iosefa Samita, Iakopo 2:1) o lona uiga o le faaalia o le faaituau mo se tagata e toatasi po o se vaega o tagata, ae leaga ona fai isi ona o o latou tulaga po o uiga.
O le a le faataitaiga o le faaituau na faasoa mai e Iakopo?
O a ni faataitaiga i o tatou aso o tagata e faaali atu le faaituau i nisi o tagata ae leaga ona fai isi ona o o latou tulaga po o uiga?
Aotele le Iakopo 2:5–7 i le faamatala atu, sa faaauau ona aoai e Iakopo le Au Paia o e na faaali atu le faaituau i e mauoa. Sa ia aoaoina i latou e faapea, na filifilia e le Atua e e matitiva ina ia mauoa i le faatuatua ma ni suli i Lona malo. Sa faamanatu foi e Iakopo i le Au Paia e faapea, o e mauoa sa faasaua ia i latou ma upuleaga e faasaga i le Alii.
Valaaulia tamaiti aoga e faitau filemu le Iakopo 2:8 , ma vaavaai mo le mea na faamanatu atu e Iakopo i le Au Paia e fai o le a fesoasoani ia i latou e aveese ai le faaituau.
O le a le mea na faamanatu atu e Iakopo i le Au Paia e fai?
Aisea e te manatu na ta’ua ai lenei poloaiga o “le tulafono silisili”? (Iakopo 2:8).
O le a se mataupu faavae e mafai ona tatou aoao mai i nei fuaiupu e uiga i le ala e fai ai tagata e soo faamaoni o Iesu Keriso? (E ono faaaoga e tamaiti aoga ni upu eseese ae e tatau ona faailoa mai se mataupu faavae e tutusa ma lenei: O soo faamaoni o Iesu Keriso e alolofa i tagata uma e tusa lava po o a o latou tulaga. Tusi lenei mataupu faavae i le laupapa.)
I le taimi o Lana auaunaga i le lalolagi, sa faapefea ona avea le Faaola ma se faataitaiga o le alofa i isi e tusa lava po o a o latou tulaga?
Fai atu i tamaiti e mafaufau i se tasi o loo taumafai e alofa i tagata uma. Valaaulia ni nai tamaiti aoga e faasoa mai i le vasega po o ai ua latou mafaufau i ai ma pe aisea.
Fai atu i tamaiti aoga e mafaufau pe o faapefea ona latou faia isi tagata? Uunaia i latou e vaavaai mo ni avanoa e mulimuli ai i le faataitaiga a le Faaola o le alofa atu i isi.
Valaaulia tamaiti aoga e vaai faalemafaufau e faapea, i le uma ai ona faalogo i le aoaoga a Iakopo e uiga i le alofa atu i tagata uma, ona latou faalogo atu lea o fai mai se tasi e le o se mea leaga pe a tatou faaalia le faaituau i nisi o tagata ae le lelei ona fai isi. Ua fai mai foi lenei tagata e i ai isi mea e sili atu le leaga e mafai ona tatou faia.
O a ni faafitauli e mafai ona oo mai i le i ai o lenei ituaiga manatu?
Valaaulia se tamaitiiti aoga e faitau leotele le Iakopo 2:9–10. Fai atu i le vasega e mulimuli i le faitauga, ma vaavaai pe aisea ua o se mea matuia ai le le alofa i tagata uma e tusa lava po o a o latou tulaga.
Aisea ua o se mea matuia ai le le alofa i tagata uma e tusa lava po o a o latou tulaga?
O le a le upumoni e mafai ona tatou aoao mai aoaoga a Iakopo i nei fuaiupu? (E ono faaaoga e tamaiti aoga ni upu e ese mai, ae ia mautinoa latou te faailoa mai se upumoni e tutusa ma lenei: E tusa lava pe tasi se agasala tatou te solia, ua tatou nofosala i luma o le Atua.)
E tusa ai ma le Iakopo 2:10, o le a le taunuuga e faavavau o le solia o se tulafono e tusa lava pe tasi a le Atua? (E avea i tatou e pei ua tatou “nofosala i mea uma” ona ua tatou le mama ma faapea ona le mafai ai ona nonofo faatasi ma le Atua [tagai foi 1 Nifae 10:21].)
Aisea e mafai ai lava ona tatou maua le faamoemoe, e ui o le le usiusitai i le Atua tatou te le mama ai e nonofo faatasi ma le Atua?
Valaaulia se tamaitiiti aoga e faitau leotele le saunoaga lenei a Peresitene Dieter F. Uchtdorf o le Au Peresitene Sili:
Ata
Peresitene Dieter F. Uchtdorf
“ E le leiloloa mea uma.
“O le alofa tunoa o le Atua o lo tatou faamoemoe sili ma le faavavau lea.
“E ala i le taulaga a Iesu Keriso, le fuafuaga o le alofa mutimutivale ua faamalieina ai manaoga o le faamasinotonu [tagai Alema 42:15] ‘ma [aumai] ai ala i tagata e mafai ai ona latou maua o le faatuatua e salamo ai’ [Alema 34:15].
“E ui e ‘ulaula a tatou agasala, ae mafai ona sinasina e pei o le kiona [tagai Isaia 1:18]. Ona ‘na foaifuaina e [lo tatou Faaola pele] Ia e fai ma togiola mo tagata uma,’ [1 Timoteo 2:6] o lea ua saunia ai mo i tatou se faitotoa e ulu atu ai i Lona malo e faavavau [tagai 2 Peteru 1:11]” (“O Le Meaalofa o le Alofatunoa,” Ensign po o le Liahona, Me 2015, 108).
O le a se mea e tatau ona tatou faia ia agavaa ai e ulu atu i le malo o le Atua e ala i le Togiola a Iesu Keriso?
E ono mafai faapefea ona fesoasoani le mataupu faavae sa tatou faailoa mai i le fuaiupu 10 ia tatou talisapaia atili atoatoa ai le Togiola a Iesu Keriso?
Aotele le Iakopo 2:11–13 i le faamatala atu, sa tuuina mai e Iakopo se faataitaiga o le mataupu faavae o loo aoaoina i le fuaiupu 10. Ona ia uunaia lea o tagata talitonu, ia fai isi ma le alofa, aua o i latou o e faia isi e aunoa ma le alofa o le a faamasinoina e aunoa ma se alofa.
Ua aoao mai Iakopo e uiga i matafaioi o le faatuatua ma galuega i lo tatou faaolataga
Valaaulia tamaiti aoga e mafaufau faapea, ua iloa e se alii talavou ua agasala o ia. E talitonu o ia i le Togiola a Iesu Keriso ma le mafai e le Faaola ona laveai o ia. Fai mai o ia, na pau lava le mea e tatau ona ia faia, o le talitonu ma o le a faamagalo o ia e le Alii, e aunoa ma se isi lava mea na te faia.
Fai atu i tamaiti aoga e mafaufau, pe lava le na’o le talitonuga o lenei alii talavou e faamagalo ai ana agasala.
Valaaulia se tamaitiiti aoga e faitau leotele le Iakopo 2:14. Fai atu i le vasega ia mulimuli i le faitauga, ma vaavaai mo mea na fesili atu ai Iakopo i le Au Paia e uiga i le faatuatua.
O le a le mea na fesili atu ai Iakopo i le Au Paia e uiga i le faatuatua?
O a ituaiga o galuega e te manatu na faatatau atu i ai Iakopo?
Faamatala atu, sa faasa’o e Iakopo se manatu sese e uiga i le faatuatua. Sa i ai se manatu sese o nisi o tagata, o le faatuatua ua na o se faailoaga i le upu o le talitonuga. I le anotusi o le Iakopo 2:14, na ese ai le faaaogaina e Iakopo o le upu galuega mai le auala na faaaoga ai e le Aposetolo o Paulo. Ina ua faaaoga e Paulo le upu galuega, sa ia faatatau atu i galuega o le tulafono a Mose. Ina ua faaaoga e Iakopo le upu galuega, sa ia faatatau atu i faatinoga o le tuuto po o galuega o le amiotonu.
E pei ona tusia i le Iakopo 2:15–16, na faaaoga e Iakopo le talafaatusa e faamalamalama ai le tali i lana fesili i le fuaiupu 14. Valaaulia ni tamaiti aoga se toalua e o mai i le pito i luma o le vasega. Fai atu i le tasi o tamaitiiti aoga e faatino le avea ma se tagata aisi o loo aisi mo ni meaai, lavalava, ma se malutaga ina ia mafai ona ola ai o ia. Valaaulia le isi tamaitiiti aoga e faatino le avea ma se tasi e mafai ona fesoasoani atu i le tagata aisi. Valaaulia se tamaitiiti aoga lona tolu e faitau leotele le Iakopo 2:15–16 a’o faatino e isi tamaiti aoga e tolaua le mea o loo faamatalaina i nei fuaiupu.
O le a le mea e sese ai le tali sa tuuina atu i le tamaitiiti aoga aisi? Mata e lava le tali a le isi tamaitiiti aoga e laveai ai le tagata aisi?
Valaaulia se tamaitiiti aoga e faitau leotele le Iakopo 2:17–18 . Fai atu i tamaiti aoga e mulimuli i le faitauga, ma vaavaai mo le mea na aoao mai e Iakopo e uiga i le faatuatua.
E te manatu, o le a le uiga o le fuaitau o le “faatuatua pe afai e le i ai galuega, e mate” (fuaiupu 17)?
E faapefea ona fesoasoani le talafaatusa a Iakopo i le tagata aisi, ia tatou malamalama ai i le uiga o lenei fuaitau?
E tusa ai ma le fuaiupu 17, o le a le upumoni na aoao mai e Iakopo e uiga i le faatuatua moni ia Iesu Keriso? (E ono faaaoga e tamaiti aoga ni upu eseese, ae e tatau ona faailoa mai se upumoni e tutusa ma lenei: O le faatuatua moni ia Iesu Keriso e faaalia i a tatou galuega amiotonu. Tusi lenei upumoni i luga o le laupapa.)
Valaaulia se tamaitiiti aoga e faitau leotele le Iakopo 2:19–20. Ia mautinoa foi e faitau e le tamaitiiti aoga le Faaliliuga a Iosefa Samita o le Iakopo 2:19 (i le Iakopo 2:19, vaefaamatalaga a). Fai atu i le vasega e mulimuli i le faitauga, ma vaavaai mo le faataitaiga na faaaoga e Iakopo e faaali mai ai, o le talitonu i le Atua e le faapea ua mautinoa lava le aofia ai o le faatuatua i le Atua.
O le a le faataitaiga na faaaoga e Iakopo e faaali mai ai, o le talitonu i le Atua e le faapea ua mautinoa lava le aofia ai o le faatuatua i le Atua?
Valaaulia se tamaitiiti aoga e faitau le faamatalaga lenei a Elder David A. Bednar o le Korama a Aposetolo e Toasefululua:
Ata
Elder David A. Bednar
“O le faatuatua moni e taulai atu i le Alii o Iesu Keriso ma e tau atu e le aunoa i faatinoga amiotonu. … O le na o le faatino lava ia, e le o se faatuatua lena i le Faaola, peitai o le faatino e tusa ai ma mataupu faavae sao, o se vaega autu lea o le faatuatua” (“Ole Atu ma le Faatuatua,” Ensign po o le Liahona, Me 2008, 95).
E tusa ai ma le saunoaga a Elder Bednar, o le a le “vaega autu lea o le faatuatua”?
Aisea e taua ai le malamalama o le faatuatua ia Iesu Keriso o lona uiga, o le talitonu ia te Ia ma le faatinoga e tusa ai ma mataupu faavae sa’o?
Faamanatu atu i tamaiti aoga le alii talavou i le vaaiga i le amataga o le vaega lenei o le lesona.
E mafai faapefea ona fesoasoani le malamalama, o le faatuatua e aofia uma ai le talitonu ma le faatino, i se tagata o loo sailia le faamagaloga mo ana agasala?
Aotele le Iakopo 2:21–26 i le faamatala atu, sa faatatau atu Iakopo ia Aperaamo ma Raava o ni faataitaiga o ni tagata o o la faatuatua i le Atua sa faaalia i a laua galuega. (O tala i le tamaitai lototoa o Raava o loo maua i le Iosua 2:1–22.)
Valaaulia tamaiti aoga e faaaoga a latou api o le vasega po o api talaaga mo le suesueina o tusitusiga paia, e tusi ai e uiga i se taimi na latou faaalia ai le faatuatua ia Iesu Keriso, e ala i a latou galuega ma le ala na faamanuiaina ai i latou ona o le faia o lena mea. Uunaia tamaiti aoga e faaaofia ai a latou molimau i le Faaola ma le auala o le a latou faaalia ai lena talitonuga e ala i a latou faatinoga. Valaaulia ni nai tamaiti aoga e faasoa mai mea na latou tusia i le vasega.
Valaaulia tamaiti aoga e mafaufau ma le agaga tatalo pe mafai faapefea ona latou faaalia atoatoa atili le faatuatua ia Iesu Keriso e ala i le usitai ia te Ia. Uunaia i latou e mulimuli i soo se uunaiga latou te maua.
Ina ia fesoasoani i tamaiti aoga e faaaoga upumoni na aoaoina i lenei fuaitau o le mau tauloto, tuu atu ia i latou taitoatasi se fasipepa. Valaaulia i latou e tusia upu o lenei fuaitau i le isi itu o le pepa. Ona fai atu lea ia i latou e faauma le fuaiupu lenei i le isi itu o le pepa: O le a ou faaali atu i le Alii lo’u faatuatua ia te ia i le … Uunai tamaiti aoga e tuu le fasipepa lenei i a latou taga i le aso atoa ma faaopoopo atu i le lisi i lea taimi ma lea taimi ni manatu mo le faaalia o o latou faatuatua i le Alii. Ao faaopoopo atu manatu i a latou lisi, e mafai ona latou toe faamanatu ai le mau tauloto. Uunaia i latou e tuu le fasipepa i se mea latou te iloa atu ai i taimi uma ma faamanatu atu ai a latou sini.
Tala ma Faamatalaga o Talaaga
Iakopo 2:10. Afai tatou te nofosala i se agasala e tasi, pe ua tatou nofosala moni ea i agasala uma?
E taua le malamalama i le aoaoga a Iakopo o loo tusia i le Iakopo 2:10 ae e faigofie foi ona malamalama sese ai. Na aoao mai e Peresitene Iosefa Filitia Samita le mea lenei e uiga i le fuaiupu lenei:
“Fai mai Iakopo i le tusi lenei: ‘Aua o se tausi le tulafono uma, ae agasala i se mea e tasi, ua nofosala ia i mea uma’ [Iakopo 2:10]. O lenei mea e foliga mai i le toatele o tagata o se upu faigata, ae ua moni. O tulafono o loo taitai ai i le malo selesitila e atoatoa, ma a’o le’i mafai ona tatou ulu atu iina e tatau ona tatou tuu i tatou lava ia ogatasi ma na tulafono uma. O se tagata e tetee faasaga i se tasi o poloaiga e faavavau, e le mafai ona ta’uamiotonuina ma e le mafai ona ulu atu i le malo selesitila. Afai e faatagaina o ia e faia lena mea, o le a ia aveina atu i totonu o lena malo le fenumia’i, ma o se tulaga faapena e le mafai ona ta’uamiotonuina” (“The Standards of the Church,” Improvement Era, July 1957, 506).
Iakopo 2:14–18. E le faasaoina i tatou i a tatou galuega
Sa faamanino mai e Peresitene Dieter F. Uchtdorf o le Au Peresitene Sili e faapea, e le o lo tatou usiusitai i poloaiga a le Atua e faaola ai i tatou:
“O le faaolataga e le mafai ona faatauina i le usiusitai; ae e faatauina i le toto o le Alo o le Atua [tagai Galuega 20:28]. O le mafaufau ai e mafai ona tatou faafesuiaia a tatou galuega lelei mo le faaolataga e pei o le faatauina o se pepa malaga o le vaalele ona manatu lea tatou te pule i le ofisa vaalele. Pe manatu foi pe a uma ona totogiina le pili o loo mautotogi ai i lo tatou fale, ua tatou pule ai i le paneta o le lalolagi atoa” (“O Le Meaalofa o le Alofatunoa,” Ensign po o le Liahona, Me 2015, 109).
Iakopo 2:18–26. “Ou te faaali foi ia te oe lo’u faatuatua i a’u galuega”
“Sa tali atu Iakopo i ni lipoti e uiga i tagata o e sa mamasagia la latou talanoa e faatatau i le faatuatua o se mea e ese mai i faatinoga po o ‘galuega’ a se tagata (tagai Iakopo 2:14–26). …
“… Sa le’i aoao atu Iakopo e faapea, e leai se mana faaola o le faatuatua; sa ia aoao atu, o se talitonuga e aunoa ma ni faatinoga lea e iu ai i le leai o ni faatinoga sa le o se faatuatua moni faaola lea. Ina ua lu’iina e Iakopo lana au faitau ina ia ‘faaali mai ia ia te au lou faatuatua e aunoa ma ni au galuega’ (Iakopo 2:18), sa ia faailoa atu e le mafai ona faaali atu le faatuatua o se tagata vagana ai e ala atu i ana faatinoga—o le faatuatua moni e le mafai ona i ai ae le o i ai galuega amiotonu” (New Testament Student Manual [Church Educational System manual, 2014], 495).
Na ta’ua e Iakopo ia Aperaamo ma Raava o ni faataitaiga se lua o ni tagata, o o laua faatuatua ia Iesu Keriso sa faaalia i a laua galuega. Sa faamalamalama mai e Iakopo o Aperaamo ma Raava sa “ta’uamiotonuina i galuega.” Ina ia ta’uamiotonuina, o lona uiga “o le faamagaloina lea mai le faasalaga o le agasala ma le tautino atu ua le nofosala. E ta’uamiotonuina se tasi i le alofa tunoa o le Faaola e ala i le faatuatua ia te Ia. O lenei faatuatua e faaalia i le salamo ma le usiusitai i tulafono ma sauniga o le talalelei” (Taiala i Tusitusiga Paia, “Ta’uamiotonuina,” scriptures.lds.org). O le mea lea, sa le’i faaolaina Aperaamo ma Raava ona o a laua galuega, ae o a laua galuega ma le usiusitai i le Alii na faaalia ai, sa i ai lo laua faatuatua moni ia Iesu Keriso ma i Lona mana e faaola ai.