Folasaga i Aoaoga Faavae Autu

O Aoaoga Faavae Autu nei e tatau ona matua faamalamalamaina i le seminare:

• Aiga Atua

• Ata o le Faaolataga

• Togiola a Iesu Keriso

• Tisipenisione, Liliuese, ma le Toefuataiga

• Perofeta ma Faaaliga

• Perisitua ma Ki o le Perisitua

• O Sauniga ma Feagaiga

• Faaipoipoga ma le Aiga

• Poloaiga

E tatau i faiaoga ona fesoasoani i tamaiti aoga ia iloa, malamalama, talitonu, faamalamalama, ma faaaoga aoaoga faavae autu nei o le talalelei a o latou suesue i tusitusiga paia. O le faia o lea tulaga o le a fesoasoani ai i tamaiti aoga e faamalolosia a latou molimau ma faateleina lo latou talisapaia o le talalelei toefuataiina a Iesu Keriso. O le aoaoina o Aoaoga Faavae Autu o le a fesoasoani foi i tamaiti aoga ia saunia lelei ai e ola i le talalelei ma aoao atu nei upumoni taua i isi. Na foafoaina lesona i lenei tusi lesona ma le manatu i Aoaoga Faavae Autu. E taua le iloa o isi aoaoga faavae taua o le talalelei o le a faamamafaina foi i lenei tusi lesona, e ui e le o lisiina ai i Aoaoga Faavae Autu. O le aoaoina atu o aoaoga faavae autu o le talalelei e tupu ao e suesue i tusitusiga paia i aso uma faatasi ma tamaiti aoga, ma ao e fesoasoani ia i latou ia malamalama lelei i fuaitau autu o mau. O le tuputupu ae i le malamalama, ma le talitonu, ma le ola ai i Aoaoga Faavae Autu o se faagasologa e tupu i le aluga o le fa tausaga o le seminare ma faaauau ai mo aso uma o totoe o le olaga o le tamaiti aoga. Atonu e te manao e tuuina atu i tamaiti aoga se lisi o Aoaoga Faavae Autu.

Faavasegaga o Aoaoga Faavae Autu

O se Faavasegaga o Aoaoga Faavae Autu ua mamanuina e tuuina atu ai i faiaoga ni faamatalaga e mafai ona latou faaaogaina e faamanuia lelei ai olaga o a latou tamaiti aoga. Matou te fautuaina ina ia tuuina atu e faiaoga lenei suesuega i le vaiaso muamua o le vasega ma toe tuuina atu foi agai i le faaiuga o le tausaga. Ina ia maua le Suesuega o Aoaoga Faavae Autu ma isi suesuega i luga o le uepisaite a le S&I (si.lds.org), saili i le faaaogaina o le upu autu assessment [faavasegaga].

O faiaoga e auina atu taunuuga o faavasegaga a a latou tamaiti aoga i le Ofisa o Suesuega a le S&I, o le a maua se lipoti o le a fesoasoani ia i latou e fetuunai ai a latou aoaoga ia ausia lelei ai manaoga o a latou tamaiti aoga. Mo se faataitaiga, afai e ta‘u mai i taunuuga e faapea, sa lei malamalama tagata aoga i le aoaoga faavae o le salamo, o le a faapea ona faailoa atu nisi o lesona i le mataupu aoaoina faaletausaga e mafai ona fesoasoani ai i tagata aoga ia malamalama lelei atu i le aoaoga faavae. A o faaaoga ma le agaga tatalo e faiaoga lenei faamatalaga i le faasologa o le latou aoaoina atu o tusitusiga paia, o le a faapea ona saunia lelei ai o tatou tagata talavou ma tagata matutua ia ausia le Faamoemoega o Seminare ma Inisitituti o Mataupu Faalelotu.