Gaoioiga o Mau Tauloto

Folasaga

O le vaega lenei ua tuuina atu ai nisi o manatu e mafai ona e faaaogaina e fesoasoani ai i tagata aoga i le taulotoina o fuaitau o mau autu. A o e fesoasoani ma faamalosiau atu i tagata aoga e atiina ae nei tomai, o loo e fesoasoani atu ia i latou ia faalagolago ia i latou lava, i lo latou suesueina o tusitusiga paia. E mafai ona faaaoga e tamaiti aoga nei tomai i le taulotoina o mau, i o latou olaga ia lelei ai i le sueina, malamalama, faaaoga, ma tauloto ia fuaitau i tusitusiga paia. O loo lisiina atu i lalo ia manatu faafaiaoga mo vaega taitasi o mau tauloto. O le faaaogaina o le tele o nei ituaiga o gaoioiga eseese e mafai ona fesoasoani i tamaiti aoga ia faamanuiaina sili atu i le taulotoina o fuaitau o mau.

Gaoioiga e Fesoasoani i Tamaiti Aoga i le Sueina o Fuaitau o Mau Tauloto

Faailogaina o Fuaitau

O le faailogaina o fuaitau o mau tauloto e mafai ona fesoasoani i tamaiti aoga e manatua ai nei mau ma sue vave i latou. Mafaufau e uunaia tagata aoga e faailoga nei fuaitau autu i a latou tusitusiga paia i se auala e tulaga ese ai mai isi fuaitau latou te faailogaina.

Iloaina o Tusi

O le taulotoina o igoa ma le faasologa o tusi o le Feagaiga Fou e mafai ona fesoasoani i tamaiti aoga ia sili atu ona vave le sailia o fuaitau o mau tauloto. O faataitaiga nei o gaoioiga e mafai ona fesoasoani i tamaiti aoga e faamasani ai i tusi o loo i le Feagaiga Fou:

Saili le Faasino Tusi—Fesoasoani e faamasani tamaiti aoga i faasino tusi o i le Tusi Paia e fesoasoani ia i latou e sue ai tusi o loo maua ai mau tauloto e fesootai i ai.
Usu se Pese—Sui ia upu o se viiga e masani ai po o se pese a le peraimeri i igoa o tusi o le Feagaiga Fou. Aoao atu le pese i au tamaiti aoga (pe faaaoga le pese “The Books in the New Testament” [Children’s Songbook, 116–17]). Usu e le vasega le pese lea mai lea taimi i lea taimi i le gasologa o le tausaga e fesoasoani ai ia latou manatua ia igoa ma le faasologa o tusi i le Feagaiga Fou.
Faaaoga Mataitusi Muamua—Tusi mataitusi muamua o tusi i luga o le laupapa (M, M, L, I, ma faasolosolo ai lava). Tuu atu i tamaiti aoga e faataitai le tauina o igoa o tusi e talafeagai ma mataitusi taitasi. Toe fai ma toe fai le gaoioiga lenei seia mafai ona latou taulotoina igoa o tusi mai i o latou mafaufau.
Suega Tusi— Faalau se tusi e tasi o loo i ai se fuaitau o mau tauloto, ma tuuina atu i tamaiti aoga e tatala ā latou tusitusiga paia i soo se itulau i lena tusi. Taimi pe o le a le umi e sueina ai e le vasega atoa tusi taitasi. E mafai ona fai soo lenei gaoioiga ina ia mafai ona atamamai tamaiti aoga i le manatuaina ma le sueina o tusi i le Feagaiga Fou.

Manatuaina o Tusi o Mau ma Anotusi

A o aoao e tamaiti aoga le nofoaga ma le anotusi o fuaitau o mau tauloto, e mafai ona fesoasoani le Agaga Paia ia i latou e manatua tusi o mau pe a manaomia (tagai i le Ioane 14:26). Upu po o fuaitau autu, e pei o le “fanau…i le vai ma le Agaga” (Ioane 3:5) ma le “o le fua o le Agaga” (Kalatia 5:22–23), e mafai ona fesoasoani i tamaiti aoga ia manatua le anotusi ma aoaoga o aoaoga faavae autu o fuaitau taitasi. O metotia nei e mafai ona fesoasoani i tamaiti aoga e faafesootai ai tusi o mau tauloto ma o latou anotusi po o upu autu. (Atonu e te manao e sefe gaoioiga e aofia i tauvaga, miliga, po o le tuutaimi mo se taimi mulimuli mai o le tausaga, pe a uma ona faaali mai e tamaiti aoga ua latou iloa mea o loo i ai fuaitau o mau tauloto. O gaoioiga faapena o le a fesoasoani e faamalosia ai mea ua latou aoaoina.)

Tusi o Mau ma Upu Tatala—Uunai tamaiti aoga e tauloto tusi o mau ma upu autu o fuaitau taitasi o mau tauloto o loo lisiina i luga o kata o mau tauloto. (E mafai ona oka kata o mau tauloto i le initoneti i le store.lds.org. E mafai foi ona fatu ai e tamaiti aoga a latou lava seti o kata o mau tauloto.) Tuu atu i tamaiti aoga se taimi e suesue ai ma se paga ia kata ona sue lea e le tasi le isi. Uunaia tamaiti aoga ia fatufatuai i auala latou te suesue faatasi ai ma sue ai e le tasi le isi. A oo ina latou lelei tele i fuaitau o mau tauloto, e mafai ona e valaaulia i latou e faaaoga faaataataga e aofia ai le talaaga po o le faaaogaaga o aoaoga ma mataupu faavae mai le mau. E mafai ona tali mai le tagata o loo sueina e ala i le tautala po o le tusitusi.
Kata o Mau Tauloto—O lenei gaoioiga e mafai ona faaaoga e faalauiloa pe toe faamanatu ai se vaega o fuaitau o mau tauloto. Filifili se numera o kata o mau tauloto, ma sauni e tufa atu i au tamaiti aoga. (Ia mautinoa e i ai ni kopi se tele o kata taitasi ina ia sili atu i le toatasi se tamaitiiti aoga e mauaina le fuaitau lava lea e tasi o le mau tauloto. (Atonu e te manao ia lava ni kata mo tamaiti aoga taitasi ina ia latou maua ni fuaitau eseese tailua pe taitolu.) Tufa atu i le vasega. Tuu atu i tamaiti aoga se taimi e suesue ai i fuaitau o mau tauloto, o le tusi, o upu autu, o le faamatalaga o le talaaga, o le aoaoga faavae po o le mataupu faavae, ma manatu mo le faaaogaaga o loo i kata taitasi. Faalau atu nisi o faaataataga mai kata (mo se faataitaiga, o upu mai le fuaitau o mau tauloto po o upu autu, faamatalaga o talaaga, aoaoga faavae po o le mataupu faavae, po o le faaaogaaga). O tamaiti aoga e i ai le kata e fesootai [ma na faaataataga] e tatau ona tutu i luga ma fai leotele le mau tauloto.
Suega Mau—Faaaoga ni faaataataga e fesoasoani ai i tamaiti aoga e faataitai le vave mauaina o fuaitau i a latou tusitusiga paia. Mo faaataataga, e mafai ona e faaaogaina ia manatu o upu autu, faamatalaga o talaaga, aoaoga faavae ma mataupu faavae, ma le faaaogaaga mai kata o mau tauloto. E mafai foi ona fai a oe lava faaataataga. O gaoioiga o suega mau lea e taututuu ai tamaiti aoga e sue fuaitau, e mafai ona fesoasoani latou te auai ai ma le mataalia i le aoaoina o fuaitau o mau tauloto. Pe a faaaoga gaoioiga o suega mau e fesoasoani ai i le taulotoina o mau, ia fai i se auala e le tupu ai ni lagona tiga pe faatiga ai le Agaga. Fesoasoani i tagata aoga ia aloese mai le soona faia o a latou tusitusiga paia po o le ova tele foi o le lagona faatauva. Ia mafaufau foi e tuu atu i tagata aoga e tauva ma se tulaga faatonuina nai lo o le tasi ma le isi. Mo se faataitaiga, e mafai ona mili tagata aoga ma le faiaoga, po o le tuu atu foi ia i latou e mili e vaai pe mafai e se pasene faapitoa o le vasega ona maua se fuaitau faapitoa i se taimi faatulagaina.
Suega Tala—Tuu atu ni faaataataga e ala i le faia o ni faamatalaga o ni mea e tutupu lea e faaalia ai le taua o fuaitau o mau tauloto i le olaga i aso uma. Mo se faataitaiga, o se faaataataga mo le Mataio 28:19–20 po o le Filipi 4:13, e mafai ona e fai atu, “Ua agavaa Tanielu e auauna atu i se misiona ma lagona o lona tiute faaleperisitua le faataunuuina, ae o loo ia popole e le o lava lona malamalama e aoao lelei atu ai le talalelei. O loo popole foi o ia o le a faigata mo ia le talanoa atu i tagata ese. Ao ia tatalo mo se faamautinoaga, na ia manatua ina ua mavae le toetu o Iesu Keriso, na Ia poloaiina Ana Aposetolo e ‘O atu… ma aoao atu i atunuu uma’ ma o le a faatasi le Alii ma outou i taimi uma. Na mafaufau foi Tanielu i upu a Paulo, ‘Ou te mafaia mea uma lava i le faamalosi mai o Keriso ia te au.’” A o faalogologo tamaiti aoga i le mea o loo tupu, tuu atu ia i latou e sue le fuaitau o le mau tauloto e fetaui i ai i a latou tusitusiga paia.
O Suega Pupuu ma Suega—Tuu atu i tamaiti aoga ni avanoa e sue ai lo latou manatuaina o fuaitau o mau tauloto. O faaataataga e mafai ona aofia ai upu autu po o tusi o mau, upusii mai fuaitau, po o mea e tutupu e faailoa ai upumoni o loo aoaoina i fuaitau. O suega pupuu ma suega e mafai ona faalau atu, tusi i luga o le laupapa, po o pepa foi. A uma ona fai e se tamaitiiti aoga se suega puupuu po o se suega, mafaufau e faa-paga ia tagata aoga e maualuluga togi ma tamaiti aoga e maualalalo togi. O le tamaitiiti aoga e maualuga ona togi e mafai ona avea o se faiaoga e fesoasoani i le tagata aoga e maualalo ona togi e suesue ma alualu i luma. O se vaega o lenei taumafaiga, e mafai ai foi e le paga ona faatu se sini ina ia ausia se togi tuufaatasi maualuga i le isi suega e sosoo ai. Mafaufau e fatu se siata po o se laupapa puletini e faaali atu ai sini a tagata aoga ma faailoa ai lo latou alualu i luma.

Gaoioiga e Fesoasoani i Tagata Aoga ia Malamalama i Fuaitau o Mau Tauloto

Faauigaga o Upu ma Fasifuaitau

O le faauigaina o upu ma fasifuaitau o mau tauloto (po o le fesoasoani i tamaiti aoga e faamatala mai o latou uiga) o le a fesoasoani i tamaiti aoga ia malamalama i le uiga o le mau atoa. Afai e taua tele ia faauigaga ina ia malamalama ai i aoaoga faavae ma mataupu faavae i se fuaitau, atonu e te manao e fautuaina tamaiti aoga e tusi nei faauigaga i a latou tusitusiga paia. Toe faamanatu uiga o upu ma fasifuaitau ao outou toe faamanatuina fuaitau o mau tauloto.

Iloaina o le Faamatalaga o le Talaaga

O le iloaina o le talaaga o se fuaitau o mau e mafai ona fesoasoani i tamaiti aoga ia malamalama atili i le uiga o le fuaitau. O le faamatalaga o le talaaga e aofia ai faamatalaga e uiga i le po o ai o loo tautala ia te ai ma aisea, o le tulaga o le mau (faasolopito, aganuu, ma le siosiomaga), ma o le fesili po o le tulaga lea na aliae mai ai le anotusi o le mau. Mo se faataitaiga, o aoaoga a le Alii i le Ioane 3:5 o ni vaega o se talanoaga i le va o Iesu Keriso ma se Faresaio popole e igoa ia Nikotemo lea na alu ane i le Faaola i le po e fesili e uiga i Lana aoaoga faavae. Ua fetalai atu le Alii ia Nikotemo, a le “toe fanau” i tatou “e le mafai ona [tatou] iloa le malo o le Atua” (Ioane 3:3). I le le mautonu, na fesili ai Nikotemo pe faapefea e se tagata ua toeaina ona toe fanau. Ioane 3:5 o loo aofia ai le tali a le Alii i le fesili a Nikotemo. O le iloaina o lenei faamatalaga e mafai ona fesoasoani i tamaiti aoga ina ia malamalama manino lelei ai po o a fesili o loo faatatau i ai le Alii ina ua ia folafola mai “afai e le fanau se tasi i le vai ma le Agaga, e le mafai ona sao o ia i le malo o le Atua.” A o e aoao atu lesona e aofia ai fuaitau o mau tauloto, ia faamamafa atu le talaaga o loo siomia ai na fuaitau. O gaoioiga faaopoopo e pei o nei e mafai foi ona fesoasoani i tamaiti aoga ia malamalama i nei fuaitau autu:

Iloaina o le Talaaga—Tusi ulutala nei i le pito i luga o le laupapa: Failauga, Au Maimoa, Faamoemoega, ma Isi Manatu Aoga. Vaevae tamaiti aoga i ni vaega, ma atofa atu i vaega taitasi se mau tauloto. Valaaulia i latou e sue le talaaga o a latou fuaitau atofaina e ala i le faailoa mai o faamatalaga e talitutusa ma ulutala o loo i luga o le laupapa. Tuu atu ia i latou e tusi mea na latou maua i le laupapa. Ona fai atu lea i vaega taitasi e faamatala mai le talaaga o a latou mau atofaina ma pe o le a le aafiaga o lenei faamatalaga i lo latou malamalamaaga i upumoni i mau taitasi. Ina ia faaopoopo atu se isi tulaga i lenei gaoioiga, atonu e te manao e lui le vaega e mate mai le tusi o le mau e faavae i faamatalaga o loo i luga o le laupapa ao lei faamatala mai e vaega taitasi mea na latou tusia.

Iloiloina

O le iloiloina e aofia ai le faailoaina o aoaoga ma mataupu faavae o loo maua i fuaitau o mau. E aofia ai foi le fesoasoani i tamaiti aoga ia malamalama po o a auala e fitoitonu ai nei upumoni ia i latou. O lenei faiga e mafai ona taitai atu ai i le faaaogaaga loloto o aoaoga ma mataupu faavae i o latou olaga. O le gaoioiga lenei e mafai ona fesoasoani i tamaiti aoga i le iloiloina o fuaitau o mau tauloto:

Tusi ni Faaataataga—A o faasolo ina masani lelei tamaiti aoga i fuaitau o mau tauloto, valaaulia i latou e fatufatu ni fesili, po o ni isi faaataataga e faaalia ai aoaoga faavae ma mataupu faavae o loo aoaoina i fuaitau. E mafai ona faaaoga nei [fesili] e sue ai le vasega.

Faamalamalamaina

O le tuu atu i tamaiti aoga e faamalamalama atu fuaitau o mau o le a faalolotoina ai lo latou malamalama ma faaleleia ai lo latou gafatia ona aoao atu aoaoga faavae ma mataupu faavae mai tusitusiga paia. O auala nei e lua e mafai ona fesoasoani i tamaiti aoga e aoao ai i le faamalamalamaina atu o fuaitau o mau tauloto:

Upu Autu ma Fuaitau—Valaaulia tamaiti aoga e faitau e le tagata lava ia le mau tauloto e tasi, ma faailoa mai se upu po o se fuaitau latou te manatu e faapitoa ona taua i le uiga o le fuaitau. Ona valaaulia lea o se tamaiti aoga e faitau atu le fuaitau i le vasega ma tuu atu le faamamafa i le upu po o fuaitau ua ia filifilia. Fesili atu i le tamaiti aoga e faamatala mai pe aisea e taua ai lena upu po o le fuaitau i le malamalama ai i le fuaitau. Valaaulia ni nai isi tamaiti aoga ia faia faapea. E mafai ona filifili e tamaiti aoga ni upu po o fuaitau eseese o le mau lava lea e tasi. A o faalogologo atu tagata o le vasega i nei manatu eseese, e mafai ona latou maua le malamalama loloto atu e uiga i le fuaitau.
Saunia se Faigalotu—Tuu atu i tamaiti aoga ni avanoa e faaaoga ai fuaitau o mau tauloto a o latou saunia ma faia faigalotu i le amataga o le vasega. Fesoasoani ia i latou e saunia e aotele le talaaga, faamalamalama atu aoaoga faavae ma mataupu faavae, faasoa atu ni aafiaga po o ni faataitaiga anoa, ma molimau atu e uiga i aoaoga faavae ma mataupu faavae i le fuaitau. Atonu e te fautuaina foi ia mafaufau tamaiti aoga e faaaoga se lesona faatino e faamatala ai manatu o loo i fuaitau.

Lagonaina o le Taua o Aoaoga Faavae ma Mataupu Faavae

Fesoasoani i tamaiti aoga ia malamalama ma maua se molimau faaleagaga e uiga i aoaoga faavae ma mataupu faavae na aoaoina i fuaitau o mau tauloto. Na faamalamalama mai e Elder Robert D. Hales, “O se faiaoga moni, o le taimi lava na [te] aoao atu ai mea moni [o le talalelei] … , na te aveina atu [tagata aoga] i se laasaga e mamao atu e maua ai le molimau faaleagaga ma le malamalama i o latou loto lea e aumaia ai le faatinoga ma le faia” (“Aoao Atu e ala i le Faatuatua” [saunoaga i faiaoga o mataupu faalelotu a le OAE, 1 Fep., 2002], 5, LDS.org; tagai foi i le Teaching Seminary: Preservice Readings [2004], 92). Pe a lagona e tamaiti aoga le moni, taua, ma le faanatinati o se aoaoga faavae po o se mataupu faavae e ala i le uunaiga a le Agaga Paia, o le a tuputupu ae lo latou manao e faaaoga lena upumoni i o latou olaga. E mafai ona fesoasoani faiaoga i tamaiti aoga e valaaulia ma faafailele nei lagona o le Agaga Paia e ala i le tuuina atu ia te i latou o ni avanoa e faasoa mai ai ni aafiaga na latou maua i le ola ai i mataupu faavae o le talalelei o loo maua i fuaitau o mau tauloto. O le a fesoasoani lenei mea i tamaiti aoga e malamalama lelei ai i upumoni na aoaoina i fuaitau o mau tauloto ma ia mautinoa ai ua tusia nei upumoni i loto o tamaiti aoga. E mafai ona fesoasoani le gaoioiga lenei i tamaiti aoga e lagona ai le taua o aoaoga faavae ma mataupu faavae na aoao mai i fuaitau o mau tauloto:

Faalogologo mo Fuaitau o Mau—Valaaulia tamaiti aoga e faalogologo mo fuaitau o mau tauloto i lauga ma lesona i le lotu, i tautalaga i konafesi aoao, ma i talanoaga ma aiga ma uo. Ia valaaulia mai lea taimi i lea taimi ni tamaiti aoga e lipoti mai po o a mau sa latou faalogo i ai, pe na faapefea ona faaaogaina ia mau, po o a upumoni na aoao mai ai, ma o a foi aafiaga na latou maua pe na maua e isi i upumoni sa aoaoina mai. Vaavaai mo avanoa e molimau atu ai (ma valaaulia tamaiti aoga e molimau atu) i upumoni na aoaoina e fuaitau o mau tauloto.

Gaoioiga e Fesoasoani i Tamaiti Aoga e Faaaoga ai Fuaitau o Mau Tauloto

Aoaoina Atu

O fuaitau o mau tauloto ma Aoaoga Faavae Autu sa atiina ae faatasi ma ua fuafuaina ia ogatasi mo le manuia o tagata o le vasega. (O fuaitau o mau tauloto o loo faaalia i le pepa atoa o faamatalaga o Aoaoga Faavae Autu.) Pe a aoao ma faamatala mai e tamaiti aoga ia aoaoga faavae ma mataupu faavae i fuaitau o mau tauloto, o le a latou aoaoina ma faamatalaina mai foi Aoaoga Faavae Autu. Ma a o aoao tamaiti aoga e faamatala mai Aoaoga Faavae Autu i a latou lava upu, e mafai ona latou faalagolago i fuaitau o mau tauloto ua taulotoina e fesoasoani ia i latou. O le tuuina atu o avanoa i tamaiti aoga e aoao atu ai aoaoga faavae ma mataupu faavae o le talalelei e faaaoga ai fuaitau o mau tauloto, e mafai ona faateleina ai lo latou talitonu ia i latou lava ma i lo latou malamalama i tusitusiga paia. Pe a aoao atu ma molimau atu tamaiti aoga e uiga i aoaoga faavae ma mataupu faavae o loo maua i fuaitau o mau tauloto, e mafai foi ona latou faamalosia ai a latou molimau. Uunai tamaiti aoga e faaaoga ia fuaitau o mau tauloto e aoao atu ai ma faamalamalama atu ai le talalelei i le vasega ma i talanoaga ma uo, aiga ma isi.

Tuu Atu o se Savali—Tofi ni tamaiti aoga e saunia ni tautalaga po o ni lesona e tai tolu i le lima minute e faavae i fuaitau o mau tauloto. Tuu atu ia i latou e saunia i le vasega po o le fale. E faaopoopo atu i fuaitau o mau tauloto, e mafai ona latou faaaogaina isi punaoa e fesoasoani ia i latou e saunia ai, e pei o kata o mau tauloto, o le Taiala i Autu, o le Taiala i Tusitusiga Paia, po o le Faamaoni i le Faatuatua: O Se Tusitaiala o le Talalelei. O tautalaga po o lesona taitasi e tatau ona aofia ai se folasaga, o le fuaitau o mau tauloto, o se tala e uiga po o se faataitaiga o le mataupu faavae o loo aoaoina atu, ma le molimau a le tamaitiiti aoga. E mafai ona volenitia tamaiti aoga e tuuina atu a latou savali i le vasega, i se afiafi faaleaiga, po o le, i a latou korama po o vasega o se vaega o o latou Tiute i le Atua po o le Alualu i Luma o le Tagata Lava Ia. Afai e tuuina atu e tamaiti aoga a latou lauga po o lesona i fafo atu o le vasega, ia mafaufau e valaaulia i latou e lipoti mai i o latou aafiaga.
Tala Faatino Faafaifeautalai—ia saunia ni kata ua i ai ni fesili e ono fesiligia e se tagata sailiili, ia e mafai ona taliina faatasi ai ma le fesoasoani a fuaitau o mau tauloto (mo se faataitaiga, “O le a le talitonuga a tagata o la outou ekalesia e uiga ia Iesu Keriso?”). Valaaulia ni paga o tamaiti aoga e o mai i luma o le vasega e tali se fesili e filifilia mai kata. Ina ia fesoasoani i tamaiti aoga ia malamalama i le auala e ono tali ai e faifeautalai ni fesili talitutusa faapena, e mafai ona e fautua atu ni nai metotia faafaiaoga aoga, e pei o le (1) ta‘uaina o le talaaga o le mau, (2) faamatala atu se aoaoga faavae po o se mataupu faavae, (3) fai atu ni fesili e iloa ai pe malamalama pe talitonu i latou o loo latou aoaoina i mea na aoao atu, (4) faasoaina atu o aafiaga ma molimau, ma le (5) valaaulia o i latou o loo latou aoaoina e faatino upumoni sa aoao atu. Fai atu i le vasega e faaali mai ni manatu i mea sa latou fiafia ai e uiga i le ala na tali ai e soa taitasi a latou fesili.
Molimau Atu—Valaaulia tamaiti aoga e vaavaai i fuaitau o mau tauloto ma filifili se fuaitau o loo i ai se aoaoga faavae po o se mataupu faavae e mafai ona molimau atu e uiga i ai. Valaaulia i latou e molimau atu e uiga i le upumoni ua latou filifilia ma faasoa atu ni aafiaga na mafai ai ona latou molimau atu e uiga i ai. A o faasoa atu e tamaiti aoga a latou molimau, o le a faamautu mai e le Agaga Paia le moni o aoaoga faavae po o mataupu faavae o loo latou molimau atu ai. E mafai foi e a latou molimau ona musuia ai isi e galulue i le faatuatua.

Ia Manatua: O avanoa mo tamaiti aoga e faasoa atu ai a latou molimau e tatau ona ofo mai [lava le tagata aoga ia]. E le tatau lava ona faamalosia tamaiti aoga e faasoa mai a latou molimau pe faia foi ia latou lagona e tatau lava ona latou tautino atu se malamalamaaga latou te le lagonaina ua latou mauaina. E le gata i lea, o nisi tamaiti aoga e mumusu e faasoa mai a latou molimau, ona o loo i ai lo latou manatu sese e faapea e tatau lava ona latou amataina i le “Ou te fia tuuina atu lau molimau …” pe faapea o lo latou faaailoaina o le molimau e tatau lava ona o mai faatasi ma se faaalia o lagona ootia. Fesoasoani i tamaiti aoga ia malamalama a latou molimau atu, e mafai ona tau lava o le faasoa atu o aoaoga faavae po o mataupu faavae latou te iloa e moni. O le faasoa atu o le molimau e mafai ona faigofie lava e pei o le faapea atu, “Ou te talitonu e moni lenei mea” po o le “Ou te iloa e moni lenei mea” po o le “Ou te talitonu i lenei mea ma lou loto atoa.”

Ola ai

O le fautuaina atu o auala e mafai ai e tamaiti aoga ona faaaoga aoaoga faavae ma mataupu faavae o loo i ai i fuaitau o mau (po o le valaaulia o tamaiti aoga e mafaufau i ni auala) e tuuina atu ai ia i latou le avanoa e aoao ai e ala i le faaaogaina o le faatuatua.

Na saunoa mai Elder David A. Bednar o le Korama a Aposetolo e Toasefululua e faapea:

“O se tagata aoao na te faaaogaina le saolotoga e ala i le galue e faatino e tusa ai ma mataupu faavae sa’o, e tatalaina lona loto i le Agaga Paia ma valaaulia Ana aoaoga, o le mana molimau, ma molimau faamaonia. O le aoao e ala i le faatuatua e manaomia ona tuu i ai le faaleagaga, o le mafaufau, ma le faaletino ae le tau lava ina talia. O le faamaoni a’ia’i ma le ogatasi o a tatou faatinoga musuia i le faatuatua, e faailoa atu ai i lo tatou Tama Faalelagi ma Lona Alo o Iesu Keriso lo tatou naunautai e aoao ma talia faatonuga po o aoaoga mai le Agaga Paia” (“Saili e Aoao e Ala i le Faatuatua,” Liahona, Sete. 2007, 64).

Tuu atu i tagata aoga ni avanoa e faasoa atu ma molimau atu ai e uiga i aafiaga na latou maua i le faaaogaina o aoaoga faavae ma mataupu faavae. O se tasi lenei o auala e uunaia ai tagata aoga e faaaoga fuaitau o mau tauloto i o latou olaga:

Faatutu ni Sini—E faavae i le vaega o le faaaogaaga o kata o mau tauloto, valaaulia tagata aoga e faatutu ni sini patino ia lelei atu ona ola i mataupu faavae o loo maua i fuaitau o mau tauloto. Tuu atu ia i latou e tusi a latou sini i se fasipepa e feoai ma i latou e avea o se faamanatu. Pe a talafeagai ai, valaaulia tamaiti aoga e lipoti mai ia mea na faamanuiaina ai i latou.

Gaoioiga e Fesoasoani i Tagata Aoga e Tauloto ai Fuaitau o Mau Tauloto

Taulotoina

O le taulotoina o fuaitau o mau e mafai ona faalolotoina le malamalama ma faaleleia ai tomai o se tamaitiiti aoga e aoao atu ai le talalelei. Pe a tauloto e tamaiti aoga ia mau, e mafai ona aumai e le Agaga Paia ia fuaitau ma manatu i o latou manatua i taimi e manaomia ai (tagai i le Ioane 14:26; MF&F 11:21). Ia manatua e fetuutuunai ia gaoioiga o le taulotoina i gafatia o au tamaiti aoga.

Sa uunaia e Elder Richard G. Scott o le Korama a Aposetolo e Toasefululua le taulotoina o mau ina ua ia saunoa mai:

“E mafai ona oo mai se mana maoae mai le taulotoina o mau. Ina ia taulotoina se mau o le fauina lea o se faigauo fou. E faapei o le mauaina o se tagata fou e mafai ona fesoasoani i le taimi e manaomia ai se fesoasoani, aumai ai musumusuga ma le mafanafana, ma avea ma sosia o le faaosofia e fai le suiga manaomia” (“O Le Mana o Mau,” Ensign po o le Liahona, Nov. 2011, 6).

O gaoioiga taitasi nei e mafai ona toe fai ma toe fai i nai aso i le amataga po o le faaiuga o le vasega e fesoasoani ai i tamaiti aoga ia ausia se taimi umi o taulotoina [ia mau]:

Tausinioga e Tasi le Upu—Lui le vasega e fai se fuaitai o mau tauloto ia tasi lava le upu e tau i le taimi e le tamaitiiti aoga. Mo se faataitaiga, pe a fesoasoani i tamaiti aoga e tauloto le Mataio 5:14-16, o le tamaitiiti aoga muamua o le a fai mai le upu o, o le tamaitiiti aoga lona lua o le a fai mai outou, o le tamaitiiti aoga lona tolu o le a fai mai o le, ma faapena ai lava seia uma le fuaiupu atoa. Ia taimi le faiga e le vasega, ma tuu atu ia i latou ni taimi e faataitai ai ina ia ausia ai se taimi e tausinio i ai. A o e toe faia lenei gaoioiga, mafaufau e fesuiai le faasologa o tamaiti aoga ina ia latou faia ia upu eseese.
Mataitusi Muamua—Tusi i luga o le laupapa ia mataitusi muamua o upu taitasi i se fuaitau o mau tauloto. Faasino atu i mataitusi ao outou faia faatasi ma tamaiti aoga le mau, e faaaoga ai a latou tusitusiga paia pe a manaomia. Toe fai le gaoioiga lenei seia oo ina lagona e tamaiti aoga le mautinoa i o latou gafatia e tauloto ai se mau i le fesoasoani a na o mataitusi muamua. Atonu e te manao e tape ese ni nai mataitusi i taimi taitasi e tauloto ai e tamaiti aoga le mau. O lenei faiga o le a faasolosolo faateleina ai le lui seia oo ina mafai e tamaiti aoga ona toe fai le mau e aunoa ma le faaaogaina o mataitusi muamua.
Paso o Uputusi—Tusi, po o le tuu atu i tamaiti aoga e tusi, ia upu o se fuaitau o mau tauloto i se fasi pepa fai laina. Otioti le pepa i ni fasipepa, ia tuu ai pea laina o mau. Oti faapupuu nisi o fasipepa ia tau lava o ni nai upu laiti o le mau e i ai i fasipepa taitasi. Faafefiloi ia fasipepa ma tuu atu i paga po o ni vaega toalaiti o tamaiti aoga. Lui tamaiti aoga e faatulaga fasipepa i le faasologa sa‘o, e faaaoga ai a latou tusitusiga paia e avea ma se taiala. Tuu atu ia i latou e faataitai le mau seia oo ina latou le toe manaomia le faaaogaina o a latou tusitusiga paia. A maea, fai atu ia te i latou e tauloto leotele le mau. E mafai foi ona e taimiina tamaiti aoga e vaai po o le fea le vaega e aupito vave ona faavasegaina sao ia fasipepa. Pe e mafai foi ona e taimiina le vasega atoa e vaai po o le a le umi e manaomia e vaega uma e faauma ai le paso (pe a uma le vaega muamua, tuu atu ia i latou e fesoasoani i vaega e telegese).