Potutusi
Lesona 89: Galuega 10–11

Lesona 89

Galuega 10–11

Folasaga

Sa faaali le Atua ia Peteru i se faaaliga e faapea ua tatau ona folafola atu le talalelei i Nuuese. Na aoao atu e Peteru le talalelei ia Konelio ma lona aiga ma mulimuli ane foia fefinauaiga i le Au Paia Iutaia e uiga i le folafola atu o le talalelei i Nuuese. Na agai pea le galuega a le Alii i luma e ui i sauaga.

Fautuaga mo le Aoaoina Atu

Galuega 10

Ua faaali le Atua ia Peteru i se faaaliga e faapea ua tatau ona folafola atu le talalelei i Nuuese

Valaaulia tagata o le vasega e vaai faalemafaufau e faapea, ua fesili atu se uo: “Ua ou faalogo e faapea o le 1978 na suia ai e la outou ekalesia lona tulaga ua faataga ai tama tane uma e maua le perisitua tusa po o le a le lanu. Afai e te talitonu e taitaia la outou ekalesia e le Atua ma o le Atua o se tagata e le fesuisuiai, e faapefea ona mafai lena mea?”

Fai atu i le vasega e tusi i a latou api o le vasega po api talaaga mo le suesueina o tusitusiga paia pe faapefea ona latou tali atu i lea uo. (Manatua: Ia mautinoa e tali atu le vasega i le fesili o le suia o faiga a le Ekalesia, nai lo le taumatemate i mafuaaga e ono i ai mo le faatapulaaina o le perisitua. E le gata i lea, aua foi nei taumatemate pe aisea na i ai le faatapulaaina i le perisitua, talu ai e lei faaalia mai lava nei mafuaaga [tagai Tautinoga Aloaia 2].)

Valaaulia le vasega a o latou suesueina le Galuega 10–11 e vaavaai mo aoaoga faavae ma mataupu faavae e mafai ona fesoasoani ia i latou e tali ai fesili e uiga i le auala e taitai ai e le Alii, taiala, suia, ma faatonutonu Lana Ekalesia.

Faamatala e oo mai i le taimi lea i ona po o le Feagaiga Fou, sa talai atu le talalelei, faatasi ma ni nai tuusaunoaga, ua na o Iutaia e pei ona faatonuina ai e le Faaola (tagai Mataio 10:5–6). Peitai, sa tau atu foi e le Faaola i Ona soo a uma ona latou maua o le Agaga Paia ona latou talai atu lea o le talalelei “i tuluiga uma o le lalolagi” (Galuega 1:8). I le Galuega 10 tatou te faitau ai i se suiga maoae i le ala na faagaoioia ai le Ekalesia ina ia faataunuu ai lenei mea.

Valaaulia se tamaitiiti aoga e faitau leotele le Galuega 10:1–2. Fai i le vasega e mulimuli ai, ma vaavaai mo faamatalaga e uiga i le tagata Nuuese e igoa ia Konelio. (Atonu e te manao e tau atu o Konelio e “matau i le Atua” fuaiupu 2). O e matatau i le Atua o tagata o Nuuese sa tapuai i le Atua ae e lei talaia i ai, e le o ni tagata liliu mai foi i le faatuatuaga Iutaia, o lea latou te lei ola ai i le tulafono atoa a Mose.)

  • O le a le galuega a Konelio? (O ia o se taitai o le toaselau o le autau a Roma, na te vaaia fitafita e toaselau.

Faamanatu i le vasega a o lei oo i le taimi lea, sa le mafai ona auai atu se Nuuese i le Ekalesia a Keriso e aunoa ma le muai liliu atu i le faa-Iutaia, talu ai sa na o Iutaia na avatu i ai le talalelei.

  • E ui ina sa lei mafai ona auai ia Konelio i le Ekalesia o se Nuuese, ae na faapefea ona faaalia lona faatuatua i le Atua?

Valaaulia ni tamaiti aoga e feauauai i le faitauina leotele o le Galuega 10:3–6. Fai atu i le vasega e mulimuli i le faitauga, ma vaavaai mo le mea na tupu ia Konelio. (Faamatala o le “itu aso pe iva” [fuaiupu 3] pe tusa o le 3:00 i le afiafi.)

  • E tusa ai ma le fuaiupu 4, o le a le mea na tau atu e le agelu ia Konelio e uiga i ana tatalo ma meaalofa?

  • O le a le mea na faatonu e le agelu ia Konelio e fai?

Aotele le Galuega 10:7–8i le faamatala e faapea na auina atu e Konelio ni alii se toatolu e sue mai Peteru. (Ina ia fesoasoani ia malamalama le vasega i le mea e i ai Kaisareia “O Le Nuu Paia i Ona Po o le Feagaiga Fou” [Bible Maps, no. 11].)

Faamatala a o malaga atu nei alii i Iopa, sa maua e Peteru se faaaliga ofoofogia a o nofo ai i le fale o se tagata e igoa ia Simona. Tuu atu ia tofu le tagata ma se fasipepa. Valaaulia le vasega e faitau filemu le Galuega 10:9–16ma tusi se ata o le faaaliga a Peteru e pei ona faamatala mai i fuaiupu nei. A uma ua lava se taimi, fai i le vasega e faaaoga a latou ata e faamatala ai i se tagata o le vasega le mea na tupu i le faaaliga a Peteru. A uma le gaoioiga lea, fesili:

  • I le faaaliga, o le a le mea na poloaiina ia Peteru e ‘ai?

  • E tusa ai ma le fuaiupu 14, o le a le uluai tali a Peteru i lenei poloaiga? (Faamatala e faapea i lalo o le tulafono a Mose, sa faasa ai tagata Iutaia ona aai i manu masani pe le mama [tagai Levitiko 11].)

  • E tusa ai ma le fuaiupu 15, o le a le fetalaiga a le Alii e uiga i manu le mama sa Ia poloaiina Peteru e ‘ai ai?

Valaaulia se tamaitiiti aoga e faitau leotele le Galuega 10:17–20. Fai i le vasega e mulimuli i le faitauga, ma vaavaai mo mea na tutupu a o mafaufau loloto ia Peteru i le uiga o lana faaaliga.

  • O le a le fasifuaitau i le fuaiupu 17 o loo ta‘u mai ai e faapea e lei malamalama muamua ia Peteru i le uiga o lana faaaliga?

  • O ai na taunuu atu a o mafaufau loloto Peteru i lana faaaliga?

  • O le a le mea na tau atu e le Agaga ia Peteru e fai?

Aotele le Galuega 10:21–24 i le faamatala atu na tau atu e alii e toatolu ia Peteru e uiga i le faaaliga a Konelio. O le aso na sosoo ai, na o atu ai Peteru ma isi soo e vaai ia Konelio.

Valaaulia ni nai tamaiti aoga e feauauai i le faitauina leotele mai o le Galuega 10:25–28. Fai i le vasega e mulimuli ai, ma vaavaai po o le a le mea na fai e Peteru ina ua taunuu i le fale o Konelio.

  • E tusa ai ma le fuaiupu 28, o le a le tala a Peteru e uiga i fegalegaleaiga i le va o Iutaia ma Nuuese?

  • O le a le mea na malamalama nei i ai Peteru?

Aotele le Galuega 10:29–33 i le faamatala atu e faapea na tau atu e Konelio ia Peteru e uiga i lana faaaliga. Na faapotopoto foi e Konelio lona aiga ma uo ina ia mafai ai e Peteru ona aoaoina i latou.

Valaaulia se tamaitiiti aoga e faitau leotele le Galuega 10:34–35. Fai atu i le vasega e mulimuli i le faitauga, ma vaavaai po o le a le mea na aoaoina e Peteru.

  • E faapefea ona e aoteleina le mea na aoaoina e Peteru?

Aotele le Galuega 10:36–43 i le faamatala atu e faapea na aoao e Peteru ia Konelio ma lona aiga e uiga ia Iesu Keriso ma Ana galuega lelei, Faasatauroga, ma le Toetu. Na molimau atu Peteru o i latou o e talitonu ia Iesu Keriso o le a maua se faamagaloga o a latou agasala.

Valaaulia se tamaitiiti aoga e faitau leotele le Galuega 10:44–48. Fai i le vasega e mulimuli ai, ma vaavaai mo aafiaga o aoaoga a Peteru i nei tagata o Nuuese. Faamatala o le fasifuaitau “e na peritomeina” (fuaiupu 45)e faasino i soo Iutaia o e na o mai ma Peteru mai Iopa.

  • E tusa ai ma fuaiupu 44–46, o le a le aafiaga o le aiga o Konelio ona o aoaoga a Peteru?

  • Aisea na maofa ai tagata Iutaia sa i ai i lea taimi?

  • Na ala mai i aafiaga o Peteru o loo tusia i le Galuega 10, o le a le mea na faaali atu e le Alii ia te ia e uiga i Nuuese? (O le a talai atu le talalelei i Nuuese, ma e mafai ona papatisoina i latou i le Ekalesia a Iesu Keriso.)

handout iconIna ia fesoasoani ia faailoa mai e le vasega ia aoaoga faavae e mafai ona tatou aoao mai le Galuega 10, vaevae i latou i ni vaega taitoalua pe taitoatolu. Tuu atu i vaega taitasi se kopi o le tufaaga, pe tusi fesili nei i le laupapa. Valaaulia le vasega e galulue i a latou vaega e tali ia fesili.

tufaaga

Galuega 10

Tusi Lesona a le Faiaoga Seminare o le Feagaiga Fou

  • O le a le upumoni e mafai ona tatou aoao mai i le tala ia Peteru ma Konelio e uiga i le ala e faatonutonu ai e le Alii Lana Ekalesia?

  • O le a le upumoni e mafai ona tatou aoao mai i le mea moni e faapea na faaalia e le Alii le upumoni i le gasologa o taimi nai lo le aumaia uma i le taimi e tasi?

  • O le a le upumoni e mafai ona tatou aoao mai i lenei tala e uiga i le mea e mafai e le Atua ona faia i faatonuga na Ia tuuina mai muamua?

© 2015 Puletaofia e le Intellectual Reserve, Inc.Ua taofia aia tatau uma.

A uma ua lava se taimi, valaaulia ni tagata e o mai i le laupapa e tusi ai upumoni sa faailoa mai e a latou vaega. Ia mautinoa e atagia mai upumoni nei i mea latou te tusia:

E taitaia e le Atua Lana Ekalesia e ala i faaaliga i Lana perofeta, le Aposetolo sinia.

E mafai ona tatou maua faaaliga ma malamalama faasolosolo pe a tatou usiusitai i le Alii.

E mafai e le Atua ona suia pe faaopoopo i faatonuga na Ia tuuina mai muamua e tusa ai ma Lona poto ma manaoga o Ana fanau.

Valaaulia se tamaitiiti aoga e faitau leotele le saunoaga a Elder D. Todd Christofferson o le Korama a Aposetolo e Toasefululua. Fai i le vasega e faalogologo pe o faapefea ona atagia mai i le upumoni lona tolu i le lisi matatetele i le saunoaga a Elder Christofferson.

Elder D. Todd Christofferson

“E ala i lenei aafiaga ma le faaaliga na oo ia Peteru, sa fetuunai ai e le Alii le faiga masani a le Ekalesia ma faaali mai ai se malamalamaaga atoatoa o le mataupu faavae i Ona soo. O le mea lea o le folafolaina atu o le talalelei ua faalautele atu ia laugatasia ai tagata uma” (“O Le Mataupu a Keriso,” Ensign po o le Liahona, Me 2012, 88).

Tuu i le vasega se taimi e toe iloilo ai mea sa latou tusia e uiga i le auala latou te tali atu ai i le fesili a a latou uo. Fautuaina i latou e tusi ni malamalamaaga faaopoopo latou te maua mai i le suesueina o le Galuega 10, ma faataga i latou e faasoa mai nei malamalamaaga i le vasega.

Atonu e manaomia ona tau i ai e faapea e ui ina mafai e le Atua ona fesuiai faiga a le Ekalesia ma faaopoopo i lo tatou malamalama i aoaoga faavae e ala i faaaliga faifai pea (tagai Mataupu Faavae o le Faatuatua 1:9), o Lona natura paia, uiga faaleatua , feagaiga, aoaoga faavae, ma le fuafuaga e le suia lava. O le iloa ai e mafai ona fesoasoani lenei mea tatou te faatuatua ai i le Atua ma mautinoa ai o le a Ia taitaia Lana Ekalesia e tusa ai ma Lona finagalo ma manaoga o Ana fanau.

Galuega 11:1–18

Na foia e Peteru le fefinauaiga i le va o le Au Paia Iutaia e uiga i le folafolaina atu o le talalelei i Nuuese

  • O le a sou manatu o a ni lagona o tagata Iutaia o le Ekalesia ina ua latou faalogo i le fegalegaleaiga a Peteru ma se tagata o Nuuese? (O le fegalegaleaiga a Peteru ma se Nuuese o se suiga tele mai faiga i aso ua mavae, ma sa faigata i nisi o tagata auai ona talia lenei suiga.)

Valaaulia se tamaitiiti aoga e faitau leotele le Galuega 11:1–3. Fai atu i le vasega e mulimuli i le faitauga, ma vaavaai pe na faapefea ona tali atu le au soo i le mea na faia e Peteru.

  • Na faapefea ona tali atu le au soo i le mea na faia e Peteru?

Aotele le Galuega 11:4–15 i le faamatala atu e faapea sa tau atu e Peteru i le au soo ia faaaliga na vaaia e ia ma Konelio. Na ia tau atu ua talia e Konelio ma lona aiga ia aoaoga a Iesu Keriso ma ua latou mauaina le mana o le Agaga Paia i le ala lava e tasi na maua ai e Peteru ma isi soo.

Valaaulia se tamaitiiti aoga e faitau leotele le Galuega:11:16–17. Fai i le vasega e mulimuli ai, ma vaavaai mo le saunoaga faaiu a Peteru i le au soo.

  • O le a sou manatu o le a le uiga o le tala a Peteru ina ua ia fai mai, “O ai ea au nei, ou te mafaia ona vavao atu i le Atua?” (fuaiupu 17)? (E le teena e Peteru le finagalo o le Atua e avatu i Nuuese le avanoa e talia ai le talalelei, salamo, ma papatisoina.)

Valaaulia le vasega e faitau filemu le Galuega 11:18, ma vaavaai pe na faapefea ona tali atu le au soo i le faamalamalamaga a Peteru.

  • Na faapefea ona tali atu le au soo i le taimi na latou iloa ai na taitaiina ia Peteru e le Atua?

  • O le a le mataupu faavae o aoao mai e lenei tala e uiga i le ala e mafai ai ona tatou lagolagoina ma mulimuli ia i latou o e pule faamalumalu i le Ekalesia? (E ono faailoa mai e le vasega ni mataupu faavae eseese, ae ia mautinoa ua latou malamalama e faapeaa tatou iloa e faapea o i latou o e pule faamalumalu i le Ekalesia e taitaia e le Atua, e mafai ona tatou lagolagoina ma le mautinoa ma mulimuli ia i latou. O le mataupu faavae lenei na faamautuina i tusitusiga paia o ona po nei, ia o loo tusia ai e faapea e faaali mai e le Atua Lona finagalo ia i latou o e umia ki o le perisitua e pulefaamalumalu ai [tagai MF&F 28:2, 7; 42:11; 107:65–66].)

  • Na faapefea ona e iloa o i latou o e pule faamalumalu i le Ekalesia e taitaia e le Atua?

  • O le a le fautuaga mai perofeta ua e fiifilia e mulimuli ai ona ua e iloa e taitaiina ia Perofeta e le Atua?

Valaaulia le vasega e faatu se sini ia maua se molimau malosi atu e faapea o i latou o e pule faamalumalu i le Ekalesia e taitaia e le Atua.

Galuega 11:19–30

E agai pea le galuega a le Alii i luma tusa lava po o a sauaga.

Aotele le Galuega 11:19–30 i le faamatala atu e faapea, ona o sauaga, e toatele le au soo sa faasalalauina i le itulagi atoa ae sa latou folafola atu ma le faamaoni le talalelei a Iesu Keriso i soo se mea lava sa latou o i ai.

Tala ma Faamatalaga o Talaaga

Galuega 10:21–24. Sa manaomia ona aami atu e Konelio ia Peteru ina ia maua ai sauniga o le talalelei

“O le vaaia o se agelu po o le maua o se asiasiga mai le lagi e le maua ai le faaolataga; o le tausia o poloaiga e maua ai. Sa moomoo Konelio mo le faaolataga, ma ina ia mauaina, sa tatau ona ia usitaia ona mataupu. O le agelu na faaali atu ma tuuina atu ia Konelio uluai faatonuga, sa mafai lava ona ia tau atu ia te ia le mea e fai, ae sa ia auina atu o ia ia Peteru, o le sa umia le pule i le lalolagi. O le mamanu lea i le malo o le Atua. O le tulaga lea i lena taimi, sa maitauina ai e Iosefa Samita: … ‘Na tau atu e le agelu ia le toeaina lelei o Konelio e tatau ona ia aami ia Peteru e aoao mai ai pe faapefea ona faasaoina: E mafai e Peteru ona papatiso atu ae e le mafai e agelu, pau lava le mea ia i ai taitai aloaia i le tino e umia ki o le malo, po o le pule o le perisitua ” [Aoaoga a Peresitene o le Ekalesia: Iosefa Samita (2007), 110; ua faaopoopo le faatusilima]” (The Life and Teachings of Jesus and His Apostles [Church Educational System manual, 1979], 252).

Galuega 10:45. O le meaalofa o le Agaga Paia

I le Galuega 10:45, o le fasifuaitau “o le meaalofa o le Agaga Paia” e faasino i le mana o le Agaga Paia, lea na oo mai i luga o nei Nuuese. E ese mai lea mai i le meaalofa o le Agaga Paia, lea tatou te maua e ala i le sauniga o le faamauga pe a uma le papatisoga (tagai Galuega 8:14–17; Aoaoga a Peresitene o le Ekalesia: Iosefa Samita (2007), 97.

Galuega 11. E taitaia e le Atua Lana Ekalesia e ala i faaaliga i Lana perofeta, le Aposetolo sinia

Sa saunoa Elder L. Tom Perry o le Korama a Aposetolo e Toasefululua i le faatulagaga tatou te maua ai faaaliga mo le Ekalesia:

“E i ai le faatulagaga i le auala e faaali mai ai e le Alii Lona finagalo i tagata. Ua ia i tatou uma le aia tatau tatou te ole atu ai i le Alii ma maua mai ai musumusuga e ala i Lona Agaga e faatatau i vaega o loo aofia ai i totonu o la tatou tausiga. E mafai ona maua e matua ia faaaliga mo o latou lava aiga, o se epikopo mo lana aulotu ua tofia i ai o ia, ma e faapena foi i le Au Peresitene Sili mo le Ekalesia aoao. Peitai, e le mafai ona tatou mauaina faaaliga mo se tiutetauave o se isi. Ua folafola mai e le Perofeta o Iosefa Samita:

“‘E feteenai ma le faatulagaga a le Atua mo soo se tagata o le Ekalesia, po o soo se isi lava, e mauaina ni faatonuga mo e o loo i ai le pule, e sili atu i lo latou’ (Aoaoga a Peresitene o le Ekalesia: Iosefa Samita [2007], 210). Iosefa Samita (2007), 197–98]” (“Matou Te Talitonu i Mea Uma Ua Faaalia Mai e le Atua,” Ensign po o le Liahona, Nov. 2003, 85–86).

Galuega 11. E tele taimi e oo mai ai e tului mai ai le oo mai o faaaliga a o tatou galulue i mea ua tatou iloa

Sa faatusa e Elder David A. Bednar o le Korama a Aposetolo e Toasefululua, le tului mai faasolosolo o faaaliga i le oso ae o le la:

“O le faateleina faifai malie o le susulu o le malamalama mai le oso a’e o le la, e pei lava o le mauaina o se feau mai le Atua i lea ‘upu ma lea upu, o le fuaiupu ma le fuaiupu’ (2 Nifae 28:30). O le tele lava o taimi, e oo mai faaaliga i nai faaopoopoga laiti mo sina taimi, ma e tuuina mai e tusa ai ma o tatou manaoga, agavaa, ma tapenapenaga. O na fesootaiga mai le Tama Faalelagi e faasolosolo malie mai ma le le gaoiā ma ‘toto ifo [i o tatou agaga] e pei o le sau mai le lagi’ (MF&F 121:45). O lenei mamanu o faaaliga e foliga mai e taatele nai lo le seāseā tupu” (“O Le Agaga o Faaaliga,” Ensign po o le Liahona, Me 2011, 88).