Na teena Paulo e le tele o Iutaia i Korinito ae sa faamanuiaina i Nuuese. Sa fesoasoani se ulugalii amiotonu o Akula ma Pisila ia Apolo ia malamalama i ala o le Atua. Sa talai atu e Paulo le Agaga Paia, faia vavega, ma aloese mai i tagata vaovaogata i Efeso.
Faitau leotele fesili nei, ma valaaulia le vasega e tusi a latou tali i a latou api o le vasega po o api talaaga mo suesuega o tusitusiga paia:
O a ni auala na e auai ai i le faatinoga o le galuega a le Alii?
O a ni luitau na e oo i ai a o e taumafai e faia le galuega a le Alii?
Fai i ni nai tamaiti aoga e faasoa mai a latou tali. Valaaulia le vasega e vaavaai mo se mataupu faavae a o latou suesue i le Galuega 18ia e mafai ona fesoasoani ia i latou a o taumafai e faia le galuega a le Alii.
Aotele le Galuega 18:1–4i le faamatala atu e faapea na tuua e Paulo ia Atenai ae malaga atu i Korinito, lea na ia aoao atu ai i le sunako e uiga ia Iesu Keriso. (Atonu e te manao e valaaulia le vasega e susue i le Faafanua o le Tusi Paia, nu. 13, “O Malaga Faafaifeautalai a le Aposetolo o Paulo,” ma sue ai Atenai ma Korinito.)
Fai i tamaiti aoga e faitau leotele le Galuega 18:5–6. Valaaulia le vasega e mulimuli ai, ma vaavaai mo luitau na oo i ai Paulo a o ia aoao atu ia Iutaia i Korinito e uiga ia Iesu Keriso.
O a luitau na feagai ma Paulo?
O le a le mea na fuafua ia Paulo e fai ona sa teena e Iutaia sa i le sunako lana savali?
Valaaulia se tamaitiiti aoga e faitau leotele le Galuega 18:7–10. Fai i le vsega e mulimuli ai, ma vaavaai mo mea na tutupu atonu na avatu ai le faamalosiauga ia Paulo.
O le a le mea na tupu atonu na avatu ai le faamalosiauga ia Paulo?
E tusa ai ma le fuaiupu 10, o le a le mea na folafola atu e le Alii ia Paulo pe afai na te talai atu le talalelei?
O le a le mataupu faavae e mafai ona tatou aoao mai i nei fuaiupu e uiga i le mea o le a faia e le Alii ia i latou o e faia ma le agavaa Lana galuega? (E ono faaaoga e le vasega ni upu eseese, ae ia mautinoa latou te faailoa maia le mataupu faavae lenei: Afai tatou te ola agavaa, o le a faatasi le Alii ma i tatou a o tatou faia Lana galuega.
Aisea e taua ai le iloa o le a faatasi le Alii ma oe a o e faia Lana galuega?
Fai atu i se tamaitiiti aoga e faitau leotele le faamatalaga lenei mai ia Peresitene Thomas S. Monson:
Ata
Peresitene Thomas S. Monson
“Atonu e i ai nisi o outou e matamumuli i o outou natura, pe manatu ane ia te outou lava e faapea e le gafatia ona talia o se valaauga. Manatua o le … galuega lenei a le Alii, ma a tatou i ai i le feau a le Alii, ua ia i tatou le aia tatau mo le fesoasoani a le Alii. Manatua o le a faagafatiaina e le Alii le tua e tauamo ai le avega e tuu i ai” (“Ia Aoao, Ia Faia, Ia Avea Ai,” Ensign po o le Liahona, Nov. 2008, 62).
O anafea na faatasi ai le Alii ma oe a o e faia Lana galuega? Na faapefea ona e iloa sa faatasi o Ia ma oe?
Aotele le Galuega 18:11–17i le faamatala atu e faapea sa talai atu pea Paulo i Korinito mo se tausaga ma le afa (e peiseai sa ia tusia ai lenei tusi i Tesalonia i le taimi lena). A o i ai o ia i Korinito, sa taumafai ni tagata Iutaia e faamasinoina Paulo i mea sa ia aoao atu, ae sa teena e le sui konesula le moliaga.
Ua fesoasoani Akula ma Pisila ia Apolo ia malamalama i ala o le Atua
Aotele le Galuega 18:18–23i le faamatala atu e faapea o se tane ma se ava, o Akula ma Pisila, sa faatasi ma Paulo i Efeso. Na tuua le ulugalii i Efeso, ae malaga atu Paulo i Ierusalema ona alu atu ai lea i matu i Anetioka. I Anetioka, sa ia faaiuina ai lana malaga faafaifeautalai lona lua, lea na alu ai le tolu tausaga ma sa aofia ai le 3,000 maila (pe tusa ma le 4,828 kilomita). Ina ua mavae se taimi, sa tuua e ia o Anetioka ma amata ai lana malaga lona tolu faafaifeautalai, ma malaga atu ai i paranesi sa ia faavaeina talu ai ma faamalolosia ai tagata o le ekalesia.
Valaaulia se tamaitiiti aoga e faitau leotele le Galuega 18:24–25. Fai i le vasega e mulimuli ai, ma vaavaai mo mea na tutupu i Efeso ina ua tuua e Paulo.
O le a le mea na tupu i Efeso ina ua tuua e Paulo?
O le a le mea ua uma ona malamalama i ai Apolo e uiga i “mea a le Alii”? (fuaiupu 25).
O le a le mea e lei iloa e Apolo? (“Ua na o le papatisoga a Ioane” [fuaiupu 25], e lei i ai ia Apolo se malamalama i le atoaga o le talalelei a le Faaola.)
Valaaulia se tagata e faitau leotele le Galuega 18:26. Fai i le vasega e mulimuli ai, ma vaavaai mo mea na faia e Akula ma Pisila ina ua la faalogo i aoaoga a Apolo.
O le a le mea na faia e Akula ma Pisila ina ua la faalogo i aoaoga a Apolo?
O le a le uiga o le sa la “faamatala atu atili le ala o le Atua ia te ia”? (fuaiupu 26). (Na aoao atili atu e Akula ma Pisila ia Apolo e uiga ia Iesu Keriso ma Lana talalelei, lea na faaopoopo i le poto ma le malamalama o Apolo.)
Valaaulia se tamaitiiti aoga e faitau leotele le Galuega 18:27–28. Fai i le vasega e mulimuli ai, ma vaavaai mo se faamaoniga e faapea na fesoasoani Akula ma Pisila ia malamalama atili ia Apolo i ala o le Atua.
O a fasifuaitau i nei fuaiupu o loo tau mai ai na fesosoani Akula ma Pisila ia malamalama atili ia Apolo i ala o le Atua?
Ua faaee atu e Paulo le meaalofa o le Agaga Paia ma faia vavega
Faamatala ina ua uma ona malaga atu Paulo i nofoaga eseese, sa ia toe foi atu loa i Efeso. Valaaulia se tamaitiiti aoga e faitau leotele le Galuega 19:2–6 . Fai i le vasega e mulimuli ai ma vaavaai pe na faapefea ona fesoasoani ia Paulo i tagata i Efeso ia malamalama atili i ala o le Atua.
O le a le aoaoga faavae na fesoasoani Paulo i le au soo i Efeso ia malamalama atili i ai?
Valaaulia se tagata e faitau e uiga i le faamatalaga na lomia ma faasalalau i lalo o le taitaiga a le Perofeta o Iosefa Samita, ma fai i le vasega e faalogologo pe aisea na manaomia ai ona toe papatiso nei tagata:
“E foliga mai … sa i ai se tagata finauvale Iutaia na faia papatisoga e pei o Ioane [le Papatiso], ae sa galo ona tau atu ia i latou e i ai le o mulimuli mai o lona suafa o Iesu Keriso, e papatiso atu i le afi ma le Agaga Paia:—lea sa faaali atu ai i nei tagata liliu mai sa lei aloaia lo latou papatisoga, ma ina ua latou faalogo i lenei mea sa papatisoina i latou ma le fiafia, ma ina ua uma ona faaee atu o lima i o latou luga, sa latou maua ia meaalofa e tusa ai ma le folafolaga” (“Baptism,” editorial published in Times and Seasons, Sept. 1, 1842, 904; spelling modernized; Joseph Smith was the editor of the periodical).
Aisea na manaomia ai ona toe papatiso nai nei tagata i Efeso?
O a upumoni e uiga i le papatisoga e mafai ona tatou aoao mai i leGaluega 19:2–6? (E ui atonu e faaaoga e le vasega ni upu eseese, fesoasoani ia latou faailoa maia ia upumoni nei: O le papatisoga e tatau ona faatino e se auauna a le Atua ua faatagaina. Ina ia atoa lelei le papatisoga, e tatau ona o faatasi ma le taliaina o le Agaga paia.
Valaaulia se tagata e faitau leotele le faamatalaga lenei mai i le Perofeta o Iosefa Samita.
Ata
Perofeta o Iosefa Samita
“E sili ai lou papatisoina o se taga oneone pei o se tagata, pe a le faia ma le faamoemoe o le faamagaloga o agasala ma maua le Agaga Paia. O le papatisoga i le vai o se afa papatisoga, ma e leai se uiga e aunoa ma le isi afa—o lona uiga, o le papatisoga a le Agaga Paia” (Aoaoga a Peresitene o le Ekalesia: Iosefa Samita [2007], 95).
Aotele le Galuega 19:7–10i le faamatala atu e faapea sa faaauau pea ona talai atu Paulo i Efeso mo le silia ma le lua tausaga.
Valaaulia se tamaitiiti aoga e faitau leotele le Galuega 19:11–12. Fai i le vasega e mulimuli ai, ma vaavaai po o a vavega na tutupu i Efeso a o i ai Paulo iina.
O a vavega na faia e le Atua e ala ia Paulo?
O le a le upumoni e mafai ona tatou aoaoina mai i lenei tala e uiga i le mea e faia e le Atua e ala i Ana auauna tofia ? (I le faaaogaina o a latou lava upu, e ao i le vasega ona faailoa mai se upumoni e pei o nei: O le auala e faaalia mai ai e le Atua Lona mana e ala mai lea i Ana auauna tofia .
Valaaulia se tamaitiiti aoga e faitau leotele le Galuega 19:13–16. Fai i le vasega e mulimuli ai, ma vaavaai mo mea na tutupu ina ua taumafai nisi o Iutaia e tutuli temoni e pei ona sa faia e Paulo.
O le a le mea na tupu ina ua taumafai ia atalii e toafitu o le faitaulaga sili e tuli ese se agaga leaga?
O ai na iloa e le agaga leaga? O ai e lei iloa e le agaga leaga?
Aisea na le iloa ai e le agaga leaga ia atalii o Seva? (Aua e lei tofia i latou e galulue i le suafa o Iesu Keriso.)
Valaaulia se tamaitiiti aoga e faitau leotele le Galuega 19:17–20. Fai i le vasega e mulimuli ai, ma vaavaai mo mea na faia e le toatele o tagata ina ua latou iloa e uiga i lenei mea na tupu. Faamatala o “togafiti faataulaitu”(fuaiupu 19)e faasino i faataulaitu ma isi faiga faatiapolo.
O le a le mea na faia e tagata e toatele ina ua maea lenei mea e faaalia ai sa latou faatuatua ia Iesu Keriso? (Sa latou tautau atu ma lafoai a latou faiga faatiapolo e ala i le susunuina o a latou tusi e faatatau i na faiga.)
O le a le mataupu faavae e mafai ona tatou aoao mai i nei fuaiupu e uiga i le ala e faaali atu ai lo tatou faatuatua ia Iesu Keriso? (E ono faaaoga e le vasega ni upu eseese, ae ia mautinoa latou te faailoa maia le mataupu faavae lea: O le tautau atu ma lafoai ia faiga faatiapolo, e tatou te faaalia ai lo tatou faatuatua ia Iesu Keriso.
O a osigataulaga atonu tatou te manaomia ona faia ina ia lafoaia ai se agasala sa tatou tautau atu?
Molimau atu i le taua o le faaali atu o lo tatou faatuatua ia Iesu Keriso e ala i le le gata ina tautau atu o a tatou agasala ae ia lafoai foi soo se mea e ono taitai ai i tatou e toe foi i na agasala.
Valaauliale vasega e mafaufau pe i ai se mea i o latou olaga e finagalo le Alii ia latou lafoaia. Fautuaina i latou e faatino soo se uunaiga latou te lagonaina i lenei lesona.
O le au tapuai i le atua fafine pepelo o Tiana sa latou tautatala leaga ia Paulo ma afua ai se vavao tele i le aai
Aotele le Galuega 19:21–41i le faamatala atu e faapea o le vaega o le tamaoaiga i Efeso sa mafuli i le tapuai ia Tiana, o se atua fafine pepelo o Roma. O le talai atu o Paulo e faasagatau i le tapuai i atua pepelo sa afua ai ona liliu ese mai ia Paulo ia le au tufuga sa faia faletapuai ma faatagata o Tiana. Sa faapotopoto tagata i le fale mataaga (lea e mafai ona ofi ai tagata e 24,000) ma le fenumiai ma le vavao. Sa manao Paulo e tautala atu i le potopotoga, ae sa tauanauina o ia e nisi o le au soo ma taitai o le malo e aua nei ulu atu i le fale mataaga. Sa iu ina faatoafilemu e le tusiupu o le taulaga le potopotoga, ma ua faataapeina. Ta’u i ai o le puipuiga o Paulo o se faataitaiga lea o le ala e le faavaatuia ai le galuega a le Atua e oo lava i le feagai ai ma tetee a e amioleaga. (O le taimi lea i Efeso [pe tusa o le T.A. 57] na tusia ai e Paulo le 1 Korinito.)
Faaiu i le molimau atu e uiga i upumoni na aoaoina i lenei lesona.
Tala ma Faamatalaga o Talaaga
Galuega 9:11–12. Pe mafai ona faamaloloina se tasi i se na o se solosolo lava ia?
Na aoao mai Elder Bruce R. McConkie o le Korama a Aposetolo e Toasefululua:
“O le faamalologa e oo mai i le mana o le faatuatua; e leai se mana o le faamalologa po o se mana i soo se vaega o se lavalava po o se isi lava mea faitino, tusa pe o se mea a Paulo po o Iesu po o se tasi lava. Ae o sauniga ma mea faitino e mafai ona faaaoga e fesoasoani e faateleina ai le faatuatua”(Doctrinal New Testament Commentary, 3 vols. [1965–73], 2:169).
Galuega 18:18. “O le sele mama o lona lauulu … : aua ua na fai lana tautoga”
Na faamatala mai e Elder Bruce R. McConkie o le Korama a Aposetolo e Toasefululua, le mea lenei e uiga i le fuaiupu lenei:
“’E avea o se faatosinaga i le amiotonu patino silisili, o se mea lelei ma le tatau ai mo le au paia ona faia ni tautoga faifai soo i le Alii. O ni folafolaga paia na e faatino ai ni tiute, e aloese ai mai ni agasala, tausia ni poloaiga, pe fetuleni atu ai i luma i se auaunaga sili atu i le malo. O lea na tauto ai Iakopo e talia ia Ieova e fai mona Atua ma totogi se sefuluai faamaoniKene. 28:20–22), sa tauto foi Hana e ofo atu Samuelu i le Alii mo lana galuega. (1 Sam. 1:9–18.)
“’E ao i le au paia ona ofo atu a latou tautoga i le aso o le Alii ma i aso uma (MF&F 59:8–12); ma a tuuina atu loa, ua tatau loa ona tausisia. (MF&F 108:3; Num. 30:2; Failau. 5:4–5.) …’ (Mormon Doctrine, 2nd ed., p. 825.)
“O le tautoga a Paulo e le o manino. Mai le mea moni e faapea na ia sele mama lona ulu ua manatu ai atonu na mulimuli o ia i le agaifanua faa-Iutaia lea e faatatau i le au Naseri. Num. 6.) Afai o lea, na ia faatinoina se sauniga e le tatau ai ma e le sa’o, mo le faamoemoe manino o le faaamuamu a le o le vaega faa-Iutaia o le Ekalesia po o tagata ua tatau ona liliu i le faa-Iutaia po o mea uma ia e lua. Bruce R. McConkie, Doctrinal New Testament Commentary, 3 vols.(1965–73), 2:165.
Galuega 19:13. O isi o le au taulaitu Iutaia, o faataulaitu”
Na aoao mai e Elder Bruce R. McConkie o le Korama a Aposetolo e Toasefululua, le mea lenei e uiga i faitaulaga pepelo:
“I se faataitaiga o le faatulagaga tonu e tutuliese ai temoni mai tagata, e taumafai ia faifeau pepelo (e le o i ai le mana tonu o le perisitua) e tutuliese e ala i mea faataulaitu. O lenei faiga e le faaleatua atonu sa sili ona masani ai anamua nai lo le taimi nei, aua e toaitiiti ni nai tagata i aso nei e talitonu i vavega po o le tutulieseina o temoni moni. Ae i le tele o tausaga e le o se mea sa lei masani ai i nei faitaulaga ona taumafai e aveesea agaga leaga mai tagata pe tutuliese mai ni nofoaga faapitoa e ala i lagiga faasaualii, togafiti faataulaitu, po o le faatauanau loto”(Mormon Doctrine, 2nd ed. [1966], 259).