Galuega 20–22

Folasaga

Sa folafola atu e Paulo le talalelei i Asia (o Take i le taimi nei), ma ao i ai o ia i Mileta, o se aai e lata i Efeso, sa lapataia o Ia o le a i ai se liliuese i le lumanai ma sa fautuaina ai taitai perisitua ia faagaeetia tagata o le Ekalesia. Ona malaga atu lea o ia i Ierusalema, lea sa sauaina ai o ia ma puefaapagotaina. A o tu ai i luga o faasitepu o le olo i Anetonia (o se aai sa nofoolo ai fitafita a Roma), sa faasoa atu ai e Paulo le tala o lona liuaina.

Fautuaga mo le Aoaoina Atu

Galuega 20:1–21:40

Ua auauna atu Paulo i Asia ma malaga atu i Ierusalema, lea sa sasaina ai o ia ma puefaapagotaina.

Fai i le vasega e mafaufau i se taimi na tatau ai ona latou tuua o latou aiga, uo, ma isi tagata latou te alolofa i ai mo ni nai aso, vaiaso, po o masina.

O a ituaiga lagona na e mauaina pe mauaina e i latou sa outou mafuta ae e te le i tuua i latou?
O le a sau tala ia i latou taitoatasi ina o le a e alu?

Faamatala i le taimi o le malaga lona tolu faafaifeautalai a Paulo, sa ia faaaluina se taimi i Maketonia, Eleni, ma Asia. I le taimi o lea malaga, sa uunaia o ia e toe foi i Ierusalema. A o malaga atu o ia, sa malolo e folafola atu ma faatofa i tagata o le Ekalesia i le ala. O le po na sosoo ma lona tuuvaaese atu mai Teroa, i le aso Sapati fou (Aso Sa), na faapotopoto ai Paulo ma le au soo e aai ma feinu i le faamanatuga (tagai Galuega 20:7). Ona talanoa lea o Paulo ma le Au Paia i le po atoa.

Valaaulia se tamaitiiti aoga e faitau leotele le Galuega 20:9–12. Fai i le vasega e mulimuli ai, ma vaavaai mo mea na tutupu i se taulealea e igoa ia Eutiko ina ua moe i le taimi o le lauga a Paulo.

O le a le mea na tupu ia Eutiko?
O le a le mea na fai e Paulo e faaalia ai le alofa ma le popolega mo lenei taulealea?
E faapefea i mea na faia e Paulo ona atagia mai ai le galuega a le Faaola?

Faamatala o se vaega o le malaga lona tolu faafaifeautalai a Paulo, na faaalu ai e Paulo pe tusa ma le tolu tausaga i Efeso e galue ai i tagata iina. Aotele le Galuega 20:13–17e ala i le faamatala atu i lona agai atu i Ierusalema, sa malolo ai Paulo i Meleto, e i tuapa o Efeso, ma auina atu le feau mo taitai o le Ekalesia o Efeso ia latou feiloai.

Valaaulia se tamaitiiti aoga e faitau leotele le Galuega 20: 18–23. Fai atu i le vasega e mulimuli i le faitauga, ma vaavaai mo le mea na faamatala atu e Paulo e uiga i lana galuega.

Na faapefea ona faamatala e Paulo lana galuega faafaifeautalai?
Mata o le a le uiga o le faamatalaga a Paulo e faapea na te “lei natia se mea aoga” (fuaiupu 20) mai ia i latou sa ia aoaoina?
E tusa ai ma lefuaiupu 23, o le a le mea sa naunau Paulo la te fetaiai o se auauna a le Alii?

Faamatala sa matuai ono faigofie ona lamatia Paulo i Ierusalema, i le mea sa vaavaai atu ai taitai Iutaia ia te ia o se tagata faalata ona o ana taumafaiga e folafola atu le talalelei a Iesu Keriso.

E tusa ai ma le fuaiupu 22, aisea na loto ai Paulo e alu i Ierusalema?

Valaaulia ni nai tamaiti aoga e feauauai i le faitauina leotele mai o le Galuega 20:24–27. Fai i le vasega e mulimuli ai, ma vaavaai mo mea sa sauniuni ia Paulo e fai o se auauna a le Alii.

E tusa ai ma le fuaiupu 24, o le a le mea sa saunia ai Paulo e fai o se auauna i le Alii?
O a lagona na fai mai Paulo na ia lagonaina i le faia o le mea sa faatonuina ai e le Alii?
O le a se mea e mafai ona tatou aoaoina mai i faataitaiga a Paulo o le auauna atu? (E ono faaaoga e le vasega ni upu eseese ae ia mautinoa latou te faailoa maia le upumoni lenei: O auauna moni a le Alii e faatinoina ma le faamaoni o latou tiute, ma o le faia faapea latou te lagonaina ai le olioli.
O le a le uiga ia te oe o le faatinoina ma le faamaoni o ou tiute?
E mafai faapefea ona tatou faaaogaina lenei upumoni i o tatou lava olaga?

Valaaulia le vasega e faasoa mai se taimi na latou iloa pe iloa e se tasi ona filifili e auauna atu i le Alii ma lo latou malosi ma le manatu atoa ma iloa ai le olioli tele.

Faamanatu i le vasega na asiasi atu Paulo i taitai o le Ekalesia i Efeso mo le toe taimi a o lei tuua mo Ierusalema.

Pe ana e i ai i le tulaga o Paulo ma iloa e te le toe vaai i taitai o le Ekalesia i Efeso, o le a se fautuaga e te avatu ia i latou ae e te lei tuua?

Fai i le vasega e faitau lemu le Galuega 20:28–31 ma vaavaai mo lapataiga na tuu atu e Paulo i nei taitai o le Ekalesia.

O a mea na lapataia ai e Paulo ia taitai?

Faamatala sa faaaoga e Paulo luko o se upu valiata mo tagata le faamaoni o e sa faaoleole i tagata faamaoni o le Ealesia.

O le a le upu tatou te faaaogaina e faamatala ai le tulaga o i latou o e liliu ese mai le upumoni ma saili e taitai ese atu isi tagata mai le upumoni? (Liliuese: Faamatala sa lapataia e Paulo ia taitai o le Ekalesia i le liliuese o le a i ai i le lumanai i totonu o le Ekalesia.)

Valaaulia se tamaitiiti aoga e faitau leotele le Galuega 20:36–38. Fai atu i le vasega e mulimuli i le faitauga, ma vaavaai pe na faapefea ona tali atu taitai o le Ekalesia ina ua tuua e Paulo. Valaaulia tagata aoga e lipoti mai mea ua latou mauaina.

Otooto le Galuega 21:1–10e ala i le faamatalaina atu e faapea na faaauau pea e Paulo lana malaga agai atu i Ierusalema ma malolo i itulagi eseese e faaalu ai se taimi ma tagata o le Ekalesia a o faagasolo lana malaga. Ina ua malolo Paulo i se aai e igoa o Turo, o nisi o soo—sa iloga le popole mo le saogalemu o Paulo—ma sa fautuaina Paulo e aua nei alu i Ierusalema (tagai Galuega 21:4).

I Kaisareia, sa valoia ai e se perofeta e igoa ia Akapo le mea o le a tupu ia Paulo i Ierusalema. Valaaulia se tagata aoga e faitau leotele le Galuega 21:11. Fai atu i le vasega e mulimuli i le faitauga, ma vaavaai mo le mea na valoia e Akapo. (Atonu e te manao e faamalamalama atu o le upu fusi e faasino i se fusipau.) Valaaulia tagata aoga e lipoti mai mea ua latou maua.

Valaaulia se tamaitiiti aoga e faitau leotele le Galuega 21:12–14. Fai i le vasega e mulimuli ai, ma vaavaai pe na faapefea ona tali atu Paulo ma ana soa i le valoaga.

Na faapefea ona tali atu soa a Paulo i le valoaga?
Na faapefea ona tali atu Paulo i le valoaga? O le a se mea o tulaga ese mai ia te oe i le tali a Paulo?
O a mataupu faavae e mafai ona tatou aoaoina mai i le faataitaiga a Paulo e uiga i le avea ai ma auauna faamaoni a le Alii? (E ono faaaoga e le vasega ni upu eseese, ae ia mautinoa latou te faailoa maia le upumoni lenei: O auauna faamaoni a le Alii e naunau e faia le finagalo o le Atua tusa lava po o le a le tau patino.

Valaaulia le vasega e mafaufau i ituaiga o ositaulaga atonu e poloaiina i tatou e faia o ni auauna a le Alii.

O anafea na e naunau ai e faia le finagalo o le Atua tusa lava po o le a lona tau ia te oe? Aisea na e naunau ai e fai lena mea?

Valaaulia se tagata e faitau leotele le aotelega lea o le Galuega 21:17–40.

Na taunuu Paulo i Ierusalema ma avatu ai se lipoti o lana galuega faafaifeautalai i taitai o le Ekalesia i le lotoifale. Na alu Paulo i le malumalu, ma ina ua vaaia o ia e se vaega o Iutaia na iloaina Paulo mai ana malaga faafaifeautalai, sa latou folafola atu o Paulo o se aoao pepelo sa aoao atu faasagatau i le tulafono a Mose ma sa ia aumaia tagata o Nuuese i le malumalu e le tusa ai ma tulafono. Ona o lea tuuaiga, sa aveeseina mai ai ni tagata ia Paulo mai le malumalu ma amata ona sasa ia te ia. Sa faalavefau ia fitafita Roma ma aveina atu o ia ina ia faamasinoina. A o i ai o ia i alasitepu o le Olo o Antonia (tagai Faafanua o le Tusi Paia, nu. 12, “Ierusalema i ona Ona Po o Iesu”), sa talosaga ai Paulo i fitafita pe mafai ona ia tautala atu i tagata.

Galuega 22:1–30

Ua faamatala atu e Paulo lona liuaina ma molimau atu ia Iesu Keriso

Tusi le upuliua i le laupapa, ma faamatala atu e faapeao le liuao lona uiga ua suia. Fesili i le vasega pe mafai faapefea ona liua le vai pe suia ina ia mafai ai ona faaaogaina mo ni faamoemoega eseese. (Mo se faataitaiga, e mafai ona liua le vai i le aisa.) Fai i le vasega e mafaufau i ituaiga o suiga e aumaia e le liua i le talalelei.

Valaaulia se tamaitiiti aoga e faitau leotele le Galuega 22:1–5. Fai i le vasega e mulimuli ai, ma vaavaai pe na faapefea e Paulo ona faamatalaina o ia lava a o ia tautala atu i Iutaia mai alasitepu o le Olo o Antonia i Ierusalema.

Na faapefea ia Paulo a o lei liuaina o ia ma avea ma soo o Iesu Keriso?

Kopi fesili nei ma mau faasino i luga o le laupapape avatu i le vasega i se tufaaga. Vaevae le vasega i ni vaega se lima ma tofi atu i ai i vaega taitasi se tasi o fesili. Fai i le vasega e faitau lemu ia mau e o faatasi ma a latou fesili ua atofa atu i ai ona tali lea o fesili i a latou api po o api talaaga mo le suesueina o tusitusiga paia.

Na faapefea ona faamatalaina e Paulo lana uluai faaaliga? Galuega 22:6–9.
O le a le mea na faatonuina Paulo e fai? Galuega 22:10–11.
O ai na feiloai i ai Paulo i Tamaseko, ma o le a le mea na toe maua ai e Paulo? Galuega 22:12–13.
O le a le mea na valoia e Anania e uiga ia Paulo? Galuega 22:14–15)
O le a le mea na faaalia e Paulo i lona faatuatua ia Iesu Keriso? (Galuega 9:18; 22:16)

A uma ua lava se taimi, valaaulia le vasega e lipoti mai a latou tali. Valaaulia ni nai tagata e aotele mai mea sa latou aoaoina e uiga i le faagasologa o le liuaina o Paulo. (Atonu foi e te manao e faamatala e faapea i le va o le uluai faaaliga a Paulo ma le taimi na ia auauna atu ai o se faifeautalai, sa ia faaaluina le tolu tausaga i Arapi, lea atonu o se vaitau lea o le tapenapenaga faaleagaga ma le tuputupu ai [tagai Kalatia 1:11–18].) Ona fai atu lea o fesili nei:

E te manatu na faapefea ona suia Paulo ona o lona liuaina?
O le a le mea na tupu na mafai ai ona tupu nei suiga?
O le a se mea o mafai ona aoao mai e le liuaina o Paulo i le ala e mafai ona tatou liua? (E ono faaaoga e le vasega ni upu eseese, ae ia mautinoa latou te faailoa maia le upumoni lenei: A tatou usiusitai i upu a Iesu Keriso, e mafai ona tatou liua atoatoa.
E mafai faapefea ona fesoasoani lenei mataupu faavae i se tasi e manao ina ia liua?

Valaaulia se tagata e faitau leotele le saunoaga lea a Sister Bonnie L. Oscarson, le peresitene aoao o Tamaitai Talavou, lea sa ia faamatalaina ai le eseesega i le va o le i ai o se molimau i le talalelei ma le liua moni i ai:

“O le liua moni e sili atu nai lo le mauaina o se malamalama i mataupu faavae o le talalelei ma ua sili atu foi nai lo le mauaina o se molimau i na mataupu faavae. E mafai ona maua se molimau o le talalelei e aunoa ma le ola ai. O le liua moni o lona uiga ua tatou faatinoina mea ua tatou talitonu ai. …

“… E oo mai le liua ao tatou faatinoina ia mataupu faavae amiotonu na tatou aoaoina i totonu o tatou aiga ma le potuaoga. E oo mai le liua pe a tatou ola i ni olaga mama ma atoatoa ma olioli i le mafutaga ma le Agaga Paia” (“Ia Outou Liua,” Ensign po o le Liahona, Nov. 2013, 76, 78).

Faitau leotele le fesili lea, pe tusi i le laupapa: Pe mafai faapefea ona ou liua i le talalelei? Valaaulia le vasega e tusi a latou tali i a latou api o le vasega po o api talaaga mo le suesueina o tusitusiga paia.

Otooto le Galuega 22:17–30i le faamatala atu e faapea na tau atu e Paulo i lana aofia ina ua mavae lona liua, sa auina atu o ia e le Alii mai Ierusalema ina ia avea ma faifeautalai i Nuuese. Ona tautino ane lea e le aofia ua tatau ona fasiotia Paulo. Sa aumaia Paulo i luma o le taitai sili o le fitafita a Roma i Ierusalema, o le sa tonu ua tatau ona faatigainaina ia Paulo, pe sasaina, o se faasalaga e masani ona faaaoga e faamaasiasia ai ma ia maua mai ai faamatalaga mai tagata solitulafono. Peitai, ina ua iloa e taitai Roma o Paulo o se tagatanuu o Roma, o lea sa tonu ai e aua nei faatigainaina o ia ona e le tusa ai ma le tulafono a Roma le saisaitia pe faatigainaina se tagatanuu o Roma e “le faasalaina” (fuaiupu 25). Ona latou aumaia lea o ia i le fono o le pulega a Iutaia, le au Saneterini.

Faaiu i le faasoa atu o lau molimau e uiga i mataupu faavae na aoaoina i le Galuega 20–22.

Tala ma Faamatalaga o Talaaga

Galuega 22:1–24. Ua i a Paulo le lototele e faasoa atu ai le talalelei

Sa i ai i le Aposetolo o Paulo le lototele e faasoa atu ai lana molimau ia Iesu Keriso e ui ina sa i ai taunuuga ogaoga (tagai Galuega 22:1–24). Na aoao mai Peresitene Thomas S. Monson e faapea, o le lototoa e fai le mea sao, tusa lava pe le tausaafia ai, e manaomia pea lava e soo o Iesu Keriso:

“E tele ituaiga o lototele. Sa tusia e le tusitala Kerisiano o Charles Swindoll: ‘O le lototele e le na o le malaetau e tupu ai … po o le pueina ma le lototoa o se gaoi i totonu o lou fale. O tofotofoga moni lava o le lototele e tele ina leleoa. O tofotofoga patino ia, e pei o le tumau i le faamaoni pe a leai se tasi o tilotilo mai, … e pei o le tu na o oe pe a le malamalama isi ia te oe.’ Ou te faaopoopo atu e faapea o lea lototele patino o loo aofia ai foi le faia o le mea sa’o e tusa lava pe tatou te fefefe, i le puipuia o o tatou talitonuga ma e tusa foi pe faifai mai ai tagata ia i tatou, ma le faatumauina o na talitonuga e tusa lava pe faamatauina ai le ō ese o uo po o le faaletonu ai o o tatou tulaga faaleagafesootai. O ia o le tutumau mausali i le mea tonu e tatau ona malosi pea tusa lava pe le aloaia ma le taualoa mai lea taimi i lea taimi” (“Ia Faamalosi ma Lototele,” Ensign po o le Liahona, Me 2014, 67).