Lesona 118

Kalatia 1–4

Folasaga

Sa aoai e le Aposetolo o Paulo le Au Paia i Kalatia i le mulimuli atu i aoaoga sese ma aoao foi e mafai ona avea i latou ma suli o le Atua e ala i le faatuatua ia Iesu Keriso ma mulimuli ai.

Fautuaga mo le Aoaoina Atu

Kalatia 1–2

Ua aoai e Paulo le Au Paia i le mulimuli i aoao pepelo ma fautuaina i latou e toe foi i le talalelei

Valaaulia le vasega e manatu faapea ua i ai se tasi o o latou tei po o uo ua fai atu ua na le toe mautinoa pe moni ia aoaoga a le Ekalesia. O le mea la ua tupu, ua le toe alu le tagata lea i le lotu ua le toe ola i le talalelei. Fai i le vasega e tusi ia latou api o le vasega po o le api talaaga mo le suesueina o tusitusiga paia pe o a mea o le a latou fai atu ai i le tei lea po o le uo, e fesoasoani ai ia te ia e iloa e moni aoaoga a le Ekalesia.

Valaaulia le vasega e vaavaai mo se upumoni a o latou suesue i le Kalatia 1lea e mafai ona fesoasoani latou te iloa ai pe faapefea ona iloa aoaoga moni.

Faamatala o Kalatia o se itulagi i Asia i matu-tutotonu lea e aofia ai le tele o aai sa asia e Paulo i ana malaga lona lua ma le lona tolu faafaifeautalai (tagai Galuega 16:6; 18:23). (Atonu e te manao e valaaulia le vasega e sue Kalatia i le Faafanua o le Tusi Paia, nu. 13, “O Malaga Faafaifeautalai a le Aposetolo o Paulo.”) Valaaulia se tamaitiiti aoga e faitau leotele le Kalatia 1:6–7. Fai atu i le vasega e mulimuli i le faitauga, ma vaavaai mo se faafitauli i le Au Paia i Kalatia.

• Aisea na toatele ai le Au Paia i Kalatia na pauu ese mai le talalelei moni?

Faamatala o i latou na faavevesia le au Kalatia ma faapiopioina ia aoaoga o le talalelei sa latou faatupuina ia masalosaloga (tagai Kalatia 1:7, vaefaamatalaga a) e uiga i aoaoga a Paulo faapea e na o Iesu Keriso e maua ai le faaolataga. O nei aoao pepelo o Kerisiano Iutaia o e na fai mai e tatau ona peritomeina ia le Au Paia Kalatia (tagai Bible Dictionary, “Circumcision”) ma tausia ia sauniga o le tulafono a Mose ina ia mafai ona faaolaina ai.

Fesoasoani ia malamalama le vasega i le anotusi

O le anotusi o tusi paia o le faasologa o mea na tutupu, o tagata, o mea na tutupu, ma faamalamalamaga musuia lea e aofia i le tusiga faatusipaia. O loo aumaia ai le ola ma le ute o aoaoga faavae ma mataupu faavae e maua i se poloka mau. Fesoasoani ia malamalama le vasega i le anotusi ina ia mafai ai ona latou faailoa mai upumoni e faavavau o loo maua i le tusiga, ae aua nei soona faamamafaina na talaaga ma auiliiliga e oo ai ina avea ma fatu o le lesona.

Valaaulia se tamaitiiti aoga e faitau leotele le Kalatia 1:8–9. Fai i le vasega e mulimuli ai, ma vaavaai mo le mea na taua e Paulo e uiga ia i latou o e folafola atu se talalelei e feteenai ma lea na sa ia folafola atu o se Aposetolo a le Alii. Fai atu i tamaiti aoga e lipoti mai mea latou te mauaina.

Valaaulia se tamaitiiti aoga e faitau leotele le Kalatia 1:10–12. Fai i le vasega e mulimuli ai, ma vaavaai pe o ai le faapogai o aoaoga a Paulo.

• E tusa ai ma lefuaiupu 12, o ai le faapogai o aoaoga a Paulo?

• O le a le upumoni e mafai ona tatou aoao mai upu a Paulo i fuaiupu 10–12e uiga i le aoaoga faavae moni? (E mafai ona faaaoga e tamaiti aoga isi upu, ae ia mautinoa latou te faailoa mai le upumoni lenei: E faailoa mai e Iesu Keriso le mataupu moni i Ana perofeta.

• E mafai faapefea e le manatuaina o lenei upumoni ona fesoasoani ia i tatou pe a i ai a tatou fesili e uiga i aoaoga a perofeta?

Faamatala ona e faaalia e Iesu Keriso ia mataupu moni i Ana perofeta, o lea e mafai ai foi ona Ia faaali mai ia te i tatou le moni o aoaoga a se perofeta.

• O le a se mea e mafai ona tatou faia ia maua ai faaaliga mai le Alii ina ia mafai ai ona tatou iloa mo i tatou lava e moni aoaoga a perofeta

Faamanatu i le vasega le tulaga na e folasia atu i le amataga o le lesona. Valaaulia ni nai tagata e faamatala i le vasega pe faapefea ona latou faaaogaina le upumoni sa latou faatoa faailoa maia e uiga i faaaliga e tali atu ai i le tagata o loo fesiligia ia aoaoga a le Ekalesia.

Molimau atu e mafai ona tatou iloa aoaoga faavae moni a o tatou suesue i aoaoga a perofeta ma sailia faaaliga mai le Alii.

Aotele le Kalatia 1:13–2:21 i le faamatala atu sa toe faamatala e Paulo lona liua mai ma malaga amata faafaifeautalai. Sa ia faamatalaina foi faapea o le faaolataga e le o i ai i le tulafono a Mose, ae e faamagaloina i tatou, pe tauamiotonuina foi, e ala i le faatuatua ia Iesu Keriso.

Kalatia 3-4

Ua valaaulia e Paulo tagata Kalatia ia maua faamanuiaga uma na folafola atu ia Aperaamo e ala ia Iesu Keriso

Faitau leotele tulaga nei. A uma ona faitau mea taitasi, fai i se tagata e faamatala pe aisea e ono lagona ai e le tagata i le tulaga lea le le manuia i le mauaina o faamanuiaga uma a le Alii pe a faatusatusa i isi i le Ekalesia o e sa faamaoni i le talalelei mai lava i le laitiiti.

1. A i ai se alii talavou na ola ae i se aiga e le malolosi ma sa lei aoaoina i le talalelei a o laitiiti. Ua toe foi nei lona aiga ina malolosi i le Ekalesia ma ua amata ona aoao ma ola ai i le talalelei.

2. Sa faitioina e se tamaitai le Ekalesia mo le tele o tausaga. Sa ia mauaina talu ai nei se suiga o le loto ma ua papatisoina.

Valaaulia le vasega e vaavaai mo se upumoni a o latou suesueina le Kalatia 3–4lea e mafai ona fesoasoani ia i tatou ia malamalama ai pe o a faamanuiaga o loo avanoa mo tagata uma, tusa lava po o a tulaga ma filifiliga ua mavae.

Faamatala o le toatele o le Au Paia i Kalatia o ni tagata o Nuuese ua liliu mai i le faa-Kerisiano, ma e le o ni e na tupuga tonu mai ia Aperaamo, lea na folafola i ai faamanuiaga uma a le Atua. Valaaulia se tamaitiiti aoga e faitau leotele le Kalatia 3:7–9. Fai i le vasega e mulimuli ai, ma vaavaai mo mea sa aoao atu e Paulo e uiga ia i latou “o e faatuatua” fuaiupu 7, pe o e talitonu, ia Iesu Keriso.

• O le a le mea na aoao atu e Paulo e uiga ia i latou o e talitonu ia Iesu Keriso?

• E tusa ai ma le fuaiupu 8, o le a le mea na folafola atu e le Alii ia Aperaamo?

• E tusa ai ma le fuaiupu 9, o le a le mea o le a tupu ia i latou o e faatuatua ia Iesu Keriso?

Faamatala o le “ua manuia e ua faatuatua faatasi ma Aperaamo” e faasino i le avea ai o se mauaina faamanuiaga o le feagaiga na osia e le Atua ma Aperaamo e faapea e ala ia te ia o le a mafai ai ona olioli tagata uma i faamanuiaga o le talalelei (tagai Aperaamo 2:11).

Aotele le Kalatia 3:10–25i le faamatala atu faapea sa aoao atu e Paulo o le tulafono a Mose sa faamoemoe e fesoasoani ia Isaraelu e o mai ai ia Iesu Keriso ma tauamiotonuina ai e ala i le faatuatua ia te Ia.

Valaaulia se tamaitiiti aoga e faitau leotele le Kalatia 3:26–27. Fai i le vasega e mulimuli ai, ma vaavaai mo mea e tatau ona tatou faia ia maua ai faamanuiaga na folafola atu ia Aperaamo.

• O le a le mea e tatau ona tatou faia ia maua ai faamanuiaga na folafola atu ia Aperaamo?

Tusi le faamatalaga lenei e lei maea i luga o le laupapa: O i latou uma o e faatino le faatuatua ia Iesu Keriso ma ulu atu i feagaiga o le talalelei o le a avea …

Valaaulia se tamaitiiti aoga e faitau leotele le Kalatia 3:28–29 . Fai i le vasega e mulimuli ai, ma vaavaai mo upu po o fasifuaitau e mafai ona latou faaaoga e faamaea ai le faamatalaga o le aoaoga faavae e lei maea o loo i le laupapa.

• E tusa ai ma le fuaiupu 28, o a mea e avea ai tagata eseese pe a latou ulu atu i le feagaiga o le talalelei?

• E tusa ai ma le fuaiupu 29, o ai e avea ai i latou o e faitaulia faatasi ma fanau a Aperaamo e ala ia Iesu Keriso?

Faamatala o se sulio se tasi lea ua i ai aia tatau e ala i le tulafono e maua ai le esetete, poo meatotino, a se isi.

Valaaulia se tamaitiiti aoga e faitau leotele le Kalatia 4:7. Fai i le vasega e mulimuli ai, ma vaavaai pe o suli o ai e mafai ona avea ai i tatou.

• O suli o ai e mafai ona avea ai i tatou? (I le faaaogaina o upu a tagata o le vasega, faamaea le faamatalaga o le mataupu faavae o i le laupapa ina ia aumai ai le upumoni lea: O i latou uma o e faatino le faatuatua ia Iesu Keriso ma ulu atu i feagaiga o le talalelei o le a tasi ia Keriso ma suli o le Atua.

• Aisea e taua ai le iloa ua folafola mai e le Atua nei faamanuiaga i tagata ua o e ulu atu i le feagaiga, tusa lava po o a ona tulaga?

Molimau atu o folafolaga a le Tama Faalelagi e mo tagata ua o e ulu atu i le feagaiga o le talalelei. Fautuaina le vasega ia faamaoni i feagaiga ua latou osia.

Aotele le Kalatia 4:8–31i le faamatala atu sa valaaulia e Paulo le Au Paia Kalatia e toe foi ia Keriso ma ia sosola ese ai mai le noataga e maua mai le lagolagoina o le tulafono a Mose.

Tala ma Faamatalaga o Talaaga

Kalatia 1:8–10. “O se agelu mai le lagi”

O aoaoga a Paulo o loo tusia i le Kalatia 1:8–10 o nisi taimi e faaaoga sese ai e finau ai i faaaliga a agelu ma le folafolaina atu o se talalelei toefuataiina. Peitai, e lei aoao atu e Paulo faapea o faaaliga uma a agelu e tatau ona teena, aua ua faaali mai i tusi paia o le a o mai agelu i aso e gata ai e toe folafola le talalelei (tagai Faaaliga 14:6). Ae, a aoao atu Paulo e faapea afai e sau se agelu e tatai ese tagata mai le talalelei moni, ona tatau lea ona teena (tagai foi Alema 30:53). O le talalelei moni i aso nei, e pei ona sa i ai i ona po o Paulo, o loo taitaia e perofeta ma aposetolo ua faatagaina (tagai Efeso 2:19–20; 4:11–14) ma le faavae i “le alofatunoa o Keriso” (Kalatia 1:6; tagai foi 2 Nifae 2:8; 10:24).

Kalatia 2:11–16. O le feteenaiga a Paulo ma Peteru

Mo nisi faamatalaga e tusa ai ma le feeseeseaiga a Paulo ma Peteru a o asiasi atu Peteru i le Au Paia i Anetioka, tagai Tusi lesona a le Tagata Aoga o le Feagaiga Fou (Church Educational System manual, 2014), 413.

Kalatia 3:10–14. “O le faafanoga a le tulafono”

E pei ona tusia i le Kalatia 3:10, na aoao atu e Paulo e faapea o i latou o e saili ina ia tauamiotonuina i le tulafono a Mose, ua i ai le matafaioi e usitaia uma. “Ua tusia, ia faafanoina i latou uma o e le tumau i mea uma lava ua tusia i le tusi o le tulafono,” o le tala lea a Paulo. O lenei tulaga manaomia e le mafai ona fai, ua tuua ai foi tagata uma o e saili mo le tauamiotonuina e ala i le tulafono i lalo o le “faafanoga o le tulafono” (Kalatia 3:13). Sa faamatala atili e Paulo faapea o Iesu Keriso na puapuagatia mo “le faafanoga o le tulafono” e ala i le “faafanoina o ia mo i tatou” e ala i Lana Togiola (Kalatia 3:13). O le Togiola a Iesu Keriso, e mafai ai e tagata uma ona maua faamanuiaga a Aperaamo e ala i le faatino o le faatuatua ia Iesu Keriso ma ulu atu i le feagaiga o le talalelei.

Kalatia 3:24. “O le tulafono o lo tatou taitaitama”

Sa faamatala e Elder Paul V. Johnson o le Fitugafulu e faapea e toatele tagata i ona po o le Feagaiga Fou sa lei malamalama i le faamoemoega o le tulafono a Mose:

“E toatele Iutaia, e oo lava i Kerisiano Iutaia, … na lei iloa le faamoemoega ma le tulaga tatau o le tulafono. O se tasi mafuaaga mo lea mea o le faaopoopoga e lei faatagaina o mea e manaomia ma uputuu o sio ai le tulafono lea sa fesoasoani e faalafi ai lona faamoemoega moni. (Kalatia 3:24), ‘na faasino atu ai o matou agaga ia te ia’ (Iakopo 4:5), ae nai lo lena sa matua mamafatu ma faataumaoia ai o le ala lea na toatele ai Iutaia na latou vaai ai ‘i talaatu o le faailoga’ (Iakopo 4:14) ma tuu ai le tulafono ua faapiopioina nai lo le Faitulafono lava Ia” (“Responding Appropriately to Change” [address to Church Educational System religious educators, Feb. 8, 2013], 1, si.lds.org).

Kalatia 3:28. “Ua tasi lava outou uma ia Keriso Iesu”

O nisi taimi e faatuatuai ai ona papatiso tagata pe auai atoatoa i le Ekalesia ona e popole i latou faapea nei lafoai ai a latou aganuu pe faapea foi nei o latou lagona e le fetaui mo i latou. Na aoao mai Peresitene James E. Faust o le Au Peresitene Sili e faapea, o tagata o le Ekalesia e mafai ona eseese ma fusia faatasi foi:

“E le alu ese lo tatou tulaga faapitoa faaletagata i lo tatou avea ma tagata o lenei ekalesia. E avea i tatou ma suli i le malo o le Atua, ua tino e tasi ia Keriso ma ia faaleagaga ona tuu ese nisi o tatou eseesega faaletagata, ina ia tuufaatasia i le galuega sili faaleagaga. Matou te fai atu i ai latou uma ua auai i le Ekalesia, ia tausi i mea uma ua tamalii, lelei ma siitia i lau aganuu ma lou tulaga faapitoa faaletagata. E ui i lea, i lalo o le pule ma le mana o ki o le perisitua, e gauai ai eseesega uma a o tatou saili e avea ma suli o le malo o le Atua” (“O Suli o le Malo o le Atua,” Ensign, Iulai 1995, 62).

Manatu Faaopoopo mo le Aoaoina Atu

Kalatia 2:16–21. Ua aoao mai Paulo le mafuaaga e le tatau ai ona mulimuli i le tulafono a Mose.

Valaaulia se tamaitiiti aoga e faitau leotele le Kalatia 2:16 Fai i le vasega e mulimuli ai, ma vaavaai pe aisea na lei manaomia ai e le Au Paia o Nuuese ona usitai i sauniga uma o le tulafono a Mose.

• Aisea na lei manaomia ai e le Au Paia o Nuuese ona usitai i sauniga uma o le tulafono a Mose? (O “galuega o le tulafono” sa aofia ai se aofaiga o sauniga na fuafua e tuueseese ai Isaraelu mai isi malo ma faatalitali atu ai i le afio mai o Keriso. O le peritomeina o se tasi o nei galuega o le tulafono. Talu ai ua faataunuuina le tulafono ia Iesu Keriso, o lea sa manaomia ai e le Au Paia i Kalatia ona faatino lo latou faatuatua ia Iesu Keriso ina ia tauamiotonuina ai.)

• O le a le uiga o le tauamiotonuina? (“O le magalo mai se faasalaga mo le agasala ma tautino atu ai ua le tausalaina” [Taiala i Tusitusiga Paia, “Justification, Justify,” scriptures.lds.org].)

Valaaulia se tamaitiiti aoga e faitau leotele le Kalatia 2:18–20. Fai i le vasega e mulimuli ai, ma vaavaai mo mea na fai mai Paulo o le a “avea ai [o ia] o se tagata solitulafono” (fuaiupu 18).

• E tusa ai ma le fuaiupu 18,o le a le mea na fai mai Paulo o le a avea ai o ia o se tagata solitulafono? (O le toe fauina o mea sa ia faatamaiaina o lona uiga o le toe foi i ona talitonuga ma faiga muamua e ui lava ina ua faataunuuina le tulafono ia Keriso.)

Ina ia fesoasoani i le vasega ia malamalama i aoaoga a Paulo i le Kalatia 2:18–20, gaugau i le afa ni pepa se tolu. Tusi le uputalitonuga i se pepa e tasi ma le upu faiga i le isi. Faatutu nei pepa e lua e fai ai se faatafafa. Tuu le isi pepa i luga o le faatafafa e fai ai se taualuga, e pei ona faapupula mai i le atao loo avatu ai. Faamatala o lenei fale e faatusa i le olaga o Paulo a o lei avea o ia ma soo o Keriso.

• O le a le mea na faatamaia e Paulo pe tuua ina ia avea ai o se soo o Iesu Keriso? (O lona tausiga o le tulafono a Mose. A uma ona tali mai le vasega, tulei i lalo le fale.)

• Aisea o le a faia ai e Paulo ia lava o se tagata solitulafono pe afai e toe foi o ia i lona olaga tuai?

Tau i ai le fasifuaitau “faasatauroina faatasi ma Keriso” i le fuaiupu 20, ma faamatala sa faaaoga e Paulo lenei fasifuaitau e faamatala ai le faagasologa na ia ui ai e tuua ai ona talitonuga ma faiga tuai ma tuu atu ai ia faaumatia.

• E tusa ai ma le fuaiupu 20, na faapefea ona ola Paulo i lona soifuaga ina ua mavae lona liua mai? (Sa soifua o ia e ala i le faatuatua ia Iesu Keriso.)

• O le a se upumoni e mafai ona tatou aoao ai e faataitaiga a Paulo e uiga i le ala e ola ai i le faatuatua ia Iesu Keriso? (E mafai ona faaaoga e tamaiti aoga isi upu, ae ia mautinoa latou te faailoa mai lenei mataupu faavae: Tatou te faatino le faatuatua ia Iesu Keriso a o tatou tuu ese talitonuga ma faiga e feteenai a Lona finagalo ma le toe foi i ai. Tusi le upumoni lenei i luga o le laupapa.)

• O a ni faataitaiga o talitonuga po o faiga e ono tatau i se tagata ona lafoai ina ia mafai ai ona ola i le talalelei a Iesu Keriso?

Fai i le vasega e mafaufau i se tasi latou te iloa ua tuu ese ia talitonuga ma faiga tuai ina ia ola i se olaga fou ma sili ona faaleatua. Valaaulia le vasega e mafaufau pe na faapefea e lenei tagata ona faatuatua ia Iesu Keriso?

Valaaulia le vasega e mafaufau i soo se talitonuga po o faiga e ono tatau ona latou tuua. Fautuaina i latou e ola i le faatuatua ia Iesu Keriso e ala i le tuua o na talitonuga po o faiga i tua .