Sa tusi atu Peteru e faamalosi le faatuatua o le Au Paia a’o latou puapuagatia i le ogaoga o sauaga mai le Malo o Roma. Sa ia faamamafaina atu, ua togiolaina i latou e ala i le toto faapelepele o Iesu Keriso, ma faamanatu ia i latou lo latou tofi paia o se nuu tulaga ese o le Atua. Sa faatonuina e Peteru le Au Paia e viia le Atua i tagata ma onosai i puapuaga e pei ona sa faia e Iesu Keriso.
Faaaliga: Tagai i le autafa “Sauniuniga Muamua” e tapena ai mo le lesona 149.
Ua aoao e Peteru le Au Paia e uiga i o latou tofi faaolioli ma le alagatatau o tofotofoga
Ata
tunuma o loo sasaa mai ai le uamea ua liusuavai
Faaali pe tusi se ata o se tunuma, ma faamalamalama mai o se tunuma o se koneteina e faamama ai uamea po o isi mea, o lona uiga e faavevela ma faaliusuavai ina ia mafai ona aveese ai otaota ma faamalosi ai le oloa faaiu.
Valaaulia se tamaitiiti aoga e faitau leotele le saunoaga lenei mai ia Elder M. Russell Ballard o le Korama a Aposetolo e Toasefululua:
Ata
Elder M. Russell Ballard
“A’o ou malaga i le Ekalesia atoa, ou te vaai ai i tagata o le Ekalesia o tofotofoina i le tunuma o puapuagatia” (“Hyrum Smith: ‘Firm As the Pillars of Heaven,’” Ensign, Nov. 1995, 9).
O le a sou manatu, o le a le uiga o le fuaitau a Elder Ballard “tunuma o puapuagatia”? (O faafitauli luitauina po o faigata o le olaga.)
Faamalamalama atu, sa tusia e Peteru lana Tusi Muamua e faamalosi ma uunaia ai le Au Paia a’o latou feagai ma se tunuma o puapuagatia. Faamalamalama atu, ana le oo i le tusa o le T.A. 64, pe a o le vaitaimi na tusia ai e Peteru lenei tusi, sa faaalia ai e le faigamalo a Roma le faapalepale aoao mo le faaKerisiano. Ia Iulai o le tausaga lena, sa faatamaia ai e se afi se vaega tele o Roma. Sa tuuaia e tagata lauiloa o Roma le au Kerisiano i le amataina o le afi. O lenei mea na oo atu ai i le ogaoga o sauaina o le au Kerisiano i le Malo atoa o Roma. O nisi o faiga faalealofa sa oo i le au Kerisiano na oo mai mai a latou uo ma tuaoi na i ai muamua.
Valaaulia tamaiti aoga e vaavaai mo ni upumoni a’o latou suesue i le 1 Peteru 1–2 e mafai ona fesoasoani ia tatou tumau faamaoni ai, pe a tofotofoina i tatou i o tatou tunuma o puapuaga.
Aotele le 1 Peteru 1:1–2 i le faamalamalama atu, sa faafeiloai e Peteru le Au Paia i itumalo o Roma o Asia Minor (o Take i aso nei) ma faamanatu atu ia i latou, o i latou o se nuu filifilia, o lona uiga, sa filifilia i latou e maua faamanuiaga faapitoa a’o latou ola faamaoni.
Valaaulia se tamaitiiti aoga e faitau leotele le 1 Peteru 1:3–5. Fai atu i le vasega e mulimuli i le faitauga, ma vaavaai mo le mea sa faamanatu atu e Peteru i le Au Paia sa faia e Keriso, ma mo faamanuiaga i le lumanai sa folafola mai mo le Au Paia.
O a faamanuiaga i le lumanai o le a maua e le Au Paia pe afai e tumau faamaoni i le talalelei a Iesu Keriso?
Valaaulia se tamaitiiti aoga e faitau leotele le 1 Peteru 1:6, ma fai atu i le vasega e vaavaai pe na faapefea ona tali atu le Au Paia i le folafolaga o nei faamanuiaga i le lumanai. Faamatala atu o le upu faaosoosoga i le fuaiupu e 6 e faatatau i tofotofoga ma puapuaga (tagai vaefaamatalaga e).
Na faapefea ona tali atu le Au Paia i le folafolaga o nei faamanuiaga i le lumanai? (Sa latou matuai olioli lava.)
O le a le mataupu faavae e mafai ona tatou aoao mai i fuaiupu 3-6? (E tatau ona faailoa mai e tamaiti aoga se mataupu faavae e pei o lenei: E ui ina tatou oo i tofotofoga, e mafai ona tatou olioli i le Togiola a Iesu Keriso ma i faamanuiaga i le lumanai ua folafola mai e le Atua e tuuina mai ia i tatou.)
E mafai faapefea e le manatua o faamanuiaga i le lumanai ua folafola mai e le Atua e tuuina mai ia i tatou, ona fesoasoani tatou te olioli ai e tusa lava pe o tatou oo i tofotofoga?
Valaaulia se tamaitiiti aoga e faitau leotele le 1 Peteru 1:7–9. Fai atu i le vasega ia mulimuli i le faitauga, ma vaavaai mo mea na aoao mai e Peteru e uiga i le tofotofoina o le faatuatua o le Au Paia.
E tusa ai ma le 1 Peteru 1:7, o le a le mea na faatusaina i ai e Peteru le tofotofoina po o le suesueina o le faatuatua o le Au Paia?
O a ni auala e mafai ona avea ai le faatuatua e tofotofoina, e faapei o le auro? (O le faatuatua ua tofotofoina, e pei lava o le auro, le taua. Ae peitai, o le faatuatua e sili atu le taua nai lo o le auro, aua o le auro e “faaumatia” [fuaiupu 7] ae o le faatuatua ia Iesu Keriso e taitai atu ai i le faaolataga [tagai fuaiupu 9], lea e faavavau. Ma le isi, o le auro e faamama i le afi. E faapena foi, e tofotofoina ma faamamaina lo tatou faatuatua ia Iesu Keriso a’o tatou onosai faamaoni i tofotofoga. Tusi lenei upumoni i luga o le laupapa.)
Valaaulia se tamaitiiti aoga e faitau leotele le faamatalaga lenei mai ia Elder Neil L. Andersen, o le Korama a Aposetolo e Toasefululua, o le na faamalamalamaina mai le auala e mafai ona tatou tumau mausali ma le le mafaagaeetia i se taimi o le tofotofoga o le faatuatua:
Ata
Elder Neil L. Andersen
“E faapefea ona e tumau ma le ‘mausali ma le le mafaagaeetia’ [Alema 1:25] i se taimi o le tofotofoga o le faatuatua? E te faatofu oe lava ia i mea moni o loo fesoasoani e fausia le fatu o lou faatuatua: e te faatinoina le faatuatua ia Keriso, e te tatalo, e te mafaufau loloto i tusitusiga paia, e te salamo, e te tausi i poloaiga, ma e auauna atu i isi.
“Pe a tatou fetaiai ma se tofotofoga o le faatuatua—po o le a lava lau mea o fai, e te le laa ese lava mai le Ekalesia! O le faataumamaoina o oe lava ia mai le malo o le Atua i taimi o se tofotofoga o le faatuatua ua tai pei lava o le tuua o le saogalemu o se malutaga malupuipuia o afā ae ua oo mai se asiosio” (“Tofotofoina O Lo Outou Faatuatua,” Ensign po o le Liahona, Nov. 2012, 40).
O le a le mea na uunaia i tatou e Elder Andersen e fai i le tofotofoga o o tatou faatuatua?
Aisea e te manatu e taua ai le faia o nei mea pe a suesueina o tatou faatuatua?
Faailoa atu o nisi o le Au Paia sa tusi atu i ai Paulo, atonu na faaosoosoina e lafoai o latou faatuatua a’o latou oo i sauaga faalelotu. Valaaulia tamaiti aoga e faitau filemu le 1 Peteru 1:13–17, ma vaavaai mo timaiga na tuuina mai e Peteru e fesoasoani i le Au Paia ia onosai faamaoni ai i o latou tofotofoga. E mafai ona e valaauliaina tamaiti aoga e faailoga mea ua latou maua.
O le a le mea na tima’i atu Peteru i le Au Paia e fai?
Na mafai faapefea ona fesoasoani le fautuaga a Peteru latou te onosai faamaoni ai i o latou tofotofoga?
Valaaulia se tamaitiiti aoga e faitau leotele le 1 Peteru 1:18–21. Fai atu i le vasega e mulimuli i le faitauga, ma vaavaai mo upumoni faaopoopo na aoao atu e Peteru i le Au Paia e fesoasoani ia latou onosai faamaoni ai i o latou tofotofoga nai lo le lafoaia o lo latou faatuatua.
O a upumoni na aoao atu e Peteru i le Au Paia i nei fuaiupu? (Atonu e faaaoga e tamaiti aoga ni upu e ese mai, ae ia mautinoa latou te faailoa mai se tasi pe sili atu o upumoni nei: E togiolaina i tatou e ala i le toto pele o Iesu Keriso. Ona sa soifua Iesu Keriso i se soifuaga e leai se agasala, na mafai ai ona Ia ofoina mai o Ia lava o se taulaga atoatoa mo i tatou. Na muai faauuina Iesu Keriso e avea ma o tatou Faaola.)
E mafai faapefea e le manatuaina o nei upumoni ona fesoasoani i le Au Paia ia onosai faamaoni i o latou tofotofoga?
Ina ia fesoasoani ia lagona e tamaiti aoga le taua o upumoni ua latou faailoaina mai i le 1 Peteru 1, valaaulia i latou e mafaufau i se taimi na latou filifili pe na filifili ai se tasi latou te iloa e onosaia se tofotofoga ma le faatuatua ia Iesu Keriso. Valaaulia ni nai tamaiti aoga e faasoa mai o latou aafiaga i le vasega.
Uunaia tamaiti aoga e mafaufau loloto i mea o le a latou faia e tumau faamaoni ai pe a tofotofoina i latou i le tunuma o puapuagatia.
Aotele le 1 Peteru 1:22–25 e ala i le faamalamalama atu, na uunaia e Peteru le Au Paia ia alofa le tasi i le isi, ma ia manatua ua toe fanaufouina i latou e ala i le talia o le afioga a le Atua, lea e tumau e faavavau.
Ua faamamafa mai e Peteru tiutetauave o le Au Paia
O a nisi o auala e ese ai tagata o le Ekalesia mai le lalolagi?
O a nisi o luitau e mafai ona tatou feagai ona o lo tatou ese?
Valaaulia tamaiti aoga e vaavaai mo se mataupu faavae a’o latou suesue i le 1 Peteru 2 o le a faamalosia ai lo latou naunau ia ese mai le lalolagi o ni tagata o le Ekalesia a le Alii.
Aotele le 1 Peteru 2:1–8 i le faamalamalama atu, na aoao mai Peteru o le Au Paia e pei o ni maa ola ae o Iesu Keriso e pei o se maatulimanu po o le faavae i e amiotonu. Ae o i latou o e e le usiusitai, o Ia “o se maa e tausuai ai, ma papa e tautevateva ai” (fuaiupu 8), o lona uiga latou te tiga ia te Ia.
Valaaulia se tamaitiiti aoga e faitau leotele le 1 Peteru 2:9–10. Fai atu i le vasega e mulimuli i le faitauga, ma vaavaai pe na faapefea ona faamatala e Peteru le Au Paia faamaoni.
Na faapefea ona faamatala e Peteru le Au Paia faamaoni?
Faailoa atu o le upu faatauina mai i le fuaiupu 9 sa faaliliuina mai i se upu Eleni o lona uiga o le faatauina pe faasaosaoina ma e talitutusa lava ma le upu Eperu i le Esoto 19:5 e faailoa mai ai o tagata o le feagaiga a le Atua o se meatotino faapitoa po o le oa faapelepele ia te Ia (tagai 1 Peteru 2:9, vaefaamatalaga f).
E mafai faapefea ona fesoasoani upu sa faaaoga e Peteru e faamatala ai le Au Paia i fuaiupu 9–10 latou te maua ai le lototele a’o latou feagai ma sauaga ona o tapuaiga?
Valaaulia se tamaitiiti aoga e faitau leotele le 1 Peteru 2:11–12. Fai atu i le vasega e mulimuli i le faitauga, ma vaavaai mo le mea na aioi atu Peteru i le Au Paia e fai i le avea ai ma tagata ua faatauina mai a le Alii? Faamalamalama atu, atonu na ta’u e Peteru le Au Paia o “tagata ese” ma “e aumau” a le ona sa latou nonofo ma ni tagata o e sa ese ni faiga faaleaganuu ma faalelotu mai le Au Paia, pe ona sa latou o ese mai lo latou aiga faalelagi, ma ola mo se vaitaimi o ni tagata e oo i ai le oti.
E tusa ai ma le fuaiupu 11, o le a le mea na fai mai Peteru e tatau ona fai e le Au Paia e o ese ai mai le lalolagi?
E tusa ai ma le fuaiupu 12, o le a le faatosinaga na fai mai Peteru e mafai ona faia e le Au Paia i isi i le avea ai ma nuu filifilia ma faatauina mai o le Atua?
O le a le upumoni tatou te aoao mai ia Peteru e uiga i le mea ua valaau mai le Atua i Lana Au Paia e fai? (E tatau ona faailoa mai e tamaiti aoga se upumoni e tutusa ma lenei: Ua valaau mai le Atua i Lana Au Paia ina ia o ese mai, ma ia tulaga ese mai le lalolagi ina ia mafai ona iloa e isi a latou faataitaiga ma viia ai o Ia.)
Valaaulia se tamaitiiti aoga e faitau leotele le saunoaga lenei a Sister Elaine S. Dalton, o le sa auauna o se peresitene aoao o le faalapotopotoga a Tamaitai Talavou:
Ata
Elaine S. Dalton
“Afai e te manao e fai se eseesega i le lalolagi, e ao ona e ese mai i le lalolagi” (“Now Is the Time to Arise and Shine!”Ensign po o le Liahona, Me 2012, 124).
Na faapefea e lau filifiliga ina ia e vavae ese mai ma tulaga ese mai le lalolagi, ona aafia ai isi mo le lelei pe na fesoasoani ai e taitai atu ai i latou i le Atua?
Uunaia tamaiti aoga e mafaufau i mea e mafai ona lelei atu ona latou faia, e vavae ese ai ma tulaga ese ai mai le lalolagi ina ia mafai ona avea i latou ma se faataitaiga. Valaaulia i latou e faatino soo uunaiga e mafai ona latou maua.
Ua fautuaina e Peteru le Au Paia e onosai i puapuaga e pei ona sa faia e le Faaola
Aotele le 1 Peteru 2:13–18 i le faamalamalama atu, sa aoao e Peteru le Au Paia ia gauai atu i latou lava i tulafono ma taitaiga faalemalo na puleaina ai i latou (e aofia ai le malo o Roma o le sa faalauiloaina sauaga e faasaga mai ia i latou; tagai foi i le MF&F 58:21–22). Sa ia uunaia i latou o e sa mafatia i faafitauli o ni auauna, e tauave o latou mafatiaga ma le onosai ma ia manatua o loo silafia i latou e le Atua.
Valaaulia se tamaitiiti aoga e faitau leotele le 1 Peteru 2:19–20 . Fai atu i le vasega e mulimuli i le faitauga, ma vaavaai mo le fautuaga a Peteru i le Au Paia, i auala e tatau ona latou onsoaia ai puapuaga.
O le a le fautuaga a Peteru i le auala e tatau ona onosaia ai e le Au Paia o latou puapuaga?
Fai atu i tamaiti aoga e faitau filemu le 1 Peteru 2:21–25 , ma vaavaai mo le faamatalaga a Peteru o le ala na tali atu ai Iesu Keriso i sauaga.
Na faapefea ona tali atu Keriso i sauaga?
E tusa ai ma le fuaiupu 21, o le a le mafuaaga e tasi na puapuagatia ai le Faaola mo i tatou?
O le a le upumoni e mafai ona tatou faailoa mai fuaiupu 21–25 e uiga i le onosaia o tofotofoga? (E tatau i tamaiti aoga ona faailoa mai se upumoni e tutusa ma lenei: E mafai ona tatou mulimuli i le faataitaiga a le Faaola o le onosaia ma le faapalepale o tofotofoga.)
Faasoa atu lau molimau e uiga i le Faaola, ma valaaulia tamaiti aoga e mafaufau i mea e mafai ona latou faia ia sili atu le lelei e mulimuli ai i Lana faataitaiga o le onosai ma le faapalepale i tofotofoga.
Tala ma Faamatalaga o Talaaga
1 Peteru 1:6–8. “O le tofotofo foi o lo outou faatuatua … e avea ma mea e iu i le viiga, ma le mamalu ma le manuia”
Na aoao mai e Elder Orson F. Whitney o le Korama a Aposetolo e Toasefululua, le mea e mafai ona oo mai mai tofotofoga tatou te mafatia ai i lenei olaga:
“E leai se tiga tatou te feagai, leai se tofotofoga tatou te oo i ai e maumau. E a’otauina ai i tatou, e fesoasoani tatou te atiina ae ai uiga auaumama e pei o le onosai, faatuatua, lototoa ma le lotomaulalo. O mea uma tatou te mafatia ai, ma mea uma tatou te onosaia, ae maise lava pe a tatou onosaia ma le faapalepale, e atiina ae ai o tatou tagata, faamama ai o tatou loto, faalautele ai o tatou agaga, ma faia ai i tatou ia sili atu ona agamalu ma agaalofa, sili atu ona agavaa e ta’ua o fanau a le Atua … ma e ala mai i faanoanoaga ma mafatiaga, o le galulue punouai ma puapuaga, tatou te maua ai le aoaoina lea ua tatou o mai ai iinei ina ia maua, ma o le a faapea ona avea atili ai i tatou e pei o lo tatou Tama ma Tina oi le lagi” (i le Spencer W. Kimball Faith Precedes the Miracle [1972], 98).
1 Peteru 2:18–25. Ua faataitai mai e Iesu Keriso le ala e tatau ona tatou onosaia ai mafatiaga.
Na aoao mai Elder Alexander B. Morrison o le Fitugafulu:
“O Peteru, le aposetolo maoae, o ia lava foi na mafatia i se maliu faamaturo (tagai Ioane 21:18–19), sa iloaina lena uiga paia e i ai faatasi ma le mafatia ma le onosai ona o Keriso, peitai o lena manuia itiiti e faateleina lava le taua ia i tatou pe a tatou mafatia [o se taunuuga o] a tatou lava agasala. Sa ia tusia: ‘Aua o le mea lenei e malie, pe afai o le loto fuatia i la le Atua e onosai ai se tasi i le tiga, o loo faatigaina fua lava o ia. Aua pe se a se viiga e maua, pe afai tou te onosai pe a tu’ia outou ona o le agasala? a e afai tou te onosai pe a tigaina outou a o amio lelei, o le mea lava lea e malie i le Atua.’ (1 Peteru 2:19–20.) A’o tatou onosai i mafatiaga e le tatau mo i tatou, tatou te atiina ae ai uiga faaKeriso e faapea ona faaatoatoa ai o tatou agaga ma aumaia latalata atili ai i tatou ia te Ia” (Feed My Sheep: Leadership Ideas for Latter-day Shepherds [1992], 166).