Sa uunai e Peteru le Au Paia ina ia saunia i taimi uma e molimau atu ia Iesu Keriso ma ia ola amiotonu ina ia mafai ona latou tafi ese tuuaiga pepelo na fai e faasaga ia i latou. Sa ia aoao mai sa talai atu e Iesu Keriso le talalelei i le lalolagi o agaga ina ua mavae Lona maliu. Sa apoapoai mai foi Peteru i toeaina o le Ekalesia e vaai le lafu a le Atua i le tausiga lava e tasi e pei o Iesu Keriso, o le Leoleo Mamoe Autu.
Ua fautuaina e Peteru le Au Paia ina ia autasi i le amiotonu ma ia saunia i taimi uma e molimau atu ia Keriso
Valaaulia se tamaitiiti aoga e faitau leotele le saunoaga lenei mai ia Peresitene Thomas S. Monson:
Ata
Peresitene Thomas S. Monson
“O le a tatou maua pea avanoa i o tatou olaga e faasoa atu ai o tatou talitonuga, e ui lava tatou te le iloa pea le taimi o le a valaauina ai i tatou e faia lena mea. O sea avanoa faapea na oo mai ia te au i le 1957, a o ou faigaluega i se pisinisi lomitusi ma sa faatonuina au ou te alu i Dallas, Texas, [USA,] o nisi taimi sa ta’ua ai ‘o le aai o lotu,’ ou te lauga i se fonotaga faapisinisi. Ina ua maea le fonotaga, sa ou alu ai i se maimoaga e malaga i le pasi i nuu tau lalata ane i le aai. A o matou pasia le tele o lotu, e faapea mai le avepasi, ‘I le itu agavale tou te vaaia ai le lotu Metotisi,’ po o le ‘I le itu taumatau o le falesa Katoliko.’
“A o matou pasia se fale matagofie piliki mumu sa tu mai se maupuepue, sa valaau mai le avepasi, ‘O le fale le la e potopoto ai le Au Mamona.’ Sa valaau mai se tamaitai i le pito i tua o le pasi, ‘Avepasi, e mafai ona e ta’u mai ia i matou se mea e uiga i le Au Mamona?’
“Sa faatu e le avepasi le pasi i autafa o le ala, faliu mai i lona nofoa, ma tali mai, ‘Tamaitai, na o le pau le mea ou te iloa e uiga i le Au Mamona e potopoto i le fale piliki mumu le la. Pe i ai se tasi i luga o lenei pasi e iloa se mea e uiga i Mamona?’” (“Ia Lototele e Tu Na o Oe,”Ensign po o le Liahona, Nov. 2011, 67).
Ana faapea sa e i ai i luga o lena pasi, o le a se mea e te ono faia?
Aisea e luitauina ai i nisi o taimi le ta’u atu i isi tagata e uiga i o tatou talitonuga?
Valaaulia tamaiti aoga e vaavaai mo se mataupu faavae a’o latou suesue i le 1 Peteru 3:1–17 o le a fesoasoani e taiala ai i latou pe a latou fetaui ma ni avanoa e faasoa atu ai le talalelei i isi.
Aotele le 1 Peteru 3:1–11 i le faamalamalama atu, sa timai e Peteru ia ava ia fesoasoani e aumai tane le talitonu ia Keriso e ala i a latou amioga amiotonu. Sa ia fautuaina tane ia ava i a latou ava. Sa ia fautuaina foi tagata o le ekalesia ia ola e tusa ai ma tulaga faatonuina o le talalelei.
Valaaulia se tamaitiiti aoga e faitau leotele le 1 Peteru 3:14–16. Fai atu i le vasega e mulimuli i le faitauga, ma vaavaai mo le mea na fautuaina ai e Peteru le Au Paia e fai pe a latou pagatia i sauaga ona sa latou ola amiotonu.
O le a le mea na fautuaina e Peteru le Au Paia e fai pe a latou pagatia i sauaga ona sa latou ola amiotonu?
E tusa ai ma le fuaiupu 15, o le a le mea na fai mai Peteru e tatau i soo o Iesu Keriso ona saunia i taimi uma e fai?
O a vaega o le talalelei e te manatu e avatua i tagata le faamoemoe?
Faamalamalama atu o le upu tali atu i le fuaiupu 15 e mafai foi ona faaliliuina o se “puipuiga” (tagai fuaiupu 15, vaefaamatalaga e). Sa apoapoa’i e Peteru le Au Paia ia faasoa atu ma puipuia o latou talitonuga faalelotu.
O a upu i le fuaiupu 15 o faamatala ai le auala e tatau ona tatou faasoa atu ma puipuia ai le talalelei a Iesu Keriso? (Atonu e te manao e faamalamalama atu o le mata’u o lona uiga o le ava po o le maofa i le anotusi lenei.)
O a upumoni e mafai ona tatou aoao mai i le 1 Peteru 3:15 e uiga i le mea e tatau ona tatou taumafai ia saunia i taimi uma, i le avea ai ma soo o Iesu Keriso? (E tatau ona faailoa mai e tamaiti aoga se upumoni e tutusa ma lenei: I le avea ai ma soo o Iesu Keriso, e tatau ona tatou taumafai ia saunia i taimi uma e faasoa atu ma puipuia o tatou talitonuga i le agamalu ma le ava. Tusi lenei upumoni i luga o le laupapa.)
Aisea e te manatu e taua ai le faasoa atu o o tatou talitonuga i le agamalu ma le ava?
Ina ia faamatalaina le upumoni o loo i le laupapa, valaaulia se tamaitiiti aoga e faitau leotele le vaega o totoe o le tala a Peresitene Monson e uiga i lona aafiaga i luga o le pasi:
Ata
Peresitene Thomas S. Monson
“Sa ou faatali mo se tasi e tali mai. Sa ou sioa atu i foliga vaaia o tagata taitasi mo sina faailoga lava e iloa ai, sina manao e faamatala mai. Sa leai ma se mea. Sa ou iloa ai e pule lava la a’u pe fai e pei ona fautua mai le Aposetolo o Peteru, ina ‘ia saunia pea lava outou e tali atu ia i latou uma o e fesili mai ia te outou i le uiga o le faamoemoe o loo ia te outou.’ Sa ou iloa ai foi le moni o le muagagana, ‘A oo mai le taimi mo faaiuga, ua le toe i ai se taimi e sauni ai.’
“Mo le isi 15 minute pe ā, sa ou maua ai le avanoa e faasoa atu ai ia i latou i luga o le pasi la’u molimau e uiga i le Ekalesia ma o tatou talitonuga. Sa ou faafetai mo la’u molimau ma faafetai foi sa ou saunia e faasoa atu.” (“Ia Lototele e Tu Na o Oe,” 67).
O a ni mea e mafai ona tatou faia ia saunia ai i taimi uma e faasoa atu o tatou talitonuga?
Valaaulia tamaiti aoga e mafaufau i se taimi sa latou faafetai ai ona sa latou saunia e faasoa atu o latou talitonuga po o molimau. Valaaulia ni nai tamaiti aoga e faasoa mai o latou aafiaga i le vasega.
Valaaulia tamaiti aoga e mafaufau loloto i mea o le a latou faia e saunia ai ia sauni i taimi uma e faasoa atu ma puipuia o latou talitonuga. Fautuaina i latou e faatino soo se uunaiga e mafai ona latou maua.
Sa talai atu e Iesu Keriso le talalelei i le lalolagi o agaga ina ua mavae Lona maliu
Valaaulia tamaiti aoga e vaai faalemafaufau e faapea, o i latou o ni faifeautalai o loo aoaoina se tagata o le na fai mai i le mea lenei:
“Ou te talitonu o mea ua e aoaoina mai ia te a’u ua moni, ae faapefea tagata ua maliliu ae le’i maua le avanoa e faalogo ai i le upumoni. E foliga mai e le talafeuga i le Atua ona faasala i latou pe taofia i latou mai le toe nonofo faatasi ma Ia pe afai latou te le’i maua le avanoa e aoao ai e uiga i Lana fuafuaga o le faaolataga.”
Fai atu i tamaiti aoga e mafaufau loloto pe o le a faapefea ona latou tali atu.
Valaaulia le afa o le vasega e faitau filemu le 1 Peteru 3:18–20, ia aofia ai le Faaliliuga a Iosefa Samita i le fuaiupu 20, vaefaamatalaga a. Fai atu i le isi afa e faitau filemu le 1 Peteru 4:5–6, ia aofia ai le Faaliliuga a Iosefa Samita i le fuaiupu 6, vaefaamatalaga a. Fai atu i tamaiti aoga e vaavaai mo upumoni na aoao mai e Peteru, e mafai ona latou faasoa atu i le tagata o loo i le vaaiga. Faamalamalama atu o le fuaitau “i agaga i le falepuipui” i le 1 Peteru 3:19 e faatatau ia i latou i le lalolagi o agaga o e sa le’i taliaina le talalelei pe maua le avanoa e faalogo i ai a’o i ai i le olaga lenei.
A ua lava se taimi, fesili atu:
O le a se mea tatou te aoao mai i nei fuaiupu e uiga ia i latou i le lalolagi o agaga o e sa le’i taliaina le talalelei pe maua le avanoa e maua ai i lenei olaga?
Ata
Peresitene Iosefa F. Samita
Faaali atu se ata o Peresitene Iosefa F. Samita (Tusi Ata o le Talalelei [2009], nu. 127; tagai foi i le LDS.org). Faamalamalama atu, sa mafaufau loloto Peresitene Iosefa F. Samita i le uiga o le 1 Peteru 3:18–20 ma le 1 Peteru 4:6 ae ona maua se faaaliga ma se faaaliga vaaia o le asiasiga a le Faaola i le lalolagi o agaga. Sa ia vaaia ai Iesu Keriso, i le va o le taimi o Lona maliu ma le Toetu, o talaiina atu le talalelei ma auauna patino atu i agaga amiotonu. Ona faatulagaina lea ma faatagaina e Iesu Keriso ia auauna amiotonu e aoao atu le talalelei i agaga i totonu o le falepuipui o agaga (tagai MF&F 138:1–11, 29–30).
E tusa ai ma le 1 Peteru 4:6, aisea na tala’i atu ai le talalelei iai latou o e ua maliliu? (Ina ia faataunuuina ai se faamasinoga amiotonu ma talafeagai e ala i le tuuina atu i fanau uma a le Tama Faalelagi se avanoa e faalogo ma ola e tusa ai ma tulafono a le Atua.)
O le a le upumoni e mafai ona tatou faailoa mai i aoaoga a Peteru e uiga i le talaiina atu o le talalelei i e ua maliliu? (Atonu e faaaoga e tamaiti aoga a latou lava faaupuga, ae ia mautinoa latou te faailoa mai se upumoni e tutusa ma lenei: E talaiina atu le talalelei ia i latou o e ua maliliu ina ia mafai ona latou maua avanoa tutusa e pei o i latou o e faalogo i le talalelei i le olaga lenei.)
Ia iloilo faavave le vaaiga na tuuina atu i le amataga o lenei poloka mau ma fesili atu:
E faapefea ona avea le aoaoga faavae o le faaolataga o e ua maliliu, o se faamaoniga o le alofa tunoa ma le agaalofa o le Atua mo Lana fanau?
Aotele le 1 Peteru 4:7–19 i le faamalamalama atu, sa apoapoai Peteru i le Au Paia ia i ai le alofa mama moni aua o le alofa mama e aofia, pe taofia ai se anoano o agasala (tagai Faaliliuga a Iosefa Samita, 1 Peteru 4:8 [i le 1 Peteru 4:8, vaefaamatalaga a]). Sa aoao foi e Peteru le Au Paia ia olioli pe a latou tigaina i tofotofoga ma aoaiga ona o lo latou talitonu ia Iesu Keriso.
Sa fautuaina e Peteru toeaina e leoleo le lafu mamoe a le Atua ma uunaia le Au Paia ia tumau mausali i le faatuatua
Faamalamalama atu, ina ia fesoasoani e saunia le Au Paia mo tofotofoga o le a latou oo i ai, na aoao ai e Peteru toeaina o le Ekalesia e uiga i o latou tiutetauave i le avea ai o ni taitai o le Ekalesia. Valaaulia se tamaitiiti aoga e faitau leotele le 1 Peteru 5:1–3. Fai atu i le vasega e mulimuli i le faitauga, ma vaavaai mo fautuaga a Peteru i toeaina o le Ekalesia.
O le a le fautuaga na tuuina atu e Peteru i toeaina o le Ekalesia?
Faamalamalama atu o le, “fafaga i le lafu mamoe a le Atua” (fuaiupu 2) o lona uiga o le tausi ma vaai tagata o le Ekalesia. Na tatau i taitai o le Ekalesia ona auauna atu ma le lotomalie ma le alofa ae le o le faatauanauina pe fai ona o le manao i se taui. E tatau ona avea i latou ma faataitaiga i tagata ae le o le “faamalo” (fuaiupu 3) ia i latou.
Mai le fautuaga a Peteru i toeaina o le Ekalesia, o le a se upumoni e mafai ona tatou aoaoina e uiga i le tiutetauave o taitai o le Ekalesia? (Fesoasoani i tamaiti aoga e faailoa mai se upumoni e tutusa ma lenei: Ua i ai i taitai o le Ekalesia le tiutetauave o le tausia ma le vaaia o le lafu a le Atua i le alofa ma i faataitaiga. Tusi le upumoni lenei i luga o le laupapa.)
Valaaulia tamaiti aoga e faitau filemu le 1 Peteru 5:4, ma vaavaai pe na faapefea ona ta’ua e Peteru le Faaola. Fai atu i tamaiti aoga e lipoti mai mea ua latou maua.
Aisea e te manatu e ta’ua soo ai le Faaola o se leoleo mamoe?
O a ni uiga faaalia ma uiga auaumama faaKeriso e mafai ona fesoasoani i taitai o le Ekalesia i le vaaiga ma le tausiga o tagata o le Ekalesia?
Na faapefea ona faamanuiaina oe i le alofa faaKeriso po o faataitaiga a se taitai o le Ekalesia?
Aotele le 1 Peteru 5:7–14 i le faamalamalama atu, sa a’oa’o e Peteru le Au Paia ina ia lafo o latou atugaluga (o lona uiga o popolega) i le Faaola o Iesu Keriso ma ia tumau mausali i o latou faatuatua , e ui lava i puapuaga. Sa faamautinoa atu e Peteru ia i latou, afai latou te faia faapea, o le a faaatoatoa ma faamalosia i latou e le Atua.
Faaiu i le uunaia o tamaiti aoga ia talitonuina ma mulimuli ia i latou o e ua valaauina e le Alii e fesoasoani e leoleo ma tausi i latou faaleagaga.
Ina ia uunaia tamaiti aoga e auai i le galuega o le faaolataga mo o latou tuaa, toe faamanatu ma i latou le 1 Peteru 4:6, ona fesili atu lea:
O le a se mea e mafai ona tatou faia e fesoasoani ai i o tatou tuaa o e ua mauaina le talalelei i le lalolagi o agaga ma o loo faatalitali ina ia faasaolotoina mai le falepuipui o agaga?
O a auala e te lagona ua faamanuiaina ai oe i le faia o talafaasolopito o aiga ma galuega o le malumalu mo ou tuaa?
Valaaulia tamaiti aoga ia saili avanoa e fai ai le sailiga o talafaasolopito o aiga e uiga i o latou tuaa ma ia auai i sauniga o le malumalu e fai ma sui o na tuaa.
Tala ma Faamatalaga o Talaaga
1 Peteru 4:6. “O le mea lea na folafola atu ai le talalelei i e ua oti”
Na aoao mai e Peresitene Iosefa Filitia Samita le mea lenei e uiga i le galuega o le faaolataga mo e ua oti:
“O i latou uma o e sa le’i i ai se avanoa iinei e talia ai, o e ua salamo iina ma talia le talalelei, o le a avea ma tofi o le malo selesitila o le Atua. Sa amatalia e le Faaola lenei galuega tele ina ua ia afio atu ma tala’i atu i agaga sa taofia i le falepuipui, ina ia mafai ona faamasinoina i latou e tusa ma tagata i le tino (po o se isi faaupuga, e tusa ai ma mataupu faavae o le talalelei) ona ola lea e tusa ai ma le Atua i le agaga, e ala i lo latou salamo ma talia o le misiona a Iesu Keriso o le na maliu mo i latou” (Doctrines of Salvation, comp. Bruce R. McConkie, 3 vols. [1954–56], 2:132–33).
E faatatau i le talaiina atu o le talalelei i le lalolagi o agaga, na aoao mai ai Peresitene Lorenzo Snow:
“A talaiina atu le Talalelei i agaga i le falepuipui, o le faamanuiaina e i ai faatasi ma lena talaiga o le a sili mamao atu nai lo faamanuiaina e i ai i le talaiga a o tatou Toeaina i lenei olaga. Ou te talitonu o le a matuai toaitiiti moni lava na agaga o e o le a le taliaina ma le fiafia le Talalelei pe a aveina atu ia i latou. O tulaga iina o le a faafia afe e sili atu ai ona lelei” (“Discourse by President Lorenzo Snow,” Millennial Star, Jan. 22, 1894, 50).