Lesona 111

1 Korinito 15:1–29

Folasaga

Sa aoaoina e Paulo o tagata i Korinito sa aoao atu faapea e leai se Toetu o e ua oti. Na ia molimau atu i tagata o le Ekalesia i Korinito na toetu mai Iesu Keriso mai e ua oti. Ona toe faamatala atu ai lea e Paulo o le aoaoga faavae o le Toetu ma ona taunuuga mo fanau uma a le Tama Faalelagi. Na taua e Paulo faapea o le sauniga o le papatisoga mo e ua maliliu o le a leai se uiga e aunoa ma le Toetu.

Fautuaga mo le Aoaoina Atu

1 Korinito 15:1–10

Ua tuuina mai e Paulo faamaoniga o le Toetu o Iesu Keriso.

Valaaulia se tamaitiiti aoga e faitau leotele le saunoaga lenei mai ia Peresitene Thomas S. Monson:

“Ou uso e ma tuafafine, tatou te talie, tatou te fetagisi, tatou te galulue, tatou te taaalo, tatou te alolofa, tatou te ola. Ona tatou oti ai lea. O le oti o lo tatou tofi laugatasia. E tatau ona tatou ui uma atu i ona faitotoa. E ave e le oti e matutua, o e ua vaivai ma le lavava. E asiasi atu o ia i e talavou i le fotuai mai o le faamoemoe ma le mamalu o le faamoemoega. E le alo foi lana pue i fanau laiti” (“Ua Ou Iloa o Loo Soifua Lo’u Faaola!” Ensign po o le Liahona, Me 2007, 24).

Valaaulia le vasega e tomanatu i mafaufauga po o lagona sa latou oo i ai ina ua maliu se tasi latou te iloa. Atonu e te fai atu i nai tagata o le vasega e faasoa mai o latou aafiaga pe afai latou te lagona le toamalie e faasoa mai ai.

Valaaulia le vasega e vaavaai mo mataupu faavae a o latou suesueina le 1 Korinito 15:1–29ia e mafai ona fesoasoani ia i latou pe a maliu se tasi latou te iloa.

Faamatala a o faaiu e Paulo lana tusi i le Au Paia i Korinito, sa ia talanoaina se talitonuga sese sa aoao atu e nisi o tagata o le Ekalesia. Valaaulia se tagata e faitau leotele le 1 Korinito 15:12, ma fai i le vasega e vaavaai mo le talitonuga sese sa aoao atu.

• O a mea na aoao atu e nisi o le Au Paia i Korinito? (E leai se Toetu o e ua maliliu.)

Valaaulia se tamaitiiti aoga e faitau leotele le 1 Korinito 15:3–8. Fai i le vasega e mulimuli ai, ma vaavaai po o le a le mea na tusia e Paulo e fesoasoani ai i tagata o le Ekalesia ia malamalama i le moni o le Toetu o le Faaola.

• O le a le mea na molimau atu ai Paulo e fesoasoani ai ia malamalama tagata o le Ekalesia i le misiona ma le Toetu o le Faaola?

• O le a le upumoni e mafai ona tatou aoao mai e uiga i le matafaioi a se Aposetolo mai nei fuaiupu? (E ono faaaoga e le vasega ni upu eseese ae e tatau ona faailoa mai se upumoni e pei o lea: E molimau atu Aposetolo na maliu Iesu Keriso mo a tatou agasala ma sa toetu mai le oti.

• E mafai faapefea ona fesoasoani ia molimau a Aposetolo i le Toetu o Iesu Keriso e talitonu ai tagata o loo tauivi ma le talitonu i le Toetu?

Ina ia fesoasoani i tamaiti aoga ia lagona le moni ma le taua o lenei upumoni, valaaulia se tamaitiiti aoga e faitau leotele le saunoaga lenei a Peresitene Thomas S. Monson. (Atonu foi e te manao e faasoa atu molimau e faatatau i le Toetu o Iesu Keriso ia na tuuina mai e isi Aposetolo i saunoaga o le konafesi aoao talu ai nei.)

“Faatasi ai ma lou loto atoa ma le faamaoni o lou agaga, ou te sii ae ai lou leo i le molimau o se molimau faapitoa e tautino atu ai o loo soifua le Atua. O Iesu o Lona Alo, le Alo e Toatasi o le Tama i le tino. O Ia o lo tatou Togiola; o Ia o lo tatou Puluvaga i le Tama. O Ia o le na maliu i luga o le satauro e togiola mo a tatou agasala. O Ia o le uluai fua o le Toetutu. Ona sa maliu o Ia, o lea o le a toe ola uma ai i tatou. ‘O lea, ou olioli ai: “Ou iloa O Ia soifua mai!” Ia iloa e le lalolagi atoa ma ola ai i lena malamalama, ou te tatalo faamaualalo ai” (“Ua Ou Iloa o Loo Soifua Lou Faaola!” 25).

Valaaulia le vasega e mafaufau pe na fesoasoani faapefea ia molimau a Aposetolo e faatatau i le Toetu o Iesu Keriso e faamalolosia ai lo latou faatuatua i le Toetu. Atonu e te manao e fai i ni nai tagata o le vasega e faasoa mai o latou mafaufauga.

1 Korinito 15:11–29

Ua faamalamalama mai e Paulo le aoaoga faavae o le Toetu

Aotele le 1 Korinito 15:11–15 i le faamatala atu na fesiligia e Paulo pe aisea na amata ai e le Au Paia i Korinito ona masalosalo i le moni o le Toetu. Sa ia taua afai e lei toetu mai Iesu Keriso mai le oti, o lona uiga e pepelo uma molimau o Lona Toetu ma e leai se uiga o le folafola atu o le talalelei.

Tusi le faamatalaga le uma lenei i luga o le laupapa:

A na fai e le i toetu mai Iesu mai e ua oti, o lona uiga … (tagai 1 Korinito 15:16–19).

Talu ai na toetu moni mai Iesu mai e ua oti, … (tagai 1 Korinito 15:20–22).

Valaaulia le afa o le vasega e faitau lemu le 1 Korinito 15:16–19, ma vaavaai po o le a le mea semanu e tupu pe ana fai e lei toetu mai Iesu mai e ua oti. Valaaulia le isi afa e faitau lemu le 1 Korinito 15:20–22, ma vaavaai mo faamanuiaga ua oo mai ona o le Toetu o Iesu Keriso.

1 Korinito15:20–22o se mau tauloto. O le suesueina o fuaitau o mau tauloto o le a fesoasoani i tagata o le vasega e faateleina ai lo latou malamalama i aoaoga faavae autu ma ia saunia ai e aoao atu aoaoga faavae i isi. Atonu e te manao e fautua atu i tagata o le vasega e faailoga le mau tauloto i se auala e iloagofie ai, ina ia faigofie ona latou mauaina. Tagai i le manatu mo le aoaoina atu o loo i le faaiuga o le lesona e fesoasoani ai i tagata o le vasega i le latou taulotoina o lenei fuaitau.

A uma ua lava se taimi, fai i tagata o loo faitauina le 1 Korinito 15:20–22e lipoti mai pe faapefea ona latou faaumaina le faamatalaga o i le laupapa. Fai atu i se tagata e lisi tali a nei tamaiti i le laupapa.

Faamatala o le upuuluai fua i le fuaiupu 20 e faasino i le vaega muamua o se faaeleeleaga e selesele i se faifaatoaga. E pei lava o nei fua o le seleselega o uluai fua o le anoanoai e tatau ona selesele, o Iesu Keriso o le uluai tamalii o tagata uma ua toetu.

• E tusa ai ma le fuaiupu 22, o le a le mea e tupu i fanau uma a le Tama Faalelagi ona ua toetu Iesu Keriso? (E ono faaaoga e le vasega ni upu eseese ae e tatau ona faailoa maia le aoaoga faavae lea: Ona o le Toetu o Iesu Keriso, o le a toetutu ai tagata uma.

Valaaulia le vasega sa faitaua le 1 Korinito 15:16–19e lipoti mai pe mafai faapefea ona latou faamaeaina le isi o faamatalaga o i le laupapa. Fai atu i se tagata e tusi tali a tagata nei i luga o le laupapa.

Faamatala o le fuaiupu 14–19, ua tatalo atu ai Paulo i le Au Paia e mafaufau pe o a taunuuga “pe ana fai e lei toetu Keriso.” Ua faamatala atu e Paulo o le a le aoga talaiga uma talu ai o le a le faaalia e Iesu Keriso ua ia te Ia le mana e pulea ai le oti ma o lea o le a le mafai ai foi ona togiola mo a tatou agasala. Ae talu ai na toetu moni mai Iesu Keriso mai e ua oti, ua tatou iloa ai o Ia o le Alo o le Atua ma o loo ia te ia lena mana.

Faasino i le faamatalaga a Paulo o i le fuaiupu 19, “Afai e gata i lenei olaga mea tatou te faamoemoe i ai ia Keriso, ua sili lo tatou malaia i tagata uma lava.”

• Aisea o le a tatou malaia ai pe afai e na ona tatou faamoemoe ia Iesu Keriso ileneiolaga pe e uma foi lo tatou faamoemoe pe a tatou oti? (Afai e leai se Toetutu o e ua oti, o lona uiga o lo tatou faamoemoe ia Iesu Keriso o e a aoga na o lenei olaga ma e le mafai ona faataunuuina faamoemoega o le ata o le faaolataga.)

E tusa ai ma fuaiupu 20–22, o le a le faamoemoega sili ua ofoina mai e le Toetu o Iesu Keriso? (O le faamoemoe o le a toe ola i tatou uma pe a mavae le oti.) A maea ona tali mai tamaiti aoga, tusi le upumoni lenei i le laupapa: Ona o le Toetu o Iesu Keriso, ua mafai ai ona i ai lo tatou faamoemoe.

• E mafai faapefea e le Toetu o Iesu Keriso ona aumaia le faamoemoe pe a oti se tasi tatou te iloa, pe tatou te popole foi e uiga i lo tatou oti pe a oo mai?

Ina ia fesoasoani ia malamalama atili le vasega i le taua o le Toetu o Iesu Keriso, fai i se tasi e faitau leotele le saunoaga lea a le Perofeta o Iosefa Samita. (Afai e mafai, saunia lenei saunoaga i se tufaaga mo tamaiti.)

“O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, o lea na Ia maliu, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai” (Aoaoga a Perofeta o le Ekalesia: Iosefa Samita [2007], 49).

• O le a le mea na taua e Iosefa Samita o mataupu faavae autu o lo tatou talitonuga faalelotu?

• E faavae i mea sa e aoaoina i lenei lesona, ua avea faapefea le Toetu o Iesu Keriso ma mataupu faavae autu i isi upumoni o le talalelei?

Atonu e te manao e molimau atu i le moni o le Toetu ma lona taua i le ata ole faaolataga a le Tama Faalelagi.

Faamatala e pei ona tusia i le 1 Korinito 15:23–24, sa aoao atu e Paulo o le a i ai se faatulagaga o le Toetutu ma o le a “[tuuina atu] le malo” e Iesu Keriso i le Tama Faalelagi pe a uma ona faaumatia ituaiga uma o “pule ma mana” o le fogaeleele (po o le lalolagi)

Valaaulia se tamaitiiti aoga e faitau leotele le 1 Korinito 15:25–26 Fai i le vasega e mulimuli ai, ma vaavaai po o le a le mea na aoao atu e Paulo o le a iu ina tupu i e ita ia Iesu Keriso.

• O le a le mea na ta’u atu e Paulo o le a iu ina tupu i e ita ia Iesu Keriso? (O le a tuuina i latou “i lalo o ona vae” [fuaiupu 25], pe faaumatia.)

• O ai pe o a foi mea e mafai ona faapea o fili o Iesu Keriso? (O faataitaiga e aofia ai le agasala, piopio, amioleaga, ma le tiapolo.)

• O le a le toe fili o le a faaumatia e Iesu Keriso?

• Aisea e mafai ai ona faapea o le oti o se fili ia Iesu Keriso ma le fuafuaga a le Tama Faalelagi?

Faamanatu i le vasega o nisi o tagata o le Ekalesia i Korinito sa talitonu o e oti o le a le toetutu mai, ae sa tau atu e Paulo sa faia e le Au Paia se mea e tau mai ai lo latou talitonuga i le Toetutu o e ua oti.

Valaaulia se tamaitiiti aoga e faitau leotele le 1 Korinito 15:29. Fai atu i le vasega e mulimuli i le faitauga ma vaavaai mo le sauniga sa faatinoina e le Au Paia i Korinito. Valaaulia tamaiti aoga e lipoti mai mea ua latou mauaina.

• E faapefea ona outou aoteleina le mea sa fesili atu ai Paulo i le Au Paia e faatatau i lo latou faatinoina o papatisoga mo e ua maliliu? (“Afai tou te le talitonu i le Toetutu, aisea la tou te papatiso ai mo e ua maliliu?”)

Tau atu o le sauniga o le papatisoga mo e ua maliliu o se molimau lea o lo tatou talitonuga i le Toetutu. Tusi le upumoni lenei i le laupapa: O i latou ua oti e aunoa ma le papatisoga e mafai ona mauaina lenei sauniga taua.

Faaali atu se ata o se malumalu. Valaaulia se tamaitiiti aoga e faitau leotele le faamatalaga lenei mai ia Peresitene Gordon B. Hinckley:

“O malumalu uma, pe tele pe laitiiti, pe tuai pe fou, o se faailoaga o la tatou molimau o le ola i talaatu o le tuugamau e moni ma e mautinoa e pei o le olaga nei” (“O Lenei Maota Filemu o le Atua,” Ensign, May 1993, 74).

Valaaulia le vasega e mafaufau i se taimi sa latou faatinoina ai papatisoga mo e ua maliliu pe saunia ai ni igoa e ave i le malumalu. Valaaulia ni nai tagata e tali i fesili nei:

• O a lagona na e maua a o e sauniaina igoa pe faatino le galuega mo i latou i le malumalu?

• O a ni auala ua faamalosia ai e ou aafiaga i le talafaasolopito o aiga ma galuega i le malumalu lou faatuatua i le Toetu o Iesu Keriso ma tagata uma?

Fuafua e molimau atu i le taua o le faatinoina o galuega o talafaasolopito o aiga ma le malumalu mo i latou ua maliliu. Fautuaina le vasega e faatino lo latou faatuatua i le Toetu o Iesu Keriso ma le Toetu o tagata uma mulimuli ane e ala i le faatinoina e le aunoa o talafaasolopito o aiga ma galuega i le malumalu.

Mau Tauloto—1 Korinito 15:20–22

Ina ia fesoasoani ia malamalama le vasega o le iloaina o le aoaoga faavae i le 1 Korinito 15:20–22e mafai ona saunia ai i latou e fesoasoani i isi, valaaulia i latou e mafaufau i se tasi latou te iloa ua maliu se e pele ia te ia. Fai i le vasega e tusi se tusi puupuu i le tagata lea ia latou api o le vasega po o le api talaaga mo le suesueina o tusitusiga paia, e faaaoga ai lo latou malamalama i lenei fuaitau e aoao atu ai ma faamafanafana i lea tagata. Valaaulia ni nai tamaiti aoga e faasoa mai a latou tali i le vasega.

Tala ma Faamatalaga o Talaaga

1 Korinito 15:20. “Ae o lenei ua toetu mai Keriso mai e ua oti”

Na aoao mai Elder D. Todd Christofferson o le Korama a Aposetolo e Toasefululua o Iesu Keriso o se auala toetu lea e mafai ai foi e i tatou ona maua le faatuatua o le a tatou toetutu mai;

“Afai e moni lava na toetu Iesu, o lona uiga e mautinoa lava o Ia o se tagata paia. E leai se tagata ola ua i ai se mana e toe ola mai ai pe a mavae le oti. Ona sa toetu o Ia, e le mafai ai la ona faapea o Iesu ua na o se kamuta, se faiaoga, se aoao, po o se perofeta. Ona sa toetu o Ia, e ao la ona avea Iesu ma se Atua, o le Alo e Toatasi na Fanaua o le Tama.

“O lea, o mea sa Ia aoaoina e moni; e le mafai ona pepelo le Atua.

“O lea, o Ia o le Foafoa o le lalolagi, e pei ona Ia fetalai mai.

“O lea, e moni le lagi ma seoli, e pei ona Ia aoao mai.

“O lea, e i ai se lalolagi o agaga lea sa Ia asiasi i ai ina ua mavae Lona maliu.

“O lea, o le a Ia toe afio mai, e pei ona fetalaia e agelu, ma ‘nofotupu patino i luga o le fogaeleele.’

“O lea, e i ai le toetu ma se faamasinoga faaiu mo tagata” (“O Le Toetu o Iesu Keriso,” Ensign po o le Liahona, Me 2014, 113).

1 Korinito 15:22. “E faaolaina uma ia Keriso”

Na molimau mai Peresitene Iosefa Filitia Samita o le a toetutu tagata uma:

“E leai se tagata na ola ma maliu i lenei lalolagi o le a faafitia le toetu. Ua aoao mai e mafuaaga lenei mea, ma o se mataupu faigofie o le faamasinoga tonu. O Atamu lava ia na afua ai le oti, ma o lea e le tuuina lava e le Alii lenei mea i se faamasinoga a se isi lava tagata. E le poloaiina e le faamasinoga tonu se tagata e le o sona tiutetauave le oti e nafa ma ia, o lea, pei ona sa tautino mai e Paulo, E faapei ona oti umaia Atamu, e faapena foi ona ola uma ia Keriso’” (Doctrines of Salvation, comp. Bruce R. McConkie, 3 vols. [1954–56], 2:274).