Lesona 128: 1 Tesalonia 3–5

Lesona 128

1 Tesalonia 3–5

Folasaga

Na manao le Aposetolo o Paulo e faamalolosia le faatuatua o tagata o le Ekalesia i Tesalonia. Na ia aoao atu i latou e uiga i le Toetu o e ua oti i le Afio Mai Faalua o Iesu Keriso ma aoao atu i latou i le ala e saunia ai mo le Afio Mai Faalua.

Fautuaga mo le Aoaoina Atu

1 Tesalonia 3–4:12

Ua manao Paulo e faamalolosia le faatuatua o tagata o le Ekalesia i Tesalonia

Saunia mo tamaiti se kopi o le suega lea o le moni ma le sese e faatatau i le Afio Mai Faalua o Iesu Keriso, ma fai i ai e filifili le tali moni po o le sese i autafa o fesili taitasi:

1 Tesalonia 3–5

Tusi lesona a le Faiaoga Seminare o le Feagaiga Fou—Lesona 128

M/S 1. O le Au Paia faamaoni o e maliliu a o lei oo mai le Afio Mai Faalua o le a le toetutu seia oo i le iuga o le Meleniuma.
M/S 2. O le Au Paia faamaoni o e ola i le Afio Mai Faalua o le a segia e faafetaiai Keriso pe a afio mai o Ia.
M/S 3. O le Afio Mai Faalua o le a faateia ai tagata uma e pei o se gaoi i le po.

Faamatala o le a e le avatua ni tali i le suega i le taimi lea, ae e mafai e le vasega ona maua ia tali sao i le lesona o le aso. Valaaulia le vasega e vaavaai mo upumoni e uiga i le Afio Mai Faalua o Iesu Keriso a o latou suesueina le 1 Tesalonia 3–5.

Faamanatu i le vasega ina ua uma ona folafola atu le talalelei mo se taimi puupuu i Tesalonia, sa tutuliese faamalosi ia Paulo, Sila, ma Timoteo mai le aai e taitai Iutaia (tagai Galuega 17:5–15). Mulimuli ane, na toe auina atu e Paulo ia Timoteo i Tesalonia e siaki ia tagata fou liliu mai ma faamalolosia lo latou faatuatua. I le 1 Tesalonia 3:1–7ua tatou aoao ai na lipoti atu e Timoteo ia Paulo faapea sa tumau faamaoni le Au Paia e ui ina sa feagai ma sauaga. Sa peiseai foi na lipoti atu e Timoteo sa tele ni fesili a le Au Paia e uiga i le Afio Mai Faalua o Iesu Keriso. Na tusia e Paulo lana tusi i le Au Paia i Tesalonia e tali ai a latou fesili.

Valaaulia se tamaitiiti aoga e faitau leotele le 1 Tesalonia 3:9–10. Fai i le vasega e mulimuli ai ma vaavaai mo mea na fai mai Paulo ia tatalo ai i le taimi na toesea ai mai le Au Paia i Tesalonia.

O le a le mea na fai mai Paulo sa ia tatalo ai i le taimi o lona toesea?
O le a le uiga o le fasifuaitau “e faaatoatoaina ai mea e lei atoa i lo outou faatuatua” i le fuaiupu 10? (Na manao Paulo e faamalolosia le faatuatua o tagata o le Ekalesia i Tesalonia.)

Faamatala o le ala tasi na saili e Paulo e faamalolosia ai le faatuatua o tagata o le Ekalesia i Tesalonia o le fesoasoani lea ia latou malamalama atili i le ala latou te saunia ai mo le Afio Mai Faalua. Valaaulia se tamaitiiti aoga e faitau leotele le 1 Tesalonia 3:11–13. Fai i le vasega e mulimuli ai, ma vaavaai mo mea na faamoemoe Paulo o le a faia e le Alii mo le Au Paia e saunia ai i latou mo Lona Afio Mai Faalua.

O le a le mea na faamoemoe ia Paulo ia fai e le Alii ia saunia ai le Au Paia mo Lona Afio Mai Faalua?

Valaaulia se tamaitiiti aoga e faitau leotele le 1 Tesalonia 4:1. Fai i le vasega e mulimuli ai, ma vaavaai mo mea na apoapoai atu Paulo i le Au Paia i Tesalonia e fai e saunia ai mo le Afio Mai Faalua.

O le a le mea na apoapoai atu Paulo i le Au Paia i Tesalonia e fai e saunia ai mo le Afio Mai Faalua?

Tofi i tagata taitasi i le vasega se tasi o mau nei (e fua i le tele o lau vasega, e mafai ona tofi i tagata e sili atu ma le tasi le mau lava e tasi): 1 Tesalonia 4:2–5; 4:6–8; 4:9–12. Valaaulia le vasega e faitau a latou mau na atofa atu ma tali ia fesili nei (atonu e te manao e tusi fesili nei i le laupapa):

O le a le mea na apoapoai atu Paulo i le Au Paia e fai ia fiafia ai le Alii?
O le a sou manatu e faapefea ona fesoasoani le ola ai i lena aoaoga e saunia ai mo le Afio Mai Faalua?

A uma ua lava le taimi, valaaulia ni nai tamaiti aoga e lipoti mai a latou tali i le vasega.

1 Tesalonia 4:13–18

Ua aoao atu Paulo e uiga i le Toetutu o e ua oti i le Afio Mai Faalua o Iesu Keriso

Faaali le ata O Le Afio Mai Faalua (Tusi Ata o le Talalelei [2009], nu. 66; tagai foi i le LDS.org).

Faamatala sa lei malamalama le au paia i Tesalonia i ni vaega patino o le Afio Mai Faalua. Sa popole i latou o le a le mafai e tagata o le Ekalesia i Tesalonia o e ua maliliu ona maua faamanuiaga o le Afio Mai Faalua.

Valaaulia se tamaitiiti aoga e faitau leotele le 1 Tesalonia 4:13–14, 16 Fai i le vasega e mulimuli ai, ma vaavaai po o a mea na aoao atu e Paulo e uiga i le Au Paia faamaoni o e oti a o lei oo i le Afio Mai Faalua. Faamatala sa faaaoga e Paulo ia upumomoe ma le momoe e faasino ai i e ua oti.

O le a le upumoni na aoao atu e Paulo e uiga i le au paia faamaoni o e oti a o lei oo i le Afio Mai Faalua? (O tamaiti aoga e tatau ona faailoa mai le mea lenei: O le Au Paia faamaoni o e oti a o lei oo mai le Afio Mai Faalua o le a toetutu pe a toe afio mai Iesu.
O le a le uiga o le fasifuaitau “aumaia e le Atua faatasi ma ia e o momoe ona o Iesu” i le fuaiupu 14? (O le Au Paia faamaoni o e toetutu mai i le Afio Mai Faalua o le a segia e faafetaiai Iesu Keriso ma o le a o ifo faatasi ma Ia i le mamalu [tagai MF&F 88:97–98].)

Valaaulia se tamaitiiti aoga e faitau leotele le 1 Tesalonia 4:15, 17. Fai i le vasega e mulimuli ai, ma vaavaai pe o a mea na aoao atu e Paulo e uiga i le au paia faamaoni o e o le a ola i le taimi e toe afio mai ai Keriso. Valaaulia le vasega e faitau foi i le Faaliliuga a Iosefa Samita i le fuaiupu 15, vaefaamatalaga a. Ona valaaulia lea o ia e faitau le Faaliliuga a Iosefa Samita i le fuaiupu 17, vaefaamatalaga a. Atonu e te manao e tau i ai o le Faaliliuga a Iosefa Samita ua suia le matou i fuaiupu nei i le latou, e atagia ai o le Afio Mai Faalua o le a le tupu i ona po o Paulo.

O le a le upumoni na aoao atu e Paulo e uiga i le Au Paia faamaoni o e o le a ola i le Afio Mai Faalua? (O tamaiti aoga e tatau ona faailoa mai le mea lenei: O le Au Paia faamaoni o e ola i le Afio Mai Faalua o le a segia ae e faafetaiai ia Iesu Keriso pe a afio mai o Ia.

Valaaulia le vasega e faitau lemu le 1 Tesalonia 4:18, ma vaavaai mo mea na faamoemoe Paulo o le a fai e le au paia pe a uma ona faalogo i nei upumoni e uiga i le Afio Mai Faalua. Valaaulia tagata aoga e lipoti mai mea ua latou mauaina.

O le a se faamafanafanaga e te maua i nei aoaoga faavae e uiga i le Afio Mai Faalua?

1 Tesalonia 5

Ua aoao atu e Paulo tagata o le Ekalesia iTesalonia le ala e saunia ai mo le Afio Mai Faalua

Valaaulia se tamaitiiti aoga e faitau leotele le 1 Tesalonia 5:1–3 Fai i le vasega e mulimuli ai, ma vaavaai mo talafaatusa e lua sa faaaoga e Paulo e faamatala ai le taimi o le Afio Mai Faalua.

O a talafaatusa e lua na faaaoga e Paulo e faamatala ai le taimi o le Afio Mai Faalua? (“O se gaoi i le po” [fuaiupu 2] ma “se fafine to” ua faatiga [fuaiupu 3].)

Faamatala o se gaoi i le po e masani ona sau “e aunoa ma se lapataiga” (Bruce R. McConkie, Doctrinal New Testament Commentary, 3 vols. [1965–73], 3:54).

O le a se mea o aoao mai e le talafaatusa a Paulo i se gaoi i le po e uiga i le Afio Mai Faalua?
O le a se mea o aoao mai ai i tatou e uiga i le Afio Mai Faalua i le talafaatusa a Paulo i se fafine ua faatiga?

A uma ona tali e le vasega fesili na muamua, atonu e te manao e tau atu na aoao mai e Elder Bruce R. McConkie o le Korama a Aposetolo e Toasefululua mea nei e faatatau i le talafaatusa o se fafine ua faatiga: “Na te leiloa le itula po o le minute o le taunuu mai o le pepe, ae na te iloa le taimi faatatau” (Doctrinal New Testament Commentary, 3:54). E faavae i lenei talafaatusa, e mafai foi ona mafaufau pe faapefea ona pei tofotofoga e muamua mai i le Afio Mai Faalua i le tiga fanau? Ae e faapei lava o le matagofie o le taunuu mai o se pepe, e faapena foi le matagofie o le Afio Mai Faalua i e amiotonu.

Valaaulia se tamaitiiti aoga e faitau leotele le 1 Tesalonia 5:4–6. Fai i le vasega e mulimuli ai, ma vaavaai pe aisea o le a le o se mea e ofo ai le Au Paia faamaoni i le Afio Mai Faalua.

Aisea o le a le ofo ai le Au Paia faamaoni i le Afio Mai Faalua?
O le a le uiga o le avea ma “fanau o le malamalama”? (O le fasifuaitau “fanau o le malamalama” i le fuaiupu 5 e faasino i tagata faamaoni o le Ekalesia o e “faatea ese galuega o le pogisa” [Roma 13:12], maua le mafutaga ma le Agaga Paia, ma o le a saunia ai mo le Afio Mai Faalua [tagai MF&F 106:4–5].
O le a uiga o le “ia mataala ma ia faautauta”? (1 Tesalonia 5:6).
E faapefea ona e aoteleina ia mea na aoao atu e Paulo i le Au paia i Tesalonia e uiga i le ala e saunia ai mo le Afio Mai Faalua? I le faaaogaina o upu a tagata o le vasega, tusi le upumoni lenei i luga o le laupapa.) Afai tatou te faamaoni ma mataala mo faailoga e muamua mai i le Afio Mai Faalua o Iesu Keriso, ona saunia lea o i tatou pe a toe afio mai o Ia.

Valaaulia se tagata o le vasega e faitau leotele le saunoaga lenei mai ia Peresitene Iosefa Filitia Samita, ma fai atu i le vasega e faalogologo pe mafai faapefea ona tatou saunia mo e Afio Mai Faalua:

“Ua tumu le lalolagi i mea faafatiatamai, o faalavelave. Ua le tata fatu o tagata. Ua tatou vaai i faailoga e pei ona tatou vaai i le laau o le mati o tulioso mai ona lau; ma iloa ai ua lata mai lea taimi, ua alagatatau ai ia te au ma oe foi, ma tagata uma i le lalolagi, ona gauai atu i afioga a Keriso, i ana aposetolo ma mataala, aua tatou te le iloa le aso po o le itula” (Doctrines of Salvation, comp. Bruce R. McConkie, 3 vols. [1954–56], 3:52–53).

E tusa ai a Peresitene Samita, e mafai faapefea ona tatou saunia mo le Afio Mai Faalua?

Valaaulia le vasega e toe iloilo ia faamatalaga moni-sese ma tali sa latou tusia i le amataga o le vasega.

E faavae i upumoni na e aoaoina i lenei lesona, pe e te manao e sui se tasi o au tali? (Tali: [1] Sese, [2] Moni, [3] Sese.)

Aotele le 1 Tesalonia 5:7–22i le faamatala faapea na fautuaina atili e Paulo le Au Paia i le ala e saunia ai mo le Afio Mai Faalua.

Valaaulia le vasega e faitau lemu le 1 Tesalonia 5:12–22, ma vaavaai mo mea na fautuaina e Paulo ia le Au Paia e fai e saunia ai i latou lava ma isi e faafetaiai le Faaola i Lona Afio Mai Faalua. Fautuaina le vasega e filifili se mea o fautuaga e sili ona taua ia i latou. Valaaulia tamaiti aoga e tali fesili o loo i lalo i api e tusi ai fesili nei po o api talaaga o le suesueina o tusitusiga paia. (Atonu e te manao e tusi fesili nei i luga o le laupapa.)

O le a le fautuaga mai le 1 Tesalonia 5:12–22e sili ona taua ia te oe?
E mafai faapefea e le ola i lenei fautuaga ona fesosoani ia te oe ma isi ia saunia ai mo le Afio Mai Faalua?
E faapefea ona e fautuaina se tasi e faaaoga lenei fautuaga i le olaga i aso taitasi?

A uma loa ua lava se taimi, valaaulia ni nai tamaiti aoga e lipoti mai a latou tali i le vasega.

Valaaulia se tamaitiiti aoga e faitau leotele le 1 Tesalonia 5:23–24. Fai i le vasega e mulimuli ai, ma vaavaai po o le a le mea na fai mai Paulo o le a faia e le Atua mo Ana Au Paia faamaoni a o latou sauniuni mo le Afio Mai Faalua.

O le a le mea e fai e le Atua mo Ana Au Paia faamaoni a o latou sauniuni mo le Afio Mai Faalua?

Faaiu i le molimau atu i upumoni na aoao atu i le lesona lenei, ma valaaulia tagata aoga e sauniuni ma le faamaoni mo le Afio Mai Faalua.

Tala ma Faamatalaga o Talaaga

1 Tesalonia 4:17. “Aveina ae faatasi”

“O le Faaliliuga a Iosefa Samita o le 1 Tesalonnia 4:17 ua faitauina: ‘Ona aveina ae lea faatasi o i latou o eo ola, i ao faatasi ma i latou o totoe, e faafetaiai i le Alii i le vanimonimo; ona tatou faatasi pea lava lea ma le Alii’ (i le 1 Tesalonia 4:17, vaefaamatalaga a) E toatele Kerisiano e faaaogaina le upu rapture (mai se upu Latina o lona uiga ‘aveina ae’) pe a faasino i le taimi o le a aveina ae ai e amiotonu e faafetaiai le Faaola i Lona afio mai” (Tusi lesona a le Tagata Aoga o le Feagaiga Fou [Church Educational System manual, 2014], 450).

1 Tesalonia 5:19. “Aua tou te tineia le agaga”

“I le tulaga i le faaiuga o le 1 Tesalonia, na tuu atu ai e Paulo ni mea o le fautuaga faatino i le ala e saunia ai mo le afio mai o le Alii (tagai 1 Tesalonia 5:6–23). O se vaega o lana fautuaga, sa talosaga atu ai Paulo i le Au Paia e ‘aua le tineia le Agaga’ (1 Tesalonia 5:19). O le tineia o le Agaga o lona uiga o le faaumatia po o le titinaina o le tosinaga a le Agaga Paia i le olaga o se tagata (tagai foi Efeso 4:30–31). Sa tau mai e Elder David A. Bednar [o le Korama a Aposetolo e Toasefululua] e faapea ina ia olioli atoatoa i le mafutaga ma le Agaga Paia, e tatau ona tatou taumamao mai gaoioiga o le a tuliese ai le Agaga mai ia i tatou:

“‘Afai o se mea tatou te mafaufau i ai, vaai i ai, faalogo i ai, pe fai foi tatou te taumamao ai mai le Agaga Paia, o lona uiga ua tatau loa ona taofia le mafaufau i ai, vaai i ai, faalogologo i ai, po o le faia o lena mea. mo se faataitaiga afai o le mea o loo faamoemoe e faafiafia ai, e tavavae ese mai ai i tatou mai le Agaga paia, ua manino mai ai o na ituaiga o faafiafiaga e le mo i tatou. Talu ai e le mafai ona mafuta le agaga ma mea faatufanua, o mea paaa, pe le tausaafia foi, o lona uiga e manino lava e le mo i tatou foi na mea. Aua tatou te tuleiesea ai le Agaga o le Alii pe a tatou auai i gaoioiga ua tatou iloa e tatau ona tatou lafoaia o lona uiga e le mo i tatou na ituaiga o mea.

“‘… A o tatou saga faalofiaina i tatou i le Agaga o le Alii, e tatau ona tatou taumafai ia iloa uunaiga pe a oo mai , ma taaiga po o mea e afua ai ona tatou aveeseina mai i tatou lava mai le Agaga Paia’ (‘Ina ia tatou maua pea lona Agaga e faatasi ma i tatou,’ Ensign po o le Liahona, May 2006, 30)” (Tusi lesona a le Tagata Aoga o le Feagaiga Fou [Church Educational System manual, 2014], 451).

1 Tesalonia 5:20–21. “Ia tofotofo i mea uma lava; ia taofi mau i le mea lelei”

I le avea ai ma tagata o le Ekalesia, ua apoapoaiina i tatou e suesue ma ia faamaoni (pe tofotofo) i mea tatou te faitauina, faalogo ai, pe sa aoaoina ai. Na aoao ai e Iosefa Filitia Samita e faapea e mafai ona tatou tofotofo i le moni o mea tatou te faitauina, faalogo ai, pe sa aoaoina ai e ala i le faatusaina i aoaoga o afioga a le Atua i tusitusiga faavae (tagai Doctrines of Salvation, comp. Bruce . McConkie, 3 vols. [1954–56], 3:203). Afai o mea tatou te faitau ai, pe sa aoaoina ai e le ogatusa ma afioga a le Atua o loo maua i tusi paia po o upu a Ana perofeta soifua ma aposetolo “a o ogatasi ai ma … tusitusiga faavae,” ona avea lea ma o tatou tiutetauave le teena e le moni (Joseph Fielding Smith, Doctrines of Salvation, 3:203). Afai e moni, ona avea lea ma a tatou tiutetauave le ola ai i na aoaoga.

1 Tesalonia 5:22. “Ia mamao outou mai mea leaga eseese uma lava”

“Na aoao atu e Paulo le Au Paia e taumamao mai ituaiga uma o ‘foliga’ o mea leaga, i se isi faaupuga, mai ‘ituaiga’ uma o mea leaga (1 Tesalonia 5:22, vaefaamatalaga e). Ua faaaoga foi e taitai o le Ekalesia le 1 Tesalonia 5:22 e aoao atu ai e tatau ona tatou aloese mai le foliga mai e pei o loo tatou faia se mea leaga. Mo se faataitaiga, na aoao mai Peresitene James E. Faust [o le Au Peresitene Sili]: ‘Ou te uunaia malosi outou afai e iai soo se fesili i o outou mafaufau po o loto e uiga i le sao po o le sese o lau amio, aua e te faia. O le tiutetauave o perofeta a le Atua le aoao atu o le afioga a le Atua , ae le tauina atu i tagata ia iota uma o le amio e tatau ona iai. Afai tatou te taumafai ma le faaeteete e aloese e le gata i le tiapolo ae o mea faatiapoloa, o le a tatou faia mo i tatou lava ae le seiloga e tau faatonuina (‘O le Faai o le Tevolo,’ Ensign po o le Liahona, Me 2003, 51). Na avatu foi e Paulo se fautuaga faapea i le 1 Korinito 8:9–13” (Tusi lesona a le Tagata Aoga o le Feagaiga Fou [Church Educational System manual, 2014], 451).