Lesona 21

Mataio 18

Folasaga

Sa aoao atu e Iesu Keriso Ona soo i mataupu faavae o le a fesoasoani ai ia i latou e taitai Lana Ekalesia pe a mavae Lona Afio Ae. Na tuuina atu foi e le Alii se faataoto i le auauna le alofa e tali ai le fesili a Peteru e uiga i le faamagalo atu.

Fautuaga mo le Aoaoina Atu

Mataio 18:1–20

Sa aoao atu e Iesu Keriso Ona soo i mataupu faavae lea o le a fesoasoani ia i latou e taitai ai le Ekalesia.

Lisi ia faatausuai nei i luga o le laupapa: o le pepelo i ai; o le gaoia o se mea; faalataina e se uo. Fai i le vasega e faatulaga filemu ia faatausuai taitasi i se fuafaatatau o le 1 i le 10, o le 1 e sili ona faigofie ona faamagalo ma le 10 e sili ona faigata. Valaaulia ni nai tagata e lipoti atu pe faapefea ona latou fuaina faatausuai taitasi.

Valaaulia le vasega e mafaufau pe aisea e tatau ai ona tatou faamagalo atu i isi tusa lava pe faigata ona fai.

Valaaulia le vasega a o latou suesueina le Mataio 18 e vaavaai mo upumoni e mafai ona fesoasoani latou te malamalama ai pe aisea e tatau ai ona tatou faamagalo atu i isi.

Otooto le Mataio 18:1–14 i le faamatala atu na faatonu e Iesu Ona soo ia faalotomaulaloina i latou lava ma avea o tamaiti laiti. Sa Ia faamatala foi o i latou o e “faatausuai” i tamaiti laiti, e latou te taitaiseseina i latou, pe afua ai ona latou tautevateva i le faatuatua, o le a tatau mo i latou le faamasinogatonu a le Atua (tagai fuaiupu 6–7, e aofia ai le fuaiupu 6, vaefaamatalaga a). Ona fautuaina lea e le Faaola Ona soo ia aveesea mai i o latou olaga na mea e ono faatausuai ai i latou, pe afua ai ona latou tautevateva (tagai fuaiupu 9). (Manatua: O aoaoga a le Faaola o loo maua i le Mataio 18:1–14 o le a auiliiliina i lesona i leMareko 9 ma le Luka 15.)

Faamatala ina ua uma ona fautuaina e le Faaola Ona soo e aveese mai o latou olaga na mea ia e ono afua ai ona latou tautevateva, sa Ia ta’u atu ia i latou mea e tatau i se tagata ona fai pe a agaleaga atu se tasi, pe agasala, ia te ia. Sa Ia aoao atu foi i Aposetolo ia mataupu faavae o le aoaiga a le Ekalesia.

Valaaulia se tagata e faitau leotele le Mataio 18:15, ma fai i le vasega e vaavaai mo mea na ta’u atu e Iesu i Ona soo e fai pe afai e agaleaga atu se tasi ia i latou.

• O le a se mea e mafai ona tatou aoao mai lenei fuaiupu e uiga i mea e ao ona tatou faia pe a agaleaga mai se tasi ia i tatou?

Otooto Mataio 18:16–17 i le faamatala atu na ta’u atu e le Faaola i Ana Aposetolo afai e musu se tagata e tautino lona sese ma ta’uta’u atu lana agasala, ma ua i ai ni molimau se toalua pe sili atu faasaga ia te ia, o le a aveesea lena tagata mai le Ekalesia. Atonu foi e te manao e faamatala atu o le taimi nei, o i latou o loo pulefaamalumalu i fono aoai a le Ekalesia, lea e faia ai faaiuga faapena, latou te sailia e le aunoa le finagalo o le Alii e tusa ai pe tatau ona faateaese se tagata mai le Ekalesia pe tape le igoa.

Valaaulia se tamaitiiti aoga e faitau leotele le Mataio 18:18–20. Fai i le vasega e mulimuli ai, ma vaavaai pe o le a le pule na maua e le au Aposetolo.

• O le a le pule na tuu atu i le au Aposetolo? (Faamatala na tuu atu e le Faaola i le au Aposetolo ia ki o le perisitua, lea na avatu ai ia i latou le pule, i lalo o le taitaiga a Peteru, e faatino ai sauniga faamau ma faia ai faaiuga tumau e tusa ai ma le Ekalesia, e aofia ai pe mafai ona faatumauina se tagata agasala o se tagata o le ekalesia [tagai Mataio 16:19].)

• O le a le mea na folafola atu e le Alii i Ana Aposetolo i fuaiupu 19–20? (Atonu e te manao e fautua atu ia faailoga e tagata aoga lenei mataupu faavae i le fuaiupu 20.)

Mataio 18:21–35

Ua tuu atu e le Alii le faataoto i le auauna le alofa

Valaaulia se tagata e faitau leotele le tala lea, na faamatalaina e Peresitene Thomas S. Monson, o se aiga na maliu se pepe e lua masina le matua:

“[O le] tama o se tagata fau meafale ma sa ia faia se pusa maliu matagofie mo le tamaititi pele. O se aso pogisa le aso o le falelauasiga, na atagia mai ai le lagona faavauvau sa la lagonaina. A o savavali atu le aiga i le falesa, faatasi ma le Tama o loo tauaveina atu lena tamai pusa maliu, sa faapotopoto atu nisi o uo. Ae peitai, sa loka le faitotoa o le falesa. Sa matuai galo lava i le epikopo pisi le maliu. Sa le manuia taumafaiga ina ia maua mai o ia. I le leiloa po o le a le mea o le a fai, o lea sa afisi e le tama le pusa maliu i lalo o lona lima, faatasi ma lona aiga i ona autafa, ma toe sii atu i le fale, ma savavali i le maligi o timuga” (“O Tina Natia,” Ensign, May 2002, 19)

• Pe ana faapea o oe o se tasi o lena aiga, mata o le a sou lagona ina ua le alu atu le epikopo mo le falelauasiga?

• Aisea e faigata ai ona faamagalo le epikopo?

Faamatala ina ua uma ona faatonu e le Faaola le au Aposetolo, sa fesili Peteru i le Alii e uiga i le faamagalo atu. Valaaulia se tasi e faitau leotele le Mataio 18:21, ma fai i le vasega e vaavaai mo le fesili a Peteru.

• O le a le mea na fesili ai Peteru i le Faaola?

Faamatala o nisi o taitai faalelotu i ona po o Peteru sa aoao atu faapea sa lei manaomia e se tagata ona ofo atu le faamagaloga i se isi tagata e silia ma le faatolu. I le fesili ai i le Alii pe tatau ona faamagalo atu i se tasi faafitu, atonu sa mafaufau Peteru ua agalelei naua o ia (tagai Bruce R. McConkie, The Mortal Messiah, 4 vols. [1979–81], 3:91). Valaaulia le vasega e faitau filemu le Mataio 18:22ma vaavaai mo le tali a le Faaola ia Peteru.

• E faafia ona fetalai le Faaola e tatau ona tatou faamagalo atu iai latou o e faatausuai mai pe agasala mai ia i tatou? (Faamatala o le “faafitugafulu ni fitu” o se auala o le faapea atu e le tatau ona tuu se tapulaa o le aofaiga o taimi tatou te faamagalo atu ai i isi.)

• O le a le upumoni e mafai ona tatou aoao mai le Faaola e uiga i le faamagalo atu o isi? (E ono faaaoga e tagata aoga ni upu eseese, ae ia mautinoa latou te faailoa mai le upumoni lea: Ua poloaiina i tatou e le Alii e faamagalo atu i latou o e tausuai mai pe agasala mai ia i tatou.

• O le a le uiga o le faamagalo atu i isi? (Faamatala o le faamagalo atu o isi o le faia lea ma le alofa o le tagata sa faatausuai mai pe faatiga ia i tatou ma ia aua nei i ai ni lagona agaleaga ia te ia [tagai Taiala i Tusitusiga Paia, “Forgive,” scriptures.lds.org; MF&F 64:9–11]. O le faamagalo atu e le faapea tatou te tuu atu pea lava pea i isi e faatiga ia i tatou pe faapea o lena tagata faatausuai e le tatau ona tali atu mo ana faatinoga e tusa ai ma le tulafono, po o se mea faapena.)

Faamatala ina ua uma ona tali le fesili a Peteru, sa aoao atu e le Faaola Ona soo i se faataoto e mafai ona fesoasoani ia i tatou e malamalama ai pe aisea e tatau ai ona faamagalo atu i isi.

Fai paga le vasega ma valaaulia paga taitasi e faitau faatasi le Mataio 18:23–35, ma vaavaai mo mafuaaga e tatau ai ona faamagalo atu i isi. A uma ua lava se taimi, valaaulia le vasega e lipoti atu mea na latou maua.

Ina ia fesoasoani ia loloto le malamalama o le vasega i lenei faataoto, kopi upu nei i luga o lelaupapa

Tupu	Auauna	Uso a auauna

• E fia le aitalafu a le auauna i le tupu? (Tusi aitalafu i le tupu e 10,000 taleni i lalo o le Auauna.)

Faamatala i ona po o Iesu o le “10,000 taleni e tutusa ma le 100,000,000 tenari [tupe Roma] O le tasi le tenari o se totogi masani lea o le aso o le tagata faigaluega” (Jay A. Parry and Donald W. Parry, Understanding the Parables of Jesus Christ [2006], 95). Fai i le vasega e fuafua pe fia tausaga e tatau i le auauna ona galue ai ina ia uma ai ona totogi lenei aitalafu i le vaevae o le 100,000,000 i le 365 aso (100,000,000/365 = 273,973). Tusi le 273,973 tausaga i luga o le laupapa i lalo o le aitalafu i le tupu i le 10,000 taleni.

• E fia le tupe na aitalafu ai le uso a auauna i le auauna? (Tusi leaitalafu i le auauna i le 100 pene i lalo o le Uso a auauna.)

Faamatala o le 100 pene e tusa ma le 100 tenari. O le mea lea, sa nofo aitalafu le uso a auauna i le auauna pe tusa ma le 100 aso faigaluega, pe toetoe atoa le tasi vaetolu o lona totogi i le tausaga. Tusi le100 aso i le laupapa i lalo o le aitalafu i le auauna le 100 pene.

• Aisea e te manatu ai na ta’u atu e le tupu i le auauna o ia o se tagata amioleaga i le le faamagaloina o le aitalafu a lona uso a auauna?

Fesili i le vasega po o ai ua latou manatu e faatusa i ai tagata taitasi e toatolu i le faataoto? A uma ona tali mai tamaiti aoga, tusi faatusa nei i le laupapa: Tupu = Tama Faalelagi, Auauna = Tatou, Uso a auauna = O i latou o e sa faatausuai mai ia i tatou.

• O le a le mataupu faavae e te manatu sa taumafai le Faaola e aoao atu i Ona soo i le mafuaaga e tatau ai ona tatou faamagalo atu i isi? (E tatau i le vasega ona faailoa mai se mataupu faavae e pei o nei: Afai tatou te mananao i le Atua e faamagalo i tatou, ona tatau lea ona tatou naunau e faamagalo atu i isi. Tusi le mataupu faavae lenei i le laupapa.

• O le a se mea e mafai e se tagata ona fai pe afai o tauivi o ia ma le faamagalo atu o se tasi?

Ina ia fesoasoani ia malamalama le vasega i mea e mafai ona tatou fai ia atili naunau ai e faamagalo i isi, valaaulia se tagata e faitau leotele le saunoaga lea a Peresitene James E. Faust o le Au Peresitene Sili. Afai e mafai, ia fai se tufaaga mo tagata aoga taitasi.

“E manaomia ona tatou iloa ma faailoa lagona ita. E manaomia ai le lotomaualalo e faia ai, peitai afai tatou te o ifo i o tatou tulivae ma ole atu i le Tama Faalelagi mo se lagona o le faamagaloga, o le a fesoasoani mai o Ia ia te i tatou. E manaomia e le Alii i tatou ‘e faamagalo atu i tagata uma’ [MF&F 64:10] mo lo tatou lava lelei ‘o le inoino e afaina ai le tuputupu ae faaleagaga’ [Orson F. Whitney, Gospel Themes (1914), 144]. Sei iloga ua tatou faamamaina i tatou lava mai le inoino ma le ita ona mafai lea e le Alii ona tuu le mafanafana lelei i o tatou loto. …

“… A tulai mai mala, e le tatau ona tatou tali atu i ai e ala i le saili atu e tauimasui, ae ia tau lava ina tuu atu le faamasinoga tonu i lona ala, ona faagalo ai lea. E le faigofie ona faagalo ma faamama o tatou loto mai le faateleina o le ita. Ua uma ona ofoina mai e le Faaola ia i tatou uma se filemu taua e ala i Lana Togiola, peitai ua na o lo tatou naunau e lafoai lagona le lelei o le ita, lotovale, po o le tauimasui e mafai ai ona oo mai. Mo i tatou uma o e faamagalo atu ‘i latou o e agaleaga mai ia te i tatou’ [Faaliliuga Iosefa Samita, Mataio 6:13], e oo lava ia i latou o e sa faia ni agasala matuia, o le Togiola e aumaia ai se fuataga o le filemu ma le mafanafana” (James E. Faust, “O Le Mana Faamalolo o le Faamagalo Atu,” Ensign po o le Liahona, Me 2007, 69).

• O le a le mea na ta’u mai e Peresitene Faust tatou te faia o le a fesoasoani ia i tatou e faamagalo atu ai i isi?

• E tusa ai ma le saunoaga a Peresitene Faust, o le a le mea e tupu pe a tatou faamagalo atu i isi?

Faamanatu i le vasega le tala na faasoa mai e Peresitene Monson i le amataga o le vasega, ma fai i se tagata e faitau le faaiuga o le tala:

“Pe ana fai o se aiga e faatauvaa, semanu latou te tuuaia le epikopo ma latou teulotoina ni lagona le lelei. Ina ua iloa e le epikopo le faaletonu, sa asiasi o ia i le aiga ma faatoese i ai. Faatasi ai ma le tiga sa iloga mai i ona foliga, ae faatasi ai ma loimata i ona mata, sa talia e le tama le faatoesega, ma sa feopoai le toalua lenei i se agaga o le malamalama” (“O Tina Na,” Ensign, Me 2002, 19).

• Na faapefea ona fesoasoani le Atua ia te oe e faamagalo se tasi sa agasala atu pe faatausuai atu ia te oe?

• O le a se mea na fesoasoani ia te oe e faamagalo ai i isi? (Fuafua e valaaulia tagata aoga e tali atu i nei fesili i totonu o a latou api o le vasega po o api talaaga mo le suesueina o tusitusiga paia.)

Fai fesili ma fai ia valaaulia e uunaia ai le faaaogaina

O le faamoemoega o le aoao atu o le talalelei o le fesoasoani lea i tagata aoga e faaaoga ia mataupu faavae ma aoaoga faavae e maua i tusitusiga paia, ia liua, ma maua faamanuiaga folafolaina i e faamaoni ma usiusitai. O fesili ma valaulia e uunaia ai le faaaogaina e mafai ona fesoasoani i tagata aoga e iloa ai pe mafai faapefea ona latou faaaogaina nei mataupu faavae ma aoaoga faavae i o latou tulaga o i ai i le taimi nei ma i le lumanai.

Valaaulia tagata aoga e mafaufau loloto pe o ai atonu o loo latou taofiofia le faamagalo atu i ai. Valaaulia i latou e tatalo mo se manao e faamagalo atu ma le tomai e lafoai ai se tiga ma se ita ina ia mafai ai ona fesoasoani Iesu Keriso ia latou maua le filemu ma le mafanafana e ala i Lana Togiola.

Tala ma Faamatalaga o Talaaga

Mataio 18:20. “O le mea ua faapotopoto ai se toalua po o se toatolu i lo’u igoa, ou te iai faatasi ma i latou.

Na aoao mai e Peresitene Boyd K. Packer o le Korama a Aposetolo e Toasefululua faapea o lenei folafolaga o le faapotopoto faatasi i le suafa o Iesu Keriso e faatatau ia i tatou pe a pulefaamalumalu ai se taitai e tatau ai i faapotopotoga.

“Ua fetalai mai le Alii, ‘Aua o le mea ua faapotopoto ai se toalua po o se toatolu i lo‘u igoa, ou te i ai faatasi ma i latou.’ (Mata. 18:20; tagai foi MF&F 6:32.)

“E i ai le saogalemu i le aoaoina o le aoaoga faavae i faapotopotoga ia e lagolagoina e le pule tatau ” (“Reverence Invites Revelation,” Ensign, Nov. 1991, 21).

Mataio 18:21–22. “Faafitugafulu ni fitu”

“O le tali ‘faafitugafulu ni fitu’ (o se aofaiga ua saga faatele, o lona uiga e le mafaitaulia) e mo i latou o e agasala mai ae salamo. Ma mo i latou e agasala mai ia i tatou ae mumusu e salamo, o taimi muamua e tolu e tatau pea ia i tatou ona faamagalo atu, ae o le taimi lona fa o molimau faasaga i le tagata agasala e tatau ona avatu i luma o le Alii. Afai e salamo ma le loto faamaoni, ma faatinoina le toefaalelei po o le toetotogi, e manaomia le faamagaloga; ae afai e leai se salamo, e tuuina atu le tagata agasala i le faamasinoga a le Atua. O nei faatonuga faaopoopo uma o loo tuuina mai i le Mataupu Faavae ma Feagaiga 98:39–48, o le tulafono o le faamagalo atu” (D. Kelly Ogden and Andrew C. Skinner, Verse by Verse: O Evagelia e Fa [2006], 371–72).

Manatua le fasifuaitau “ia e le faamagalo atu ia te ia” i leMataupu Faavae ma Feagaiga 98:44o lona uiga o tagata na faia le agasala ae le salamo, e tatau ona tali atu atoatoa mo a latou mea na fai. E le faapea e tatau ona tatou taofia le faamagalo atu mai pe ita pea ia i latouDoctrine and Covenants and Church History Seminary Teacher Manual [Church Educational System manual, 2013], 349).

Mataio 18:22. Faamagaloga ma le aoaiga a le Ekalesia

Na aoao mai e Elder Bruce R. McConkie o le Korama a Aposetolo e Toasefululua le ala e fesootai ai le Mataio 18:22 i tulaga e aofia ai le aoaiga a le Ekalesia:

“E leai se tapulaa i le aofaiga o taimi e tatau ai i le usoga ona faamagalo e le tasi le isi i o latou agaleaga patino i luga o tuutuuga o le salamo faamaoni. Peitai, o lenei mea, e le o fuafua faapea o le Ekalesia lava ia o le a faaauau e aunoa ma se iuga e faamagalo ai ma faaaumea mai ona tagata e sese. E i ai taimi e tatau ai ona tuliesea tagata agasala mai le malo tusa lava po o le a le faanoanoa latou te oo i ai ona o a latou taga amioletonu”(Doctrinal New Testament Commentary, 3 vols. [1965–73], 1:423).

Mataio 18:23–30. Ua poloaiina i tatou e le Alii ia faamagalo atu ia te i latou o e faatausuai mai ia i tatou

Sa fesoasani mai Elder Richard G. Scott o le Korama a Aposetolo e Toasefululua ia tatou malamalama i le ala e faamanuiaina ai i tatou ona o le faamagalo atu o isi:

“O le faamagalo atu e faamaloloina ai manu’a matuia, aua na te faatagaina le alofa o le Atua e tuia lou loto ma le mafaufau mai le ’oona o le inoino. E faamamaina ai lou mafaufau fai ifo i le manao mo le tauimasui. E faaavanoaina ai le nofoaga mo le faamamaina, faamalologa, toefuataiina o le alofa o le Alii” (“Faamaloloina o Maila Matautia o le Faatautala,” Ensign, Me 1992, 33).

Na aoao mai e Peresitene Dieter F. Uchtdorf o le Au Peresitene Sili le mea lea e uiga i le faamagalo atu:

“Ia manatua, ua faatumulia le lagi ia i latou o loo i ai le tulaga tutusa lenei: Ua faamagaloina i latou. Ma latou te faamagalo atu” (“O Le e Alofa Atu e Alofaina Mai,” Liahona, Me 2012, 77).

Manatu Faaopoopo mo le Aoaoina Atu

Mataio 18:22. Ata Vitio—“Faamagalo Atu Faamagalo Atu: Ua Faamāmāina La’u Avega”

Ina ia fesoasoani ia lagona e le vasega le taua o le faamagalo atu o i latou e faatiga mai ia i tatou, fuafua e faaali le vitio“Faamagalo Atu: Ua Faamamaina La’u Avega” (8:24). I le vitio lenei, o loo faasoa mai ai e se tagata lona aafiaga o le maliu o lona toalua ma le fanau e toalua i se faalavelave tau taavale ma sa ia faamagalo i le avetaavale na maliliu ai i latou. O lenei vitio e mafai ona maua i le LDS.org.