Lesona 30
Mataio 26:1–30
Folasaga
E lua aso a o lumanai le Paseka, na taupulepule ai Iuta ma taitai o Iutaia o e sa mananao e fasiotia Iesu. I le po o le Paseka, na faatuina ai e Iesu le faamanatuga.
Fautuaga mo le Aoaoina Atu
Mataio 26:1–16
Ua taupulepule ia Iuta faatasi ma taitai o Iutaia o e ua mananao e fasioti Iesu
A o lei amataina le vasega, ia saunia se laulau e ala i le ufiufia i se ie laulau ma tuu ai i luga ni nai fasi falaoa tipi (po o ni masi) ma se ipu. A uma le faigalotu ia faamatala o le taimi o Keriso, o mea nei, faatasi ai ma isi, atonu na i ai i luga o laulau a Iutaia i le taimi o le Paseka.
-
O le a le faamoemoega o le tausamaaga o le Paseka? (O le Paseka sa faia i le taimi o Mose e faamanatu ai i le fanauga a Isaraelu faapea na laaloa le agelu i o latou fale ma fasiotia fanau ulumatua i Aikupito [tagai Esoto 12:21–28; 13:14–15]. O se vaega o le Paseka, sa fasia ai e tagata Isaraelu se tamai mamoe ma sausau lona toto i luga o pou o faitotoa. O lea tamai mamoe e faatusa i le afio mai o le Mesia, o lana taulaga togiola o le a laveai ai le tagata mai le oti ma le agasala “Passover,” scriptures.lds.org].)
Valaaulia se tamaitiiti aoga e faitau leotele le Mataio 26:1–2 Fai atu i le vasega e mulimuli i le faitauga, ma vaavaai po o le a le fetalaiga a Keriso i le mea o le a tupu pe a mavae le Paseka.
-
O le a le mea na fetalai Iesu o le a tupu pe a mavae le Paseka?
Valaaulia se tamaitiiti aoga e faitau leotele le Mataio 26:3–5 Fai i le vasega e mulimuli ai ma faailoa mai po o ai na fuafuaina se fuafuaga e fasioti Iesu i le taimi lea.
-
Aisea na tonu ai i le au tusiupu ma faitaulaga sili e faatali seia uma le Paseka ona fasioti lea o Iesu?
Otooto le Mataio 26:6–13 i le faamatala atu a o i ai Iesu i Petania, sa alu atu se fafine ia te Ia ma uuina o Ia i se suauu taugata e faataimua ai Lona maliu ma le tanuga o loo faatalitali mai. O nisi o Ona soo, e aofia ai ma Iuta, o se tasi o Aposetolo e Toasefululua ma le teutupe a le vaega, sa faitio faapea sa tatau ona faatau atu le suauu e fesoasoani ai i e matitiva. Peitai, e lei manatu moni ia Iuta mo e matitiva aua o ia o se faomea, sa manao i le tupe mo ia lava Ioane 12:4–6). (Manatua: O le uuina o Iesu i Petania o le a talanoaina auiliili i le lesona o i le Mareko 11–14.)
Valaaulia se tamaitiiti aoga e faitau leotele le Mataio 26:14–16 Fai i le vasega e mulimuli ai, ma vaavaai mo mea na faia e Iuta ina ua uma ona aoai o ia e le Faaola i le faitio.
-
O le a le mea sa faia e Iuta? (Sa taupulepule o ia ma le au faitaulaga sili e fesoasoani ia i latou e faasino atu ma pue faapagotaina Iesu.)
-
E fia le tupe na totogi ai e le au faitaulaga sili ia Iuta e tuuina atu Iesu ia te i latou?
Faamatala “e tusa ai ma le tulafono a Mose, o sekeli e tolusefulu o siliva o le a taui ai se e faaooina le oti i se pagota (tagai Esoto 21:32). … O le totogi o le faalata e atagia mai ai le maualalo tele o le manatu o Iuta ma le au faitaulaga sili i le Faaola” (Tusi lesona a le Tagata Aoga o le Feagaiga Fou [Church Educational System manual, 2014], 81). Ua faataunuuina ai foi se valoaga o le Feagaiga Tuai i le faalataina o le Faaola e Iuta (tagai Sakaria 11:12).
Mataio 26:17–25
Ua taumamafa Iesu ma Ona soo i le tausamiga o le Paseka
Faaali atu se faaata ma fesili:
-
O a ni mea e mafai ona fesoasoani ai faaata ia i tatou?
Valaaulia se tamaitiiti aoga e faitau leotele le saunoaga lenei a Peresitene Dieter F. Uchtdorf o le Au Peresitene Sili:
“E tele lava ina tatou taumafai e aloese mai le tagai totoa i o tatou loto ma faailoa o tatou lava vaivaiga, lē atoatoa, ma mea e fefefe ai. …
“Ae o le mafai ona tatou vaai manino ia i tatou lava e taua lea i lo tatou tuputupu ae faaleagaga ma le tulaga manuia. …
E mafai ona ou fautua atu, o tusitusiga paia ma lauga e tuuina atu i le konafesi aoao o se faata aoga lea e mafai ona tatou tilotilo i ai mo le suesueina o i tatou lava. Ensign po o le Liahona, Nov. 2014, 58).
-
E mafai faapefea ona avea tusitusiga paia ma lauga e tuuina mai i se konafesi aoao ona avea faapei o se faata?
A o suesue e le vasega le Mataio 26:17–25, valaaulia i latou e vaavaai mo se mataupu faavae e mafai ona fesoasoani ia i latou e iloa ai o latou vaivaiga ma galulue ai e faatoilaloina.
Otooto le Mataio 26:17–19i le faamatala atu na ta’u atu e Iesu i Ona soo e tapena se potu i Ierusalema mo le tausamiga o le Paseka.
Valaaulia se tamaitiiti aoga e faitau leotele le }Mataio 26:20–21. Fai i le vasega e mulimuli ai, ma vaavaai mo mea na ta’u atu e Iesu i Ana Aposetolo i le taimi o le tausamiga o le Paseka.
-
O le a se mea na fetalai atu ai Iesu i Ana Aposetolo?
-
Pe a na fai o oe o se tasi o Aposetolo, mata o le a se mea na e mafaufau i ai i lea taimi?
Valaaulia se tamaitiiti aoga e faitau leotele le Mataio 26:22 Fai atu i le vasega e mulimuli i le faitauga, ma vaavaai mo le auala na tali atu ai Aposetolo i le fetalaiga a Iesu.
-
O le a le fesili na fai atu e Aposetolo?
-
O le a le mea ua aoao mai e uiga i Aposetolo faamaoni e toasefulu ma le tasi i le fesili, “Le Alii e, o a’u ea?”
-
E fuafua i lea tala, o le a le mataupu faavae e mafai ona tatou aoao ai e uiga i le ala e ao ona tali atu ai soo o Iesu Keriso ina ua latou faalogo atu i upu a le Alii? (A maea ona tali mai tamaiti aoga, tusi le mataupu faavae lenei i le laupapa: Ina ua faalogo ia soo o Iesu Keriso i le upu a le Alii, sa latou suesueina o latou lava olaga e iloa ai pe faapefea ona faatatau ia i latou.
Valaaulia se tamaitiiti aoga e faitau leotele le faamatalaga lenei a Peresitene Uchtdorf:
“Sa lei fesiligia e le au soo le moni o le mea na Ia fetalai ai. Pe sa latou fetilofai solo foi, ma tusitusilima i se tasi, ma fesili, ‘O ia ea?’
“Ae, ‘sa latou matua tiga ai, ua latou taitasi ma fai mai ia te ia, Le Alii e, o a’u ea?’ [Mataio 26:22].
“Ou te le iloa po o le a le mea o le a tofu faia e i tatou. … Pe o le a tatou autilotilo atu ea ia i latou i o tatou talaane ma faapea ifo i o tatou loto, ‘Atonu o loo fetalai o Ia e uiga ia Uso Ioanesi. Sa ou masalomia lava o ia,’ po o le ‘Ua ou fiafia lava o loo faatasi mai Uso Brown. E moomia ona ia faafofoga i le savali lenei’? Pe o le a tatou pei ea o na soo anamua, o le a tatou mafaufau ifo ia i tatou lava ma fesili i lena fesili matuitui: ‘O au ea?’ (“Le Alii e, O Au Ea?” 56).
-
O a ni nai faataitaiga o le ala e ono tofotofoina ai i tatou ia le manatu i upu a le Alii ma faapea ai e faatatau mo se isi tagata?
Valaaulia se tasi e faitau leotele le saunoaga lea a Peresitene Uchtdorf, ma fai i le vasega e faalogologo mo mea o loo valaaulia i tatou e Peresitene Uchtdorf e fai pe a tatou faalogo i upu a le Alii:
“I nei upu faigofie, ‘Le Alii e, o au ea?’ o loo taoto ai le amataga o le poto ma le ala i le liuaina faaletagata lava ia ma le suiga tumau. …
“E tatau ona tatou tuu ese lo tatou faamaualuga, aveese lo tatou faasausili, ae ia lotomaualalo ma fesili atu, ‘Le Alii e, o au ea?’
“Ma afai o le tali a le Alii o le ‘Ioe, lo’u atalii e, o loo i ai mea e tatau ona e faaleleia, o mea e mafai ona ou fesoasoani atu ai ia te oe e faatoilalo,’ ou te tatalo o le a tatou taliaina lenei tali, iloaina ma le lotomaualalo a tatou agasala ma vaivaiga, ma suia o tatou ala e ala i le avea ma ni e ua sili atu” (“Le Alii e, O Au Ea?” 56, 58).
-
Ua faamanuiaina faapefea oe a o e faaaogaina ia upu a le Alii ma faia suiga i lou olaga?
Molimau atu e uiga i le mataupu faavae na faailoa mai talu ai e le vasega. Valaaulia le vasega e suesue i o latou lava olaga i soo se taimi latou te faalogo ai pe faitau ai foi i upu a le Alii ma vave ona faatino ia uunaiga latou te mauaina.
Valaaulia se tamaitiiti aoga e faitau leotele le Mataio 26:23–25. Fai atu i le vasega e mulimuli i le faitauga, ma vaavaai mo le tali a le Alii i fesili a le au Aposetolo.
Faamatala o le taimi lava na faailoa ai e Iesu o Iuta o le o le a faalataina o Ia, sa aluese ai Iuta (tagai Ioane 13:30).
Mataio 26:26–30
Ua faatuina e Iesu Keriso le faamanatuga i le taimi o le Paseka
Faaali le ata O Le Talisuaga Mulimuli (Tusi Ata o le Talalelei [2009], nu. 54; tagai foi LDS.org). Ta’u i le vasega na talisua le Faaola ma Ana Aposetolo i le Paseka, sa Ia faatuina le sauniga o le faamanatuga.
Valaaulia le vasega e tusi i a latou api o le vasega po o api talaaga mo suesuega a latou tali i fesili nei (atonu e te manao e tusi nei fesili i le laupapa a o lei amataina le vasega):
I le taimi na e ’ai ai ma inu i le faamanatuga talu ai, o a au mea sa fai? O a mea sa e mafaufau i ai? O le a se mea na e lagonaina?
Uu i luga le ipu ma le falaoa sa faaali i luga o le laulau. Valaaulia se tamaitiiti aoga e faitau leotele le Mataio 26:26–29. Fai atu i le vasega e mulimuli i le faitauga, ma vaavaai mo mea na faia e le Alii i le falaoa ma mea na i le ipu.
-
O a mea na fai e le Alii i le falaoa ma mea sa i le ipu?
-
E tusa ai ma nei fuaiupu, o a mea o suitulaga ai nei faatusa i le faamanatuga? (E tatau ona faailoa mai e le vasega le aoaoga faavae lenei: O faatusa o le faamanatuga e suitulaga i le tino ma le toto o Iesu Keriso, lea na Ia ositaulagaina mo i tatou.
Faamatala i le vasega o le Faaliliuga a Iosefa Samita o loo maua ai se malamalamaaga faaopooopo o fuaiupu nei. Valaaulia le vasega e faitau filemu le tusiga mai le Faaliliuga a Iosefa Samita, Mataio 26:22 o loo maua i le Mataio 26:26, vaefaamatalaga i. Ia valaaulia foi i latou e faitau le Faaliliuga a Iosefa Samita, Mataio 26:24–25 (i le faaopopoga i le tusi paia). Fai i le vasega e vaavaai mo mea na musuia ai suiga ia na faia i nei fuaiupu, ia e mafai ona fesoasoani tatou te malamalama ai i se faamoemoega taua o le faamanatuga.
-
Aisea na faatuina ai e Iesu Keriso le faamanatuga? (A maea ona tali mai tamaiti aoga, tusi le upumoni lenei i le laupapa: Na faatuina e Iesu Keriso le faamanatuga mo i tatou ia manatua ai o Ia ma Lana Togiola mo a tatou agasala.
-
O a ni nai mea e mafai ona tatou faia ina ia mautinoa ai ua fesoasoani le faamanatuga tatou te manatua ai Iesu Keriso ma Lana Togiola mo a tatou agasala?
-
E faapefea i le taumafai ia manatua le Faaola ma Lana Togiola ona faatosinaina ai ou lagona ma aafiaga a o ’ai ma inu i le faamanatuga?
Ina ia fesoasoani i tamaiti aoga e faailoa mai se isi mataupu faavae, fesili:
-
E tusa ai ma fuaiupu e27–28, o le a le mea ua mafai ona tatou maua i le faamaligiina o le toto o Keriso a o tatou aai ma feinu i le faamanatuga? (O se faamagaloga o a tatou agasala.)
Ta’u i ai, o le na ona ’ai i le falaoa ma le inu i le vai i le taimi o le faamanatuga e le otometi ai ona agavaa ai i tatou e maua se aveesega, po o se faamagaloga, o a tatou agasala. E tatau ona faaaoga lo tatou faatuatua ia Iesu keriso, ma aai ma feinu i le faamanatuga ma le loto faamaoni e ala i le manatuaina pea lava pea o Ia ma taumafai e tausi Ana poloaiga. O le aai ma feinu ma le agavaa i le faamanatuga, tatou te faafouina ai a tatou feagaiga o le papatisoga. Tusi le upumoni lenei i le laupapa: Pe a tatou salamo ma aai ma feinu i le faamanatuga ma le loto faamaoni, e mafai ona tatou maua se faamagaloga o a tatou agasala.
Valaaulia le vasega e tusi i a latou api o le vasega po o api o talaaga o suesuega pe faapefea ona latou faaaogaina ia upumoni e faatatau i le faamanatuga sa latou faailoa maia i le Mataio 26. Valaaulia ni nai tagata o e fiafia e faasoa atu a latou tali i le vasega.
Valaaulia se tamaitiiti aoga e toe faitau le Mataio 26:29 Fai i le vasega e mulimuli ai, ma vaavaai mo taimi na fetalai ai le Faaola o le a Ia toe taumafa i le faamanatuga. Fai atu i tagata o le vasega e lipoti mai mea ua latou mauaina.
Faamatala faapea “o le faamanatuga e le gata ina faatusa i le Togiola a le Faaola, ae ua faasino atu ai foi ma le faamoamoe i le taimi o le a toe foi mai ai o Ia i le lalolagi i le mamalu (tagai 1 Korinito 11:26)” (Tusi lesona a le Tagata Aoga o le Feagaiga Fou, 83). Afai tatou te tausia a tatou feagaiga ma tumau e oo i le iuga, e mafai ona avea i tatou ma e e aai ma feinu i le faamanatuga faatasi ma le Faaola i lea taimi i le lumanai (tagai MF&F 27:4–14).
Faaiu i le faasoa atu o lau molimau i upumoni sa faailoa mai i lenei lesona.
Tala ma Faamatalaga o Talaaga
Mataio 26:16. “Sa ia saili i se avanoa e faalata ai o Ia”
O le Faaliliuga a Iosefa Samita o le Mareko 14:10ua faamanino ai le mafuaaga e tasi na faalataina ai e Iuta ia Iesu: “Ona alu ai lea o Iuta le Sekara, o se tasi o le toasefulu ma le toalua, i le au faitaulaga sili, e faalata Iesu ia te i latou; aua ua ia liliu ese mai ia te ia, ma sa faatausuai o ia i ana upu”(Faaliliuga Iosefa Samita, Mareko 14:31 [i le Mareko 14:10, vaefaamatalaga a]).
Mataio 26:28. “Mo le faamagaloga o agasala”
Na aoao mai Elder Vaughn J. Featherstone i le uiga o le aai ma feinu ma le agavaa i le faamanatuga ina ia tatou maua ai se faamagaloga o a tatou agasala:
“E taua lo tatou faafouina o a tatou feagaiga e ala i le aai ma feinu i le faamanatuga. A tatou faia lenei mea ma se loto faamaoni, ma le faamoemoe moni, lafoai a tatou agasala, ma toe faafou la tatou tautinoga i le Atua, o le a saunia e le Alii se ala e mafai ai ona faamagaloina a tatou agasala mai lea vaiaso i lea vaiaso. O le na ona ’ai o le falaoa ma inu i le vai o le a le aumaia ai lena faamagaloga. E tatau ona tatou saunia ona aai ai lea ma feinu ma se loto momomo ma se agaga salamo. O le tapenaga faaleagaga tatou te faia ina ia aai ai ma feinu i le faamanatuga e taua i le mauaina o se faamagaloga o a tatou agasala” (“Sauniga Faamanatuga ma le Faamanatuga,” Ensign, Sete. 2001, 24–25).