Lesona 33: Mataio 27:51–28:20.

Lesona 33

Mataio 27:51–28:20.

Folasaga

I le maliu o Iesu Keriso, sa saeluaina le ie puipui o le malumalu Sa talosagaina e taitai Iutaia ia Pilato ia leoleo le tuugamau lea na tuu ai le tino o Iesu. Sa toetu Iesu Keriso ma sa faaali i le toatele o tagata, e aofia ai Ana Aposetolo. Sa Ia poloaiina Ana Aposetolo e ave le talalelei i le lalolagi uma.

Fautuaga mo le Aoaoina Atu

Mataio 27:51–56

Ina ua mavae le maliu o Iesu Keriso, sa saeluaina le ie puipui o le malumalu ma sa luluina le laueleele.

Fai i le vasega e mafaufau pe i ai se tasi latou te iloa pe iloa foi e se isi latou te iloa ua maliu se tagata e latalata i ai. Ona fesili lea i le vasega:

Aisea e faigata ai le maliu o se tasi e alolofa i ai?

Fai i le vasega e vaavaai mo upumoni a o latou suesueina le Mataio 27:51–28:20o le a fesoasoani latou te maua ai le toafimalie pe a maliu se tasi e pele. Ina ia saunia se talaaga mo le lesona o le aso, e mafai ona e fesili i le vasega e otooto puupuu mai mea na oo i ai Iesu Keriso i le va o le taimi sa pue faapagotaina ai o Ia ma le taimi na faasatauroina ai o Ia.

Valaaulia se tamaitiiti aoga e faitau leotele le Mataio 27:51. Fai i le vasega e mulimuli ai, ma vaavaai mo le mea na tupu i le malumalu ina ua maliu Iesu.

O le a le mea na tupu ina ua maliu Iesu? (Valaaulia le vasega e vaavaai i leMataio 27:51, vaefaamatalaga e, ia malamalama o le “saeluaina” o lona uiga “masae i ni fasi ie se lua.”)

Fuafua e kopi i luga o le laupapa le ata lea o totonu o le malumalu.

Faamatala o le taimi o Iesu, sa lua potu o le malumalu: o le Nofoaga Paia ma le Paia o Paia. O le Paia o Paia e faatusa i le afioaga o le Atua. O nei potu e lua sa vavae i se veli, po o se pupuni. E ta’i tasi i le tausaga, i le Aso o le Togiola, e ui atu ai le faitaulaga sili i le veli o le malumalu ma ulufale atu i le Paia o Paia, lea na te sausauina ai le toto mo se taulaga mo le agasala e togiola ai agasala a le faapotopotoga uma a Isarelu (tagai Levitiko 16). Ina ua “saeluaina” le ie puipui o le malumalu i le taimi o le maliu o Iesu Keriso, o se faatusa maoae faapea o le Faaola, le Faitaulaga Sili, sa pasi atu i le veli o le oti ma e le o toe mamao ona ulufale atu lea i le afioaga o le Atua.

Ina ia fesoasoani i tagata o le vasega ia malamalama lelei i le faataoto i taupou e toasefulu, valaaulia se tagata o le vasega e faitau leotele le faamatalaga lenei a Elder Bruce R. McConkie o le Korama a Aposetolo e Toasefululua.

“O le Paia o Paia ua tatalaina nei i tagata uma, ma o tagata uma foi, e ala i le toto togiola o le Tamai Mamoe, ua mafai ai nei ona ulufale atu i le nofoaga aupito maualuga ma aupito paia i nofoaga uma, lena malo lea e maua ai le ola e faavavau. … O sauniga ia sa faatinoina i le veli o le malumalu anamua, o se faatusa o le mea sa tatau ona faia e Keriso, lea ua uma ona ia faia, ua mafai nei e tagata uma ona filifili ia agavaa e ulu atu i le veli i le afioaga o le Alii ina ia maua ai le faaeaga atoa”(Doctrinal New Testament Commentary, 1:830).

O le a le upumoni taua e mafai ona tatou aoaoina e uiga i le Togiola a Iesu Keriso mai le saeluaina o le veli?” (A maea ona tali mai tamaiti aoga, tusi le faamatalaga lenei i le laupapa: Ona o le Togiola a Iesu Keriso, ua mafai ai e i tatou uma ona ulufale atu i le afioaga o le Atua pe afai tatou te salamo ma tausi a tatou feagaiga.
Ua mafai faapefea i le Togiola a Iesu Keriso ona tatou toe foi atu ai i le afioaga o le Atua?

Ta’u i ai e uiga o le Togiola a Iesu Keriso ua mafai ai ona tatou toe foi atu i le afioaga o le Atua, e tatau lava ona fai la tatou vaega ina ia agavaa ai e mau faatasi ma lo tatou Tama Faalelagi e faavavau.

O le a se mea e tatau onatatoufaia ina ia agavaa ai e mau faatasi ma le Tama Faalelagi e faavavau?

Otooto le Mataio 27:52–56 i le faamalamalama atu ina ua mavae le Toetu o Iesu Keriso, e toatele tagata amiotonu o e sa maliliu ma sa toetutu mai ma faaali atu i tagata e toatele i Ierusalema. O loo faamatala mai foi i nei fuaiupu o se tasi o i latou o e sa molimauina le maliu o Iesu o se taitai o le toaselau a Roma ma le toatele o fafine.

Valaaulia se tamaitiiti aoga e faitau leotele le Mataio 27:54. Fai i le vasega e vaavaai pe na faapefea ona tali atu le taitaiau o le toaselau a Roma ma i latou sa faatasi ma ia ina ua latou molimauina mea na sosoo ma le faasatauroga o le Faaola.

O le a le tali a le taitai o le toaselau ma i latou sa faatasi ma ia?
O le a le mea sa latou vaai i ai atonu na afua ai ona latou tautino atu “e moni o [Iesu] o le Alo o le Atua”?

Mataio 27:57–66

Na taupulepule ia taitai Iutaia ma Pilato e leoleo le tuugamau o Iesu

Otooto le Mataio 27:57–61 i le faamatala atu ina ua mavae le maliu o Iesu, sa i ai se soo mauoa e igoa ia Iosefa le Arimataia sa“faanoi [talosaga atu mo le] tino o Iesu” (fuaiupu 58). Sa ia auiina le tino o Iesu i se ie mama, ma tuu i se tuugamau e a ia, ona pupuni lea o le gutu o le tuugamau i se maa tele.

Valaaulia ni tamaiti aoga e feauauai i le faitauina leotele o le Mataio 27:62–66. Fai i le vasega e mulimuli ai, ma vaavaai po o a mea na talosagaina ai e le faitaulaga sili ma le au Faresaio ia Pilato.

O le a le mea na talosaga atu ai le au faitaulaga sili ma le au Faresaio ia Pilato?
Aisea na latou mananao ai i lea mea?

Mataio 28:1–20

Ua toetu Iesu Keriso ma ua faaali atu i le toatele

Faamatala o le taeao po o le uluai aso o le vaiaso, po o le Aso Sa, na o mai ai Maria le Makatala ma se tasi fafine e igoa ia Maria i le tuugamau e uu le tino o Iesu o se faailoga o lo latou alolofa ma le faamamaluga. Valaaulia ni nai tamaiti aoga e feauauai i le faitauina leotele mai o le Mataio 28:1–6.

O le a le mea na maua atu e fafine ina ua latalata atu i le tuugamau? (Faamatala o le Faaliliuga a Iosefa Samita ua faamanino mai ai na vaai ia fafine i agelu e toalua, ae le tasi [tagai Mataio 28:2, vaefaamatalaga a].)
Mata o le a sau tali pe ana e vaai i ni agelu se toalua? O le a le tali a leoleo?
E tusa ai mafuaiupu 5–6, o le a le mea na ta’u atu e agelu i fafine?
O a ni upumoni e mafai ona tatou aoao mai i nei upu? A uma ona tali mai tamaiti aoga, tusi le upumoni lea i le laupapa: Sa toetu mai Iesu Keriso mai e ua oti.

Ina ia fesoasoani ia malamalama tagata i le aoaoga faavae o le Toetu, vaevae i latou i ni vaega e taitoalua pe toatolu ma valaaulia i latou e faamaea le tufaaga lea i a latou vaega:

“Ua Toetu o Ia,” (Mataio 28:6)

Tusi lesona a le Faiaoga Seminare o le Feagaiga Fou—Lesona 33

Suesue le faaulutalaToetu”o i le Bible Dictionary. Ona talanoaina lea o fesili o i lalo ma tusi a outou tali i avanoa ua saunia.

O le a le eseeega i le va o le toe aumai mai le oti ma le toetu?
O le a le mea e tupu i tagata uma o se taunuuga o le Toetu o Iesu Keriso?
E mafai faapefea i le malamalama i le aoaoga faave o le Toetu ona maua ai le toafilemu mo i latou ua maliliu e pele?

Fai i ni nai tagata e faasoa mai i le vasega mea sa latou aoaoina e ala i le faamaeaina o le tufaaga.

Valaaulia se tamaitiiti aoga e faitau leotele le faamatalaga lenei mai ia Peresitene Gordon B. Hinckley:

“O le vavega o lena taeao o le toetu, lena uluai Aso Sa o le Toetu, o se vavega mo tagata uma. O le vavega o le mana o le Atua, o Lona Atalii Pele na ofoina atu Lona soifua e togiolaina mo agasala a tagata uma, o se taulaga o le alofa mo atalii ma afafine uma o le Atua. O le faia na Ia motusia ai faamau o le oti. …

“Ma e faapei ona Ia aveina ae Lona tino ma aumai mai le tuugamau, ina ia tatou olioli uma ai i se toetuufaatasiga o le tino ma le agaga ia avea ai ma agaga ola i le aso o lo tatou lava toetutu.

“O le mea lea, tatou te olioli, e pei o le toatele, ma e ao ai i tagata uma, pe a tatou manatuaina le mea aupito mamalu, o le mea aupito toafilemu, o le mea e aupito mautinoa o mea uma na tutupu i le talafaasolopito o le tagata—o le manumalo i le oti”(“O Le Manumalo i le Oti,” Liahona, Apr. 1997, 4).

Valaaulia se tamaitiiti aoga e faitau leotele le Mataio 28:7–10.

E tusa ai ma le fuaiupu e 7, o le a le mea na faatonuina e agelu ia fafine e fai?
Aisea e te manatu ai na o ese ia fafine ma le “fefefe ma le olioli tele”?
O le a le mea na tupu i fafine ina ua la o atu e ta’u atu i soo e uiga i le mea na la oo i ai?

Otooto le Mataio 28:11–15e ala i le faamatala atu a o faanatinati atu fafine e avatu i soo le tala fiafia i le Toetu o Iesu, sa faalogo le au faitaulaga sili i le mea ua tupu mai fitafita sa leoleo i le tuugamau. Sa fefefe ia taitai Iutaia nei iloa e tagata le mea moni, ona latou totogia ai lea o leoleo ina ia faasalalau atu talapelo na aveina e soo o le Faaola Lona tino mai le tuugamau a o momoe ia leoleo.

Fai i se tamaitiiti aoga e faitau leotele le Mataio 28:16-l18. Valaaulia le vasega e mulimuli ai, ma vaavaai mo faamanuiaga na oo mai i Aposetolo e toasefulutasi ina ua latou usitai i upu a fafine e o i Kalilaia.

O a faamanuiaga na oo mai i soo e toasefulutasi ona sa latou usitai i upu a fafine?

Valaaulia se tamaitiiti aoga e faitau leotele le Mataio 28:19–20. Fai i le vasega e mulimuli i le faitauga, ma vaai mo mea na poloaiina e le Faaola ia Aposetolo e fai ina ua uma ona latou vaai ia te ia.

O a mea na poloaiina ia Aposetolo e fai ina ua uma ona latou vaai i le Faaola?
O le a se mea o mafai ona tatou aoao mai i lo latou aafiaga e uiga i lo tatou tiutetauave a o tatou maua se molimau ia Iesu Keriso? A maea ona tali mai tamaiti aoga, tusi le mataupu faavae lea i luga o le laupapa: A o tatou mauaina se molimau ia Iesu Keriso, ua ia te i tatou se tiutetauave e molimau atu ia te Ia i isi.

Valaaulia tagata e o mai i le laupapa ma lisi ni auala e mafai ai ona tatou molimau atu ia Iesu Keriso i isi. Atonu e te manao e valaaulia tagata e faamatala mai pe tuu mai ni faataitaiga o manatu sa latou tusia. Ona fai atu lea o fesili nei:

E tusa ai ma le fuaiupu 20, o le a le folafolaga na tuu atu e le Faaola i Ana Aposetolo?
Na faapefea ona faatasi le Alii “ma oe,” pe fesoasoani foi ia te oe i au taumafaiga e faasoa atu le talalelei?

Fautuaina le vasega e faasoa atu ai a latou molimau e uiga ia Iesu Keriso i isi? Ina ia fesoasoani ia latou faia, fai i le vasega e faaaoga se tasi o manatu o loo lisi atu i luga o le laupapa e amata ai se sini faaletagata lava ia e molimau atu ia Iesu Keriso ma Lana talalelei i tagata o aiga, uo, ma isi. Valaaulia tagata o le vasega e tusi nei fesili i a latou api o le vasega po o api talaaga mo le suesueina o tusitusiga paia.

Mau Tauloto—Mataio 28:19–20

Ina ia fesoasoani i le vasega e tauloto le mau tauloto lea, vaevae le vasega i ni paga ma valaaulia se tagata mai paga taitasi e tusi se mau i se fasipepa. Fai i le vasega e otioti le fasipepa, ae tuu ai pea le fuaitau o le mau. Fai i le vasega e faafefiloi ia fasipepa ona toefaatulaga lea i le faatulagaga sa’o [tilotilo i a latou tusi paia pe a tatau ai). Lu’i le vasega e faifai pea seia iu ina le toe manaomia e faaaoga a latou tusi paia. Fautuaina le vasega e aveese se fasipepa se tasi ona tauloto lea o le fuaitau o loo misi e aunoa ma le tilotilo i ai. A uma ona tauloto mai e le vasega se fuaitau se tasi, fautuaina i latou e aveese se isi fuaitau ma toe tauloto ia fuaitau uma e lua e aunoa ma le tilotilo i ai. Ia tuu atu foi i latou e faia pea lea faiga seia mafai ona latou taulotoina le fuaitau atoa.

Tala ma Faamatalaga o Talaaga

Mataio 28:6. “Ua toetu o Ia”

Na tautino mai e Peresitene Ezra Taft Benson, e leai se mea na tupu e sili atu ona taua nai lo le Toetu o Iesu Keriso.

“O le mea aupito silisili o le talafaasolopito o mea ia ua aafia ai le aofaiga aupito silisili mo vaitau aupito uumi. O lea tulaga, e leai se mea na tupu e sili atu ona taua i tagata taitoatasi po o atunuu nai lo o le toetu o le Matai. O le toetu o le a i ai o agaga uma o e sa ola ma maliliu i le lalolagi, o se tulaga mautinoa ua faapine ma e leai lava se isi mea e tatau ona matuai tapena lelei i ai nai lo lea. E leai se mea e sili atu ona laugatasia ai nai lo le toetu. O le a toetu mai tagata ola uma” (“The Greatest Event in History,” New Era, Apr. 2004, 45).

Mataio 28:19. “O lea, ia o atu outou e aoao nuu uma lava”

Na aoao mai e Elder David A. Bednar o le Korama a Aposetolo e Toasefululua faapea e mafai e tagata o le Ekalesia ona faaaoga ala o faasalalauga e faasoa atu ai le talalelei.

“Ua faanatinati e le Alii Lana galuega, ma e le o se mea na faafuaveta nei fesootaiga mamana taulagalaga ma mea fou o loo tutupu i le tisipenisione o le atoaga o taimi. O ala o faasalalauga o ni meafaigaluega faavaomalo e mafai ona aoga patino ma le lelei i tagata e toatele taitoatasi ma aiga. Ma ou te talitonu ua oo mai le taimi mo i tatou o soo o Keriso e faaaogaina lelei ia sili atu le aoga o nei meafaigaluega musuia e molimau atu ai i le Atua le Tama Faavavau, o Lana fuafuaga o le fiafia mo Lana fanau, ma Lona Alo, o Iesu Keriso, o le Faaola o le lalolagi; e folafola atu le moni o le Toefuataiga o le talalelei i aso e gata ai; ma faataunuu le galuega a le Alii. (“To Sweep the Earth as with a Flood” [Brigham Young University Campus Education Week devotional, Aug. 19, 2014], LDS.org).