1. He oiaio, wahi a ka Haku ia olua, e Kuu mau hoaloha, Sidane a me Iosepa, he maikai ke ola kino o ko olua mau ohana; aia lakou iloko o Koʻu mau lima, a e hana aku no Au ia lakou e like me Kaʻu e manao ai he pono; no ka mea, iloko Oʻu ka mana a pau;

2. Nolaila, e hahai mai Iaʻu a hoolohe i ka olelo-ao Aʻu e haawi aku ai ia olua.

3. Aia hoi, e nana, he nui Koʻu poe kanaka ma keia wahi, a ma na wahi e pili kokoke mai ana, a e wehe ia he ipuka e pomaikai ai ma na wahi e pili kokoke mai ana ma keia aina hikina.

4. Nolaila, ua ae aku Au, ka Haku, ia olua e hele mai i keia wahi; no ka mea, he pono ia Iaʻu no ka hoola ia ana o na uhane me ke kino.

5. Nolaila, he oiaio Kaʻu e olelo aku nei ia olua, e hookiekie ae i ko olua mau leo i keia poe kanaka, e olelo aku i na manao Aʻu e hookomo aku ai iloko o ko olua mau naau, a aole olua e hoohoka ia imua o kanaka;

6. No ka mea, e haawi ia aku no ia ia olua ia hora no, he oiaio, ia minute no, ka olua mea e olelo aku ai.

7. Aka, he kauoha Kaʻu e haawi aku nei ia olua, e hai aku olua i na mea a olua e hai ai ma Koʻu inoa, me ke kuoo o ka naau a me ka uhane o ka haahaa ma na mea a pau.

8. A ke haawi nei Au ia olua i keia olelo-hoopomaikai, ina e hana olua i keia, e pahola ia aku ka Uhane Hemolele ma ka hooiaio ana i na mea a pau a olua e olelo ai.

9. A he pono hoi iloko Oʻu, e lilo oe, e Kuu kauwa, e Sidane, i wahaolelo i keia poe kanaka; ae, he oiaio, e hoolilo no Au ia oe i keia hana, oia hoi, i wahaolelo no Kuu kauwa, no Iosepa;

10. A e haawi aku no Au ia ia i ka mana e ikaika ma ka hooiaio ana;

11. A e haawi aku no Au ia oe i ka mana e ikaika ma ka wehewehe ana i na Palapala Hemolele a pau, i lilo ai oe i wahaolelo nona, a e lilo oia i mea-hoike ia oe, i maopopo ai ia oe ka oiaio o na mea a pau e pili ana i na mea o Kuu aupuni maluna o ka honua.

12. Nolaila, e hoomau ma ka olua huakai hele a e hauoli ko olua mau naau, no ka mea, aia hoi, e nana, Owau pu me olua a hiki aku i ka hopena.

13. A ano, ke haawi aku nei Au ia olua he olelo e pili ana no Ziona. E hoolapanai ia auanei o Ziona, oiai nae, e hoopai ia oia no ka wa pokole.

14. Aia ko olua mau hoahanau, Kuu mau kauwa, o Oresona Haida a me Ioane Gula, iloko o Kuu mau lima, a ina e malama laua i Kaʻu mau kauoha, e hoola ia auanei laua.

15. Nolaila, e hooluolu ia ko olua mau naau, no ka mea, e hana like ana na mea a pau no ka pono o ka poe e hele ana me ka pono; a i ka hoomaemae ia ana o ka Ekalesia;

16. No ka mea, e hoala mai ana Au Noʻu iho i poe kanaka maemae, i poe e hookauwa mai Naʻu me ka pono;

17. A o ka poe a pau e hea ana ma ka inoa o ka Haku, a malama i Kana mau kauoha, e hoola ia. Pela io no. Amene.