1. He oiaio, penei wahi a ka Haku ia oukou, e Kaʻu mau kauwa, e pili ana i ka olelonane o ka palaoa a me na kikania.

2. Aia hoi, he oiaio, ke olelo aku nei Au, o ka mahinaai oia no ke ao nei, a o na Aposetolo na mea lulu hua;

3. A mahope o ko lakou haule ana i ka hiamoe, o ka mea hoomaau nui i ka Ekalesia, ka mea i haalele i ka Ekalesia, ka mea hookamakama, oia hoi, o Babulona, ka mea i hoohainu i na lahuikanaka a pau i kona kiaha, iloko o ko lakou mau naau ka enemi, oia hoi, o Satana, e noho alii nei, aia hoi, ke lulu nei oia i na kikania, no ia mea, e kahihi na kikania i ka palaoa a hookuke aku la i ka Ekalesia i ka waonahele.

4. Aka, aia hoi, ma na la hope, oia hoi, i keia manawa, oiai ka Haku e hoomaka ana e hoopuka mai i ka olelo, ke omamaka ae nei ka liko a ua palupalu,

5. Aia hoi, he oiaio, ke olelo aku nei Au ia oukou, ke kahea nei na anela i ka Haku i ke ao a me ka po, ka poe i makaukau a e kali ana e hoouna ia aku e oki i na mahinaai;

6. Aka, olelo aku la ka Haku ia lakou, mai uhuki oukou i na kikania oi palupalu ka liko (no ka mea, he nawaliwali ko oukou manaoio,) o hoopoino no hoi oukou i ka palaoa;

7. Nolaila, e waiho i ka palaoa a me na kikania e ulu pu, a hiki i ke oo pono ana o ka mahinaai, alaila, e ohi mua ae oukou i ka palaoa maiwaena mai o na kikania, a mahope o ka ohi ana i ka palaoa, aia hoi, e nana! Ua nakii ia na kikania ma na pu-a, a e koe iho ka mahinaai no ke puhi ia ana.

8. Nolaila, penei wahi a ka Haku ia oukou, ka poe i mau ai ka Oihanakahuna ma o ka mamo ponoi la o ko oukou poe kupuna,

9. No ka mea, o oukou no he poe hooilina i ku i ke kanawai mamuli o ka io, a i huna ia mai ko ke ao nei mai me Kristo iloko o ke Akua;

10. Nolaila, ua mau ko oukou ola a me ka Oihanakahuna a he pono e mau aku ma o oukou la a me ko oukou mamo, a hiki i ka hoihoi hou ia ana mai o na mea a pau i olelo ia ma na waha o na Kaula hemolele a pau mai ka hoomaka ana mai o ke ao nei.

11. Nolaila, pomaikai oukou, ina e hoomau oukou iloko o Koʻu pono, i malamalama i ka poe Genetile, a ma o keia Oihanakahuna la, e lilo ai i hoola no Koʻu poe kanaka o Iseraela. Ua olelo mai ka Haku ia mea. Amene.