1. Aia hoi, e hoolohe mai e na Lunakahiko o Kuu Ekalesia, wahi a ka Haku ko oukou Akua, oia hoi, o Iesu Kristo, ka oukou Mea uwao, ka Mea i ike i ka nawaliwali o kanaka, a me ke ano o ke kokua ana i ka poe i hoowalewale ia;

2. A he oiaio, aia Koʻu mau maka maluna o ka poe i pii ole aku i ka aina o Ziona; no ia mea, aole i pau pono ka oukou misiona i keia wa;

3. Eia no nae, ua hoopomaikai ia oukou, no ka mea, o ka olelo hoike a oukou i hoike aku ai, ua hoopaa ia ia iloko o ka lani no na anela e nana ai, a ke hauoli nei lakou maluna o oukou, a ua huikala ia ko oukou mau hewa.

4. A ano, e hoomau ma ko oukou huakai hele. E hoakoakoa ia oukou iho maluna o ka aina o Ziona, a e malama i kekahi halawai a e hauoli pu, a e alana aku i ahaaina a ka Haku i ka Mea Kiekie Loa;

5. Alaila, e hiki ia oukou ke huli hoi e hoike aku, he oiaio, o oukou a pau loa, a i ole, me ka papalua, e like me ka oukou i manao ai he pono; he mea ole nae ia Iaʻu; koe wale no e kupaa, a e hai aku i ka olelo olioli i na kanaka o ka honua, a i ole, mawaena o na anaina o ka poe hewa.

6. Aia hoi, ua hoakoakoa pu mai Au, ka Haku, ia oukou i hooko ia ai ka olelo hoopomaikai, a i malama ia ai ka poe kupaa mawaena o oukou a e hauoli pu ma ka aina o Misouri. Olelo-paa iho la Au, ka Haku, i ka poe kupaa a aole hiki ke wahahee.

7. Ke ae nei Au, ka Haku, ina makemake kekahi mawaena o oukou e kau maluna o na lio, a i ole, maluna o na hoki, a i ole, ma na kaa, e loaa ia ia keia pomaikai, ina e loaa ia ia ia mai ka lima mai o ka Haku, me ka naau mahalo ma na mea a pau.

8. Aia me oukou ka hana ana i keia mau mea e like me ka noonoo maikai a me na kuhikuhi ana o ka Uhane.

9. Aia hoi, no oukou ke aupuni. A aia hoi, e nana, Owau pu no me ka poe kupaa i na wa a pau. Pela io no. Amene.