1. E hoolohe mai oukou, e na Lunakahiko o Kuu Ekalesia, a e haliu mai ka pepeiao i ka leo o ke Akua ola, a e hoolohe i na olelo o ka naauao, ka mea e haawi ia aku ana ia oukou, i ku like me ka oukou i noi mai ai a i lokahi ai hoi e pili ana i ka Ekalesia, a me na uhane i hele ma o a maanei ma ka honua.

2. Aia hoi, he oiaio, ke olelo aku nei Au ia oukou, aia he nui wale o na uhane hoopunipuni, i hele aku ma ka honua, e hoopunipuni ana i ko ke ao nei;

3. A ua imi no hoi o Satana e hoopunipuni ia oukou, i hiki ai ia ia ke hookahuli ia oukou.

4. Aia hoi, ua nana aku au, ka Haku, maluna o oukou, a ua ike i na hana hoopailua iloko o ka Ekalesia e kaena ana i Koʻu inoa;

5. Aka, pomaikai ka poe i kupaa a hoomau, ina paha ma keia ola ana, a i ole, iloko o ka make, no ka mea, e loaa no ia lakou ke ola mau loa.

6. Aka, auwe ka poe hoopunipuni a hookamani, no ka mea, penei wahi a ka Haku, e lawe mai ana Au ia lakou i ka hoopai ana.

7. Aia hoi, he oiaio, ke olelo aku nei Au ia oukou, aia he poe hookamani mawaena o oukou, he poe i hoopunipuni i kekahi poe, ka mea i haawi aku i ka mana i ka mea kue, aka, aia hoi, e loaa hou mai lakou;

8. Aka, e ike ia ka poe hookamani a e oki ia aku, ma keia ola ana, a i ole, iloko o ka make, he oiaio, e like me Kaʻu i makemake ai; a auwe lakou ka poe e oki ia ana mai Kuu Ekalesia aku, no ka mea, o lakou ka poe e hoopio ia e ko ke ao nei;

9. No ia mea, e ao kela a me keia kanaka o hana oia i ka mea aole i ku i ka oiaio a me ka pono imua Oʻu.

10. A ano, e hele mai, wahi a ka Haku, ma ka Uhane, i na Lunakahiko o Kona Ekalesia, a e kamailio pu kakou me ka noonoo kuhohonu, i hoomaopopo ai oukou:

11. E kamailio kakou me ka noonoo kuhohonu e like me kekahi kanaka e kamailio kuhohonu ana me kekahi he alo no he alo:

12. Ano, i ka wa o kekahi kanaka e kamailio ai me ka noonoo kuhohonu e hoomaopopo ia ana oia e ke kanaka, no ka mea, ua kamailio oia me ka noonoo kuhohonu e like la me ko ke kanaka, pela no Au, ka Haku, e kamailio ai me ka noonoo kuhohonu me oukou i hiki ai ia oukou ke hoomaopopo;

13. No ia mea, ke ninau aku nei Au, ka Haku, ia oukou i keia ninau, i ke aha la oukou i hoolilo ia ai?

14. E hai i Kuu Euanelio ma ka Uhane, oia hoi, ka Uhane Kokua, ka mea i hoouna ia aku e ao i ka oiaio;

15. Alaila, loaa mai la ia oukou na uhane a oukou i hiki ole ai ke hoomaopopo, a hookipa mai la ia lakou me he la no ke Akua mai, a ma keia ua hoapono ia anei oukou?

16. Aia hoi, e pane oukou i keia ninau no oukou iho; aka nae, e lokomaikai no Au ia oukou; o ka mea nawaliwali mawaena o oukou ma keia hope aku e hooikaika ia auanei ia.

17. He oiaio, ke olelo aku nei Au ia oukou, o ka mea i hoolilo ia e Aʻu a hoouna ia aku e hai i ka olelo o ka oiaio ma ka Uhane Kokua, iloko o ka Uhane o ka oiaio, e hai ana anei ia ia mea ma ka Uhane o ka oiaio, a i ole, ma kekahi ano e ae paha?

18. A ina ia ma kekahi ano e ae, aole ia na ke Akua.

19. A eia hou, o ka mea i hookipa i ka olelo o ka oiaio, ua hookipa anei ia ia mea ma ka Uhane o ka oiaio, a i ole, ma kekahi ano e ae paha?

20. Ina ia ma kekahi ano e ae aole ia na ke Akua:

21. Nolaila, no ke aha la i hiki ole ai ia oukou ke hoomaopopo a ike o ka mea e hookipa ana i ka olelo ma ka Uhane o ka oiaio, ua hookipa mai ia ia mea e like me ia i hai ia aku e ka Uhane o ka oiaio?

22. No ia mea, o ka mea e hai ana a me ka mea e hookipa ana, ua hoomaopopo kekahi i kekahi, a ua hoonaauao ia laua a elua a hauoli pu;

23. A o ka mea e hoonaauao ole ana aole ia na ke Akua, a he pouli no ia;

24. O ka mea na ke Akua he malamalama ia; a o ka mea hookipa i ka malamalama a hoomau iloko o ke Akua, e loaa ka mahuahua ana o ka malamalama, a o ua malamalama la e pii mahuahua mau ana ia a hiki i ka la hemolele.

25. A eia hou, he oiaio, ke olelo aku nei Au ia oukou, a ke olelo nei Au ia mea i hoomaopopo ai oukou i ka oiaio, i kipaku aku ai oukou i ka pouli maiwaena aku o oukou;

26. O ka mea i hoolilo ia e ke Akua a hoouna ia aku, oia ka i koho ia ka mea nui loa, me ka nana ole he mea uuku loa paha ia a he kauwa paha na na mea a pau.

27. No ia mea, he mea oia e paa ana i na mea a pau; no ka mea, aia na mea a pau malalo iho ona, ma ka lani a ma ka honua pu, ke ola a me ka malamalama, ka Uhane a me ka mana, i hoouna ia aku ma ka makemake o ka Makua, ma o Iesu Kristo la, Kana Keiki:

28. Aka, aole kekahi kanaka e paa ana i na mea a pau; ke ole oia i hoomaemae ia a holoi ia mai na hewa a pau;

29. A ina ua hoomaemae ia a holoi ia oukou mai na hewa mai a pau, e noi oukou i kela a me keia mea a oukou i makemake ai ma ka inoa o Iesu a e hooko ia no ia:

30. Aka, e hoomaopopo i keia, e haawi ia aku ana ia oukou ka mea a oukou e noi ai, a mamuli o ko oukou koho ia ana i poo, e hoolohe no na uhane ia oukou.

31. No ia mea, e hiki mai ana keia, ina e ike oukou i kekahi uhane i hoike ia, i hiki ole ia oukou ke hoomaopopo, a loaa ole ia oukou kela uhane, e noi oukou i ka Makua ma ka inoa o Iesu, a ina e haawi ole mai Oia ia oukou i kela uhane, alaila e ike no oukou aole ia no ke Akua mai:

32. A e haawi ia aku ia oukou ka mana maluna o ua uhane la, a e olelo kue aku oukou i ua uhane la, me ka leo nui, aole ia no ke Akua mai;

33. Aole me ka hoahewa ana me ka huhu, i hoopio ole ia ai oukou, aole hoi me ke kaena ana, aole hoi me ka hauoli ana, o paa oukou ma ia mea la.

34. O ka mea e loaa ana mai ke Akua mai, e manao oia mai ke Akua mai ia, a e hauoli oia no ka manao ia e ke Akua i kupono e loaa mai.

35. A ma ka hoolohe a hana ana i keia mau mea a oukou i loaa ai, a me na mea e loaa aku ana ia oukou ma keia hope aku: a ua haawi ia aku ia oukou ke aupuni e ka Makua, a me ka mana e lanakila maluna o na mea a pau i apono ole ia e Ia.

36. A, aia hoi, he oiaio, ke olelo aku nei Au ia oukou, pomaikai no oukou ka poe e lohe nei i keia mau olelo Aʻu mai ka waha o Kaʻu kauwa aku, no ka mea, ua kala ia ko oukou mau hewa.

37. A o Kaʻu kauwa o Iosepa Wekipila, ka mea Aʻu i olioli loa ai, a me Kaʻu kauwa o Pale P. Parata, e hele aku mawaena o na apana o ka Ekalesia e hooikaika aku ana ia lakou me ka olelo o ke kauleo;

38. A me Kaʻu kauwa o Ioane Korila no hoi, a i ole, e like me ka nui o Kaʻu mau kauwa i hoolilo ia ma keia oihana, a e hana lakou ma ka pawaina; a mai ae i kekahi kanaka e alalai ia lakou i ka hana ana i ka mea Aʻu i koho aku ai no lakou:

39. No ia mea, aole i hoapono ia Kaʻu kauwa o Eluene Paterige ma keia mea, aka nae, e mihi oia a e kala ia no ia.

40. Aia hoi, he poe keiki liilii oukou a aole e hiki ia oukou ke auamo i na mea a pau i keia wa; he pono no oukou e ulu iloko o ka lokomaikai a iloko o ka ike ana i ka oiaio;

41. Mai makau, e na keiki liilii, no ka mea, Naʻu oukou, a ua lanakila Au maluna o ko ke ao nei, a o oukou kekahi o ka poe a Koʻu Makua i haawi mai ai Iaʻu;

42. A aole e nalowale kekahi o lakou a ka Makua i haawi mai ai Iaʻu:

43. A o ka Makua a me Aʻu he hookahi no: Owau iloko o ka Makua a o ka Makua iloko Oʻu: a e like me ko oukou hookipa ana mai Iaʻu, pela no oukou iloko Oʻu a Owau iloko o oukou;

44. No ia mea, aia Au iwaena o oukou, a Owau ke Kahuhipa maikai, a me ka Pohaku o Iseraela. O ka mea e kukulu ana maluna iho o keia pohaku aole loa oia e hiolo.

45. A e hiki mai ana ka la e lohe ai oukou i Koʻu leo a e ike mai Iaʻu, a hoomaopopo Owau no ia.

46. Nolaila, e kiai, i makaukau ai oukou. Pela io no. Amene.