1. He oiaio, penei wahi a ka Haku ia oe, e Kuu kauwa, e Toma, ua lohe Au i kau mau pule, a ua hiki mai kau mau manawalea me he mea hoomanao la imua Oʻu, no ka pono o kela poe hoahanau ou, ka poe i wae ia ai e hoike no Kuu inoa a e hoouna ia mea ma o a maanei mawaena o na lahuikanaka a pau, na ohana, na olelo, a me na kanaka, ka poe i hoolilo ia hoi ma o ka lawelawe ana la a Kuu mau kauwa.

2. He oiaio Kaʻu e olelo aku nei ia oe, aia he mau mea kakaikahi iloko o kou naau a i pili pu me oe, na mea Aʻu, a ka Haku, i oluolu loa ole ai;

3. Aka nae, oiai ua hoohaahaa oe ia oe iho e hookiekie ia ae oe; nolaila, ua kala ia kou mau hewa a pau.

4. E olioli kou naau imua o Koʻu maka, a e hoike aku oe no Kuu inoa, aole i ka poe Genetile wale no, aka, i ka poe Iudaio no hoi; a e hoouna aku no oe i Kaʻu olelo i na welelau o ka honua.

5. Nolaila, e paio ma kela me keia kakahiaka, a e hoopuka aku i kou leo ao ia la aku ia la aku, a i ka hoi ana mai o ka po, mai hookuu i na kanaka o ka honua e hiamoe, mamuli o kau haiolelo ana.

6. E hoike aku i kou wahi noho ma Ziona, a mai hoonee i kou hale, no ka mea, he hana nui Kaʻu, ka Haku, nau e hana ai, ma ka hoolaha ana i Kuu inoa mawaena o na keiki a kanaka;

7. Nolaila, e kaei i kou puhaka no ka hana. A e hawele ia kou mau wawae, no ka mea, ua wae ia oe, a ke moe nei kou alahele mawaena o na mauna, a mawaena o na lahuikanaka he nui;

8. A ma kau olelo ana e hoohaahaa ia ai kekahi poe kiekie he nui, a ma kau olelo ana e hookiekie ia ai ka poe haahaa he nui.

9. A e lilo kou leo i mea ao ikaika a papa hoi i ka mea hana hewa, a ma kau ao ikaika a papa ana e hooki ke alelo o ka mea olelo ino i kana olelo ino ana.

10. E hoohaahaa oe, a e alakai ka Haku, kou Akua, ia oe ma kou lima, a e haawi mai i pane no kau mau pule.

11. Ua maopopo Iaʻu kou naau, a ua lohe i kau mau pule no kou mau hoahanau. Mai paewaewa oe ma ke aloha ana ia lakou a oi ae mamua o ka poe e ae he nui, aka, e aloha ia lakou e like me oe ia oe iho; a e pahola aku i kou aloha i ka poe a pau, a i ka poe a pau i aloha i Koʻu inoa.

12. A e pule no kou mau hoahanau o ka Papa Umikumamalua. E ao ikaika aku ia lakou no ka pono o Koʻu inoa, a e ao ikaika ia aku lakou no ko lakou mau hewa a pau, a e kupaa oukou imua Oʻu no Kuu inoa.

13. A mahope iho o ka lakou mau hoowalewale ia ana, a me na popilikia he nui, aia hoi, e haha aku no Au, ka Haku, ia lakou, a ina e hoopaakiki ole lakou i ko lakou mau naau, a hooolea ole i ko lakou mau ai e kue mai Iaʻu nei, e hoohuli ia mai auanei lakou, a e hoola Au ia lakou.

14. Ano, ke olelo aku nei Au ia oukou, a o Kaʻu e olelo nei ia oe oia no Kaʻu e olelo nei i ka Papa Umikumamalua a pau, E ala, a e kaei i ko oukou mau puhaka, e hapai i ko oukou kea, a hahai mai Iaʻu, a e hanai i Kuu mau hipa.

15. Mai hookiekie ia oukou iho; mai kipi i Koʻu kauwa ia Iosepa, no ka mea, he oiaio, ke olelo aku nei Au ia oukou aia no Au me ia, a e hoomalu Koʻu lima maluna ona; a o na ki Aʻu i haawi ai ia ia, a ia oukou no hoi, aole e lawe ia mai ia ia aku a hiki mai Au.

16. He oiaio, Kaʻu e olelo aku nei ia oe, e Kuu kauwa, e Toma, o oe no ke kanaka Aʻu i wae ai e paa i na ki o Koʻu aupuni (ma na mea e pili ana i ka Papa Umikumamalua) ma o a maanei iwaena o na lahuikanaka a pau.

17. E lilo no oe i kauwa Naʻu e wehe i ka puka o ke aupuni ma na wahi a pau kahi a Kuu kauwa, o Iosepa, a me Kuu kauwa, o Sidane, a me Kuu kauwa, o Hailama, e hiki ole ai ke hele aku;

18. No ka mea, maluna o lakou i kau aku ai Au i ke koikoi o na apana a pau o ka Ekalesia no kekahi wa pokole;

19. No ia mea, ma kela me keia wahi a lakou e hoouna aku ai ia oe, e hele oe, a Owau pu no me oe; a ma kela me keia wahi au e hai ai i Koʻu inoa, e wehe ia ia oe i puka e pomaikai ai, i loaa ai ia lakou Kaʻu olelo;

20. O kela me keia mea e hookipa ana i Kaʻu olelo oia ka i hookipa mai Iaʻu, a o kela me keia mea e hookipa mai ana Iaʻu, oia ka i hookipa mai i ka poe (ka Papa Peresidena) Aʻu i hoouna aku ai, ka poe hoi Aʻu i hoolilo ai i mau hoakuka nou no ka pono o Koʻu inoa.

21. A eia hou, ke olelo aku nei Au ia oe, o kela me keia mea au e hoouna aku ai ma Kuu inoa, ma o ka leo la o kou mau hoahanau, ka Papa Umikumamalua, i apono pololei ia a i hoamana ia e oe, e loaa ka mana e wehe i ka puka o Kuu aupuni i kela me keia lahuikanaka ma kela me keia wahi au e hoouna aku ai ia lakou,

22. Ke hoohaahaa lakou ia lakou iho imua Oʻu, a malama i Kaʻu olelo, a hoolohe i ka leo o Kuu Uhane.

23. He oiaio, he oiaio, Kaʻu e olelo aku nei ia oe, ke uhi nei ka pouli i ka honua, a o ka pouli loa i na naau o na kanaka, a ua lilo na mea io a pau i haumia imua o Koʻu alo.

24. Aia hoi, e hiki koke mai ana ka hoopai maluna o na kanaka o ka honua, he la o ka inaina, he la o ke puhi ana, he la o ka hooneoneo ana, o ka uwe ana, o ke kumakena ana, a o ke kanikau ana, a me he puahiohio la, e iho mai no ia maluna o ka ili o ka honua a pau, wahi a ka Haku.

25. A maluna o Koʻu hale e hoomaka ai ia, a mai Koʻu hale aku e nee aku ai ia, wahi a ka Haku.

26. O ka mua, mawaena o ka poe mawaena o oukou, wahi a ka Haku, ka poe i kaena aku ua ike i Koʻu inoa, aole nae i ike Iaʻu, a kuamuamu mai Iaʻu iwaena o Kuu hale, wahi a ka Haku.

27. Nolaila, e nana pono aole e hoopilikia oukou ia oukou iho ma na hana pili i Kuu Ekalesia ma keia wahi, wahi a ka Haku;

28. Aka, e hoomaemae i ko oukou mau naau imua Oʻu, alaila, e hele aku oukou i ko ke ao nei a pau, a hai i Kuu Euanelio i kela me keia mea i loaa ole ia mea,

29. A o ka mea e manaoio a bapetizo ia e hoola ia, a o ka mea e manaoio ole mai, a bapetizo ole ia, e hoahewa ia.

30. No ka mea, ia oukou (Ka Papa Umikumamalua) a me ka poe (Ka Papa Peresidena) i koho pu ia me oukou e lilo i mau hoakuka no oukou a i mau alakai no oukou, i haawi ia aku ai ka mana o keia Oihanakahuna, no na la hope a no ka manawa hope, iloko olaila ke kau o ka hooko ana i na mea o na kau a pau.

31. Oia ka mana a oukou e paa like nei me ka poe a pau i loaa kekahi kau ma kekahi manawa mai ka hookumu ia ana mai o ka honua;

32. No ka mea, he oiaio Kaʻu e olelo aku nei ia oukou, o na ki o ke kau a oukou i loaa ai, ua ili mai mai na kupuna mai, a o ka hope loa o ia mau mea a pau, ua hoouna ia mai mai ka lani a ia oukou.

33. He oiaio, Kaʻu e olelo aku nei ia oukou, nani ke koikoi o ko oukou oihana. E hoomaemae i ko oukou mau naau a me ko oukou mau aahu, o koi ia auanei ke koko o keia hanauna ma ko oukou mau lima.

34. E kupaa a hiki mai Au, no ka mea, e hiki koke mai ana Au, a me Aʻu no Kaʻu uku e uku aku ai i kela me keia kanaka e like me kana e hana ai. Owau no ka Alepa a me ka Omega. Amene.