1. He oiaio, penei wahi a ka Haku ia oe, e Kaʻu kauwa, e Iosepa Kamika, ke olioli loa nei Au i kau alana a me kau mau ae haahaa ana mai au i hana ai, no ka mea, no keia kumu Aʻu i hoala mai ai ia oe, i hiki ai Iaʻu ke hoike aku i Koʻu naauao ma o na mea nawaliwali la o ka honua.

2. Ua apono ia kau mau pule imua Oʻu, a i pane no ia mau pule ke olelo aku nei Au ia oe, ua kahea ia oe ano e hana koke aku i kuahaua hoano o Kuu Euanelio, a me keia Mahele-aina Aʻu i kukulu ai i pohaku kihi no Ziona, ka mea e hoohinuhinu ia ana me ka maikai loa i ku i ke ano o kekahi halealii.

3. E hai ia keia kuahaua i na moi a pau o ke ao nei, i na kihi eha ona; i ka Peresidena hanohano i koho ia, a me na Kiaaina naau kiekie o ke aupuni au e noho nei, a i na lahuikanaka a pau i hookaawale ia ma o a maanei o ka honua.

4. E kakau ia ia me ka uhane o ka haahaa a ma ka mana o ka Uhane Hemolele, ka mea iloko ou i ka wa o ke kakau ia ana o ia mea;

5. No ka mea, e haawi ia aku ana ia ia oe e ka Uhane Hemolele e ike i Koʻu makemake e pili ana i ua poe moi la a poe mana hoi, he oiaio, i na mea e haule mai ana maluna o lakou i kekahi wa e hiki mai ana.

6. No ka mea, aia hoi! Ua aneane Au e kahea aku ia lakou e haliu mai i ka malamalama a me ka nani o Ziona, no ka mea, ua hiki mai ka manawa i koho ia e hoopomaikai ia ia.

7. Nolaila, e kahea aku oe ia lakou me ke kukala leo nui ana, a me kau olelo hoike, i waiho ia ai lakou me ke kumu kupono ole e pakele ai; e wiwo ole ia lakou, no ka mea, ua like lakou me he mauu la, a ua like ko lakou nani a pau me kona pua, ka mea e helelei koke ana;

8. A i hele mai ai Au ia lakou i ka la o ka hoopai ana, i ka manawa Oʻu e wehe ai i ke alo o Koʻu paku, e koho i ka mahele o ka mea hooluhi mawaena o ka poe hookamani, kahi e uwi ai na niho, ina e hoole lakou i Kaʻu mau kauwa a me Kaʻu olelo hoike Aʻu i hoike aku ai ia lakou.

9. A eia hou, e hele aku no Au a e hoopalupalu i ko lakou mau naau, he nui wale o lakou no kou pono, i loaa ai ia oe ka lokomaikai ia imua o ko lakou mau maka, i hiki aku ai lakou i ka malamalama o ka oiaio, a o ka poe Genetile hoi i ka hookiekie ana, a i ole i ka hapai ana ae ia Ziona.

10. No ka mea, e hiki kokoke mai ana ka la o Koʻu hoopai ana, i kekahi hora au e noonoo ole ai, a mahea kahi e palekana ai Koʻu poe kanaka, a me ka puuhonua hoi no ka poe o lakou e koe ana?

11. E ala! E na moi o ka honua! E hele mai oukou, e hele mai oukou, me ka oukou gula a me ka oukou kala, i ke kokua ana i Koʻu poe kanaka, i ka hale o na kaikamahine o Ziona.

12. A eia hou, he oiaio, ke olelo aku nei Au ia oe, e kokua Kaʻu kauwa o Robata B. Tomekona ia oe i ke kakau ana i keia olelo kuahaua, no ka mea, ua olioli loa Au ia ia, a e noho pu oia me oe;

13. Nolaila, e hoolohe oia i kau ao ana, a e hoopomaikai aku no Au ia ia me na pomaikai he lehulehu; e kupaa a e kuio oia ma na mea a pau mai keia manawa aku, a e lilo auanei oia i mea nui imua o Koʻu mau maka;

14. Aka, e hoomanao oia e koi ana Au i kona oihana kahu malama waiwai ma kona mau lima.

15. A eia hou, he oiaio, ke olelo aku nei Au ia oe, pomaikai no Kaʻu kauwa, o Hailama Kamika, no ka mea, ke aloha nei Au, ka Haku, ia ia mamuli o ke kuio o kona naau, a no ka mea, ke aloha nei oia i na mea pololei imua Oʻu, wahi a ka Haku.

16. Eia hou, e kokua Kaʻu kauwa o Ioane C. Beneta, ia oe ma kau hana ma ka hoouna ana i Kaʻu olelo i na moi o na kanaka o ka honua, a e kakoo ia oe, he oiaio, ia oe, e Kuu kauwa e Iosepa Kamika, iloko o ka hora o ka popilikia, a aole e nele kona uku ia ana ke hookipa oia i ke ao ana;

17. A no kona aloha e lilo no oia i mea nui, no ka mea, e lilo oia Noʻu, ina e hana oia i keia, wahi a ka Haku. Ua ike Au i ka hana ana i hana ai, ka mea Aʻu e apono nei, ke hoomau aku oia, a e hoolei aku Au ia ia me na pomaikai a me ka nani nui.

18. A eia hou, ke olelo nei Au ia oe, o Koʻu makemake ia e hoomau Kaʻu kauwa, o Laimana Waita, i ka haiolelo ana no Ziona, iloko o ka uhane haahaa, e hooia ana Iaʻu imua o ko ke ao nei, a e kaikai no Au ia ia iluna me he la maluna o na eheu o ka aeko, a e loaa ia ia ka nani a me ka hanohano nona iho, a no Koʻu inoa.

19. A i ka wa e hoopau pono ai oia i kana hana, e hookipa no Au ia ia Ioʻu nei, he oiaio, e like la me Kaʻu i hana ai i Kaʻu kauwa ia Davida Patena, ka mea me Aʻu i keia manawa, a me Kaʻu kauwa no hoi, o Eluene Paterige, a me Kaʻu kauwa elemakule, o Iosepa Kamika, makua, ka mea e noho nei me Aberahama ma kona lima akau, a pomaikai a hemolele hoi oia, no ka mea, Noʻu no oia.

20. A eia hou, he oiaio, ke olelo aku nei Au ia oe, he hewa ole Kaʻu kauwa o Keoki Mila: ua hiki ke hilinai ia oia mamuli o ke kuio o kona naau; a no ke aloha ana i loaa ai i Kaʻu olelo-hoike ke aloha nei Au, ka Haku, ia ia.

21. Nolaila, ke olelo aku nei Au ia oe, ke sila nei Au i ka oihana o ka Bihopa maluna o kona poo, e like me Kaʻu kauwa, o Eluene Paterige, i loaa ai ia ia na waiwai i hoolaa ia mai no Kuu hale, i hiki ai ia ia ke kau aku i na pomaikai maluna o na poo o ka poe ilihune o Kuu poe kanaka, wahi a ka Haku. Mai ae i kekahi kanaka e hoowahawaha i Kuu kauwa, ia Keoki, no ka mea, e hoomaikai mai ana oia Iaʻu.

22. E kukulu Kaʻu kauwa o Keoki, a me Kaʻu kauwa o Laimana, a me Kaʻu kauwa o Ioane Kanaida a me kekahi poe e ae, i kekahi hale no Koʻu inoa, e like me ka mea a Kuu kauwa, o Iosepa, e hoike aku ai ia lakou; ma kahi no hoi ana e hoike aku ai ia lakou.

23. A e lilo ia i hale no ka hookipa ana, i hale no na malihini e hele mai ana mai kahi mamao mai e noho ai; nolaila, e pono e lilo ia i hale maikai i ku i ke apono ia ma na ano a pau, i loaa ai i ke kamahele maluhiluhi ka hooluolu ia ana o ke ola kino a me ka palekana, oiai oia e noonoo ana i ka olelo a ka Haku; a me ka pohaku kihi Aʻu i koho ai no Ziona.

24. E lilo no keia hale i wahi noho kupono i ke ola kino, ke kukulu ia ia no Koʻu inoa, a ke ae ole aku ka luna nui e koho ia ana e malama ia hale, i kekahi hana hoohaumia e hiki mai iloko olaila. E lilo ia i wahi hemolele, a i ole pela, aole e noho ka Haku kou Akua iloko olaila.

25. A eia hou, he oiaio, ke olelo aku nei Au ia oe, e hele mai Koʻu Poe Hoano mai kahi mamao mai.

26. E hoouna oukou i poe elele mama, he oiaio, he poe elele i koho ia, a olelo aku ia lakou: E hele mai oukou, me ko oukou mau gula a pau, a me ko oukou kala, a me ko oukou pohaku momi, a me ko oukou mau mea kahiko a pau; a me ka poe a pau i loaa ka ike no na mea kahiko, e ae ana e hele mai, e hele mai no, a e lawe mai i ka laau-pahu, a i ka laau-kaa, a i ka laau-paina, pu me na laau makamae a pau o ka honua;

27. A me ka hao, me ke keleawe-ulaula, a me ke keleawe, a me ka zinika, a me ko oukou mau mea makamae a pau o ka honua, a e kukulu i hale no Koʻu inoa, no ka Mea Kiekie Loa e noho ai iloko olaila;

28. No ka mea, aole i loaa kekahi wahi ma ka honua nei kahi Ona e hiki mai ai a e hoihoi hou mai ia oukou i ka mea i nalowale mai ia oukou aku, a i ole ka mea Ana i lawe aku ai, oia hoi, ka piha o ka Oihanakahuna;

29. No ka mea, aole kekahi pahuwai bapetizo maluna o ka honua nei, i hiki ai ia lakou, Koʻu Poe Hoano, ke bapetizo ia no ka poe i make;

30. No ka mea, no Koʻu hale keia lawelawe-paa, a aole e apono ia e Aʻu nei, koe wale no ma na la o ko oukou nele, ka wa i hiki ole ai ia oukou ke kukulu ae i kekahi hale Noʻu.

31. Aka, ke kauoha aku nei Au ia oukou, i Koʻu Poe Hoano a pau, e kukulu i kekahi hale Ioʻu nei; a ke haawi nei Au ia oukou i kekahi manawa lawa kupono e kukulu i kekahi hale Ioʻu nei, a iloko o ia manawa e apono ana Au i ko oukou mau bapetizo ana.

32. Aka, aia hoi, i ka pau ana o ia wa i hookaawale ia ai, aole Au e apono ana i ko oukou bapetizo ana no ko oukou poe i make; a ina aole oukou e hana i keia mau mea i ka pau ana o ka wa i hookaawale ia, e hoole ia oukou ma ke ano he Ekalesia, me ko oukou poe make, wahi a ka Haku ko oukou Akua.

33. No ka mea, he oiaio, ke olelo aku nei Au ia oukou, mahope iho o ka loaa ana ia oukou ka manawa lawa kupono e kukulu ai i kekahi hale Noʻu, noloko olaila wale no i pili ai ka lawelawe-paa o ka bapetizo ana no ka poe make, a no ua mea nei i hookumu ia ai ua mea la mamua o ka hookumu ia ana o ke ao nei, aole e hiki ke apono ia e Aʻu ko oukou bapetizo ana no ka poe i make,

34. No ka mea, iloko olaila e hooili ia ai na ki o ka Oihanakahuna hemolele, i loaa ai ia oukou ka hanohano a me ka nani.

35. A mahope aku o ia manawa aole e apono ia e Aʻu ka oukou mau bapetizo ana no ka poe i make ma o ka poe la i kaawale mao a mao, wahi a ka Haku;

36. No ka mea, ua hooholo paa ia, ma Ziona, a ma kona mau Mahele-aina, a ma Ierusalema, na wahi Aʻu i koho ai i mau puuhonua, na wahi auanei e bapetizo ai oukou no ko oukou poe i make.

37. A eia hou, he oiaio, ke olelo aku nei Au ia oukou, pehea la e apono ai Au i ko oukou mau holoi ana, ke ole oukou e lawelawe ia mau mea iloko o kekahi hale a oukou i kukulu ai i Koʻu inoa?

38. No ka mea, no keia kumu i kauoha ai Au ia Mose e kukulu oia i kekahi halelewa, a e kaikai lakou ia mea me lakou iloko o ka waonahele, a e kukulu i kekahi hale ma ka aina i olelo mua ia, i hiki ai ke hoike ia mai kela mau lawelawe-paa i huna ia mai ka manawa mamua aku o ke ao nei;

39. Nolaila, he oiaio, ke olelo aku nei Au ia oukou, o ka oukou mau poni ana, a me ka oukou mau holoi ana, a me ko oukou mau bapetizo ana no ka poe make, a me ko oukou mau halawai hoano, a me ko oukou mau mea lawelawe hoomanao no ko oukou mau mohai, ma o na keiki la a Levi, a no ko oukou mau keena ma ko oukou mau wahi hemolele loa, kahi hoi a oukou e loaa ai na kamailio ana mai, a me ko oukou mau papa kanawai a me na olelo-hooholo, no ka hoomaka ana o na hoikeana a me ka hookumu ia ana o Ziona, a no ka nani, ka hanohano, a me ka hoopomaikai-laa ana o kona mau kulanakauhale, ua hooholo paa ia ma o ke kanawai la o Kuu hale hemolele, ka mea a Koʻu poe kanaka i kauoha mau ia ai e kukulu i Koʻu inoa hemolele.

40. A he oiaio, ke olelo aku nei Au ia oukou, e kukulu ia keia hale no Koʻu inoa, i hoike aku ai Au i Koʻu mau lawelawe-paa iloko olaila, i Koʻu poe kanaka;

41. No ka mea, ke ae nei Au e hoike i Koʻu Ekalesia, i na mea i huna ia mamua aku o ka hookumu ia ana o ke ao nei, i na mea e pili ana i ke kau o ka hooko ana i na mea o na kau a pau;

42. A e hoike aku no Au i Kuu kauwa, ia Iosepa, i na mea a pau e pili ana i keia hale, a me ka Oihanakahuna olaila, a me ka wahi ona e kukulu ia ai;

43. A e kukulu oukou ia hale maluna o kahi a oukou i manao ai e kukulu, no ka mea, oia maoli kahi Aʻu i wae ai no oukou e kukulu ai ia;

44. Ina e hana oukou me ko oukou ikaika a pau, e hoolaa no Au i ua wahi la i hoohemolele ia ai ia;

45. A ina e hoolohe mai Koʻu poe kanaka i Koʻu leo, a i ka leo o Kaʻu mau kauwa, ka poe Aʻu i koho ai e alakai i Koʻu poe kanaka, aia hoi, he oiaio, ke olelo aku nei Au ia oukou, aole lakou e hoonee ia mai ko lakou wahi ae.

46. Aka, ina aole lakou e hoolohe i Koʻu leo, a i ka leo hoi o keia poe kanaka Aʻu i koho ai, aole lakou e hoopomaikai ia, no ka mea, ke hoohaumia nei lakou i Koʻu mau aina hemolele, a me Koʻu mau lawelawe-paa hemolele, a me na palapala-hookumu a me Kaʻu mau olelo hemolele Aʻu i haawi aku ai ia lakou.

47. A e hiki mai no keia, ina e kukulu oukou i kekahi hale i Koʻu inoa, a hana ole i na mea Aʻu e olelo ai, aole Au e hooko i ka hoohiki Aʻu e hana nei me oukou, aole hoi e hooko i na olelo-hoopomaikai a oukou i manao ai mai Koʻu mau lima aku, wahi a ka Haku;

48. No ka mea, ma kahi o na hoopomaikai, e lawe mai oukou, mamuli o ka oukou mau hana ponoi iho, i na hoino ana, ka inaina, ka ukiuki, a me na hoopai ana maluna o ko oukou mau poo iho, ma ka oukou mau hana lapuwale, a ma ka oukou mau hana hoopailua a pau, a oukou e hana nei imua Oʻu, wahi a ka Haku.

49. He oiaio, he oiaio, ke olelo aku nei Au ia oukou, i ka wa Aʻu e haawi ai i kekahi kauoha i kekahi o na keiki a kanaka, e hana i kekahi hana no Koʻu inoa, a hele aku kela poe keiki a kanaka me ko lakou ikaika a pau, a me na mea a pau a lakou i loaa ai, e hooko i ua hana la, a hooki ole i ko lakou hooikaika ana, a lele mai ko lakou poe enemi maluna o lakou, a akeakea ia lakou mai ka hooko ana i ua hana la; aia hoi, he mea pono Iaʻu e koi hou ole i ua hana la mai na lima mai o ua mau keiki la a kanaka, aka, o ka ae wale aku no i ka lakou mau mohai ana;

50. A no ka hana hewa a me ka uhaki ana i Kuu mau kanawai a me na kauoha hemolele, e hoopai aku no Au maluna o na poo o ka poe e akeakea ana i Kaʻu hana, a hiki aku i ke kuakahi a me ke kualua, oiai lakou e mihi ole ana, a inaina mai Iaʻu, wahi a ka Haku ke Akua.

51. Nolaila, no keia kumu i apono aku ai Au i na alana ana a ka poe Aʻu i kauoha aku ai e kukulu ae i kulanakauhale a i hale i Koʻu inoa, ma ke Kalana o Iakekona, Misouri, a ua akeakea ia nae e ko lakou mau enemi, wahi a ka Haku ko oukou Akua.

52. A e pane aku no Au ma ka hoopai, ka inaina, a me ka ukiuki, ka uwe ana, ka ehaeha, a me ka uwi ana o na niho maluna o ko lakou mau poo, a hiki aku i ke kuakahi a me ke kualua, oiai lakou e mihi ole ana a inaina mai Iaʻu, wahi a ka Haku ko oukou Akua.

53. A ke hana aku nei Au i keia i kumuhoohalike no oukou, no ko oukou hooluolu ia ana e pili ana i ka poe a pau i kauoha ia e hana i kekahi hana, a ua akeakea ia e na lima o ko lakou mau enemi, a ma o ka hooluhi ia ana, wahi a ka Haku ko oukou Akua;

54. No ka mea, Owau no ka Haku ko oukou Akua, a e hoola no Au i ko oukou mau hoahanau a pau i maemae ma ka naau, a i pepehi ia a make ma ka aina o Misouri, wahi a ka Haku.

55. A eia hou, he oiaio, ke olelo aku nei Au ia oukou, ke kauoha hou aku nei Au ia oukou e kukulu i hale i Koʻu inoa, oia hoi, ma keia wahi, i hooiaio mai ai oukou ia oukou iho Iaʻu he poe kupaa oukou ma na mea a pau Aʻu e kauoha aku ai ia oukou, i hoopomaikai aku ai Au ia oukou, a hoolei aku ia oukou me ka hanohano, me ka palaho ole, a me ke ola mau loa.

56. A ano, ke olelo aku nei Au ia oukou, no ka mea e pili ana i Kuu hale hookipa, ka mea Aʻu i kauoha aku ai ia oukou e kukulu no ka hookipa ana i na malihini, e kukulu ia ia i Kuu inoa, a e kapa ia Kuu inoa maluna iho ona, a e loaa ona wahi no Kuu kauwa, o Iosepa, a me ko kona hale iloko olaila, ia hanauna aku ia hanauna aku;

57. No ka mea, ua kau aku Au i keia poni ana maluna o kona poo, i kau ia aku ai no hoi kona pomaikai maluna o ke poo o kona mau mamo mahope aku ona,

58. A e like me Kaʻu i olelo ai ia Aberahama e pili ana i na ohana o ka honua, pela no Au e olelo nei i Kaʻu kauwa, ia Iosepa, iloko ou a me kau hua e hoopomaikai ia ai na ohana o ka honua.

59. Nolaila, e loaa ona wahi iloko o kela hale no Kuu kauwa, o Iosepa, a me kana hua mahope aku ona, ia hanauna aku ia hanauna aku, no ka wa mau loa a mau loa, wahi a ka Haku,

60. A e kapa ia ka inoa o ua hale la ka Hale Navu, a e lilo ia i wahi oluolu maikai no ka noho ana o ke kanaka, a i wahi e hooluolu ai no ke kamahele maluhiluhi, i noonoo ai oia no ka nani o Ziona, a me ka nani o keia kona pohaku kihi;

61. I loaa ai no hoi ia ia na ao ana mai ka poe Aʻu i hoonoho ai me he la he mau mea kanu kaulana, a me he la he mau kiai maluna o kona mau pa.

62. Aia hoi, he oiaio, ke olelo aku nei Au ia oukou, e hoonohonoho Kuu kauwa, o Keoki Mila, a me Kuu kauwa, o Laimana Waita, a me Kuu kauwa, o Ioane Kanaida, a me Kuu kauwa, o Petero Hase, ia lakou iho, a e koho i hookahi o lakou e lilo i peresidena maluna o ko lakou papa no ka hana o ke kukulu ana i ua hale la.

63. A e haku lakou i kumukanawai, a ma o ia mea la lakou e ohi mai ai i kumu-waiwai no ke kukulu ana i ua hale la.

64. A aole e lawe mai ka huina emi iho malalo o ke kanalima dala no ke kea hookahi o ke kumu-waiwai o ua hale la, a e ae ia lakou e lawe mai i umikumamalima tausani dala mai ke kanaka hookahi mai no ke kumu-waiwai o ua hale la;

65. Aka, aole lakou e ae ia e lawe mai a oi aku mamua o ka umikumamalima tausani dala no ke kumu-waiwai mai kekahi kanaka hookahi mai;

66. A aole lakou e ae ia e lawe mai i ka huina emi mai malalo o ke kanalima dala no ke kea hookahi o ke kumu-waiwai o ua hale la, mai kekahi kanaka hookahi mai;

67. A aole lakou e ae ia e hookomo mai i kekahi kanaka ma ke ano he mea paa kumu-waiwai iloko o keia hale, ke ole e uku oia i kona mahele kumu-waiwai iloko o ko lakou mau lima ma ka manawa ana e loaa mai ai he kumu-waiwai;

68. A e like ka nui o ka huina o ke kumu-waiwai ana e uku ai iloko o ko lakou mau lima, pela no e loaa mai ai ia ia ke kumu-waiwai iloko o ua hale la; aka, ina aole oia i uku i kekahi mea iloko o ko lakou mau lima, aole loa e loaa ia ia kekahi kumu-waiwai iloko o ua hale la.

69. A ina e uku mai kekahi i kumu-waiwai iloko o ko lakou mau lima, e lilo no ia i kumu-waiwai no ua hale la, nona ponoi iho a no kona hanauna mahope aku ona, ia hanauna aku ia hanauna aku, oiai oia a me kona mau hooilina e paa ana i ua kumu-waiwai la a aole e kuai aku, a i ole, hoolilo aku i ua kumu-waiwai la mailoko aku o ko lakou mau lima mamuli o ko lakou makemake ponoi iho a hana hoi, ina e hana oukou i Kuu makemake, wahi a ka Haku ko oukou Akua.

70. A eia hou, he oiaio, ke olelo aku nei Au ia oukou, ina e lawe mai Kuu kauwa, o Keoki Mila, a me Kuu kauwa, o Laimana Waita, a me Kuu kauwa, o Ioane Kanaida, a me Kuu kauwa, o Petero Hase, i kekahi kumu-waiwai iloko o ko lakou mau lima, ma na dala, a i ole, ma na waiwai, ma o ia mea la e loaa ai ia lakou ka waiwai io o ke dala, aole lakou e hoolilo i kekahi hapa o ua kumu-waiwai la no kekahi hana okoa ae, aka, no ua hale wale la no;

71. A ina e hoolilo lakou i kekahi hapa o ua kumu-waiwai la ma kekahi wahi e ae, koe wale no ma ua hale wale la no, me ka ae ole o ka mea nona ia kumu-waiwai, a aole e uku pa-paha mai no ke kumu-waiwai a lakou i hoolilo aku ai i kekahi wahi e ae, koe wale no i ua hale wale la no, e hoino ia lakou, a e hoopau ia mai ko lakou wahi ae, wahi a ka Haku ke Akua, no ka mea, Owau no ka Haku ke Akua, a aole hiki ke hoomaewaewa ia ma kekahi o keia mau mea.

72. He oiaio, ke olelo aku nei Au ia oukou, e ae i Kuu kauwa, ia Iosepa, e uku aku i kumu-waiwai iloko o ko lakou mau lima no ke kukulu ana i ua hale la, e like me kana i manao ai he pono; aka, aole e hiki i Kuu kauwa, ia Iosepa, ke uku a oi aku mamua o umikumamalima tausani dala no ke kumu-waiwai iloko o ua hale la, aole hoi malalo iho o kanalima dala; aole hoi e hiki i kekahi kanaka e ae, wahi a ka Haku.

73. A aia kekahi poe e ae no hoi e makemake ana e ike i Koʻu makemake e pili ana ia lakou, no ka mea, ua noi mai lakou ia mea ma Koʻu lima.

74. Nolaila, ke olelo aku nei Au ia oukou e pili ana i Kaʻu kauwa, ia Vinesona Naita, ina e hana oia i Koʻu makemake, e hookomo oia i kumu-waiwai iloko o ua hale la nona iho, a no kona hanauna mahope ona, ia hanauna aku ia hanauna aku,

75. A e hookiekie ae oia i kona leo a nui a loihi iwaena o na kanaka, e imi i ka pono o ka poe ilihune a me ka poe nele, a mai paupauaho oia, aole hoi e mauleule kona naau, a e apono no Au i kana mau mohai ana, no ka mea, aole e lilo ia mau mea Iaʻu e like me na mohai a Kaina, no ka mea, Naʻu auanei oia, wahi a ka Haku.

76. E hauoli kona ohana, a e huli ae ko lakou mau naau mai ka popilikia aku, no ka mea, ua koho Au ia ia a ua poni hoi ia ia, a e hoomaikai ia oia mawaena o kona hale, no ka mea, e kala no Au i kona mau hewa a pau, wahi a ka Haku. Amene.

77. He oiaio, ke olelo aku nei Au ia oukou, e hookomo Kuu kauwa, o Hailama, i kumu-waiwai iloko o ua hale la, e like me kana i manao ai he pono, nona ponoi iho a me kona hanauna mahope aku ona, ia hanauna aku ia hanauna aku.

78. E hookomo Kuu kauwa, o Isaaka Kalana, i kumu-waiwai iloko o ua hale la, no ka mea, ke aloha nei Au ka Haku ia ia no ka hana ana i hana ai, a e kala no Au i kona mau hewa a pau; nolaila, e hoomanao ia oia no kekahi kuleana iloko o ua hale la, ia hanauna aku ia hanauna aku.

79. E koho ia Kuu kauwa, o Isaaka Kalana, mawaena o oukou, a e hoolilo ia e Kuu kauwa, e Wiliama Mareko, a e hoopomaikai ia e ia, e hele pu me Kuu kauwa, o Hailama, e hoopau pono i ka hana a Kuu kauwa, o Iosepa, e kuhikuhi mai ai ia laua, a e hoopomaikai nui ia auanei laua.

80. E uku Kuu kauwa, o Wiliama Mareko, i kumu-waiwai iloko o ua hale la, e like me kana i manao ai he pono, nona iho a me kona hanauna, ia hanauna aku ia hanauna aku.

81. E uku Kuu kauwa, o Hanale G. Serewuda, i kumu-waiwai iloko o ua hale la, e like me kana i manao ai he pono, nona iho a me kana hua mahope aku ona, ia hanauna aku ia hanauna aku.

82. E uku Kuu kauwa, o Wiliama Kanawai, i kumu-waiwai iloko o ua hale la, nona iho, a me kana hua mahope aku ona, ia hanauna aku ia hanauna aku.

83. Ina e hana oia i Kuu makemake, mai lawe oia i kona ohana i na aina ma ka hikina, oia hoi, i Ketalana; aka nae, e kukulu ae ana no Au, ka Haku, ia Ketalana, aka, he hoopai Kaʻu, ka ka Haku, i hoomakaukau ai no na kanaka olaila.

84. A no Kaʻu kauwa, o Alamona Babita, aia he nui wale na mea Aʻu i oluolu ole ai; aia hoi, ke imi nei oia e kukulu i kana ahakuka ma kahi o ka ahakuka Aʻu i hoopaa ai, oia hoi, ka Papa Peresidena o Kuu Ekalesia, a kukulu ae la oia i bipi-keiki gula no Kuu poe kanaka e hoomana ai.

85. Mai hele aku kekahi kanaka mai keia wahi aku, oia hoi, ka poe i hele mai ia nei e hoao ana e malama i Kaʻu mau kauoha.

86. Ina e noho lakou ia nei e ola lakou iloko Oʻu; a ina e make lakou, e make no lakou iloko Oʻu; no ka mea, e hoomaha no lakou mai ka lakou mau hana ae a pau oonei, a e hoomau aku auanei i ka lakou mau hana.

87. Nolaila, e paulele Kaʻu kauwa, o Wiliama, Iaʻu nei, a e hooki i ka hopohopo ana no kona ohana mamuli o ka mai maluna o ka aina. Ina e aloha mai oukou Iaʻu e malama i Kaʻu mau kauoha, a e lilo ka mai o ka aina no ko oukou nani.

88. E hele Kuu kauwa, o Wiliama, a e hai i Kuu Euanelio mau loa me ka leo nui, a me ka olioli nui, e like me kona uluhia ia ana e Kuu Uhane, i na kanaka o Wasa, a i na kanaka no hoi o Katage, a i na kanaka no hoi o Balinetona, a i na kanaka no hoi o Madisona, a e kali ahonui me ke kupaa no kekahi mau kuhikuhi hou ana aku ma Kuu huikuka nui, wahi a ka Haku.

89. Ina e hana oia i Koʻu makemake, e hoolohe oia mai keia manawa aku i ke ao ana a Kuu kauwa, a Iosepa, a me kona waiwai e kokua i ka pono o ka poe ilihune, a e pai a hoolaha i ka unuhina hou o Kaʻu olelo hemolele i na kanaka o ka honua;

90. A ina e hana oia i keia, e hoopomaikai aku no Au ia ia me na pomaikai he lehulehu, a aole oia e haalele ia, aole hoi e ike ia kana hua e noi ana i palaoa.

91. A eia hou, he oiaio, ke olelo aku nei Au ia oukou, e koho ia Kuu kauwa, o Wiliama, a e hoolilo ia, a e poni ia, i hoakuka no Kuu kauwa, o Iosepa, ma ka hakahaka o Kuu kauwa, o Hailama, i lawe ai Kuu kauwa, o Hailama, i ka oihana o ka Oihanakahuna a me ka Makualii, ka mea i koho ia nona e kona makuakane, ma ka hoopomaikai ana a me ke kuleana no hoi,

92. A mai keia manawa aku e paa oia i na ki o na hoopomaikai Makualii maluna o na poo o Kuu poe kanaka a pau,

93. Aia hoi, o ka mea ana e hoopomaikai ai e hoopomaikai ia no, a o ka mea ana e hoino ai e hoino ia no; a o ka mea ana e hoopaa ai ma ka honua nei e hoopaa ia iloko o ka lani; a o ka mea ana e hookuu ai ma ka honua nei e hookuu ia no iloko o ka lani;

94. A mai keia manawa aku ke koho aku nei Au ia ia e lilo oia i Kaula, a i mea ike, a i mea-hoike i Kuu Ekalesia, e like no hoi me Kuu kauwa, o Iosepa,

95. I hana kuikahi like ai no hoi oia me Kuu kauwa, o Iosepa, a e loaa ia ia ke ao ana mai Kuu kauwa mai, o Iosepa, ka mea nana e kuhikuhi mai ia ia i na ki e hiki ai ia ia ke noi a loaa mai, a e hoolei ia me ka pomaikai like, ka nani, ka hanohano, ka Oihanakahuna, a me na haawina o ka Oihanakahuna, na mea i hookau ia mamua maluna o ka mea he kauwa Naʻu mamua, oia hoi, o Oliva Kaudare;

96. I hoike ai Kuu kauwa, o Hailama, i na mea Aʻu e hoike aku ai ia ia, i loaa ai kona inoa me ka hoomanao maikai ia ana ia hanauna aku ia hanauna aku, no ka wa mau loa a mau loa.

97. E loaa pu no hoi i Kuu kauwa, ia Wiliama Kanawai, na ki e hiki ai ia ia ke noi a loaa mai na pomaikai; e haahaa oia imua Oʻu, a e noho hala ole, a e loaa ia ia mai Kuu Uhane mai, oia hoi ka Uhane Kokua, ka mea e hoike aku ia ia i ka oiaio o na mea a pau, a e haawi aku ia ia ia hora no i kana mea e olelo ai.

98. A e ukali aku ana keia mau ouli; e hoola no ia i ka poe mai, e kipaku no oia i na daimonio, a e hoopakele ia no ia mai ka poe mai e makemake ana e haawi mai ia ia i ka laau make;

99. A e alakai ia no oia ma na ala kahi e hiki ole ai i ka moonihoawa ke nahu i kona kuekue wawae, a e lele ae ka noonoo ana o kona mau manao iluna me he la aia iluna o na eheu o ka aeko;

100. A heaha hoi, ina o Koʻu makemake ia e hoala mai oia i ka mea i make, mai kaohi mai oia i kona leo.

101. Nolaila, e kahea nui aku Kuu kauwa, o Wiliama, a mai aua, me ka olioli a me ka hauoli ana, a me ka hosana ana ia Ia, i ka Mea e noho ana maluna o ka nohoalii no ka wa mau loa a mau loa, wahi a ka Haku ko oukou Akua.

102. Aia hoi, ke olelo aku nei Au ia oukou, he misiona Kaʻu i hoolala ia ai no Kuu kauwa, o Wiliama, a no Kuu kauwa, o Hailama, a no laua wale no; a e kali no Kuu kauwa, o Iosepa, ma ka home, no ka mea, ua makemake ia oia malaila; a o ke koena iho, e hoike aku no Au ia oe ma keia hope aku. Pela io no. Amene.

103. A eia hou, he oiaio ke olelo aku nei Au ia oukou, ina e hookauwa mai Kuu kauwa, o Sidane, Naʻu a e lilo i hoakuka no Kuu kauwa, o Iosepa, e ala mai oia a e pii mai a ku ma ka oihana ona i kahea ia ai, a hoohaahaa ia ia iho imua Oʻu;

104. A ina e alana mai oia imua Oʻu i mohai i ku i ke apono ia, a me na ae haahaa ana, a hoomau me Kuu poe kanaka, aia hoi, e hoolaa aku no Au, ka Haku, ko oukou Akua ia ia, i hoola ia ai ia; a e hookiekie hou ae no oia i kona leo maluna o na mauna, a e lilo i waha-olelo imua o Koʻu alo.

105. E hele mai oia a hoonoho i kona ohana ma kahi kokoke i kahi e noho nei Kuu kauwa, o Iosepa,

106. A iloko o kona mau kaahele ana a pau e hookiekie oia i kona leo e like la me ka leo o kekahi pu, a ao aku i na kanaka o ka honua e holo mai ka inaina aku e hiki mai ana;

107. E kokua oia i Kuu kauwa, ia Iosepa, a e kokua no hoi Kuu kauwa, o Wiliama Kanawai, i Kuu kauwa, o Iosepa, ma ka hana ana i kekahi kuahaua hoano i na moi o ka honua, he oiaio, e like me Kaʻu i olelo ai ia oukou mamua.

108. Ina e hana Kuu kauwa, o Sidane, i Koʻu makemake, mai lawe oia i kona ohana i na aina ma ka hikina, aka, e hoololi oia i ko lakou wahi e noho ai, he oiaio, e like me Kaʻu i olelo ai.

109. Aia hoi, aole ia o Koʻu makemake e imi oia i wahi e palekana ai a i puuhonua mawaho aku o ke kulanakauhale Aʻu i koho aku ai no oukou, oia hoi, ke kulanakauhale o Navu.

110. He oiaio, ke olelo aku nei Au ia oukou, he oiaio ano, ina e hoolohe oia i Koʻu leo, e pomaikai auanei oia. Pela io no. Amene.

111. A eia hou, he oiaio, ke olelo aku nei Au ia oukou, e uku mai Kuu kauwa, o Amosa Kewiki, i kekahi kumu-waiwai iloko o na lima o ka poe Aʻu i koho ai e kukulu i hale no ka hookipa ana, oia hoi, ka Hale Navu;

112. O keia kana e hana ai, ina e makemake oia e loaa kekahi mahele-waiwai, a e hoolohe oia i ke ao ana a Kuu kauwa, a Iosepa, a e hana me kona mau lima ponoi i loaa ai ia ia ka hilinai ia mai e kanaka;

113. A i ka wa ona e hooiaio mai ai i kona kupaa ma na mea a pau e waiho ia ana nana e malama; he oiaio, he mau mea kakaikahi, e hoolilo ia auanei oia i mea hoomalu maluna o na mea he nui;

114. Nolaila, e hoohaahaa oia ia ia iho i hookiekie ia ai oia. Pela io no. Amene.

115. A eia hou, he oiaio, ke olelo aku nei Au ia oukou, ina e hoolohe mai Kuu kauwa, o Robata D. Poka, i Kuu leo, e kukulu oia i hale no Kuu kauwa, no Iosepa, i ku like me ka aelike ana i hana ai me ia, e like me ka wehe ia ana aku o ka ipuka ia ia ia manawa aku ia manawa aku;

116. A e mihi oia i kana hana lapuwale a pau, a e hoaahu ia ia iho me ke aloha, a e hooki i ka hana hewa ana, a e kapae ae i kana mau olelo oolea a pau,

117. A e uku aku no hoi i kekahi kumu-waiwai iloko o na lima o ka papa o ka Hale Navu, nona iho a me kona hanauna mahope ona, ia hanauna aku ia hanauna aku,

118. A e hoolohe i ke ao ana a Kuu mau kauwa, a Iosepa a me Hailama a me Wiliama Kanawai, a i na poe mana Aʻu i kahea ai e hookumu i ke kahua o Ziona, a e pomaikai auanei oia no ka wa mau loa a mau loa. Pela io no. Amene.

119. A eia hou, he oiaio ke olelo aku nei Au ia oukou, mai ae i kekahi kanaka e uku i kekahi kumu-waiwai i ka papa o ka Hale Navu, ke ole oia he mea manaoio iloko o ka Buke a Moramona, a me na hoikeana Aʻu i haawi aku ai ia oukou, wahi a ka Haku ko oukou Akua;

120. No ka mea, o ka mea i oi aku a emi mai paha mamua o keia mai ka ino mai no ia, a e pili pu aku ana na hoino ana ia mea, aole na hoopomaikai ana, wahi a ka Haku ko oukou Akua. Pela io no. Amene.

121. A eia hou, he oiaio, ke olelo aku nei Au ia oukou, e loaa i ka papa o ka Hale Navu kekahi uku kupono no ka lakou mau hana a pau a lakou e hana ai ma ke kukulu ana i ka Hale Navu, a o ko lakou uku e like ia me ka mea e hooholo like ia ana mawaena o lakou iho, e pili ana i ka nui oia uku;

122. A na kela a me keia kanaka e uku ana i kekahi kumu-waiwai e auamo i kona mahele o ko lakou uku, ina he mea ia e pono ai, no ko lakou ola, wahi a ka Haku; ina aole pela, e helu ia ka lakou mau hana i kumu-waiwai no lakou iloko o ua hale la. Pela io no. Amene.

123. He oiaio, Kaʻu e olelo aku nei ia oukou, ke haawi aku nei Au ia oukou ano i na luna e pili pu me Kuu Oihanakahuna, i paa ai oukou i na ki o ia mea, oia hoi, ka Oihanakahuna mamuli o ke ano o Melekisedeka, ka mea hoi mamuli o ke ano o Kaʻu Keiki Hanaukahi.

124. O ka mua, ke haawi aku nei Au ia oukou ia Hailama Kamika e lilo i Makualii no oukou, e paa i na hoopomaikai sila o Kuu Ekalesia, oia hoi ka Uhane Hemolele o ka olelo-hoopomaikai, ka mea ma ona la oukou i sila ia ai no ka la o ka hoola ana, i haule ole ai oukou, oiai nae e hiki mai paha ka hora o ka hoowalewale ana maluna o oukou.

125. Ke haawi aku nei Au i Kuu kauwa, ia Iosepa, ia oukou e lilo i Lunakahiko hoomalu maluna o Koʻu Ekalesia holookoa, i mea unuhi, i mea hoike, i mea ike, a i Kaula.

126. Ke haawi aku nei Au i Kuu kauwa, o Sidane Rigedona, a me Kuu kauwa, o Wiliama Kanawai, i mau hoakuka nona, i lilo ai lakou i papa a i Papa Peresidena hoi, e loaa na hoikeana no ka Ekalesia holookoa.

127. Ke haawi aku nei Au ia oukou i Kuu kauwa, o Birigihama Iana, e lilo i Peresidena maluna o na Hoakuka kaahele he Umikumamalua;

128. Ke paa nei ua Umikumamalua nei i na ki e wehe ae i ka mana o Koʻu aupuni ma na kihi eha o ka honua, a mahope aku oia hana e hoouna i Kaʻu olelo i na mea ola a pau.

129. Eia no lakou: Heba C. Kimabala, Pale P. Parata, Oresona Parata, Oresona Haida, Wiliama Kamika, Ioane Tela, Ioane E. Pegi, Wilifoda Wuderufa, Wilada Rikeke, Keoki A. Kamika;

130. Ua lawe Au ia Davida Patena Iaʻu iho; aia hoi, aole e hiki i kekahi kanaka ke lawe i kana Oihanakahuna mai ia ia aku; aka, he oiaio, ke olelo aku nei Au ia oukou, ua hiki ke koho ia kekahi no ia oihana hookahi.

131. A eia hou, ke olelo aku nei Au ia oukou, ke haawi aku nei Au ia oukou i kekahi Ahakuka Kiekie, no ka pohaku kihi o Ziona;

132. Oia hoi, o Samuela Beneta, H. G. Serewuda, Keoki W. Hailaki, Kale C. Waiwai, Toma Kolova, Nuela Naita, Davida Dota, Dunaba Wilisona; (ua lawe Au ia Simona Barunekona Iaʻu iho, aole kekahi kanaka e hiki ke lawe i kana Oihanakahuna, aka, ua hiki ke koho ia kekahi no ia Oihanakahuna hookahi no ma kona hakahaka, a he oiaio, ke olelo aku nei Au ia oukou, e hoolilo ia Kuu kauwa, o Aarona Ioanekona, i keia oihana ma kona hakahaka); o Davida Fulama, Alepaio Katala, Wiliama Hakinekona.

133. A eia hou, ke haawi aku nei Au ia oukou ia Dona C. Kamika e lilo i peresidena maluna o kekahi papa o na Kahuna Kiekie;

134. Ka oihana i kukulu ia no ka hoomakaukau ana i ka poe e koho ia ana i mau peresidena ku mau, a i ole i mau kauwa maluna o na Mahele-aina like ole i kakaawale ma o a ma o,

135. A e kaahele lakou, ina lakou e koho ana pela, aka, e aho no ke hoolilo ia i mau peresidena ku mau, o keia ka hana o ko lakou oihana, wahi a ka Haku ko oukou Akua.

136. Ke haawi aku nei Au ia Amasa Laimana, a me Noa Pakada, i mau hoakuka nona, i hiki ai ia lakou ke hoomalu maluna o ka papa o na Kahuna Kiekie o Kuu Ekalesia, wahi a ka Haku.

137. A eia hou, ke olelo aku nei Au ia oukou, ke haawi aku nei Au ia oukou ia Ioane A. Hiki, Samuela Wiliama, a me Iese Beka, a na ia Oihanakahuna e hoomalu maluna o ka papa o na Lunakahiko, o ua papa la ka i kukulu ia i poe hai Euanelio ku mau, eia nae he hiki no ia lakou ke kaahele, aka nae, ua hoolilo ia lakou i poe hai Euanelio ku mau no Kuu Ekalesia, wahi a ka Haku.

138. A eia hou, ke haawi aku nei Au ia oukou ia Iosepa Iana, Iosia Batapila, Daniela Mile, Hanale Helimana, Zera Pulesipa, Levi Hanekoki, Iakobo Poka, e noho hoomalu maluna o ka papa o na Kanahiku.

139. Oia no ka papa i kukulu ia i mau Lunakahiko kaahele e hoike aku i Kuu inoa i ko ke ao nei a pau, ma kela a me keia wahi a ka Ahakuka Kiekie Kaahele, Kuu poe Aposetolo, e hoouna ai ia lakou e hoomakaukau i ke ala imua Oʻu.

140. O ka like ole mawaena o keia papa a me ka papa o na Lunakahiko, oia keia, e kaahele mau kekahi, a o kekahi hoi e noho hoomalu maluna o na apana o ka Ekalesia ia manawa aku ia manawa aku; aia i kekahi ke koikoi o ka noho hoomalu ana ia manawa aku ia manawa aku, a o kekahi hoi aole i loaa ke koikoi o ka hoomalu ana, wahi a ka Haku ko oukou Akua.

141. A eia hou, ke olelo aku nei Au ia oukou, ke haawi aku nei Au ia oukou, ia Vinesona Naita, Samuela H. Kamika, a me Saderaka Raunade, ina e ae mai oia, e noho hoomalu maluna o ka oihana Bihopa; ua haawi ia ia oukou ka ike no ua oihana Bihopa la ma ka Buke o na Berita a me na Kauoha.

142. A eia hou, ke olelo aku nei Au ia oukou, o Samuela Rolepa a me kona mau hoakuka i mau Kahuna, a me ka peresidena o na Kumu a me kona mau hoakuka, a me ka peresidena o na Diakona a me kona mau hoakuka no hoi, a me ka peresidena o ka Mahele-aina a me kona mau hoakuka no hoi;

143. O keia mau oihana i hai ia maluna ae Kaʻu i haawi aku ai ia oukou, a me na ki hoi oia mau mea, i mau kokua a no ka hoomalu ana hoi, no ka hana o ka Oihanakahuna, a no ka hoohemolele ana i Koʻu Poe Hoano;

144. A he kauoha Kaʻu e haawi aku nei ia oukou e hoopiha oukou i keia mau oihana a pau a e apono i kela mau inoa Aʻu i hai ae nei, a i ole e kue ia lakou iloko o Kuu huikuka nui,

145. A e hoomakaukau oukou i mau keena no keia mau oihana a pau, iloko o Kuu hale i ka wa a oukou e kukulu ai ia mea i Kuu inoa, wahi a ka Haku ko oukou Akua. Pela io no. Amene.