1. Ninau.—Heaha ka moana akaka me he aniani la [Moana aniani e like me ka pohaku aiai] i olelo ia e Ioane, ma ke pauku 6 o ka mokuna 4 o Hoikeana?Haina.—Oia no ka honua, ma kona ano i hoomaemae ia, palaho ole, a kulana mau loa.

2. N.—Heaha ka mea a kakou e hoomaopopo ai ma na mea ola eha [holoholona eha] i olelo ia ma ia pauku hookahi no?H.—He mau olelo hoohalikelike lakou a Ioane ka Mea Hoike i hoopuka ai, ma ka hoakaka ana i ke ano o ka lani, ka Paredaiso o ke Akua, ka hauoli ana o ke kanaka, a o na holoholona, a o na mea kolo, a o na manu o ka lewa; ka mea uhane ma ke ano like me ka mea kino; a o ka mea kino ma ke ano like me ka mea uhane; ka uhane o ke kanaka ua like ia me kona kino io, a pela no hoi ka uhane o ka holoholona, a me na mea ola e ae a pau a ke Akua i hana ai.

3. N.—Ua kaupalena ia anei na mea ola eha ma ke ano he mau holoholona ku pakahi, a i ole, ua hoonohonoho ia anei ma ke ano o na papa, a i ole, na mahele?H.—Ua kaupalena ia lakou ma ke ano o eha mau holoholona ku pakahi, ka mea i hoike ia ia Ioane, e hoalike i ka nani o na papa o na mea ola, ma ko lakou mahele i hooholo ia, a i ole, kulana i hana ia ai, ma ka hauoli ana ma ko lakou olioli mau loa.

4. N.—Heaha ka mea a kakou e hoomaopopo ai ma o na maka a me na eheu o ua mau holoholona la?H.—O ko lakou mau maka he hoohalike ana ia o ka malamalama, a me ka ike; oia hoi, ua piha lakou i ka ike, a o ko lakou mau eheu he hoohalike ana ia i ka mana e nee, e hana, a pela aku.

5. N.—Heaha ka mea a kakou e hoomaopopo ai ma o na Lunakahiko la he iwakalua-kumamaha, i olelo ia e Ioane?H.—E hoomaopopo kakou o keia mau Lunakahiko a Ioane i ike ai, he mau Lunakahiko lakou i kupaa iloko o ka hana o ka Oihanakahuna a ua make; he poe no na ekalesia ehiku,—a ia manawa, aia lakou iloko o ka Paredaiso o ke Akua.

6. N.—Heaha ka mea a kakou e hoomaopopo ai ma o ka buke la a Ioane i ike ai, i sila ia o hope me na wepa ehiku?H.—E hoomaopopo kakou e paa ana ia i ka makemake i hoike ia mai, na mea pohihihi, a me na hana a ke Akua; na mea huna o Kona malama pono ana e pili ana i keia honua iloko o na makahiki ehiku tausani o kona ku ana, a i ole, o kona ano e ku nei i keia wa.

7. N.—Heaha ka mea a kakou e hoomaopopo ai ma o na sila la ehiku ona i sila ia ai?H.—E hoomaopopo kakou o ka sila mua e paa ana ia i na mea o ke tausani makahiki mua, a pela no hoi ka elua i ko ka lua o ka tausani makahiki, a pela aku a hiki i ka hiku.

8. N.—Heaha ka mea a kakou e hoomaopopo ai ma o na anela la eha, i olelo ia ma ka mokuna 7, pauku 1, o Hoikeana?H.—E hoomaopopo kakou he mau anela eha lakou i hoouna ia mai ke Akua aku, ka poe i haawi ia ka mana maluna o na mahele eha o ka honua, e hoopakele i ke ola a e luku no hoi; o keia ka poe ia lakou ka Euanelio mau loa e haawi aku i kela a me keia lahui, ohana, olelo, a me na kanaka; ka poe i loaa ka mana e pani aku i na lani, e sila ae no ke ola, a i ole, e hoolei ilalo i na wahi o ka pouli.

9. N.—Heaha ka mea a kakou e hoomaopopo ai ma o ka anela la e pii mai ana mai ka hikina mai, Hoikeana mokuna 7, pauku 2?H.—E hoomaopopo kakou o ka anela e pii mai ana mai ka hikina mai, oia ka mea i haawi ia ka sila o ke Akua ola, maluna o na ohana umikumamalua o ka Iseraela; no ia mea, kahea aku la oia i na anela eha e paa ana i ka Euanelio mau loa, i ka i ana, mai hana ino i ka honua, aole hoi i ka moana, aole hoi i na laau, a sila kakou i na kauwa a ko kakou Akua ma ko lakou mau lae; a ina e apo mai oukou ia mea, o keia o Elia ka mea e hiki mai ana e houluulu pu i na ohana o ka Iseraela a e hoihoi hou mai i na mea a pau.

10. N.—I ka manawa hea e hooko ia ai na mea i olelo ia iloko o keia mokuna?H.—E hooko ia ana ia mau mea iloko o ke ono o na tausani makahiki, a i ole, i ka wehe ana o ke ono o na sila.

11. N.—Heaha ka mea a kakou e hoomaopopo ai i ka sila ana i ka hookahi haneri a me kanaha-kumamaha tausani, mailoko mai o na ohana a pau o ka Iseraela; he umikumamalua tausani mailoko mai o kela a me keia ohana?H.—E hoomaopopo kakou o ka poe i sila ia he poe Kahuna Kiekie lakou, i hoolilo ia no ka papa hemolele o ke Akua, e lawelawe i ka Euanelio mau loa; no ka mea, o lakou ka poe i hoolilo ia mailoko mai o kela a me keia lahui, ohana, olelo, a me na kanaka, e na anela na mea i haawi ia ka mana maluna o na lahuikanaka o ka honua, e lawe mai i ka poe a pau e makemake ana e hele mai i ka Ekalesia o ka Hanaumua.

12. N.—Heaha ka mea a kakou e hoomaopopo ai ma o ke kani ana la o na pu, i hai ia ma ka mokuna 8 o Hoikeana?H.—E hoomaopopo kakou e like la me ka ke Akua hana ana i ke ao nei iloko o na la eono, a i ka hiku o ka la i hoopau ai Oia i Kana hana, a hoolaa iho la ia la, a hana iho la no hoi i ke kanaka mai ka lepo mai o ka honua; pela no, ka Haku ke Akua e hoolaa ai i ka honua i ka hoomaka ana o ka hiku o na tausani makahiki, a e hoopau pono i ka hoola ana i kanaka, a e hookolokolo i na mea a pau, a e hoolapanai i na mea a pau, koe ka mea Ana i waiho ole ai iloko o Kona mana, i ka wa e sila ai Oia i na mea a pau, i ka hopena o na mea a pau; a o ke kani ana o na pu o na anela ehiku, oia ka hoomakaukau ana, a me ka hoopau ana i Kana hana, i ka hoomaka ana o ka hiku o ke tausani makahiki; ka hoomakaukau ana i ke alanui mamua o Kona hiki ana mai.

13. N.—I ka manawa hea e hooko ia ai na mea i palapala ia iloko o ka mokuna 9 o Hoikeana?H.—E hooko ia ana ia mau mea mahope o ka wehe ia ana o ka hiku o na sila, mamua o ka hiki ana mai o Kristo.

14. N.—Heaha ka mea a kakou e hoomaopopo ai ma o ka buke uuku la i ai ia e Ioane, e like me ia i hai ia iloko o ka mokuna 10 o Hoikeana?H.—E hoomaopopo ana kakou he misiona ia a he lawelawe-paa hoi nana e houluulu i na ohana o ka Iseraela; aia hoi, o keia o Elia, ka mea e hiki mai a e hoihoi mai i na mea a pau e pono ai e like me ia i palapala ia.

15. N.—Heaha ka mea e hoomaopopo ia ma o na hoike elua la iloko o ka mokuna umikumamakahi o Hoikeana?H.—He mau Kaula elua laua e hoala ia mai ana no ka lahui Iudaio ma na la hope, i ka wa o ka hoihoi-hou-ana, a e wanana aku i ka poe Iudaio, mahope o ko lakou houluulu ia ana, a kukulu i ke kulanakauhale o Ierusalema, ma ka aina o ko lakou mau kupuna.