1. Aia hoi, ke olelo aku nei Au ia olua e Kaʻu mau kauwa, e Ezera a me Nokalupa, e hoohamama olua i ko olua mau pepeiao a e hoolohe i ka leo o ka Haku ko olua Akua, Nana ka olelo ola a mana, i oi aku ka oi mamua o ka pahi oi-lua, i ka mahele ana a kaawale i na ami a me ka lolo, i ke kino me ka uhane a me ka uhane; a he Mea Hoomaopopo i na manao a me na iini o ka naau.

2. No ka mea, he oiaio, he oiaio, ke olelo aku nei Au ia olua, ua kahea ia olua e hapai ae i ko olua mau leo, e like la me ka leo o ka pu, e hai i Kuu Euanelio i kekahi hanauna hewa a kekee:

3. No ka mea, aia hoi, ua keokeo ke kihapai a makaukau e ohi ia: a o ka umikumamakahi keia o ka hora, a no ka manawa hope Aʻu e kahea ai i na paahana iloko o Kuu malawaina.

4. A ua lilo Kuu malawaina a pau i mea ino; a aole mea e hana nei i ka pono koe kekahi poe kakaikahi wale no; a he lalau nae lakou ma na mea he nui, mamuli o ka hana a na kahuna wahahee, a ua loaa ia lakou a pau na naau ino.

5. A he oiaio, he oiaio, ke olelo aku nei Au ia olua, o keia Ekalesia Kaʻu i kukulu ai a kahea mailoko mai o ka waonahele:

6. A pela no Au e houluulu ai i Koʻu poe i wae ia mai na kihi eha mai o ka honua, o ka poe a pau e manaoio mai ana Iaʻu a e hoolohe ana i Koʻu leo:

7. He oiaio, he oiaio, ke olelo aku nei Au ia olua, ua keokeo ka mahinaai a makaukau no ka ohi ia ana; no ia mea, e hookomo i ka olua mau pahi-kakiwi, a e ohi me ko olua mana, naau, a ikaika a pau.

8. E oaka ae i ko olua mau waha a e hoopiha ia auanei laua, a e lilo auanei olua e like la me Nepai o ka wa kahiko, ka mea i hele mai Ierusalema aku iloko o ka waonahele;

9. He oiaio, e oaka i ko olua mau waha a mai aua, a e kaumaha auanei olua me na pu-a palaoa maluna o ko olua mau hokua, no ka mea, aia hoi, Owau pu me olua:

10. He oiaio, e oaka i ko olua mua waha a e hoopiha ia laua, i ka i ana—E mihi, e mihi, a e hoomakaukau oukou i ke alanui o ka Haku, a e hana i Kona mau kuamoo a pololei; no ka mea, ua kokoke mai ke aupuni o ka lani;

11. He oiaio, e mihi a e bapetizo ia, kela me keia mea o oukou, no ke kala ia ana o ko oukou mau hala; he oiaio, e bapetizo ia me ka wai, alaila, e hiki mai ka bapetizo ana o ke ahi a me ka Uhane Hemolele.

12. Aia hoi, he oiaio, he oiaio, ke olelo aku nei Au ia olua, o keia Kuu Euanelio, a e hoomanao e loaa ia lakou ka manaoio iloko Oʻu e pono ai, a i ole, aole loa e hiki ia lakou ke hoola ia;

13. A maluna o keia pohaku e kukulu ai Au i Kuu Ekalesia; he oiaio, maluna o keia pohaku i kukulu ia ai olua, a ina e hoomau olua, aole e lanakila mai na ipuka o ka po maluna o olua;

14. A e hoomanao hoi olua i na loina o ka Ekalesia a me na berita a e malama ia mau mea;

15. A o ka mea i loaa ka manaoio e hoopaa olua iloko o Koʻu Ekalesia, ma ke kau ana o na lima, a e kau aku Au i ka haawina o ka Uhane Hemolele maluna o lakou.

16. A o ka Buke a Moramora a me ka Palapala Hemolele, ua haawi ia e Aʻu no ko olua ao ia ana; a ke hoolalelale nei Koʻu Uhane i na mea a pau:

17. No ia mea, e kupaa, e pule mau ana, me ko olua mau ipukukui i hoomakaukau ia a e a ana, a he aila kekahi me olua, i makaukau ai olua i ka hiki ana mai o ke Kane mare:

18. No ka mea, aia hoi, he oiaio, he oiaio, ke olelo aku nei Au ia olua, e hele koke mai ana Au. Pela io no. Amene.