1. Aia hoi, e malama ia kekahi mooolelo mawaena o oukou, a iloko olaila e kapa ia oe he Mea Ike, he Mea Unuhi, he Kaula, he Aposetolo o Iesu Kristo, he Lunakahiko o ka Ekalesia ma o ka makemake la o ke Akua ka Makua, a me ka lokomaikai o kou Haku Iesu Kristo,

2. Mamuli o ka uluhia ia ana e ka Uhane Hemolele e hookumu i kona kahua a e kukulu i ua mea la i ka manaoio hemolele loa,

3. Oia ka Ekalesia i hoonohonoho a kukulu ia iloko o ka makahiki o kou Haku he umikumamawalu haneri me kanakolu, iloko o ka ha o ka malama a ma ke ono o ka la o ka malama i kapa ia o Aperila.

4. No ia mea, e hoolohe oe, oia hoi ka Ekalesia, i kana mau olelo a pau a me na kauoha ana e haawi aku ai ia oe e like me ka loaa ana o ia mau mea ia ia, me ka hele ana me ka hemolele a pau imua Oʻu;

5. No ka mea, e apo aku oukou i kana olelo me ka hoomanawanui a me ka manaoio a pau, me he mea la mai Koʻu waha ponoi aku;

6. No ka mea, ma ka hana ana i keia mau mea aole e lanakila na ipuka o ka po maluna ou; he oiaio, na ka Haku ke Akua e hooauhee i na mana o ka po maimua aku ou, a e hoonaueue i na lani no kou pono, a me ka nani o Kona inoa.

7. No ka mea, penei wahi a ka Haku ke Akua, oia Kaʻu i hoouluhia aku ai e hoonee i ka hana a Ziona me ka mana nui no ka pono, a ua ike Au i kona hooikaika ana a ua lohe Au i kana mau pule.

8. He oiaio, ua ike Au i kona uwe ana no Ziona, a e hana aku no Au i uwe hou ole aku ai ia nona, no ka mea, ua hiki mai kona mau la o ka hauoli ana i ke kala ia ana o kona mau hewa, a i na hoikeana o Kuu mau pomaikai maluna o kana mau hana.

9. No ka mea, aia hoi, e hoopomaikai aku no Au i na mea a pau e hana ana ma Kuu malawaina me kekahi pomaikai nui, a e manaoio lakou i kana mau olelo, ka mea i haawi ia ia ia ma Oʻu nei e ka Uhane Kokua, ka Mea e hoike nei ua kaulia ia o Iesu e na kanaka hewa no na hewa o ko ke ao nei, he oiaio, no ke kala ana i na hewa o ka mea naau mihi.

10. No ia mea, he mea pono Iaʻu e hoolilo ia oia e oe, e Oliva Kaudare, Kuu Aposetolo;

11. He hana lawelawe keia ia oe, a he Lunakahiko oe malalo iho o kona lima, a oia ka mua ia oe, i lilo ai oe i Lunakahiko no keia Ekalesia o Kristo, e hali ana i Koʻu inoa,

12. A o ka mea haiolelo mua o keia Ekalesia i ka Ekalesia, a imua o ko ke ao nei, he oiaio, imua o ka poe Genetile; he oiaio, a penei wahi a ka Haku ke Akua, aia hoi, aia hoi, i ka poe Iudaio no hoi kekahi. Amene.