1. Aole Owau, ka Haku ko oukou Akua, i naukiuki no ko oukou hele ana mai ma keia huakai, oiai nae, he mau kinaunau ko oukou;

2. He nui Koʻu mau waiwai iloko o keia kulanakauhale no oukou, no ka pono o Ziona; a he nui na kanaka maloko o keia kulanakauhale Aʻu e houluulu aku ai i ka wa pono no ka pomaikai o Ziona, mamuli o ka oukou hana ana.

3. Nolaila, he mea pono e hookamaaina oukou me na kanaka o keia kulanakauhale, e like me oukou e alakai ia ai, a e like hoi me ia e haawi ia aku ai ia oukou;

4. A e hiki mai ana keia i ka wa pono, e haawi aku ana Au i keia kulanakauhale iloko o ko oukou mau lima, a e loaa ia oukou ka mana maluna ona, a hiki ole ia lakou ke ike i ko oukou mau aoao huna; a o kona waiwai e pili ana i ke gula a me ke dala no oukou auanei ia.

5. Mai kaumaha oukou no ko oukou mau aie, no ka mea, e haawi no Au i ka mana ia oukou e uku aku ia mau mea.

6. Mai kaumaha oukou no Ziona, no ka mea, e hana lokomaikai aku ana Au ia ia.

7. E kali ma keia wahi, a ma na wahi e pili kokoke mai ana;

8. A o kahi Aʻu i makemake ai ia oukou e kali, oia hoi, no ka hapanui o ka manawa, e kuhikuhi ia aku no ia ia oukou ma o ka maluhia a me ka mana la o Kuu Uhane, e kau aku ana maluna o oukou.

9. Ua hiki ia oukou ke loaa ia wahi ma ka hoolimalima ana, a pela aku. A e ninaninau pauaho ole i na mea e pili ana i na kamaaina kahiko a me ka poe na lakou i hookumu i keia kulanakauhale;

10. No ka mea, ua oi na waiwai mamua o hookahi no oukou ma keia kulanakauhale;

11. Nolaila, e maalea oukou e like me na nahesa me ka hewa ole nae, a e kauoha no Au i na mea a pau no ko oukou pono, e like me ko oukou makaukau e loaa ia mau mea. Amene.