1. E haliu a e hoolohe i ka leo o ka Mea i mau mai ka manawa mau loa a i ka manawa mau loa, ka Mea Nui a Mau Loa, oia hoi, o Iesu Kristo,

2. Ka malamalama a me ke ola o ke ao nei; he malamalama e olino ana iloko o ka pouli, aole nae i hoomaopopo ka pouli ia mea:

3. Ka mea hookahi no i hiki aku i ka waenakonu o ka manawa i Koʻu poe ponoi, aole nae i hookipa Koʻu poe ponoi Iaʻu;

4. Aka, haawi aku la Au i ka poe a pau i hookipa mai Iaʻu i ka mana e lilo i mau keiki Naʻu, a pela no Au e haawi aku ai i ka poe a pau e hookipa mai ana Iaʻu, i ka mana e lilo i mau keiki Naʻu.

5. A he oiaio, he oiaio, ke olelo aku nei Au ia oe, o ka mea e hookipa mai ana i Kuu Euanelio, e hookipa mai ana ia Iaʻu; a o ka mea e hookipa ole ana i Koʻu Euanelio e hookipa ole ana ia Iaʻu.

6. A o keia Koʻu Euanelio: o ka mihi a me ka bapetizo ana me ka wai, alaila e hiki mai ka bapetizo ana o ke ahi a me ka Uhane Hemolele, he oiaio, o ka Uhane Kokua, ka mea e hoike nei i na mea a pau, a ao mai i na mea maluhia o ke aupuni.

7. A ano, aia hoi, ke olelo aku nei Au ia oe, e Kaʻu kauwa, e Iakobo, ua nana aku Au maluna o kau mau hana a ua ike Au ia oe:

8. A he oiaio, ke olelo aku nei Au ia oe, ua pololei kou naau imua Oʻu i keia manawa ano, a, aia hoi, ua hooili aku Au i mau pomaikai nui maluna o kou poo;

9. Oiai nae, ua ike oe i na ehaeha nui, no ka mea, ua hoole mai oe Iaʻu i na manawa he nui no ka haaheo, a no ka manao nui ana i na mea o ko ke ao nei;

10. Aka, aia hoi, ua hiki mai na la o kou hoopakele ia ana, ina e hoolohe mai oe i Koʻu leo, ka Mea e i aku nei ia oe, e ala a e bapetizo ia a e holoi aku i kou mau hewa, e kahea ana ma Koʻu inoa, a e loaa ia oe Koʻu Uhane, a he pomaikai nui loa hoi au i ike ole ai mamua.

11. A ina e hana oe i keia, ua hoomakaukau Au ia oe no kekahi hana i oi aku. E hai oe i ka piha o Kuu Euanelio, ka mea Aʻu i hoouna aku ai i keia mau la hope nei; o ka berita Aʻu i hoouna aku ai i loaa hou mai ai Koʻu poe kanaka, ka poe o ka hale o ko ka Iseraela.

12. A e hiki mai auanei ka wa e kau ka mana maluna ou; a e loaa ia oe ka manaoio nui, a Owau pu me oe a e hele mamua o kou alo.

13. Ua kahea ia oe e hana ma Koʻu malawaina, a e kukulu ae i Kuu Ekalesia, a e lawe mai ia Ziona, i hauoli ai ia maluna o na puu a ulumahiehie.

14. Aia hoi, he oiaio, he oiaio, ke olelo aku nei Au ia oe, aole oe i kahea ia e hele aku i na aina ma ka hikina, aka, ua kahea ia oe e hele i Ohaio.

15. A ina e hoakoakoa Koʻu poe kanaka ia lakou iho ma Ohaio, ua malama Au ma kahi hoahu he pomaikai i ike ole ia mawaena o na keiki a kanaka, a e ninini ia aku auanei ia maluna o ko lakou mau poo. A mai ia wahi aku e hele aku ai na kanaka i na lahuikanaka a pau.

16. Aia hoi, he oiaio, he oiaio, ke olelo aku nei Au ia oe, ke kahea mai nei na kanaka o Ohaio Iaʻu, me ka manaoio nui, e manao ana e kaohi malie ana Au i Koʻu lima i ka hoopai ana maluna o na lahuikanaka, aka, aole e hiki Iaʻu ke hoole i Kaʻu olelo;

17. No ia mea, e hana aku me kou ikaika a kahea i kekahi mau paahana kupaa iloko o Koʻu malawaina, i paipai ia ai ia no ka manawa hope.

18. A ina e mihi lakou a hookipa mai i ka piha o Koʻu Euanelio, a e hoomaemae ia, e kaohi no Au i Koʻu lima i ka hoopai ana:

19. No ia mea, e hele aku me ke kahea ana me ka leo nui, i ka i ana, ua kokoke mai ke aupuni o ka lani; e kahea ana Hosana! Pomaikai ka inoa o ke Akua Kiekie Loa.

20. E hele aku me ka bapetizo ana me ka wai, e hoomakaukau ana i ke alanui imua o Koʻu alo, no ka manawa o Koʻu hiki ana mai;

21. No ka mea, ua kokoke mai ka manawa; o ka la a o ka hora aole kanaka i ike; aka, e hiki io mai ana no ia,

22. A o ka mea e hookipa mai ana i keia mau mea e hookipa mai ana ia Iaʻu; a e houluulu ia auanei lakou i Oʻu nei, no ka manawa a me ka wa mau loa.

23. A eia hou, e hiki mai ana keia e kau i kou mau lima maluna o ka poe a pau au e bapetizo aku ai me ka wai, a e loaa ia lakou ka haawina o ka Uhane Hemolele, a e nana auanei lakou no na hoailona o Koʻu hiki ana mai, a e ike no Iaʻu.

24. Aia hoi, e hiki koke mai no Au. Pela io no. Amene.