1. Aia hoi, penei wahi a ka Haku i Kuu kauwa, ia Ioane Medoka, ua kahea ia oe e hele aku ma na aina ma ka hikina mai ia hale aku ia hale aku, mai ia taona aku ia taona aku, a mai ia kulanakauhale aku ia kulanakauhale aku, e hai i Kuu Euanelio mau loa i na kanaka olaila, mawaena o na hoomaau ia ana a me na hana ino;

2. A o ka poe e hookipa mai ia oe oia ka i hookipa mai Iaʻu, a e loaa ia oe ka mana e hai i Kaʻu olelo ma o ke kuhikuhi ana la a Kuu Uhane Hemolele;

3. A o ka poe e hookipa mai ia oe me he keiki uuku la, e hookipa lakou i Kuu aupuni, a pomaikai no lakou, no ka mea, e loaa ia lakou ke aloha ia mai;

4. A o ka poe e hoole mai ia oe, oia ke hoole ia e Kuu Makua a me ko Kona hale; a e hoomaemae oe i kou mau wawae ma na wahi malu ma ke ala i hoike kue ia lakou.

5. A aia hoi, e nana, e hiki koke mai no Au i ka hookolokolo ana, e hoohuli i ka poe a pau a maopopo lakou i ka lakou mau hana i ku ole i ke ano Akua a lakou i hana kue mai ai Iaʻu, e like me ia i palapala ia Noʻu nei iloko o ka buke.

6. A ano, he oiaio Kaʻu e olelo aku nei ia oe, aole ia he mea pono e hele aku oe a hiki i ka hoolako pono ia ana o kau poe keiki, a hoouna oluolu ia aku i ka Bihopa ma Ziona;

7. A mahope o na makahiki kakaikahi, ina e makemake oe ma Oʻu nei, e hele pu no hoi oe i ka aina maikai e loaa kou hooilina:

8. I ole ia e hoomau oe i ka hai ana i Kuu Euanelio a hiki i kou lawe ia ana. Amene.