1. Aia hoi, e hoolohe, e na Lunakahiko o Koʻu Ekalesia, ka poe i hoakoakoa pu ia oukou iho, ka poe nana na pule Aʻu i lohe ai, a no lakou na naau Aʻu e ike ai, a no lakou na iini i hiki mai imua Oʻu.

2. Aia hoi, e nana, aia Koʻu mau maka maluna o oukou, a eia iloko o Koʻu mau lima na lani a me ka honua, a o na waiwai o ka wa mau loa Naʻu ia e haawi aku.

3. Hooikaika iho la oukou e manaoio e loaa ana ia oukou ka pomaikai i waiho ia aku no oukou; aka, aia hoi, he oiaio, ke olelo aku nei Au ia oukou, aia he mau hopohopo ana iloko o ko oukou mau naau, a he oiaio, o keia ke kumu o ka loaa ole ana ia oukou.

4. A ano, ke haawi aku nei Au, ka Haku, ia oukou i kekahi hoike no ka oiaio o keia mau kauoha e waiho nei imua o oukou;

5. Ua haka pono ko oukou mau maka maluna o Kuu kauwa o Iosepa Kamika, opio, a ua ike oukou i kana olelo, a ua ike oukou i kona mau hemahema; a ua imi oukou iloko o ko oukou mau naau i ka ike i hiki ai ia oukou ke hoakaka a oi aku ka maikai mamua o kana olelo, ua ike no hoi oukou i keia;

6. Ano, e imi oukou mailoko mai o ka Buke o na Kauoha, he oiaio, o ka mea uuku loa mawaena o ia mau mea, a e koho i ka mea i naauao loa mawaena o oukou;

7. A i ole, ina aia kekahi mawaena o oukou, i hiki ke haku aku i kekahi e like me ia, alaila, ua apono ia oukou ma ka olelo ana aole i maopopo ia oukou he oiaio ia mau mea:

8. Aka, ina e hiki ole ia oukou ke haku i kekahi e like me ia, aia oukou malalo o ke ahewa ia ana, ina aole oukou e hoike ana he oiaio ia mau mea;

9. No ka mea, ua ike oukou aole he mea pono ole iloko o ia mau mea, a o ka mea pono ke iho mai nei ia mailuna mai, mai ka Makua mai o na malamalama.

10. A ano, ke olelo aku nei Au ia oukou, o ko oukou kuleana ia, a he olelo hoopomaikai Kaʻu e haawi aku nei ia oukou ka poe i hoolilo ia no keia oihana, a e like me ko oukou hookaawale ana ia oukou iho mai na manao lili a me na hopohopo ana, a hoohaahaa ia oukou iho imua Oʻu, no ka mea, aole i lawa kupono ko oukou haahaa, e nahae auanei ka paku a e ike mai oukou Iaʻu a hoomaopopo lea ke ola nei Au; aole me ka naau o ko ke kino, a i ole, me ka naau maoli, aka, me ko ka uhane;

11. No ka mea, aole he kanaka i ike i ke Akua i kekahi manawa ma ka io, ke ole i hoouluhia ia e ka Uhane o ke Akua;

12. Aole hoi e hiki i kekahi kanaka maoli ke ku imua o ke alo o ke Akua; aole hoi, mamuli o ka naau o ko ke kino;

13. Aole e hiki ia oukou ke ku imua o ke alo o ke Akua i keia wa, aole hoi ka lawelawe ana a na anela; no ia mea, e hoomau ma ka hoomanawanui a hemolele oukou.

14. Mai huli hope ko oukou mau naau, a i ka wa o oukou e kupono ai, ma Koʻu manawa kupono, e ike a e hoomaopopo oukou i ka mea i hooili ia maluna o oukou ma o na lima la o Kuu kauwa o Iosepa Kamika, opio. Amene.