1. Aia hoi, ke olelo aku nei Au ia oe, e Oliva, e haawi ia aku ana ia oe, oia hoi, e hoolohe ia oe e ka Ekalesia ma na mea a pau au e ao aku ai ia lakou ma o ka Uhane Kokua la, e pili ana i na hoikeana a me na kauoha Aʻu i haawi aku ai.

2. Aka, aia hoi, he oiaio, he oiaio, ke olelo aku nei Au ia oe, aole kekahi mea e koho ia e loaa na kauoha a me na hoikeana iloko o keia Ekalesia, koe wale no o Kaʻu kauwa, o Iosepa Kamika, opio, no ka mea, e loaa ana ia mau mea ia ia e like la me Mose;

3. A e hoolohe oe i na mea Aʻu e haawi aku ai ia ia, e like la me Aarona, e hai pololei aku i na kauoha a me na hoikeana, me ka ikaika a me ka mana i ka Ekalesia.

4. A ina e alakai ia oe i kekahi manawa e ka Uhane Kokua e olelo aku a ao paha, a i ole, i na manawa a pau, ma ke ano kauoha i ka Ekalesia, ua hiki ia oe ke hana pela.

5. Aka, mai kakau oe ma ke ano kauoha, aka, ma ka naauao;

6. A mai kauoha aku oe ia ia, ka mea ma kou poo, a ma ke poo hoi o ka Ekalesia,

7. No ka mea, ua haawi aku Au ia ia i na ki o na mea pohihihi a me na hoikeana i sila ia, a hiki i Koʻu koho ana no lakou he mea okoa ae ma kona wahi.

8. A ano, aia hoi, ke olelo aku nei Au ia oe, e hele aku oe i ka poe Lamana a e hai i Kuu Euanelio ia lakou; a ina e hookipa lakou i kau mau ao ana, e kukulu oe i Kuu Ekalesia mawaena o lakou, a e loaa ia oe na hoikeana, aka, mai kakau ia mau mea ma ke ano kauoha.

9. A ano, aia hoi, ke olelo aku nei Au ia oe, aole i hoike ia mai, a aole kekahi kanaka i ike i kahi o ke kulanakauhale o Ziona e kukulu ia aku ai, aka, e haawi ia aku ana ia ma keia hope aku. Aia hoi, ke olelo aku nei Au ia oe e ku auanei ia ma na palena e pili ana i ko Lamana poe.

10. Mai haalele oe i keia wahi a mahope aku o ka huikuka, a e koho ia Kuu kauwa, o Iosepa, e noho Peresidena maluna o ka huikuka ma o ko lakou koho ana la, a o ka mea ana e olelo mai ai ia oe oia kau e hai aku ai.

11. A eia hou, e lawe oe i kou hoahanau, ia Hailama Peki, a mawaena o olua wale no, a e hai aku oe ia ia o kela mau mea ana i kakau ai mai kela pohaku mai, aole ia Naʻu, a ua hoopunipuni ia oia e Satana;

12. No ka mea, aia hoi, o keia mau mea aole i haawi ia ia ia, aole no hoi kekahi mea e haawi ia aku ana i kekahi o keia Ekalesia i kue i na berita o ka Ekalesia.

13. No ka mea, e hana ia na mea a pau me ka pololei e pono ai, a ma o ka ae lokahi ana la o ka Ekalesia, ma o ka pule o ka manaoio.

14. A e kokua oe i ka hooponopono ana i keia mau mea a pau i ku i na berita o ka Ekalesia, mamua o kou hele ana aku mawaena o ka poe Lamana.

15. A e haawi ia aku ana ia ia oe mai ka manawa au e hele aku ai a hiki i kou hoi ana mai, ka mea au e hana ai.

16. A e oaka oe i kou waha i na manawa a pau e pono ai, e hai ana i Kuu Euanelio me ka leo o ka hauoli. Amene.