1. He oiaio Kaʻu e olelo aku nei ia oe, e pili ana no kou mau hoahanau i hoopilikia ia, a hoomaau ia, a hookuke ia aku mai ka aina o ko lakou hooilina aku,

2. Ua ae aku Au, ka Haku, e kau mai ka popilikia maluna o lakou, ka mea a lakou i hoopilikia ia ai, mamuli o ka lakou mau hana hewa ana;

3. Aka nae, Noʻu ponoi ana lakou, a Noʻu auanei lakou i ka la Aʻu e hiki mai ai e hoonohonoho iho ai i Kuu mau momi.

4. Nolaila, e ao ikaika ia lakou e pono ai, a e hoao ia e like me Aberahama, ka mea i kauoha ia e mohai i kana kamakahi;

5. No ka mea, o ka poe a pau e hoomanawanui ole ana i na ao ana me na hoopai, aka, e hoole Iaʻu, aole hiki ke hoomaemae ia.

6. Aia hoi, ke olelo aku nei Au ia oe, aia na kuee ana, na paio ana, na manao lili, na paonioni ana, a me na iini makaleho a kuko hoi mawaena o lakou; nolaila, ma keia mau mea ua hoohaumia lakou i ko lakou mau hooilina.

7. Ua lohi lakou i ka hoolohe ana i ka leo o ka Haku, ko lakou Akua, nolaila ua lohi ka Haku, ko lakou Akua, i ka hoolohe ana i ka lakou mau pule, oia hoi, e hooko ia mau mea i ka la o ko lakou popilikia.

8. I ka la o ko lakou maluhia ua nana ole lakou i Kaʻu olelo-ao; aka, i ka la o ko lakou pilikia, haha mai la lakou Iaʻu, i mea e pono ai.

9. He oiaio Kaʻu e olelo aku nei ia oe, me ka nana ole i ka lakou mau hana hewa, ua piha Koʻu naau i ke aloha no lakou: aole Au e kipaku loa ana ia lakou; a i ka la o ka inaina e hoomanao Au i ke aloha.

10. Ua hoohiki Au, a ua puka aku ka olelo kuahaua ma o kekahi kauoha mua la, Aʻu i haawi aku ai ia oe, e hoohaule iho no Au i ka pahikaua o Kuu inaina no ka pono o Kuu poe kanaka; a e like me Kaʻu i olelo ai, pela no auanei e hiki mai ai ia.

11. E ninini koke ia aku ana Kuu inaina me ke ana ole ia maluna o na lahuikanaka a pau, a o keia Kaʻu e hana ai i ka wa e piha ai ke kiaha o ka lakou mau hana hewa.

12. A ma kela la, o ka poe a pau e loaa ana maluna o na hale-kiai, a i ole, ma kekahi olelo ana, e hoola ia auanei Kuu Iseraela a pau.

13. A o ka poe i hoopuehu ia e hoouluulu ia auanei lakou;

14. A o ka poe a pau i u e hooluolu ia auanei lakou;

15. A o ka poe a pau i haawi i ko lakou mau ola no Kuu inoa e hoolei ia auanei me ka leialii.

16. Nolaila, e hooluolu ia ko oukou mau naau e pili ana no Ziona; no ka mea, aia na mea io a pau ma Koʻu mau lima; e noho malie a e hoomaopopo Owau no ke Akua.

17. Aole e hoonee ia o Ziona mai kona wahi aku, oiai nae, ua hoopuehu ia kana poe keiki;

18. O ka poe e koe iho, a i maemae ma ka naau, e hoi hou mai auanei, a e hiki i ko lakou mau hooilina, o lakou me ka lakou poe keiki, me na mele o ka hauoli mau loa, e kukulu i na wahi neoneo o Ziona;

19. A o keia mau mea a pau i hooko ia ai ka na Kaula.

20. A, aia hoi, aole kekahi wahi e ae i wae ia mawaho ae o kahi Aʻu i wae ai; aole no hoi kekahi wahi e ae e wae ia mawaho ae o kahi Aʻu i wae aku ai, no ka hana o ka houluulu ana i Kuu Poe Hoano,

21. A hiki mai ka la e loaa hou ole ai he wahi kaawale no lakou; a alaila, he mau wahi hou e ae Kaʻu e wae aku ai no lakou, a e kapa ia lakou he mau Mahele-aina, no na paku, a i ole, ka ikaika o Ziona.

22. Aia hoi, o Koʻu makemake ia, o ka poe a pau e hea mai ana ma Koʻu inoa, a hoomana mai Iaʻu e ku i Kuu Euanelio mau loa, e hoakoakoa lakou ma kahi hookahi, a e ku ma na wahi hoano,

23. A e hoomakaukau no ka hoikeana e hiki mai ana, i ka wa e wehe ia ai ka uhi o ka paku o Kuu halelaa, iloko o Kuu luakini, ka mea e huna nei i ka honua, a e ike mai auanei na mea io a pau Iaʻu.

24. A e luku ia auanei kela me keia mea palaho, o ko ke kanaka, a ko na holoholona o ke kula, a ko na manu o ka lewa, a ko na ia o ke kai, a noho ana maluna o ka ili a pau o ka honua;

25. A pela no hoi e hehee auanei ko na mea kumupaa no ka wela enaena; a e lilo ana na mea a pau i mau mea hou, i noho ai Kuu ike a me Kuu nani maluna o ka honua a pau.

26. A i kela la e pau no ke kuee o kanaka, a me ke kuee o na holoholona, he oiaio, o ke kuee o na mea io a pau, imua o Koʻu maka.

27. A i kela la, o kela me keia mea a kekahi kanaka e noi mai ai, e haawi ia aku no ia ia ia.

28. A i kela la, aole e loaa ka mana ia Satana e hoowalewale i kekahi kanaka.

29. A aole he kaumaha ana, no ka mea, aole he make ana.

30. I kela la, aole e make kekahi keiki liilii a hiki i kona elemakule ana, a e like kona ola ana me na makahiki o ko ke kumulaau,

31. A i kona wa e make ai, aole oia e moe, (oia hoi, iloko o ka honua,) aka, e hoololi auanei ia iloko o ka imo ana la a ka maka, a e kaili ia ae iluna, a e nani auanei kona hoomaha ana.

32. Ae, he oiaio Kaʻu e olelo aku nei ia oukou, i kela la a ka Haku e hiki mai ai, e hoike mai Oia i na mea a pau—

33. Na mea i hala a me na mea i huna ia a ke kanaka i maopopo ole ai—na mea o ka honua ma o ia mau mea la i hana ia ai ia, a me na kumu a me ka hopena ona—

34. Na mea makamae loa—na mea oluna, a me na mea malalo iho—na mea maloko o ka honua, a maluna o ka honua, a iloko o ka lani.

35. A o ka poe a pau i ehaeha i ka hoomaau ia no Kuu inoa, a kupaa iloko o ka manaoio, oiai, ua kahea ia lakou e waiho aku i ko lakou mau ola Noʻu nei, eia nae, e loaa auanei ia lakou keia nani a pau.

36. No ia mea, mai makau i ka make; no ka mea, ma keia ao aole piha pono ko oukou hauoli, aka, iloko Oʻu e piha no ko oukou hauoli.

37. Nolaila, mai manao nui no ke kino, aole hoi no ke ola o ke kino; aka, e manao nui no ka uhane me ke kino, a no ke ola hoi o ka uhane me ke kino;

38. A e imi mau i ke alo o ka Haku, i paa ai oukou i ko oukou mau uhane ma ka hoomanawanui, a e loaa ia oukou ke ola mau loa.

39. I ka wa o na kanaka i kahea ia ai i Kuu Euanelio mau loa, a e berita me kekahi berita mau loa, ua helu ia lakou me he paakai la o ka honua, a me ka liu o kanaka;

40. Ua kahea ia lakou e lilo i mea e liu ai na kanaka. Nolaila, ina e pau ka liu o kela paakai o ka honua, aia hoi, he waiwai ole ia ma ia hope aku, koe wale no e kiloi wale ia aku iwaho, a e hehi ia malalo o na wawae o kanaka.

41. Aia hoi, eia ka naauao e pili ana i na keiki o Ziona, he oiaio, he nui wale, aka, aole pau loa; ua loaa aku lakou he poe hana hewa, nolaila, e aa ia a hoopai ia e pono ai.

42. O ka mea e hookiekie ia ia iho e hoohaahaa ia auanei oia, a o ka mea e hoohaahaa ana ia ia iho e hookiekie ia auanei oia.

43. A, ano, e hoike aku no Au ia oukou i kekahi olelonane, i ike ai oukou i Koʻu makemake e pili ana i ka hoolapanai ia ana o Ziona.

44. He apana aina ko kekahi keiki-alii, he aina maikai loa, a olelo aku la oia i kana poe kauwa, e hele aku oukou ma Kuu malawaina, he oiaio, maluna o keia apana aina maikai loa, a kanu i mau kumu-laau oliva he umikumamalua,

45. A hoonoho i poe kiai a puni lakou, a e kukulu i hale-kiai, i hiki ai i kekahi ke nana aku ma ka aina apuni, i mea kiai maluna o ka hale-kiai, i haihai ole ia ai kuu mau kumulaau oliva, i ka wa a ka enemi e hele mai ai e hoopoino a e lawe aku i ka hua o kuu malawaina na lakou iho.

46. Ano, hele aku la na kauwa a ua keiki-alii la a hana aku la e like me ka ko lakou haku i kauoha mai ai ia lakou; a kanu iho la i na kumulaau oliva, a kukulu i pa apuni, a hoonoho i poe-kiai, a hoomaka e kukulu i ka hale-kiai.

47. A ia lakou e hoonoho ana i ke kahua, hoomaka iho la lakou e olelo mawaena o lakou, A heaha la ka waiwai o keia hale-kiai i kuu haku?

48. A kukakuka iho la lakou no kekahi wa loihi, me ka i ana mawaena o lakou iho, Heaha la ka waiwai o keia hale-kiai i kuu haku, me ka ike iho he wa maluhia keia?

49. Aole anei e hiki ke haawi ia aku keia dala i ka poe ho-aie dala? No ka mea, aole he waiwai keia mau mea!

50. A oiai lakou e kuee ana kekahi me kekahi, lilo lakou i poe molowa loa a hoolohe ole i na kauoha a ko lakou haku,

51. A hiki mai la ka enemi i ka po, a wawahi iho la i ka pa, a ala ae la na kauwa a ke keiki-alii a ua makau, a holo aku la; a hoohiolo iho la ka enemi i ka lakou mau hana, a haihai iho la na kumulaau oliva.

52. Ano, aia hoi, kahea ae la ke keiki-alii, ka haku hoi o ka pa-waina, i kana mau kauwa, a olelo aku la ia lakou, Auwe! Heaha ke kumu o keia poino nui?

53. Aole anei he pono ia oukou ke hana aku e like me kaʻu i kauoha aku ai ia oukou? A—mahope o ko oukou kanu ana i ka malawaina, a kukulu i ka pa apuni, a hoonoho i ka poe-kiai maluna o na pa ona,—kukulu hoi i ka halekiai, a hoonoho i mea kiai maluna o ka hale-kiai, a kiai i kuu malawaina, aole hoi hiamoe, o komo auanei ka enemi maluna o oukou?

54. A aia hoi, ua hiki i ka mea kiai maluna o ka hale-kiai ke ike i ka enemi oiai oia ma kahi mamao, a alaila, hiki ia oukou ke hoomakaukau e pale aku i ka enemi mai ka hoohiolo ana i ka pa, a hoopakele i kuu malawaina mai na lima mai o ka mea hoopoino.

55. A olelo aku la ka haku o ka malawaina i kekahi o kana mau kauwa, E hele a hoakoakoa mai i ke koena o kuu poe kauwa, a e lawe aku i ka ikaika a pau o kuu hale, oia hoi, kuu poe pukaua, kuu poe kanaka opio, a me ka poe aoo no hoi mawaena o kuu poe kauwa a pau, o lakou no ka ikaika o kuu hale, koe wale no ka poe aʻu i wae ai e kakali;

56. A e hele pololei aku oukou i ka aina o kuu malawaina, a e hoopakele i kuu malawaina, no ka mea, noʻu ia, ua kuai au ia me ke dala.

57. Nolaila, e hele pololei oukou i kuu aina; e wawahi iho i na pa o kuu mau enemi; e hoohiolo i ko lakou hale-kiai, a e hoopuehu i ko lakou poe kiai:

58. A ina lakou e hoakoakoa ana a kue mai ia oukou, e hoopai oukou i kuu mau enemi noʻu nei, i hele aku ai au mahope aku me ke koena o kuu hale, a noho iho ma ka aina.

59. A olelo aku la ke kauwa i kona haku, I ka wa hea auanei keia mau mea?

60. A olelo aku la oia i kana kauwa, I ka wa aʻu e makemake ai, e hele pololei aku oukou, a e hana aku i na mea a pau aʻu i kauoha aku ai ia oukou;

61. A o keia auanei kaʻu sila a me ka hoopomaikai ana maluna ou—he kahu malama waiwai kupaa a naauao mawaena o kuu hale, a he mea hoomalu iloko o kuu aupuni.

62. A hele pololei aku la kana kauwa, a hana aku la i na mea a pau a kona haku i kauoha ai ia ia, a mahope o na la he nui ua hooko ia na mea a pau.

63. Eia hou, he oiaio Kaʻu e olelo aku nei ia oukou, e hoike no Au ia oukou i ka naauao iloko Oʻu e pili ana i na apana a pau o ka Ekalesia, ke ae mai lakou e alakai ia ma ka aoao pololei a kupono no ko lakou hoola ia ana,

64. I mau ai ka hana o ka houluulu pu ana o Kuu Poe Hoano, i kukulu ai Au ia lakou ma Koʻu inoa maluna o na wahi hoano; no ka mea, ua hiki mai ka wa o ka ohi ana, a e hooko ia Kaʻu olelo e pono ai.

65. Nolaila, e houluulu pu no Au i Kuu poe kanaka e pono ai, e like me ka olelonane o ka palaoa a me ke kikania, i paa ai ka palaoa iloko o na hale-papaa i loaa ai ke ola mau loa, a e hoolei ia me ka nani celestiela i ka wa Aʻu e hele mai ai iloko o ke aupuni o Kuu Makua, e uku i kela a me keia kanaka e like me kana hana ana,

66. Oiai e nakii ia na kikania iloko o na pu-a, a e hana ia ko lakou mau kaula a paa, i puhi ia ai lakou me ke ahi pio ole.

67. Nolaila, he kauoha Kaʻu e haawi aku nei i na apana a pau o ka Ekalesia, e hoomau aku lakou i ka hoakoakoa pu ana mai ma na wahi Aʻu i wae ai;

68. Aka nae, e like me Kaʻu i olelo ai ia oukou ma kekahi kauoha mamua, mai wikiwiki ka oukou houluulu ana, aole no hoi ma ka holo awiwi; aka, e hoomakaukau ia na mea a pau imua o oukou:

69. A i mea e hoomakaukau ia ai na mea a pau imua o oukou, e malama oukou i na kauoha Aʻu i haawi aku ai ia oukou e pili ana i keia mau mea,

70. Ka mea e olelo ana, a i ole, e ao ana, e kuai i na aina a pau me ke dala, ka aina i hiki ke kuai ia me ke dala, ma na wahi e pili kokoke mai ana i ka aina Aʻu i wae ai e lilo i aina o Ziona, no ka hoomaka ana o ka houluulu ana o Kuu Poe Hoano;

71. O ka aina a pau e hiki ke kuai ia ma ke kalana o Iakekona, a me na kalana e pili kokoke mai ana, a e waiho iho i ke koena iloko o Kuu lima.

72. Ano, he oiaio Kaʻu e olelo aku nei ia oukou, e houluulu na apana a pau o ka Ekalesia i ka lakou mau dala a pau; e hana ia keia mau mea ma ko lakou wa, mai awiwi, a e nana e hoomakaukau ia na mea a pau imua o oukou.

73. A e koho ia na kanaka hoopono, oia hoi, na kanaka naauao, a e hoouna ia lakou e kuai i keia mau aina;

74. I ka wa e kukulu ia ae ai kela a me keia apana o ka Ekalesia ma na aina o ka hikina, ina e hoolohe mai lakou i keia olelo-ao, e kuai no lakou i mau aina a houluulu maluna o lakou, a ma keia ano e kukulu ai lakou ia Ziona.

75. Aia i keia wa ano i lawa i hoahu ia, ae, he oiaio, ua lawa loa e uku panai ia Ziona, a e kukulu i kona mau wahi oneanea, aole e hoohiolo hou ia, ina e ae mai na apana o ka Ekalesia, ka poe e kapa nei ia lakou iho ma Koʻu inoa, e hoolohe mai i Koʻu leo.

76. A eia hou Kaʻu e olelo aku nei ia oukou, o ka poe i hoopuehu ia e ko lakou mau enemi, o Kuu makemake ia e hoomau lakou i ke noi ikaika no ka hooponopono ana i na pilikia, a me ka uku panai ana, ma na lima o ka poe i hoonohonoho ia i poe hoomalu, a e noho mana ana maluna o oukou,

77. E like me na kanawai a me ke kumukanawai o na kanaka Aʻu i ae aku ai e kukulu ia, a e hookupaa ia no na pono a me ka palekana o na io a pau, e ku i na kumupaa pono a hemolele,

78. I hana ai kela me keia kanaka ma ke kauoha a me ke kumupaa e pili ana i ka wa e hiki mai ana, mamuli o ka mana e koho ai i ka pono a me ka hewa Aʻu i haawi aku ai ia lakou, i hookolokolo ia ai kela me keia kanaka no kona hewa iho ma ka la hookolokolo.

79. Nolaila, aole pono i kekahi kanaka e noho kuapaa aku na kekahi.

80. A no keia kumu Au i hookumu ai i ke kumukanawai o keia aina, ma o na lima la o na kanaka naauao Aʻu i hoala mai ai no keia hana no, a hoolapanai i ka aina ma ka hookahe ia ana o ke koko.

81. Ano, me ke aha la Au e hoohalike ai i na keiki o Ziona? E hoohalike Au ia lakou me ka olelonane o ka wahine a me ka lunakanawai paewaewa (no ka mea, e pono na kanaka e pule mau a aole e maule) ka mea e olelo ana,

82. Aia ma kekahi kulanakauhale he lunakanawai i makau ole i ke Akua, aole no hoi i nana i kanaka.

83. A aia kekahi wahinekanemake ma ia kulanakauhale, a hele mai la ia i ona la, i ka i ana, E hoopai aku i kuu enemi noʻu.

84. A aole oia i hana aku no kekahi wa, aka, mahope aku olelo iho la oia iloko ona iho, Oiai aole Oʻu makau i ke Akua, aole hoi e nana i kanaka, aka, mamuli nae o ka hoouluhua a keia wahinekanemake iaʻu, e hoopai aku au nona, malia paha, e hooluhi mai oia iaʻu mamuli o kona hele mau ana mai.

85. Pela Au e hoohalike ai i na keiki o Ziona.

86. E noi ikaika lakou ma na wawae o ka Lunakanawai;

87. A ina e hoolohe ole mai oia ia lakou, e noi ikaika aku lakou ma na wawae o ke Kiaaina;

88. A ina e hoolohe ole mai ke Kiaaina, e noi ikaika aku lakou ma na wawae o ka Peresidena;

89. A ina e hoolohe ole mai ka Peresidena, alaila, e ala mai no ka Haku a e puka mai mai kona wahi i pee ai, a ma Kona inaina nui e hoopai Oia i ka lahuikanaka,

90. A iloko o Kona huhu wela, a iloko o Kona inaina weliweli, ma Kona wa, e oki aku i na kahu malama waiwai hana hewa, kupaa ole a paewaewa, a e koho aku i ko lakou mahele mawaena o ka poe hookamani, a hoomaloka;

91. He oiaio, iloko o ka pouli mawaho, i laila ka uwe ana, a me ke kumakena ana, a me ka uwi ana o na niho.

92. Nolaila, e pule oukou, i hoohamama ia ai ko lakou mau pepeiao no ka oukou mau uwe ana, ilokomaikai ai Au ia lakou, i hiki ole mai ai keia mau mea maluna o lakou.

93. O Kaʻu i olelo ai ia oukou, e hooko ia e pono ai, i waiho ia ai na kanaka a pau me ke kumu ole e pakele ai;

94. I lohe a hoomaopopo ai na kanaka naauao a me na luna hoomalu i ka mea a lakou i noonoo ole ai;

95. I hoomaka ai Au e hooko i Kaʻu hana, Kaʻu hana kamahao, a lawelawe i Kaʻu hana, i Kaʻu hana kamahao, i hoomaopopo ai na kanaka i ka poe pono a i ka poe hewa, wahi a ko oukou Akua.

96. A eia hou, ke olelo aku nei Au ia oukou, he kue ia i Kuu kauoha a me Kuu makemake, e kuai aku Kuu kauwa o Sidane Gilibati i Kuu hale-hoahu Aʻu i koho ai no Kuu poe kanaka, iloko o na lima o Kuu poe enemi.

97. Mai ae aku i ka mea Aʻu i koho ai e hoohaumia ia e Kuu poe enemi, ma ka ae ana o ka poe e kapa nei ia lakou iho ma Koʻu inoa;

98. No ka mea, o keia kekahi hewa nui a eha loa Iaʻu nei a i Koʻu poe kanaka, mamuli o kela mau mea Aʻu i hooholo ai, a e haule koke iho ana maluna o na lahuikanaka.

99. Nolaila, o Koʻu makemake ia e koi aku Koʻu poe kanaka, a e paa i ke kuleana maluna o ka mea Aʻu i koho ai no lakou, oiai nae, aole lakou i ae ia e noho maluna olaila;

100. Aka nae, aole Au e i ana aole lakou e noho maluna olaila; no ka mea, ina lakou e lawe mai i ka hua a me na hana kupono no Kuu aupuni, e noho no lakou maluna olaila;

101. E kukulu auanei lakou, a aole ia e ili aku ia hai, e kanu lakou i na malawaina, a e ai no lakou i kona hua. Pela io no. Amene.