1. He hana nui a kupaianaha i aneane e puka mai i na keiki a kanaka.

2. Aia hoi, Owau no ke Akua, a e hoolohe mai i Kaʻu olelo, ka mea ola a mana, i oi aku ka oi i ko ka pahikaua oi-lua, i ka mahele ana a kaawale na ami a me ka lolo; nolaila, e hoolohe mai i Kaʻu olelo.

3. Aia hoi, ua keokeo ka mahinaai, a makaukau e ohi ia, nolaila, o ka mea i makemake e ohi, e hookomo aku i kana pahi-kakiwi me kona ikaika, a ohi oi kau ka la, i hoahu ai oia i ke ola mau loa no kona uhane iloko o ke aupuni o ke Akua;

4. He oiaio, o ka mea e hookomo i kana pahi-kakiwi a ohi, oia ka i kahea ia e ke Akua;

5. Nolaila, ina e noi mai oe Iaʻu e loaa aku no ia oe, ina e kikeke oe e wehe ia no ia ia oe.

6. E imi e hoopuka mai a e kukulu i Kuu Ziona. E malama i Kaʻu mau kauoha ma na mea a pau;

7. A, ina e malama oe i Kaʻu mau kauoha a hoomanawanui a hiki i ka hopena, e loaa no ia oe ke ola mau loa, oia hoi, ka haawina i oi loa ae mamua o na haawina e ae a pau o ke Akua.

8. A eia kekahi, ina e nonoi aku oe i ka Makua ma Koʻu inoa, me ka manaoio paulele, e loaa ia oe ka Uhane Hemolele, ka mea e haawi ana i ka olelo, i ku ai oe i hoike no na mea au e lohe ai a e ike ai, a i hai aku ai no hoi oe i ka mihi i keia hanauna.

9. Aia hoi, Owau no o Iesu Kristo, ke Keiki a ke Akua ola, ka mea Nana i hana i ka lani a me ka honua; ka malamalama hiki ole ke huna ia iloko o ka pouli;

10. No ia mea, e hoopuka aku no Au i ka piha o Kuu Euanelio mai ka poe Genetile aku a i ko ka hale o Iseraela e pono ai.

11. A aia hoi, o oe no o Davida, a ua kahea ia oe e kokua; a ina e hana oe i keia mea, a kupaa, e hoopomaikai pu ia oe ma ko ka uhane a me ko ke kino, a e nui auanei kou uku. Amene.