1. Aia hoi, ke olelo aku nei Au ia oukou, e paulele oukou maluna o Kaʻu olelo e pono ai, a ina e hana oukou pela, me ka naau a pau, e loaa ia oukou ka ikemaka ana i na papa, a me ka paleumauma hoi, ka pahikaua a Labana, ka Urima a me ka Tumima, na mea i haawi ia aku i ke kaikaina o Iareda maluna o ka mauna, ia ia i kamailio pu ai me ka Haku he alo no he alo, a me na kuhikuhi kupaianaha i haawi ia ia Lehi, oiai oia ma ka waonahele, ma na kapa o ke Kai Ula;

2. A mamuli o ko oukou manaoio e loaa ai ia oukou ka ike maka ana ia mau mea, he oiaio, ma o kela manaoio la i loaa ai i na Kaula o ka wa kahiko.

3. A mahope iho o ka loaa ana ia oukou o ka manaoio, a ike ia mau mea me ko oukou mau maka, e hooiaio aku oukou no ia mau mea ma o ka mana la o ke Akua;

4. A o keia ka oukou e hana ai, i pepehi ole ia ai Kuu kauwa o Iosepa Kamika, opio, i hiki ai Iaʻu ke lawe mai i Koʻu mau manao pono i na keiki a kanaka ma keia hana.

5. A e hoike aku oukou ua ike oukou ia mau mea, he oiaio, e like me ka Kuu kauwa o Iosepa Kamika, opio, i ike ai ia mau mea, no ka mea, mamuli o Koʻu mana i ike ai ia ia mau mea, a no ke kumu ua loaa ka manaoio ia ia;

6. A ua unuhi oia i ka buke, he oiaio, o kela hapa Aʻu i kauoha aku ai ia ia, a e like me ke ola ana o ko oukou Haku a me ko oukou Akua, he oiaio no ia.

7. Nolaila, ua loaa ia oukou ia mana hookahi, a me ia manaoio hookahi, a me ka haawina hookahi e like me kona;

8. A ina a hooko oukou i keia mau kauoha hope Aʻu i haawi aku ai ia oukou, aole e lanakila na ipuka o ka po maluna o oukou; no ka mea, ua lawa Koʻu aloha no oukou, a e hookiekie ia ae oukou ma ka la mahope.

9. A Owau, o Iesu Kristo, ko oukou Haku a me ko oukou Akua, ka i olelo aku ia mea ia oukou, i hiki ai Iaʻu ke lawe mai i Koʻu mau manao pono i na keiki a kanaka. Amene.