1. Penei wahi a ka Haku ke Akua, ka Mea Mana o Iseraela, Aia hoi, ke olelo aku nei Au ia oe, e Kuu kauwa, e Eluene, ua pomaikai oe, a ua kala ia kou mau hewa, a ua kahea ia oe e hai i Kuu Euanelio e like la me ka leo o ka pu;

2. A e kau no Au i Koʻu lima maluna ou ma o ka lima la o Kuu kauwa o Sidane Rigedona, a e loaa ia oe Kuu Uhane, ka Uhane Hemolele, oia hoi, ka Uhane Kokua, ka Mea Nana e ao ia oe i na mea ku i ka maluhia o ke aupuni;

3. A e hai oe ia mea me ka leo nui, e i ana, Hosana, pomaikai ka inoa o ke Akua Kiekie Loa.

4. A ano, o keia kahea ana a me keia kauoha Kaʻu e haawi aku nei ia oe e pili ana i na kanaka a pau,

5. O ka poe a pau e hele mai ana imua o Kuu mau kauwa o Sidane Rigedona a me Iosepa Kamika, opio, e apo ana i keia kahea ana a me keia kauoha, e hoolilo ia lakou a e hoouna ia e hai i ka Euanelio mau loa mawaena o na lahuikanaka,

6. E hea ana i ka mihi, e i ana, E hoopakele ia oukou iho mai keia hanauna hookuli mai, a e hele mailoko mai o ke ahi, e hoowahawaha ana i na aahu i kikohukohu me ko ka io.

7. A e haawi ia keia kauoha i na Lunakahiko o Koʻu Ekalesia, a o kela a me keia kanaka e apo mai ana ia mea me ka naau kaukahi, ua hiki ke hoolilo ia a hoouna ia aku, e like me Kaʻu i olelo ai.

8. Owau no o Iesu Kristo ke Keiki a ke Akua: no ia mea, e kaei i kou mau puhaka a e hiki emo ole aku Au i Koʻu halelaa. Pela io no. Amene.