1. He oiaio Kaʻu e olelo aku nei ia oukou ka poe i hoakoakoa pu ia oukou iho i maopopo ai ia oukou Koʻu makemake e pili ana no ka hoopakele ana i Kuu poe kanaka iloko o ka popilikia:

2. Aia hoi, ke olelo aku nei Au ia oukou, ina aole ka hana hewa ana a Kuu poe kanaka, he olelo keia i pili i ka Ekalesia, aole i ke kanaka hookahi, ina ua hoolapanai ia lakou i keia manawa;

3. Aka, aia hoi, aole lakou i hoomaopopo e hoolohe i na mea Aʻu i koi ai ma ko lakou mau lima, aka, ua piha i na mea ino o kela me keia ano, aole hoi i haawi manawalea aku i kekahi o ko lakou mau mea i loaa ai i ka poe ilihune a me ka poe mai mawaena o lakou, i ku i ke ano o ka Poe Hoano,

4. A aole no hoi lakou i lokahi e like me ka lokahi i koi ia ma ke kanawai o ke aupuni celesetiela;

5. A aole hiki o Ziona ke kukulu ia koe wale no ma na kumupaa o ke kanawai o ke aupuni celesetiela, ke ole ia, aole hiki Iaʻu ke hookipa mai ia ia Ioʻu nei;

6. E hoopai ia Koʻu poe kanaka e pono ai a ao lakou i ka hoolohe, ina he mea pono ia ma na mea a lakou i ehaeha ai.

7. Aole Au e olelo nei no ka poe i koho ia e alakai i Kuu poe kanaka, na Lunakahiko mua hoi o Kuu Ekalesia, no ka mea, aole lakou a pau malalo o keia ahewa ana;

8. Aka, ke olelo nei Au e pili ana no na apana o Kuu Ekalesia ma na wahi mamao—aia no kekahi poe he nui wale e olelo mai ana, Aia ihea ko lakou Akua? Aia hoi, e hoopakele no Ia ia lakou i ka wa o ka pilikia, ke ole ia, aole makou e pii ana i Ziona, a e aua ana makou i ka makou mau kala.

9. Nolaila, mamuli o ka hana hewa o Kuu poe kanaka, he mea pono ia iloko Oʻu e kali Kuu mau Lunakahiko no kekahi wa pokole no ka hoopakele ia ana o Ziona,

10. I hoomakaukau ia ai lakou iho, i oi ae ai ka nui a me ka maikai o ke aʻo ia ana o Kuu poe kanaka, a e loaa ka ike ma ka hana ana, a e oi ae ka hoomaopopo pono ana i ka lakou hana, a me na mea Aʻu i koi ai ma ko lakou mau lima.

11. A aole e hiki ke hooko ia keia a hiki i ka haawi ia ana i Kuu mau Lunakahiko ka mana mailuna mai;

12. No ka mea, aia hoi, ua hoomakaukau Au i haawina-laa a i pomaikai hoi e ninini ia aku maluna o lakou, ke kupaa lakou a hoomau ma ka haahaa imua Oʻu;

13. Nolaila, he mea pono Noʻu e kali Kuu mau Lunakahiko no kekahi wa pokole no ka hoopakele ia ana o Ziona;

14. No ka mea, aia hoi, aole Au i makemake ma ko lakou mau lima e kaua aku i na kaua o Ziona; no ka mea, e like me Kaʻu i olelo ai ma kekahi kauoha mamua, pela io no Au e hooko ai. E kaua no Au i ka oukou mau kaua.

15. Aia hoi, ua hoouna aku Au i ka mea-luku e luku a e anai i Kuu mau enemi; a aole nui na makahiki mai keia wa aku e koe koena ole lakou e hoohaumia i Kuu hooilina, a e hailiili i Kuu inoa maluna o na aina Aʻu i hoolaa ai no ka houluulu ana i Kuu Poe Hoano.

16. Aia hoi, ua kauoha aku Au i Kuu kauwa ia Iosepa Kamika, opio, e hai aku i ka ikaika o Kuu hale, oia hoi, i Kuu poe pukaua, Kuu poe ui a me na poe aoo, e houluulu i kahi hookahi no ka hoola ana i Kuu poe kanaka, a e hoohiolo i na hale-kiai o Kuu mau enemi, a e hoopuehu i ko lakou poe-kiai;

17. Aka, aole hoolohe mai ka ikaika o Kuu hale i Kaʻu mau olelo;

18. Aka, oiai, aia no kekahi poe i hoolohe mai i Kaʻu mau olelo, ua hoomakaukau Au i pomaikai a me kekahi pomaikai-laa hoi no lakou, ke hoomau lakou ma ke kupaa.

19. Ua lohe Au i ka lakou mau pule, a e apono Au i ka lakou mohai; a he pono ia Iaʻu ke hana ia lakou pela i hoao ia ai ko lakou manaoio.

20. A ano, he oiaio Kaʻu e olelo aku nei ia oukou, he kauoha Kaʻu e haawi aku nei ia oukou, e like me ka nui o ka poe i hiki mai la ia nei, a e hiki ke noho ma na wahi e pili kokoke mai ana, e noho no lakou;

21. A o ka poe e hiki ole ke noho, ka poe hoi i loaa na ohana ma ka hikina, e kali iki lakou no kekahi wa pokole, e like me ka Kuu kauwa, o Iosepa, e koho ai no lakou;

22. No ka mea, e ao no Au ia ia e pili ana no keia mea, a o na mea a pau ana e koho ai no lakou e hooko ia no ia.

23. A e hooikaika a e kupaa loa Kuu poe kanaka a pau e noho nei ma na wahi e kokoke mai ana, a e pule, a e hoohaahaa imua Oʻu, a aole e hoike aku i na mea Aʻu i hoike aku ai ia lakou, a hiki i ka wa kupono iloko Oʻu e hoike ia aku ai ia mau mea.

24. Mai kamailio no ka hoopai ana, aole hoi e kaena no ka manaoio, aole hoi no na hana mana, aka, e houluulu akahele ma kahi hookahi e like me ka hiki, i ku nae i ka makemake o na kanaka;

25. A aia hoi, e haawi aku no Au ia oukou i ka lokomaikai a me ke aloha ia mai imua o ko lakou mau maka, i noho ai oukou iloko o ka maluhia a me ka palekana, oiai oukou e olelo ana i na kanaka, E hooko i ka hoopai a me ke kaulike no makou i ku i ke kanawai, a e hooponopono mai i na hana hewa ia ana o makou.

26. Ano, aia hoi, ke olelo aku nei Au ia oukou, e Kuu poe hoaloha, ma keia ano e loaa ai ia oukou ka oluolu ia imua o na maka o na kanaka, a hiki i ka nui loa ana o ka puali kaua o Iseraela;

27. A e hoopalupalu aku Au i na naau o na kanaka, e like me Aʻu i hana ai i ka naau o Parao, ia wa aku ia wa aku, a hiki i ka wa o Kuu kauwa, o Iosepa Kamika, opio, a me Kuu mau Lunakahiko, Aʻu i wae ai, e loaa ai he manawa e hoakoakoa ai i ka ikaika o Kuu hale,

28. A e hoouna aku i kekahi mau kanaka naauao, e hooko i na mea Aʻu i kauoha ai e pili ana no ke kuai ana i na aina a pau ma ke kalana o Iakekona i hiki ke kuai ia, a me na kalana e pili kokoke mai ana;

29. No ka mea, o Koʻu makemake ia e kuai ia keia mau aina, a mahope o ko lakou kuai ia ana, e loaa aku no ia i Kuu Poe Hoano e like me ke kanawai o ka hoolaa ana Aʻu i haawi aku ai;

30. A mahope o ke kuai ia ana o keia poe aina, aole Au e hoahewa i na puali kaua o ka Iseraela no ka lawe ana i ko lakou mau aina ponoi, a lakou hoi i kuai mua ai me ka lakou mau kala, a no ka hoohiolo ana i na hale-kiai o Kuu mau enemi e ku ana maluna olaila, a no ka hoopuehu ana i ko lakou poe kiai, a no ka hoopai ana i Kuu mau enemi Noʻu a hiki aku i ke kuakahi a me ke kualua o ka poe e inaina mai ana Iaʻu.

31. Aka, o ka mua, e mahuahua Kuu puali kaua a nui loa, a e hoomaemae ia ia imua Oʻu, i nani ai ia e like me ka la, a aiai hoi e like me ka mahina, a e lilo kona mau hae i mea weliweli i na lahuikanaka a pau;

32. I koi ia ai na aupuni o keia ao e ae aku o ke aupuni o Ziona oia io no ke aupuni o ke Akua a me Kona Kristo; nolaila, e lilo kakou i poe malalo iho o Kona mau kanawai.

33. He oiaio Kaʻu e olelo aku nei ia oukou, he mea pono ia Iaʻu ke loaa aku i na Lunakahiko mua o Kuu Ekalesia ko lakou pomaikai-laa mailuna mai iloko o Kuu hale, Aʻu i kauoha ai e kukulu ia ma Kuu inoa ma ka aina o Ketalana.

34. A e lawelawe ia a hooko ia kela mau kauoha Aʻu i haawi aku ai e pili ana no Ziona a me kona kanawai, mahope iho o kona hoolapanai ia ana.

35. Aia no he la o ke kahea ana mamua, aka, ua hiki mai ka wa no kekahi la no ke koho ana, a e koho ia ka poe i kupono;

36. A e hoike ia aku no ia i Kuu kauwa, ma ka leo o ka Uhane, ka poe i koho ia, a e hoomaemae ia lakou;

37. A ina e hahai lakou i ka olelo-ao i loaa ia lakou, e loaa auanei ia lakou ka mana, mahope o na la he nui, e hooko i na mea a pau e pili ana no Ziona.

38. A eia hou, ke olelo aku nei Au ia oukou, e imi i ka maluhia, aole wale mawaena o ka poe i hahau mai ia oukou, aka mawaena hoi o na kanaka a pau;

39. A e hapai i ka hae o ka maluhia, a e kukala aku i ka maluhia a hiki aku i na welelau o ka honua;

40. E hoike aku i ka makemake no ka maluhia i ka poe i hahau mai ia oukou, e like me ka leo o ka Uhane iloko o oukou, a e hana pu auanei na mea a pau no ko oukou pono;

41. Nolaila e kupaa, a aia hoi, e nana, Owau no me oukou a hiki aku i ka hopena. Pela io no. Amene.