1. E hoolohe mai oukou e na Lunakahiko o Kuu Ekalesia, wahi a ka Haku ko oukou Akua, ka poe i hoakoakoa pu ae ia oukou iho e like me Kaʻu mau kauoha, ma keia aina, oia hoi, ka aina o Misouri, ka aina hoi ia Aʻu i koho ai a i hoolaa ai no ka houluulu ia ana o ka Poe Hoano:

2. No ia mea, o keia ka aina i olelo mua ia, a me kahi o ke kulanakauhale o Ziona.

3. A penei wahi a ka Haku ko oukou Akua, ina e apo mai oukou i ka naauao, eia ka naauao. Aia hoi, o kahi e kapa ia nei o Kuokoa [Independence], oia ke kikowaena, a o kahi o ka halelaa aia ke waiho la ma ke komohana aku maluna o kekahi apana aina i mamao ole mai ka hale-hookolokolo aku;

4. No ia mea, he hana naauao ke kuai ia ka aina e ka Poe Hoano; a pela no hoi kela a me keia apana aina e waiho la ma ke komohana aku, he oiaio, a hiki i ka palena e holo pololei ana mawaena o ka poe Iudaio a me ka poe Genetile.

5. A pela no hoi kela a me keia apana aina e pili ana ma na aina kula, e like me ka hiki i Kuu poe haumana ke kuai i na aina. Aia hoi, he naauao keia, i loaa ai ia ia lakou i hooilina mau loa.

6. A e ku Kuu kauwa o Sidane Kilibati ma ka oihana Aʻu i hoonoho aku ai ia ia, e ohi mai i na moni, a i agena no ka Ekalesia, e kuai i ka aina ma na wahi a pau e pili kokoke mai ana, e like me ka hiki ke hana ia me ka pono, a e like me ka ka naauao e kuhikuhi ai.

7. A e ku Kuu kauwa o Eluene Paterige ma ka oihana Aʻu i hoonoho aku ai ia ia, e mahelehele no ka Poe Hoano i ko lakou mau hooilina, he oiaio, e like me Kaʻu i kauoha ai; a pela pu no hoi me ka poe ana i koho ai e kokua ia ia.

8. A eia hou, he oiaio, ke olelo aku nei Au ia oukou, e hoonoho paa o Kuu kauwa o Sidane Kilibati ia ia iho ma keia wahi, a e kukulu i kekahi hale kuai, i kuai aku ai oia i na waiwai kalepa me ke apuka ole, i loaa ai ia ia ke dala e kuai i na aina no ka pomaikai o ka Poe Hoano, a i loaa ai ia ia kela a me keia mea a na haumana e makemake ai e hoonoho paa ia lakou ma ko lakou hooilina.

9. A e loaa no hoi i Kuu kauwa ia Sidane Kilibati he laikini—(aia hoi, eia ka naauao, a o ka mea e heluhelu ana e hoomaopopo oia)—i hiki ai no hoi ia ia ke hoouna i na waiwai kalepa i na kanaka, he oiaio, ma o ka mea la ana e makemake ai, ma ke ano he poe kokua ma kana hana.

10. A pela e hoolako aku ai i Kuu Poe Hoano, i hai ia ai Kuu Euanelio i ka poe e noho la iloko o ka pouli a ma na wahi a me ka malu o ka make.

11. A eia hou, he oiaio, ke olelo aku nei Au ia oukou, e hoonoho paa ia Kuu kauwa o Wiliama W. Pelepa ma keia wahi, a e hoopaa ia i mea pai palapala no ka Ekalesia;

12. A aia hoi, ina e hookipa ko ke ao nei i kana mau mea i kakau ai—(aia hoi, eia ka naauao)—e lawe oia i kela a me keia mea e hiki ana ia ia ke loaa iloko o ka pono, no ka pomaikai o ka Poe Hoano.

13. A e kokua Kuu kauwa o Oliva Kaudare ia ia, he oiaio, e like me Kaʻu i kauoha ai, ma kela a me keia wahi Aʻu e hoonoho ai ia ia, e kope, a e hoopololei, a e wae, i pololei ai na mea a pau imua Oʻu, e like me ka hooia ana a ka Uhane ma o na la.

14. A pela ka poe Aʻu i olelo aku ai e hoonoho paa ia ma ka aina o Ziona, me ka awiwi e like me ka hiki, me ko lakou mau ohana, e hana i kela mau mea, oia hoi, e like me Kaʻu i olelo ai.

15. A ano, e pili ana i ka houluulu ana. E hoomakaukau koke ka Bihopa a me ka agena, e like me ka hiki, no kela mau ohana i kauoha ia ai e hele mai i keia aina, a e hoonoho paa ia lakou ma ko lakou mau aina hooilina.

16. A i ke koena iho o na Lunakahiko a me na lala, e haawi ia aku auanei na kuhikuhi ana ma keia hope aku. Pela io no. Amene.