1. E hoomaikai ia Kou inoa, e ka Haku, ke Akua o ka Iseraela, ka Mea malama berita, a hoike mai i ka lokomaikai i Kau mau kauwa e hele ana me ka pono imua Ou me ko lakou mau naau a pau;

2. Ooe, ka Mea i kauoha mai i Kau mau kauwa e kukulu i hale i Kou inoa ma keia wahi. (Ketalana.)

3. A, ano ke ike mai nei Oe, e ka Haku, ua hana aku Kau mau kauwa e like me Kau kauoha,

4. A, ano, ke noi aku nei makou ia Oe, e ka Makua Hemolele, ma ka inoa o Iesu Kristo, ke Keiki a Kou poli, ma Kona inoa wale no e hiki ai ka hoola ana ke lawelawe ia i na keiki a kanaka, ke noi aku nei makou ia Oe, e ka Haku, e apono mai i keia hale, ka hana hoi a na lima o makou, Kau poe kauwa, ka mea Au i kauoha mai ai ia makou e kukulu;

5. No ka mea, ua ike Oe ua hana aku makou i keia hana iloko o na popilikia nui; a mailoko ae o ko makou hune i haawi ae ai makou i ka makou loaa e kukulu i hale i Kou inoa, i loaa ai i ke Keiki a ke Kanaka i wahi e hoike ae ai ia Ia iho i Kona poe kanaka.

6. A e like me Kau i olelo mai ai ma kekahi hoikeana, i haawi ia mai ia makou, e kapa ana ia makou Kou poe hoaloha, me ka i ana, “E kahea i ko oukou mau halawai hoano e like me Kaʻu i kauoha aku ai ia oukou;

7. “A oiai aole he manaoio ko ka poe a pau, e imi ikaika oukou a e ao kekahi i kekahi i na olelo o ka naauao; he oiaio, e imi oukou mailoko mai o na buke maikai loa, i na olelo o ka naauao, e imi i ka ike ma ka huli nui ana, a ma ka manaoio no hoi.

8. “E hoonohonoho ia oukou iho; e hoomakaukau i kela me keia mea e pono ai, a e kukulu i hale, oia hoi, i hale e pule ai, i hale e hookeai ai, i hale o ka manaoio, i hale e imi ai i ka ike, i hale o ka nani, i hale o ka maluhia, i hale o ke Akua,

9. “I hana ia ai ko oukou mau komo ana mai ma ka inoa o ka Haku, a i hana ia ai ko oukou mau puka ana aku ma ka inoa o ka Haku, a i hana ia ai ko oukou mau aloha ana aku a pau ma ka inoa o ka Haku, me na lima i hapai ia iluna i ka Mea Kiekie Loa.”

10. A ano, e ka Makua Hemolele, ke noi aku nei makou ia Oe e kokua mai ia makou, Kou poe kanaka, me Kou lokomaikai, ma ke kahea ana i ko makou halawai hoano, i hana ia ai ia i Kou hoohanohano ia, a i Kau hoapono hemolele ana mai,

11. A ma ke ano i ike ia ai makou he pono imua Ou, i loaa ai ka hooko ia ana o na olelo hoopomaikai Au i hana ai no makou, Kou poe kanaka, ma na hoikeana i haawi ia mai ia makou;

12. I kau iho ai Kou nani maluna o Kou poe kanaka, a maluna o keia Kou hale, a makou e hoolaa nei Nou, i hoomaemae ia ai ia a hoolaa ia hoi e lilo ai i mea hemolele, i mau ai Kou nohona hemolele iloko o keia hale,

13. A i hoomaopopo ai na kanaka a pau e komo ana ma ka paepae puka o ka hale o ka Haku, i Kou mana, a e koi ia e ae aku ua hoolaa Oe ia mea a o Kou hale no ia, he wahi o Kou hemolele.

14. A e oluolu mai Oe, e ka Makua Hemolele, o ka poe a pau e hoomana ana maloko o keia hale, e ao ia lakou i na olelo o ka naauao mailoko ae o na buke maikai loa, a e huli i ka ike ma ka imi ikaika ana, a ma ka manaoio no hoi, e like me Kau i olelo mai ai;

15. A i ulu ae ai lakou iloko Ou, a e loaa ka piha o ka Uhane Hemolele, a e hoonohonoho ia e ku like me Kou mau kanawai, a e hoomakaukau ia e loaa kela me keia mea e pono ai;

16. A i lilo ai keia hale i hale e pule ai, i hale e hookeai ai, i hale o ka manaoio, i hale o ka nani a o ke Akua, he oiaio, o Kou hale;

17. A o na komo ana mai a pau o Kou poe kanaka iloko o keia hale, ma ka inoa o ka Haku no ia;

18. A o na puka ana a pau mai keia hale aku ma ka inoa o ka Haku no ia;

19. A o na aloha ana a pau a lakou ma ka inoa o ka Haku, me na lima hemolele i hapai ia i ka Mea Kiekie Loa;

20. A aole e ae ia kekahi mea maemae ole e komo iloko o Kou hale e hoohaumia ai ia;

21. A i ka wa o Kou poe kanaka e hana hewa ai, oia hoi kekahi o lakou, e mihi koke lakou a e hoi hou aku i Ou la, a loaa ka oluolu ia imua o Kou maka, a e hoihoi hou ia mai na pomaikai Au i koho ai e ninini ia maluna iho o ka poe e hoomana ana ia Oe maloko o Kou hale.

22. A ke noi aku nei makou ia Oe, e ka Makua Hemolele, e puka aku no Kau poe kauwa mai keia hale aku, i hoaahu ia me Kou mana, a i Kau ai Kou inoa maluna iho o lakou, a e hoopuni ana Kou nani ia lakou, a na Kou poe anela e kiai maluna o lakou;

23. A mai keia wahi aku e hali aku ai lakou i na mea hou nui a nani loa, he oiaio, i na welelau o ka honua, i ike ai lakou o keia no Kau hana, a ua hohola mai Oe i Kou lima e hooko i na mea Au i olelo mai ai ma na waha o na Kaula, e pili ana i na la hope.

24. Ke noi aku nei makou ia Oe, e ka Makua Hemolele, e hookupaa i na kanaka e hoomana ana, a e paa ana i inoa a i kulana hoi me ka maikai iloko o Kou hale nei, i na hanauna a pau, a no ka wa pau ole,

25. Aole e lanakila kekahi mea eha i hana ia e kue mai ia lakou; a o ka mea e eli ana i lua no lakou e haule iho no oia iloko olaila;

26. Aole e loaa ka mana i kekahi hui o ka poe hana hewa e ala ae a lanakila maluna o Kou poe kanaka, ka poe i hookau ia aku ai Kou inoa maloko o keia hale;

27. A ina e ala kue mai kekahi poe kanaka i keia poe kanaka, e ho-a ia Kou inaina ia lakou,

28. A ina e hahau mai lakou i keia poe kanaka, e hahau no Oe ia lakou, a e kaua no Oe no Kou poe kanaka e like me Oe i hana aku ai ma ka la kaua, i hoopakele ia ai lakou mai na lima aku o ko lakou mau enemi a pau.

29. Ke noi aku nei makou ia Oe, e ka Makua Hemolele, e hoohoka, a e hookahaha, a e hoohilahila a hoopioo i ka poe a pau i hoolaha aku i na lono hoopunipuni mai o a o maluna o ke ao nei, e kue i Kau kauwa, a i ole mau kauwa, ina aole lakou e mihi mai i ka wa o ka Euanelio mau loa e hai ia aku ai iloko o ko lakou mau pepeiao,

30. A e hoolilo ia ka lakou mau hana a pau i mea ole, a e hoopau ia e ka huahekili, a mamuli o na hoopai ana Au e hoouna ai maluna iho o lakou iloko o Kou inaina, e hiki mai ai he hopena o na hoopunipuni a me na olelo ino e kue i Kou poe kanaka;

31. No ka mea, ua ike Oe, e ka Haku, ua hala ole Kau poe kauwa imua Ou, ma ka hooiaio ana i Kou inoa, ka mea o lakou i ehaeha ai i ua mau mea la;

32. Nolaila, ke noi haahaa aku nei makou imua Ou e loaa ka hoopakele piha pono ia ana mai keia auamo aku;

33. E uhaki aku ia mea, e ka Haku; e uhaki aku ia mea mai na ai aku o Kau poe kauwa, ma o Kou mana la, i ala ae ai makou iwaena o keia hanauna a hana i Kau hana.

34. E Iehova, e aloha mai i Kou poe kanaka, a oiai ua hana hewa na kanaka a pau, e kala mai i na hana hewa ana a Kou poe kanaka, a e holoi loa ia aku ia mau mea no ka wa pau ole.

35. E sila ia ka poni ia ana o Kou poe luna hai Euanelio maluna iho o lakou e ka mana mailuna mai;

36. E hooko ia ia maluna o lakou, e like me ia maluna o ka poe ma ka la Penetekota, e ninini ia ka haawina o na olelo e maluna o Kou poe kanaka, he oiaio, na alelo manamana me he ahi la, a me ka hoomaopopo ana ia mea,

37. A e hoopiha ia Kou hale me Kou nani, me he makani nui la e pa ikaika mai ana.

38. E kau mai maluna o Kau poe kauwa i ka hoike o ka berita, a i ka wa e hele aku ai lakou e hoolaha i Kau olelo, e sila no lakou i ke kanawai, a e hoomakaukau i na naau o Kou Poe Hoano no kela mau hoopai ana a pau Au i aneane ai e hoouna mai ma Kou inaina, maluna o na kanaka o ka honua, mamuli o ka lakou mau hana hewa ana, i maule ole ai Kou poe kanaka ma ka la o ka pilikia.

39. A o kela me keia kulanakauhale a Kau poe kauwa e komo aku ai, a hookipa mai na kanaka o ia kulanakauhale i ka lakou hoike, e kau mai Kou maluhia a me Kou hoola ana maluna o ia kulanakauhale, i houluulu ae ai lakou i ka poe pono mailoko mai o ia kulanakauhale, i pii mai ai lakou i Ziona, a i ole, i kona mau Mahele-aina, na wahi o Kou koho ana, me na mele o ka olioli mau loa;

40. A mai kau mai i Kau mau hoopai ana maluna o ia kulanakauhale a hiki i ka hooko ia ana o keia.

41. A o kela me keia kulanakauhale a Kau poe kauwa e komo aku ai, a hookipa ole mai na kanaka o ia kulanakauhale i ka hoike a Kau poe kauwa, a ao aku Kau poe kauwa ia lakou e hoopakele ia lakou iho mai keia hanauna hookuli, alaila, e kau aku no ia maluna o ia kulanakauhale e like me Kau i olelo ai ma na waha o Kau poe Kaula;

42. Aka, ke noi haahaa aku nei makou ia Oe e hoopakele mai Oe, e Iehova, i Kau poe kauwa mai ko lakou la mau lima, a e hoomaemae ia lakou nei mai ko lakou la koko aku.

43. E ka Haku, aole o makou hauoli i ke kinai ia ana o ko makou hoakanaka; he makamae ko lakou mau uhane imua Ou;

44. Aka, e hooko ia Kau olelo e pono ai; e kokua mai i Kau poe kauwa e olelo aku, me Kou aloha e kokua ana ia lakou, O Kou makemake ke hana ia, e ka Haku, aole o ko makou.

45. Ke ike nei makou ua olelo mai Oe ma ka waha o Kau poe Kaula i na mea weliweli e pili ana i ka poe hewa ma na la hope—e ninini mai ana Oe i Kau mau hoopai me ke ana ole;

46. Nolaila, e ka Haku, e hoopakele mai i Kou poe kanaka mai ka popilikia mai o ka poe hewa; e kokua i Kau poe kauwa e sila ae i ke kanawai, a e hoopaa i ka olelo-hoike, i makaukau ai lakou i ka la o ke puhi ana.

47. Ke noi aku nei makou ia Oe, e ka Makua Hemolele, e hoomanao i ka poe i hookuke ia e na kanaka o ke kalana o Iakekona, Misouri, mai na aina o ko lakou hooilina aku, a e uhaki ae, e ka Haku, i keia auamo o ka ehaeha i hookau ia aku maluna o lakou.

48. Ua ike Oe, e ka Haku, ua hookaumaha ia a hoeha nui ia lakou e na kanaka hewa, a ke hu ae nei ko makou mau naau me ka ehaeha no ko lakou mau haawe kaumaha.

49. E ka Haku, pehea la ka loihi o Kou ae ana e auamo keia poe kanaka i keia ehaeha, a me na uwe ana o ko lakou mau keiki hala ole e pii aku iluna i Kou mau pepeiao, a pii ae la hoi ko lakou koko i hoike imua Ou, a aole hoi Oe i hoikeike i Kau hoike no ko lakou pono?

50. E aloha mai, e ka Haku, maluna o kela poe uluaoa hewa, ka poe nana i hookuke aku i Kou poe kanaka, i hooki ai lakou i ka hana ino ana, a i mihi ai lakou i ka lakou mau hewa, ina e hiki ke loaa ka mihi;

51. Aka, ina aole lakou e mihi, e hohola ae Oe i Kou lima, e ka Haku, a e hoolapanai Oe i kahi Au i wae ai i Ziona no Kou poe kanaka!

52. A ina aole hiki ke hana ia ma kekahi ano okoa ae, i ole ai e haule wale ka hana a Kou poe kanaka imua Ou, e ho-a ia mai Kou inaina, a haule mai Kou huhu maluna o lakou, i anai ia ai lakou mai ka mole a i ka lala, malalo iho o ka lani;

53. Aka, ina e mihi lakou, he lokomaikai a he aloha Oe, a e kapae ae i Kou inaina i ka wa Au e nana iho ai maluna o ka maka o Kou poe i poni ia.

54. E aloha mai, e ka Haku, maluna o na lahuikanaka a pau o ka honua, e aloha mai i ka poe e hoomalu ana i ko makou aina, e kukulu paa ia a mau loa kela mau kumupaa i kupale ia ai me ka pono a me ka hanohano e ko makou poe kupuna, oia hoi, ke Kumukanawai o ko makou aina;

55. E hoomanao i na alii, na keikialii, ka poe hanohano, a me ka poe kiekie o ka honua, a me na kanaka a pau, a me na ekalesia, ka poe ilihune a pau, ka poe nele, a me ka poe i hoehaeha ia o ka honua,

56. I hoopalupalu ia ai ko lakou mau naau, i ka wa e puka aku ai Kau poe kauwa mai Kou hale aku, e Iehova, e hoike aku no Kou inoa, i auhee aku ai ko lakou mau manao kue imua o ka oiaio, a i loaa ai i Kou poe kanaka ka oluolu ia imua o na maka o ka poe a pau,

57. I ike ai na welelau a pau o ka honua, ua lohe makou Kau poe kauwa i Kou leo, a ua hoouna mai Oe ia makou,

58. I hoakoakoa ai Kau poe kauwa, na keiki a Iakoba, i ka poe pono mawaena ae o ia poe a pau, e kukulu i kulanakauhale hoano i Kou inoa, e like me Kau i kauoha mai ai ia lakou.

59. Ke noi aku nei makou ia Oe e koho aku i mau Mahele-aina e ae no Ziona, mawaho o keia ka mea Au i koho ai, i kaa aku ai ka hooluolu ana o Kou poe kanaka me ka mana a me ka nani nui, i hoopokole ia ai Kau hana ma ka pono.

60. Ano, o keia mau olelo, e ka Haku, ka makou i olelo ai imua Ou, e pili ana i na hoikeana a me na kauoha Au i haawi mai ai ia makou, ka poe i helu pu ia me ka poe Genetile;

61. Aka, ua ike no Oe ua nui Kou aloha no na keiki a Iakoba, ka poe i hoopuehu ia maluna o na mauna no ka wa loihi, ma kekahi la pouli a hakumakuma;

62. Nolaila, ke noi aku nei makou ia Oe e aloha mai i na keiki a Iakoba, i hoomaka ia ai ka hoolapanai ia ana o Ierusalema mai keia hora aku,

63. A i hoomaka ia ai ka uhaki ana i ka auamo o ka noho hooluhi ana mai ka hale aku o Davida;

64. A i hoomaka ai na keiki a Iuda e hoi hou i na aina Au i haawi aku ai no Aberahama, ko lakou kupuna;

65. A e hana i mea e hoohuli ia mai ai ke koena a Iakoba, ka poe i hoopai ia a hahau ia mamuli o ka lakou mau hana hewa, mai ko lakou kulana ahiu a hupo, a i ka piha o ka Euanelio mau loa,

66. I waiho iho ai lakou i ka lakou mau lako kaua o ka hookahe koko, a hooki i ko lakou mau kipikipi ana;

67. A e ike ai na koena a pau o ka Iseraela i hoopuehu ia, i ka oiaio, ka poe i hookuke ia aku i na welelau o ka honua, a e manaoio ai hoi i ka Mesia, a e hoola ia mai ka hookaumaha ia ana, a e olioli imua Ou.

68. E ka Haku, e hoomanao i Kau kauwa, ia Iosepa Kamika, opio, a me kona mau popilikia a hoomaau ia ana a pau—i kona berita pu ana me Iehova, a aelike-laa me Oe, e ke Akua Mana o Iakoba—a me na kauoha Au i haawi aku ai ia ia, a ua hooikaika oia me ke kuio e hana i Kou makemake.

69. E aloha mai, e ka Haku, i kana wahine a me kana mau keiki, i hookiekie ia ai lakou imua o Kou alo, a hoopakele ia e Kou lima kokua;

70. E aloha mai Oe i ko lakou poe pili koko a pau, i hoopau ia ai ko lakou mau manao kue, a e kahili ia aku e like me ke kahe ana o ka wai-kahe, i hoohuli ia mai ai lakou a hoolapanai ia me ka Iseraela, a e hoomaopopo o Oe no ke Akua.

71. E hoomanao, e ka Haku, i na peresidena, oia hoi, i na peresidena a pau o Kou Ekalesia, i hookiekie ae ai Kou lima akau ia lakou, me ko lakou mau ohana a pau, a me ko lakou poe pili koko, i hoomau ia ai ko lakou mau inoa, a e loaa ma ka hoomanao mau loa ia ana, ia hanauna aku ia hanauna aku.

72. E hoomanao i Kou Ekalesia a pau, e ka Haku, me ko lakou mau ohana a pau, a me ko lakou poe pili koko a pau, me ko lakou mau poe mai a pilikia hoi a pau, me ka poe ilihune a haahaa a pau o ka honua, i lilo ai ke aupuni Au i kukulu ai, me na lima ole, i mauna nui, a piha ka honua holookoa ia ia;

73. I puka mai ai Kou Ekalesia mai ka waonahele mai o ka pouli, a e olino mai me ka nani e like me ka mahina, molaelae e like me ka la, a weliweli e like me ka puali kaua me na hae,

74. A e kahiko ia me he wahine mare no ka la Au e wehe ae ai i ka uhi o ka lani, a e hookahe mai i na mauna imua o Kou alo, a e hookiekie na awawa, a e hoolaumania ia na wahi apuupuu; i piha ai ka honua i Kou nani,

75. A i ka wa e kani ai ka pu no ka poe make, e kaili ia aku no makou i luna iloko o ke ao e halawai me Oe, i noho mau loa ai makou me ka Haku,

76. I maemae ai ko makou mau aahu, i aahu ia ai makou me na lole o ka pono, me na lau pama ma ko makou mau lima, a me na leialii o ka nani maluna o ko makou mau poo, a e ohi mai i ka hauoli mau loa no ko makou mau ehaeha ana a pau.

77. E ka Haku ke Akua Mana Loa, e hoolohe mai ia makou ma keia ka makou mau noi haahaa, a e pane mai ia makou mai ka lani mai, Kou wahi noho hemolele, kahi Au e nohoalii nei me ka nani, ka hanohano, ka mana, ke ano alii, ka ikaika, ka mana hoomalu, ka oiaio, ke kaulike, ka hoopai, ke aloha, a me ka piha palena ole mai ka mau loa a i ka mau loa.

78. E hoolohe, e hoolohe, e hoolohe mai ia makou, e ka Haku! A pane mai i keia mau noi haahaa, a e apono mai i ka hoolaa ia ana o keia hale ia Oe, ka hana hoi a ko makou mau lima, a makou i kukulu ai i Kou inoa:

79. A i keia Ekalesia no hoi, e hookau iho i Kou inoa maluna iho ona; a e kokua ia makou ma ka mana o Kou Uhane, i hoohui like ai makou i ko makou mau leo me kela poe serapima olinolino a lilelile e hoopuni ana i Kou nohoalii, me na hooho o ka hoonani e mele ana: Hosana i ke Akua a me ke Keikihipa;

80. A e hoaahu ia keia poe, Kou poe i poni ia, me ke ola mau loa, a e hooho aku Kou Poe Hoano me ka leo nui o ka olioli. Amene, a Amene.