1. O na hana, a me na hoolala ana, a me na manao paa o ke Akua aole e hiki ke hookahuli ia, aole hoi e hiki ke lilo i mea ole.

2. No ka mea, aole hele ke Akua ma na ala kekee, aole hoi Oia e huli ae i ka akau aole hoi i ka hema, aole hoi Oia e loli ae mai ka mea Ana i olelo ai, nolaila, he pololei Kona mau ala, a o Kona alahele he hookahi mau loa no ia.

3. E hoomanao, e hoomanao aole o ka hana a ke Akua ke hookahuli ia, aka o ka hana no a kanaka;

4. No ka mea, ina paha e loaa i kekahi kanaka na hoikeana he nui, a loaa ka mana e hana i na hana mana he nui, aka nae, ina e kaena oia iloko o kona ikaika iho, e kapae ae i mea ole na olelo ao a ke Akua, a hahai mamuli o kona mau makemake a kuko kino iho, e haule no ia a e hookau mai i ka hoopai o ke Akua hoopono maluna ona.

5. Aia hoi, ua waiho ia keia mau mea ia oe me ka hilinai, aka, me e ke oolea o na kauoha nou; a e hoomanao hoi i na olelo hoopomaikai i hai ia ia oe, ina aole oe i uhaki ia mau mea;

6. A aia hoi, me e ka pinepine o kou uhaki ana i na kauoha a me na kanawai o ke Akua, a hele aku mamuli o na manao hoohuli o kanaka;

7. No ka mea, aia hoi, aole i pono kou makau ana i ke kanaka a oi aku mamua o ke Akua, aka nae, ke waiho wale nei kanaka i na olelo ao a ke Akua i mea ole, a hoowahawaha i Kana mau olelo;

8. Eia nae, he pono ina i kupaa oe, alaila ua hohola mai Oia i Kona lima a hookupaa ia oe imua o na ihe wela o ka mea kue; a Oia pu kekahi me oe i kela a me keia manawa o ka popilikia.

9. Aia hoi, o oe no o Iosepa, a ua wae ia oe e hana i ka hana a ka Haku, aka, mamuli o ka hana hewa, ina aole oe e nana pono e haule ana oe;

10. Aka, e hoomanao he lokomaikai ke Akua; nolaila, e mihi i na hana hewa au i hana ai i kue i ke kauoha Aʻu i haawi aku ai ia oe, alaila e mau no kou wae ia ana, a ua kahea hou ia i ka hana;

11. Aka, ke ole oe e hana i keia, e hookuu ia aku oe a e lilo oe e like me na kanaka e ae, a e nele loa i ka haawina.

12. A i ka wa au i haawi aku ai i ka mea a ke Akua i haawi aku ai ia oe i ka ike a me ka mana e unuhi, ua haawi aku oe i kekahi mea laa iloko o na lima o kekahi kanaka hewa,

13. Ka mea i kapae wale i na olelo ao a ke Akua i mea ole, a i uhaki i ka olelo ae-like laa loa i hana ia imua o ke Akua, a ua hilinai oia maluna o kona noonoo iho, a kaena iloko o kona naauao iho.

14. A o keia ke kumu i lilo ai kou mau kuleana no ka manawa,

15. No ka mea, ua ae wale oe i na olelo ao a kou mea kuhikuhi e hehi wale ia mai kinohi mai.

16. Aka nae, e holo no Kaʻu hana imua, no ka mea, oiai e like me ka hiki ana mai i ke ao nei o ka ike no kekahi Hoola, ma o ka hoike ana la o ka poe Iudaio, pela no auanei ka ike no kekahi Hoola e hiki mai ai i Koʻu poe kanaka,

17. A i ka poe Nepai, a i ka poe Iakoba, a i ka poe Iosepa, a i ka poe Zorama, ma o ka hoike ana la o ko lakou mau makua—

18. A o keia hoike e hiki mai no ia i ka ike ana o ka poe Lamana, a me ka poe Lemuela, a me ka poe Isemaela, i emi iloko o ka hoomaloka mamuli o ka hana hewa a ko lakou mau makua, ka poe a ka Haku i ae aku ai e luku i ko lakou mau hoahanau, ka poe Nepai, mamuli o ka lakou mau hana hewa a me ka lakou mau hana hoopailua;

19. A no keia kumu hookahi no ua malama ia keia mau papa, na mea e paa ana i keia mau mooolelo, i hooko ia ai na olelo hoopomaikai a ka Haku, na mea Ana i hana ai i Kona poe kanaka;

20. A i hiki mai ai i ka poe Lamana ka ike no ko lakou mau makua, a i ike ai no hoi lakou i na olelo hoopomaikai a ka Haku, a i manaoio ai lakou i ka Euanelio a paulele maluna o ka pono o Iesu Kristo, a e hoonani ia mamuli o ka manaoio i Kona inoa, a ma o ko lakou mihi ana la e hoola ia ai lakou. Amene.