1. Aia hoi, penei wahi a ka Haku, he oiaio, ka Alepa a me ka Omega, ka hoomaka ana a me ka hopena, he oiaio, ka Mea i kaulia ia no na hewa o ko ke ao nei.

2. Aia hoi, he oiaio, he oiaio, ke olelo aku nei Au ia oe, e Kuu kauwa, e Nuela Naita, e kupaa oe iloko o ka oihana Aʻu i koho aku ai nou;

3. A ina e makemake kou mau hoahanau e pakele mai ko lakou mau enemi mai, e mihi lakou i ko lakou mau hewa a pau, a e lilo i poe haahaa maoli imua Oʻu me ka naau mihi;

4. Oiai ua uhaki ia ka berita a lakou i hana ai me Aʻu, pela no i lilo ai ia i mea ole, a mana ole;

5. A auwe ka mea, ma o na la i hiki mai ai keia lawehala ana, no ka mea, e aho nona ina i hoopiholo ia oia iloko o ka hohonu o ke kai;

6. Aka, pomaikai no ka poe i malama i ka berita a hoolohe i ke kauoha, no ka mea, e loaa ia lakou ke aloha ia mai.

7. No ia mea, e hele ano mai ka aina aku, o lele mai ko oukou mau enemi maluna o oukou; a e hele ma ko oukou huakai hele a e koho i ka mea a oukou i makemake ai i alakai no oukou, a i mea e uku i na moni no oukou.

8. A pela e hele ai oukou ma ko oukou huakai hele ma na aina ma ke komohana, a hiki i ka aina o Misouri, ma na palena o ko Lamana poe.

9. A mahope o ka pau ana o ko oukou huakai hele, aia hoi, ke olelo aku nei Au ia oukou, e imi oukou i ola no ka noho ana, e like me ko kanaka, a hiki i Koʻu hoomakaukau ana i wahi no oukou.

10. A eia hou, e hoomanawanui iloko o na popilikia a hiki mai Au; a aia hoi, e hele koke mai no Au, a o Kaʻu uku aia no me Aʻu, a o ka poe i imi koke mai Iaʻu e loaa no ka maha i ko lakou mau uhane. Pela io no. Amene.