1. E hoolohe mai, e na kanaka, a e hoohamama i ko oukou mau naau a e haliu mai na pepeiao mai kahi mamao mai; a e hoolohe mai oukou ka poe e kapa ana ia oukou iho na kanaka o ka Haku, a e hoolohe i ka olelo a ka Haku a me Kona makemake e pili ana no oukou:

2. Ae, ke olelo nei Au, e hoolohe i ka olelo a ka Mea Nona ka inaina i hoaa ia e kue i ka poe hewa a me ka poe kipi;

3. Ka Mea e makemake ana e lawe i ka poe Ana e makemake ai e lawe, a e hoopakele iloko o ke ola ka poe Ana e makemake ai e hoopakele;

4. Ka Mea e kukulu ana e like me Kona makemake ponoi a oluolu hoi; a luku aku i Kona wa e makemake ai a he hiki hoi ke kiola aku i ka uhane me ke kino ilalo i gehena.

5. Aia hoi, ke hoopuka nei Au, ka Haku, i Koʻu leo, a e hoolohe ia no ia.

6. No ia mea, he oiaio, ke olelo nei Au, e ao ka poe hewa, a e makau a haalulu ka poe kipi; a o ka poe hoomaloka e paa i ko lakou mau lehelehe, no ka mea, e hiki mai ana ka la o ka inaina maluna o lakou me he makani puahiohio la, a e ike na mea io a pau Owau no ke Akua.

7. A o ka mea e imi ana i na hoailona e ike no i na hoailona, aka, aole nae no ka hoola ana.

8. He oiaio, ke olelo aku nei Au ia oukou, aia kekahi mawaena o oukou e imi nei i na hoailona, a he poe kekahi o ia ano mai kinohi mai;

9. Aka, aia hoi, aole hiki mai ka manaoio ma o na hoailona la, aka, ke hahai nei na hoailona i ka poe manaoio.

10. He oiaio, ke hiki mai nei na hoailona ma ka manaoio, aole mamuli o ka makemake o kanaka, aole hoi e like me ka lakou i manao ai, aka, ma o ka makemake la o ke Akua.

11. He oiaio, ke hiki mai nei na hoailona ma ka manaoio, i ka hana ana i na hana mana nui, no ka mea, ke ole ka manaoio aohe kekahi kanaka e hiki ke hooluolu i ke Akua; a o ka poe a ke Akua i huhu ai aole Oia i oluolu loa; no ia mea, aole Ona hoike i na hoailona i ua poe la, koe wale no ma ka inaina no ko lakou hoahewa ia ana.

12. No ia mea, aole Au, ka Haku, i oluolu me ka poe mawaena o oukou i imi i na hoailona a me na mea kupaianaha i mea e loaa ai ka manaoio, a aole no ka pomaikai o na kanaka no Koʻu nani;

13. Eia no nae, haawi aku la Au i na kauoha, a he nui ka poe i huli aku mai Kaʻu mau kauoha aku a aole i malama ia lakou.

14. Aia mawaena o oukou mamua he poe kane moekolohe a he poe wahine moekolohe; o kekahi o lakou ua haalele mai ia oukou, a o kekahi aia no me oukou, a ma keia hope aku e hoike ia aku lakou.

15. E ao ka poe o ia ano a e mihi koke, o hiki mai ka hoopai ana maluna o lakou me he pahele la, a e hoike ia auanei ko lakou lapuwale, a e hahai ka lakou mau hana ia lakou imua o na maka o na kanaka.

16. A, he oiaio, ke olelo aku nei Au ia oukou, e like me Kaʻu i olelo aku ai mamua, o ka mea e nana aku ana maluna o ka wahine a kuko ia ia, a i ole, ina e moekolohe kekahi iloko o ko lakou mau naau, aole e loaa ia lakou ka Uhane, aka, e hoole i ka manaoio a e makau no:

17. No ia mea, ua olelo aku Au, ka Haku, o ka poe i makau, a me ka poe hoomaloka, a me ka poe wahahee a pau, a o ka mea makemake a haku no hoi i ka wahahee, a o ka poe hookamakama, a me ka poe anaana, e loaa no ko lakou mahele iloko o kela loko e a ana me ke ahi a me ke kukaepele, oia hoi, ka make elua.

18. He oiaio, ke olelo nei Au, aole e loaa ia lakou ke ala mua ana.

19. A ano, aia hoi, ke i aku nei Au, ka Haku, ia oukou, aole oukou i apono ia, no ka mea, aia keia mau mea mawaena o oukou;

20. Eia nae, o ka mea e hoomanawanui ana iloko o ka manaoio a hana i Koʻu makemake, oia auanei ke lanakila, a e loaa ka hooilina maluna o ka honua i ka wa e hiki mai ai ka la o ka hoopahaohao ana;

21. I ka wa e hoopahaohao ia ai ka honua, he oiaio, e like me ke ano i hoike ia ai i Kuu mau Aposetolo maluna o ka mauna; a oia mooolelo aole i loaa piha ia oukou i keia wa.

22. A ano, he oiaio, ke olelo aku nei Au ia oukou, e like me Kaʻu i olelo aku ai e hoike aku ana Au i Kuu makemake ia oukou, aia hoi, e hoike aku ana Au ia ia oukou, aole ma ke ano he kauoha, no ka mea, aia he nui wale i manao ole e malama i Kaʻu mau kauoha;

23. Aka, i ka mea e malama ana i Kaʻu mau kauoha, e haawi aku no Au i na mea pohihihi o Kuu aupuni, a e lilo auanei ua mau mea la i punawai o ka wai ola iloko ona, e puapuai ana iluna i ke ola mau loa.

24. A ano, aia hoi, o keia ka makemake o ka Haku ko oukou Akua e pili ana i Kona Poe Hoano, e hoakoakoa pu lakou ia lakou iho ma ka aina o Ziona, aole me ka pupuahulu, o huikau auanei, ka mea nana e lawe mai i ka mai ahulau.

25. Aia hoi, o ka aina o Ziona, ke paa nei Au, ka Haku, ia mea iloko o Koʻu mau lima ponoi;

26. Eia no nae, ke haawi aku nei Au, ka Haku, ia Kaisara i na mea no Kaisara:

27. No ia mea, ke makemake nei Au, ka Haku, e kuai oukou i na aina i kaa e oukou mamua o ko ke ao nei, i loaa ai ia oukou ke kuleana maluna o ko ke ao nei, i ole ai lakou e hoeueu ia e huhu;

28. No ka mea, ke hookomo nei o Satana iloko o ko lakou mau naau e huhu ia oukou, a i ka hookahe ana i ke koko;

29. No ia mea, aole e loaa ka aina o Ziona, ke ole ma ke kuai ana, a i ole, ma o ke koko la, i ole ia, aole kekahi hooilina no oukou.

30. A ina ma ke kuai ana, aia hoi, ua pomaikai oukou;

31. A ina ma o ke koko la, oiai ua papa ia oukou i ka hookahe ana i ke koko, aia hoi, aia ko oukou poe enemi maluna o oukou, a e hahau ia oukou mai ia kulanakauhale aku a ia kulanakauhale aku, a mai ia hale halawai aku a ia hale halawai aku, a he kakaikahi ka poe e ku ana e loaa kekahi hooilina.

32. Ua huhu Au, ka Haku, i ka poe hewa; a ke kaohi nei Au i Kuu Uhane mai na kanaka mai o ka honua.

33. A ua hoohiki Au iloko o Kuu inaina, a ua kuahaua i na kaua maluna o ka ili o ka honua, a e luku no ka poe hewa i ka poe hewa, a e kau no ka makau maluna o kela a me keia kanaka.

34. A e aneane no e pakele ole ka Poe Hoano; eia nae, Owau, ka Haku, pu me lakou, a e iho mai maloko o ka lani mai ke alo mai o Kuu Makua, a e hoopau ae i ka poe hewa me ke ahi pio ole.

35. A aia hoi, aole keia i keia wa, aka, mahope aku;

36. No ia mea, i ka ike ana ua hooholo Au, ka Haku, i keia mau mea a pau maluna o ka ili o ka honua, ke makemake nei Au e hoakoakoa ia Koʻu Poe Hoano maluna o ka aina o Ziona;

37. A e lawe kela a me keia kanaka i ka pono iloko o kona mau lima a o ka manaoio me ke kupaa maluna o kona puhaka, a e hookiekie i kekahi leo ao i na kanaka o ka honua; a e hai ma ka olelo a ma ka holo ana, e hiki mai ana ka hooneoneo ana maluna o ka poe hewa.

38. No ia mea, e hooponopono Kaʻu mau haumana, ka poe e noho ana maluna o keia mahinaai ma Ketalana, i ko lakou mau mea pili i ko ke kino.

39. A na Kaʻu kauwa na Tito Bilina, ka mea nana e malama nei ua mea la, e hoolilo i ka aina, i makaukau ai oia i keia kau kupulau ae e hele ma kona huakai hele i ka aina o Ziona, me ka poe e noho la maluna o ka ili o ua aina la, koe ka poe Aʻu e hookoe iho ai Noʻu iho, ka poe e hele ole ana a hiki i Kaʻu kauoha ana aku ia lakou.

40. A o na moni a pau e hiki ana ke haawi ia mai, he mea ole ia Iaʻu nei, ina paha he uuku, a i ole, he nui, e hoouna ia iluna i ka aina o Ziona, i ka poe Aʻu i koho ai e ohi.

41. Aia hoi, e haawi aku ana Au, ka Haku, i Kaʻu kauwa, ia Iosepa Kamika, opio, i ka mana e hiki ai ia ia ke hoomaopopo ma ka Uhane i ka poe i kupono e hele aku iluna i ka aina o Ziona, a me ka poe mawaena o Kaʻu mau haumana e kali hou aku ana.

42. A e paa Kaʻu kauwa o Nuela K. Witine, i kona hale kuai, a i ole, ma kekahi olelo ana, i ka hale kuai, no kekahi manawa pokole hou aku.

43. Eia no nae, e haawi oia i na dala a pau ana e hiki ai ke haawi aku e hoouna ia i luna i ka aina o Ziona.

44. Aia hoi, aia keia mau mea iloko o kona mau lima ponoi, a e hana oia me ka naauao.

45. He oiaio, ke olelo aku nei Au, e hoolilo ia oia i agena no na haumana e kali ana, a e hoolilo ia oia ma keia mana;

46. A ano, e hele koke aku e ike i na apana o ka Ekalesia, me ke ao ana i keia mau mea ia lakou, me Kuu kauwa o Oliva Kaudare. Aia hoi, o keia Koʻu makemake, e loaa o na dala, oia hoi, e like me Kaʻu i kuhikuhi ai.

47. O ka mea kupaa a hoomau aku oia auanei ke lanakila maluna o ko ke ao nei.

48. O ka mea e hoouna ana i kekahi mau waiwai i ka aina o Ziona, e loaa auanei he hooilina ma keia ao, a e hahai kana mau hana ia ia, a he uku no hoi ma ke ao e hiki mai ana:

49. He oiaio, pomaikai ka poe make e make ana iloko o ka Haku mai keia manawa aku, i ka wa o ka Haku e hiki mai ai, e lilo aku na mea kahiko, a e lilo na mea a pau i mau mea hou, a e ala lakou mai ka make mai a aole e make hou mahope aku, a e loaa ka hooilina imua o ka Haku iloko o ke kulanakauhale hemolele.

50. A o ka mea e ola ana i ka wa e hiki mai ai ka Haku, a i kupaa ma ka manaoio, e pomaikai no oia; eia nae, ua koho ia nona e make i ka pau ana o na makahiki o ke ola ana o kanaka;

51. No ia mea, e ulu ae ana na keiki a hiki i ko lakou elemakule ana, a e make ana na elemakule, aka, aole lakou e moe ana iloko o ka lepo, aka, e hoololi ia ana lakou iloko o ka imo ana o ka maka;

52. Nolaila, no keia kumu i hai ai na Aposetolo i ko ke ao nei i ke alahouana o ka poe make.

53. O keia mau mea na mea i pono no oukou e nana aku ai, a ma ka olelo ana mamuli o ke ano o ka ka Haku, ua kokoke mai ua mau mea nei i keia wa; a i kekahi manawa e hiki mai ana, oia hoi, i ka la o ka hiki ana mai o ke Keiki a ke Kanaka.

54. A e loaa mau ana kekahi mau wahine puupaa naaupo mawaena o ka poe wahine puupaa naauao a hiki wale mai ia hora, a ia hora e hiki mai ai ka hookaawale loa ia ana o ka poe pono a me ka poe hewa, a i kela la e hoouna aku ai Au i Kuu poe anela e o-u ae i ka poe hewa a e kiloi ia lakou iloko o ke ahi pio ole.

55. A ano, aia hoi, he oiaio, ke olelo aku nei Au ia oukou, aole Au, ka Haku, i oluolu i Kuu kauwa ia Sidane Rigedona, ua hookiekie oia ia ia iho iloko o kona naau, a aole i hoolohe i ka olelo-ao, aka, hoehaeha aku la i ka Uhane;

56. No ia mea, o kana mea i kakau ai aole ia i ku i ke apono ia imua o ka Haku a e hana oia i palapala hou aku e pono ai, a ina aole ka Haku e apono ana ia mea, aia hoi, aole oia e ku hou aku ana iloko o ka oihana Aʻu i hoonoho aku ai ia ia.

57. A eia hou, he oiaio, ke olelo aku nei Au ia oukou, o ka poe e iini ana iloko o ko lakou mau naau, me ka haahaa, e ao aku i ka poe hewa i ka mihi ana, e hoolilo ia lakou i keia mana:

58. No ka mea, he la keia o ke ao ana, a aole he la o na olelo he nui. No ka mea, aole Au, ka Haku, e hoomaewaewa ia ma na la hope.

59. Aia hoi, mailuna mai Au, a ke waiho nei Koʻu mana malalo iho. Aia Au maluna o na mea a pau, a iloko o na mea a pau, a e komohia ana mai kela aoao a keia aoao o na mea a pau, a e imi ana i na mea a pau, a e hiki mai ana kekahi la e lilo ai na mea a pau malalo iho o Koʻu mana.

60. Aia hoi, Owau no ka Alepa a me ka Omega, oia hoi, o Iesu Kristo.

61. No ia mea, e ao na kanaka a pau i ke ano o ka lakou hoopuka ana i Koʻu inoa ma ko lakou mau lehelehe;

62. No ka mea, aia hoi, he oiaio, ke olelo nei Au he nui ka poe malalo iho o keia hoahewa ana, ka poe e hoopuka ana i ka inoa o ka Haku, a e hoopuka ana ia mea me ke kumu ole, me ka loaa ole o ka mana.

63. No ia mea, e mihi ka Ekalesia i ko lakou mau hewa, a e lilo lakou Naʻu, na ka Haku, i ole ia e oki ia aku lakou.

64. E hoomanao o ka mea e hiki mai ana mailuna mai he laahia ia, a e olelo ia me ke akahele, a ma ke kuhikuhi ana o ka Uhane, a ma keia aohe hoahewa ana, a e loaa ia oukou ka Uhane ma o ka pule ana la; no ia mea, ke ole keia e kau mai ana ka hoahewa ia.

65. E imi Kuu mau kauwa o Iosepa Kamika, opio, a me Sidane Rigedona i home no laua, e like me laua e ao ia ai e ka Uhane ma o ka pule ana la.

66. E lanakila ka poe maluna o ia mau mea ma o ka hoomanawanui ana la, i loaa ai ia lakou ka nani i oi aku ka maikai a me ka mau loa, i ole ia, ka hoahewa ana i oi aku. Amene.