1. Aia hoi, penei wahi a ka Haku i Kuu kauwa ia Wiliama E. Makalelina, Pomaikai oe, mamuli o kou huli ana ae mai kou mau hewa mai, a ua hookipa hoi i Kuu mau mea oiaio, wahi a ka Haku kou Hoolapanai, ka Hoola o ko ke ao nei, oia hoi, o ka poe a pau e manaoio ana i Kuu inoa.

2. He oiaio, ke olelo aku nei Au ia oe, pomaikai oe no ka hookipa ana i Kuu berita mau loa, oia hoi, ka piha o Kuu Euanelio i hoouna ia aku i na keiki a kanaka, i loaa ai ia lakou ke ola a i hoolilo ia ai i poe loaa pu o na nani e hoike ia aku ana i na la hope, e like me ia i palapala ia e na Kaula a me na Aposetolo i na la o ka wa kahiko.

3. He oiaio, ke olelo aku nei Au ia oe, e Kuu kauwa e Wiliama, ua maemae oe, aka, aole i pau loa; nolaila, e mihi i kela mau mea i oluolu ole i Koʻu maka, wahi a ka Haku, no ka mea, e hoike aku ana ka Haku ia mau mea ia oe.

4. A ano, he oiaio, e hoike aku ana Au, ka Haku, ia oe i na mea Aʻu e makemake ai e pili ana nou, a i ole, Koʻu makemake e pili ana nou;

5. Aia hoi, he oiaio, ke olelo aku nei Au ia oe o Koʻu makemake ia e hai aku oe i Kuu Euanelio mai kekahi aina a i kekahi aina, a mai kekahi kulanakauhale a i kekahi kulanakauhale; he oiaio, i kela mau wahi e pili kokoke ana ma kahi i hai ole ia ai ia.

6. Mai kali no na la loihi ma keia wahi; mai pii aku i ka aina o Ziona i keia wa; aka, ina e hiki ia oe ke hoouna, e hoouna aku; i ole ia, mai manao i kou waiwai.

7. E hele aku i na aina ma ka hikina, e hai aku i na olelo hooiaio ma kela a me keia wahi, i kela a me keia poe kanaka, iloko o ko lakou mau halehalawai; e kamailio ana me ka noonoo kuhohonu me na kanaka.

8. E hele pu Kuu kauwa o Samuela H. Kamika me oe, a mai haalele ia ia, a e haawi aku ia ia i kau mau ao ana; a o ka mea i kupaa e hooikaika ia auanei ia ma kela a ma keia wahi, a e hele pu no Au ka Haku me oe.

9. E kau i kou mau lima maluna o ka poe mai, a e ola no lakou. Aole e huli hoi aku a hoouna aku Au, ka Haku, ia oe. E hoomanawanui iloko o ka popilikia. E noi a e loaa no ia oe. E kikeke a e wehe ia no ia nou.

10. E imi e hookaumaha ole ia mai. E haalele i na mea pono ole a pau. Mai moekolohe, he hoowalewale nana oe i hoopilikia.

11. E malama i keia mau olelo, no ka mea, he oiaio a he pololei lakou, a e hoonani oe i kau oihana, a e hoonee i na kanaka he nui i Ziona me na mele o ka hauoli mau loa maluna o ko lakou mau poo.

12. E hoomau ma keia mau mea a hiki i ka hopena, a e loaa auanei ia oe ka lei ke ola mau loa ma ka lima akau o Koʻu Makua, ka Mea i piha i ka lokomaikai a me ka oiaio.

13. He oiaio, penei wahi a ka Haku kou Akua, kou Hoolapanai, oia hoi, o Iesu Kristo. Amene.