1. He oiaio Kaʻu e olelo aku nei ia oukou, Kuu poe hoaloha, ke haawi aku nei Au ia oukou he olelo-ao, a he kauoha e pili ana i na waiwai a pau o ka hui Aʻu i kauoha ai e kukulu ia a e hoonohonoho ia, i hui kuikahi a i hui mau loa no ka pono o Kuu Ekalesia, a no ka hoola ia ana o kanaka a hiki mai Au,

2. Me kekahi olelo-hoopomaikai onipaa a loli ole, a ina ua kupaa ka poe Au i kauoha ai, e hoopomaikai ia auanei lakou me na hoopomaikai he nui;

3. Aka, ina ua kupaa ole lakou, ua aneane aku lakou i ka hoino ia.

4. Nolaila, mamuli o ka malama ole ana o kekahi o Kuu mau kauwa i ke kauoha, aka, ua uhai i ka berita ma o ke kuko la, a me na olelo hoomalae, ua hoino aku Au ia lakou me kekahi hoino walania a kaumaha;

5. No ka mea, ua hohola Au, ka Haku, iloko o Koʻu naau, ina e loaa kekahi kanaka o keia hui, he mea hana hewa, a i ole, ma kekahi olelo ana, ina e uhai oia i ka berita o oukou i hoopaa ia ai, e hoino ia oia ma kona ola ana, a e hehi ia auanei ilalo e ka mea Aʻu e makemake ai,

6. No ka mea, aole Au, ka Haku, e hoomaewaewa ia ma keia mau mea;

7. A o keia a pau i hoahewa pu ole ia ai ka poe hala ole mawaena o oukou me ka poe pono ole, a i pakele ole ai ka poe hewa mawaena o oukou, no ka mea, ua olelopaa Au, ka Haku, e loaa ia oukou he leialii o ka nani ma Kuu lima akau.

8. Nolaila, ina e loaa aku oukou he poe hana hewa, aole e hiki ia oukou ke pakele aku i Kuu inaina i ko oukou wa e ola ana;

9. Ina e oki ia oukou ma o ka hana hewa ana la, aole e hiki ia oukou ke pakele i ka hoehaeha ana o Satana a hiki i ka la o ka hoolapanai ia ana.

10. A ano, ke haawi aku nei Au ia oukou i ka mana mai keia hora aku, ina e loaa kekahi kanaka mawaena o oukou no ka hui, he mea hana hewa, a mihi ole i kela hewa, e haawi ia aku oia i ka hoehaeha ana a Satana, a aole e loaa ka mana ia ia e kau mai i ka ino maluna o oukou.

11. He naauao ia iloko Oʻu; nolaila, he kauoha Kaʻu e haawi aku nei ia oukou, e hoonohonoho oukou ia oukou iho a koho i kela me keia kanaka i kona oihana malama waiwai;

12. I hoike mai ai kela me keia kanaka Iaʻu i kana oihana malama waiwai ona i koho ia ai;

13. No ka mea, he mea pono ia, Naʻu, na ka Haku, e koi i kela me keia kanaka e hoike nona iho, ma ke ano he kahu malama waiwai maluna o na pomaikai honua Aʻu i hana ai a hoomakaukau ai no Kuu mau mea ola.

14. Hohola ae no Au, ka Haku, i na lani, a kukulu i ka honua Kaʻu hana noeau loa, a Noʻu na mea a pau iloko olaila;

15. A o Koʻu manao paa ia e hoolako i Kuu Poe Hoano, no ka mea, Noʻu na mea a pau;

16. Aka, he pono ke hana ia e like me Koʻu makemake; a, aia hoi, o keia ke ano Aʻu, ka Haku, i kauoha ai e hoolako i Kuu Poe Hoano, i hookiekie ia ai ka poe ilihune, mamuli o ka hoohaahaa ia ana o ka poe waiwai;

17. No ka mea, ua piha ka honua, a ua lawa a koe kekahi no ka haawi ana aku; he oiaio, ua hoomakaukau Au i na mea a pau, a ua haawi aku i na keiki a kanaka e lilo i mau agena no lakou iho.

18. Nolaila, ina e lawe kekahi kanaka mai ka lawa loa Aʻu i hana ai, a haawi ole aku i kekahi o kona mahele i ka poe ilihune a me ka poe nele e like me ke kanawai o Kuu Euanelio, e leha auanei oia i kona mau maka iluna, me ka poe hewa iloko o gehena, e ola ana iloko o ka ehaeha.

19. A ano, he oiaio Kaʻu e olelo aku nei ia oukou, e pili ana i na waiwai o ka hui.

20. E koho ia aku na Kuu kauwa, na Sidane Rigedona kahi ana e noho nei, a o ka apana o ka hale-hana-ili i hooilina nona, no kona ola, oiai oia e hana ana ma Kuu malawaina, e like me Koʻu makemake i ka wa Aʻu e kauoha aku ai ia ia;

21. A e hana ia na mea a pau e like me ke ao ana a ka hui, a me ka ae lokahi ana, a i ole, ka leo o ka hui e noho ana ma ka aina o Ketalana.

22. A ke hooili nei Au, ka Haku, i keia hooilina a me keia hoopomaikai ana maluna o Kuu kauwa, o Sidane Rigedona, i hoopomaikai nona a me kana hua mahope aku ona;

23. A e hoonui aku no Au i na pomaikai maluna ona, ke noho haahaa oia imua Oʻu.

24. A eia hou, e koho ia aku na Kuu kauwa, na Makini Hailaki, i hooilina nona, oia hoi, ka apana aina o Kuu kauwa, o Ioane Ioanekona i loaa ai ma ke kuapo ana i kona hooilina mua, nona a me kana mau hua mahope aku ona;

25. A ina e kupaa oia, e hoonui no Au i na pomaikai maluna ona, a me kana hua mahope ona.

26. A e hoolilo Kuu kauwa, o Makini Hailaki i kana mau dala no ka hai ana i Kuu mau olelo e like me ka Kuu kauwa, o Iosepa Kamika, opio, e kuhikuhi ai.

27. A eia hou, e haawi aku i Kuu kauwa, ia Federika G. Wiliama, kahi ana e noho nei.

28. A e haawi i Kuu kauwa, ia Oliva Kaudare i ka apana aina i hookaawale ia e pili ana i ka hale, oia hoi ka hale e lilo ana ikeena pai palapala, oia ka apana ekahi, a me ka apana kahi a kona makuakane e noho nei.

29. A e haawi ia i Kuu mau kauwa, ia Federika G. Wiliama a me Oliva Kaudare ke keena pai palapala, a me na mea a pau e pili ana no ia mea;

30. A o keia auanei ko laua hooilina, ka mea e hookaawale ia ana no laua:

31. A ina e kupaa laua, aia hoi, e hoopomaikai aku Au a e hoonui i na hoopomaikai maluna o laua.

32. A o keia ka hoomaka ana o ka hooilina i koho ia no laua a me ka laua hua mahope aku o laua;

33. A ina e kupaa laua, e hoonui no Au i na hoopomaikai maluna o laua a me ka laua hua mahope aku o laua, he oiaio, na pomaikai he nui wale.

34. A eia hou, e haawi i Kuu kauwa ia Ioane Ioanekona i ka hale ana e noho nei, a me ka hooilina—na mea a pau, koe ka aina i hookaawale ia no ke kukulu ana i Kuu mau hale, ka mea e pili ana ia hooilina, a me kela mau apana aina i hai ia no Kuu kauwa, no Oliva Kaudare.

35. A, ina e kupaa oia, e hoonui Au i na pomaikai maluna ona.

36. A o Kuu makemake ia e kuai aku oia i na apana aina i hookaawale ia no ke kukulu ana i ke kulanakauhale o Kuu Poe Hoano, ke hoike ia aku ia ia ia ma ka leo o ka Uhane, a e ku like me ke ao ana o ka hui, a ma ka leo o ka hui.

37. A o keia ka hoomaka ana o ka hooilina Aʻu i hookaawale ai nona, i pomaikai nona a me kana hua mahope ona;

38. A ina e kupaa oia, e hoonui no Au i na pomaikai maluna ona a nui wale.

39. A e haawi ia i Kuu kauwa, ia Nuela K. Witine na hale a me ka apana aina kahi ana e noho nei, a me ka apana aina a me ka hale kahi e ku nei ka hale oihana kalepa, a me ka apana aina no hoi ma ke kihi hema o ka hale oihana kalepa, a me ka apana aina no hoi kahi e ku nei ka wahi hoahu lehu.

40. A ua koho Au i keia mau mea a pau no Kuu kauwa, no Nuela K. Witine, i hooilina nona, a i pomaikai nona a me kana hua mahope aku ona, no ka pomaikai o ka hale oihana kalepa o Kuu hui Aʻu i kukulu ai no Kuu Mahele-aina ma ka aina o Ketalana.

41. Ae, he oiaio, o keia ka hooilina Aʻu i koho ai no Kuu kauwa, no N. K. Witine; oia hoi o keia hale oihana kalepa holookoa, nona a me kana agena, a me kana hua mahope aku ona;

42. A ina e kupaa oia ma ka malama ana i Kaʻu mau kauoha Aʻu i haawi ai ia ia, e hoonui no Au i na pomaikai maluna ona, a me kana hua mahope ona, oia hoi, na pomaikai he lehulehu.

43. A eia hou, e haawi ia i Kuu kauwa, ia Iosepa Kamika, opio, ka apana aina i hookaawale ia no ke kukulu ana i Kuu hale, oia hoi, he kanaha roda ka loa, a he umikumamalua ka laula, a me ka hooilina no hoi ma kahi a kona makuakane e noho la.

44. A o keia ka hoomaka ana o ka hooilina Aʻu i koho ai nona, i pomaikai maluna ona, a maluna o kona makuakane.

45. No ka mea, aia hoi, ua hookoe Au he hooilina no kona makuakane, no ka pono o kona ola ana; nolaila, e helu ia auanei oia me ka hale o Kuu kauwa, o Iosepa Kamika, opio.

46. A e hoonui aku Au i na pomaikai maluna o ka hale o Kuu kauwa, o Iosepa Kamika, opio, ke kupaa oia, he oiaio, i na pomaikai he lehulehu.

47. A ano, he kauoha Kaʻu e haawi aku nei ia oukou e pili ana ia Ziona, aole e mau ko oukou hoopaa ia ana ma ke ano he Hui Kuikahi me ko oukou mau hoahanau o Ziona, koe wale no ma keia ano:

48. Mahope o ko oukou hoonohonoho ia ana, e kapa ia oukou ka Hui Kuikahi o ka Mahele-aina o Ziona, ke kulanakauhale o Ketalana. A o ko oukou mau hoahanau, mahope o ko lakou hoonohonoho ia ana, e kapa ia lakou ka Hui Kuikahi o ke Kulanakauhale o Ziona.

49. A e hoonohonoho ia lakou ma ko lakou mau inoa ponoi, a ma ko lakou inoa ponoi, a e hana lakou i ka lakou hana ma ko lakou inoa ponoi, a ma ko lakou mau inoa ponoi;

50. A e hana oukou i ka oukou hana ma ko oukou inoa ponoi, a ma ko oukou mau inoa ponoi.

51. A o keia Kaʻu i kauoha aku ai e hana ia no ko oukou hoola ia ana, a no ko lakou hoola ia ana no hoi, mamuli o ko lakou kipaku ia ana, a me ka mea e hiki mai ana.

52. Oiai ua uhaki ia na berita ma o ka hana hewa ana la, ma ke kuko ana a me na olelo hoomalae;

53. Nolaila, ua hoopau ia oukou ma ke ano he Hui Kuikahi me ko oukou mau hoahanau, aole oukou i hoopaa ia me lakou, koe wale no a hiki wale iho la i keia hora, a koe wale no ma keia ano, e like me Kaʻu i olelo ai, ma ka hoaie ana e like me ka ae lokahi ana o keia hui ma ke kuka ana, e like hoi me ka mea hiki ia oukou a me ke kuhikuhi ana o ka leo o ka ahakuka.

54. A eia hou, he kauoha Kaʻu e haawi aku nei ia oukou e pili ana no ka oukou hooilina Aʻu i koho ai no oukou.

55. Aia hoi, Noʻu keia mau waiwai a pau, i ole ia, ua makehewa ko oukou manaoio, a e ike ia oukou he poe hookamani, a ua uhai ia na berita a oukou i hana ai me Aʻu;

56. A, ina Noʻu na waiwai, alaila, he poe kahu malama waiwai oukou, i ole ia aohe oukou he poe kahu malama waiwai.

57. Aka, he oiaio Kaʻu e olelo aku nei ia oukou, ua koho aku Au ia oukou i poe kahu malama waiwai no Kuu hale, oia hoi, he poe kahu malama waiwai maoli;

58. A no keia kumu Au i kauoha ai ia oukou e hoonohonoho ia oukou iho, he oiaio, e pai i Kuu mau olelo, ka piha pono o Kuu mau Palapala Hemolele, na hoikeana Aʻu i haawi aku ai ia oukou, a me na mea Aʻu e haawi aku ana ia oukou ma keia hope aku, ia wa aku a ia wa aku,

59. No ke kumu o ke kukulu ana ae i Kuu Ekalesia a Aupuni hoi maluna o ka honua, a no ka hoomakaukau ana i Kuu poe kanaka no ka wa Aʻu e noho pu ai me lakou, a ua kokoke mai hoi ia.

60. A e hoomakaukau oukou no oukou iho i wahi no kekahi waihona-kala, a e hoolaa ia mea no Kuu inoa;

61. A e koho oukou i kekahi mawaena o oukou e malama i ka waihona-kala, a e hoolilo ia oia no keia pomaikai;

62. A e kau ia i sila maluna o ka waihona-kala a e hoihoi ia na mea laahia a pau iloko o ka waihona-kala, a aole e olelo aku kekahi kanaka mawaena o oukou nana ia, aole hoi i kekahi hapa o ia mea, no ka mea, no oukou a pau auanei ia mamuli o ka lokahi;

63. A ke haawi aku nei Au ia oukou mai keia hora aku; a ano e nana pono e hele oukou a hoohana i ka hooilina Aʻu i koho ai no oukou, mawaho ae o na mea laa, no ka pai ana i keia mau mea laa e like me Kaʻu i olelo ai;

64. A o na loaa o na mea laa e hoihoi ia ia iloko o ka waihona-kala, a e kau ia i sila maluna iho o ia mea, a aole ia e hoohana ia, aole hoi e lawe ia mai ka waihona-kala aku e kekahi mea, aole hoi e wehe ia ka sila i kau ia maluna iho o ia mea, koe wale no ma ka leo o ka hui, a i ole, ma ke kauoha.

65. A pela auanei oukou e malama ai i na loaa o na mea laa iloko o ka waihona-kala, no na hana laahia a hemolele:

66. A e kapa ia keia ka waihona-kala laahia o ka Haku, a e kau ia i sila maluna iho o ia mea, i hemolele ai ia a hoolaa ia no ka Haku.

67. A eia hou, e hoomakaukau ia i waihona-kala hou ae, a e koho ia i puuku e malama ia waihona-kala, a e kau ia i sila maluna iho o ia mea;

68. A o na dala a pau e loaa ana ia oukou ma ka oukou mau hooilina, ma ka hoomahuahua ana i na waiwai Aʻu i koho aku ai no oukou, ma na hale, a i ole, ma na aina, a i ole, ma na bipi, a ma na mea a pau, koe na palapala hemolele a laahia Aʻu i hookoe iho ai Noʻu iho, no na hana hemolele a laahia hoi, e hoihoi koke ia iloko o ka waihona-kala e like me ka loaa ana mai o na kala ia oukou, ma na haneri paha, a i ole, ma na kanalima, a i ole, ma na iwakalua, a i ole, ma na umi, a i ole, ma na elima;

69. A i ole, ma kekahi olelo ana, ina e loaa i kekahi kanaka mawaena o oukou na talena (kala) elima e hoihoi aku oia ia iloko o ka waihona-kala; a ina e loaa ia ia he umi, a i ole, he iwakalua, a i ole, he kanalima, a haneri paha, e hana no oia e like me ia;

70. A aole e olelo kekahi kanaka mawaena o oukou nana ponoi ia, no ka mea, aole e olelo ia nana ia, aole hoi kekahi hapa o ia mea;

71. A aole kekahi hapa o ia mea e hoohana ia, a i ole, e lawe ia mailoko ae o ka waihona-kala, koe wale no ma ka leo a me ka ae lokahi ana o ka hui.

72. A o keia ka leo a me ka ae lokahi ana o ka hui; ina e i aku kekahi kanaka mawaena o oukou i ka puuku, Ua makemake au i keia i mea e kokua iaʻu ma kaʻu oihana malama waiwai;

73. Ina he elima talena (dala) ia, a i ole he umi talena (dala), a i ole he iwakalua, a i ole he kanalima, a i ole he haneri paha, e haawi aku ka puuku ia ia i ka huina ana i makemake ai e kokua ia ia ma kana oihana malama waiwai,

74. A hiki i kona ike ia ana he mea hana hewa, a ua hoike ia ia imua o ka ahakuka o ka hui me ka moakaka, he kahu malama waiwai kupaa ole a naaupo;

75. Aka, oiai oia he hoahanau oiaio, a ua kupaa a naauao ma kana oihana malama waiwai, o keia auanei ka hoailona i ka puuku, i aua ole ai ka puuku.

76. Aka, ke hana hewa, aia ka puuku malalo o ka malu o ka ahakuka a me ka leo o ka hui.

77. A ina e ike ia ka puuku he kahu malama waiwai kupaa ole a naaupo, aia oia malalo o ka malu o ka ahakuka a me ka leo o ka hui, a e hoopau ia oia mai kona wahi ae, a e koho ia kekahi mea e ae ma kona hakahaka.

78. A eia hou, he oiaio Kaʻu e olelo aku nei ia oukou e pili ana no ko oukou mau aie, aia hoi, o Koʻu makemake ia e hookaa oukou i ko oukou mau aie a pau;

79. A o Koʻu makemake ia e hoohaahaa oukou ia oukou iho imua Oʻu, a e loaa keia pomaikai ma ko oukou hooikaika a haahaa, a me ka pule o ka manaoio;

80. A ina e hooikaika a haahaa oukou, a malama i ka pule o ka manaoio, aia hoi, e hoopalupalu no Au i ka naau o ka poe a oukou i aie aku ai, a hiki i Koʻu hoouna ana i mau mea ia oukou no ko oukou hoopalekana ia ana.

81. Nolaila, e palapala koke aku i Nu Ioka, a e palapala aku e like me ia e kuhikuhi ia ana e Kuu Uhane, a e hoopalupalu no Au i na naau o ka poe a oukou i aie aku ai, i lawe ia aku ai mai ko lakou noonoo e hookau mai i na popilikia maluna o oukou.

82. A ina e haahaa a kupaa oukou, a kahea aku ma Kuu inoa, aia hoi, e haawi no Au ia oukou i ka lanakila.

83. Ke haawi aku nei Au ia oukou i olelopaa, e hoopakele ia oukou i keia wa hookahi mai ko oukou noho kuapaa ana;

84. Ina e loaa ia oukou he wa kupono e hoaie i na dala ma ka haneri, a i ole, na tausani, he oiaio, a hiki i ka oukou hoaie ana a lawa e hoopakele ia ae ai oukou mai ka noho kuapaa ana, ia oukou ke kuleana.

85. A e hoopaa i na waiwai Aʻu i waiho ai iloko o ko oukou mau lima no keia wa hookahi no, ma ka haawi ana i ko oukou mau inoa ma ka ae lokahi ana, a ma kahi ano e ae paha e like me ka oukou e manao ai he pono.

86. Ke haawi aku nei Au ia oukou i keia kuleana no keia wa hookahi no, a aia hoi, ina e hoomaka oukou e hana i na mea Aʻu i waiho aku ai imua o oukou, e like me Kaʻu mau kauoha, Noʻu keia mau mea a pau, a o oukou Kaʻu poe kahu malama waiwai, a aole e ae ka haku e wawahi ia kona hale. Pela io no. Amene.