1. Ano, aia hoi, no ka mea au, e Kuu kauwa, e Oliva Kaudare, i makemake ai e ike ma Oʻu nei, ke haawi aku nei Au ia oe i keia mau olelo:

2. Aia hoi, ua hoike aku Au ia oe, ma o Koʻu Uhane la, i na manawa he nui, he oiaio na mea au i kakau ai; no ia mea, ua ike no oe he oiaio ia mau mea;

3. A ina ua ike oe he oiaio ia mau mea, aia hoi, ke haawi aku nei Au ia oe i kauoha, e paulele oe maluna o na mea i kakau ia;

4. No ka mea, maloko olaila na mea apau i kakau ia e pili ana i ke kahua o Kuu Ekalesia, Kuu Euanelio, a me Kuu pohaku;

5. No ia mea, ina e kukulu oe i Kuu Ekalesia maluna o ke kahua o Kuu Euanelio a me Kuu pohaku, aole e lanakila na ipuka o ka po maluna ou.

6. Aia hoi, ke oo nei ko ke ao nei iloko o ka hewa, a he mea e pono ai e hoeueu ia na keiki a kanaka e mihi, na Genetile pu me ko ka hale o Iseraela no hoi:

7. No ia mea, oiai ua bapetizo ia oe e na lima o Kuu kauwa, o Iosepa Kamika, opio, e like me ka mea Aʻu i kauoha aku ai ia ia, ua hooko oia i ka mea Aʻu i kauoha aku ai ia ia.

8. A ano, mai kahaha no Koʻu kahea ana aku ia ia i Kaʻu hana iho, a o keia hana ua ike ia iloko Oʻu; no ia mea, ina e hooikaika oia i ka malama ana i Kaʻu mau kauoha, e hoopomaikai ia oia i ke ola mau loa, a o kona inoa o Iosepa.

9. A ano, e Oliva Kaudare, ke olelo aku nei Au ia oe, a me Davida Witima pu no hoi, ma o ke kauoha ana la; no ka mea, aia hoi, ke kauoha nei Au i na kanaka a pau ma na wahi a pau e mihi, a ke olelo aku nei Au ia olua, e like la me ia ia Paulo, Kuu Aposetolo, no ka mea, ua kahea ia olua i ka oihana i like me ia i kahea ia ai.

10. E hoomanao, o ka waiwai o na uhane he mea nui ia imua o na maka o ke Akua;

11. No ka mea, aia hoi, ua ehaeha ka Haku, ko olua Hoolapanai i ka make ana ma ka io; no ia mea, ua ehaeha oia i ka eha o na kanaka a pau, i mihi ai na kanaka a pau a hele i Ona la.

12. A ua ala hou mai Oia mai ka make mai, i hiki ai ia Ia ke lawe mai i na kanaka a pau i Ona la, mamuli no nae o na loina o ka mihi;

13. A nani wale Kona hauoli no ka uhane i mihi mai.

14. No ia mea, ua kahea ia olua e hai i ka mihi i keia poe kanaka;

15. A ina pela io olua e hana ai i ko olua mau la a pau i ka hai ana i ka mihi i keia poe kanaka, a e lawe mai, ina he hookahi wale no uhane i Oʻu nei, pehea ana auanei ka nani o ko olua hauoli me ia iloko o ke aupuni o Koʻu Makua?

16. A ano, ina e nui ana ko olua hauoli me hookahi uhane a olua i lawe mai ai i Oʻu nei iloko o ke aupuni o Koʻu Makua, pehea ana la ka nui o ko olua hauoli, ina e lawe mai ana olua i na uhane he nui i Oʻu nei?

17. Aia hoi, aia imua o olua Kuu Euanelio, a me Kuu pohaku, a me Kuu hoola ana.

18. E noi aku i ka Makua ma Koʻu inoa, me ka manaoio e hilinai ana e loaa io mai ana ia olua, a e loaa ia olua ka Uhane Hemolele, ka mea nana e hoike mai nei i na mea a pau i kupono i na keiki a kanaka.

19. A, ina aole ia olua ka manaoio, ka manaolana, a me ke aloha, aole e hiki ia olua ke hana i kekahi mea.

20. Mai paio me kahi ekalesia, koe wale no ka ekalesia o ke diabolo.

21. E lawe maluna o olua i ka inoa o Kristo, a e olelo aku i ka oiaio me ke kuoo;

22. A e like me ka nui e mihi ana a bapetizo ia iloko o Koʻu inoa, oia hoi o Iesu Kristo, a hoomanawanui a hiki i ka hopena, oia auanei ke hoola ia.

23. Aia hoi, o Iesu Kristo ka inoa i haawi ia mai e ka Makua, a aole inoa e ae i haawi ia mai i mea e hoola ia ai ke kanaka;

24. No ia mea, e lawe na kanaka a pau maluna iho o lakou i ka inoa i haawi ia mai e ka Makua, no ka mea, ma ia inoa e kahea ia ai lakou ma ka la hope;

25. No ia mea, ina e hoomaopopo ole lakou i ka inoa o lakou e kahea ia ai, aole e hiki ia lakou ke loaa he wahi iloko o ke aupuni o Koʻu Makua.

26. A ano, aia hoi, aia no he poe e ae i kahea ia e hai aku i Kuu Euanelio, i ka poe Genetile pu me na Iudaio hoi;

27. He oiaio, he Umikumamalua, a o ka Umikumamalua auanei Kaʻu mau haumana, a e lawe ana lakou i Koʻu inoa maluna iho o lakou; a o ka Umikumamalua ka poe auanei e makemake ana e lawe maluna iho o lakou i Koʻu inoa me ka manao piha o ka naau;

28. A ina e makemake lakou e lawe maluna o lakou i Koʻu inoa me ka manao piha o ka naau, ua kahea ia lakou e hele i ko ke ao nei a pau e hai aku i Kuu Euanelio i na kanaka a pau;

29. A o lakou ka poe i hoolilo ia e Aʻu e bapetizo ma Koʻu inoa, e like me ka mea i palapala ia;

30. A aia na mea i palapala ia imua o olua; no ia mea, e lawelawe aku olua ia mea e like me na olelo i palapala ia.

31. A ano, ke olelo aku nei Au ia oukou, ka poe Umikumamalua—Aia hoi, ua lawa Kuu aloha no oukou; e hele oukou me ka pono imua Oʻu e pono ai, a hana hewa ole.

32. A, aia hoi, o oukou ka poe i hoolilo ia e Aʻu e hoolilo aku i mau Kahuna a mau Kumu hoi; e hai i Kuu Euanelio, e like me ka mana o ka Uhane Hemolele iloko o oukou, a e like me na oihana a me na haawina o ke Akua i kanaka;

33. A Owau, o Iesu Kristo, ko oukou Haku a me ko oukou Akua, ka i olelo aku ia mea.

34. O keia mau olelo aole na kanaka, aole no hoi na ke kanaka, aka Naʻu no; no ia mea, e hoike aku oukou Naʻu ia mau mea, a aole na ke kanaka;

35. No ka mea, o Koʻu leo ka i olelo aku ia mau mea ia oukou, no ka mea, ua haawi ia aku ia mau mea ma o Koʻu Uhane la ia oukou, a ma o Koʻu mana la e hiki ai ia oukou ke heluhelu aku i kekahi i kekahi, a ke ole ma o Koʻu mana la, aole e loaa ia oukou ia mau mea;

36. No ia mea, ua hiki ia oukou ke hoike aku ua lohe oukou i Koʻu leo, a ua ike i Kaʻu mau olelo.

37. A ano, aia hoi, ke haawi aku nei Au ia oe, e Oliva Kaudare, a ia Davida Witima no hoi, e wae aku olua i ka Umikumamalua, ka poe i loaa na makemake no na mea Aʻu i olelo aku ai;

38. A ma o ko lakou mau makemake a me ka lakou mau hana la e ike ai olua ia lakou;

39. A i ka wa e loaa ai lakou ia olua e hoike aku olua i keia mau mea ia lakou.

40. A e moe iho olua ilalo a hoomana aku i ka Makua ma Koʻu inoa;

41. A he pono ia olua e hai aku i ko ke ao nei, i ka i ana, E mihi a e bapetizo ia oukou e pono ai, iloko o ka inoa o Iesu Kristo;

42. No ka mea, e mihi a e bapetizo ia na kanaka a pau e pono ai, a aole na kane wale no, aka o na wahine, a me na keiki i hiki aku i na makahiki o ka hoomaopopo ana i ka pono a me ka hewa.

43. A ano, mahope iho o ka loaa ana o keia ia olua, e malama olua i Kaʻu mau kauoha ma na mea a pau e pono ai;

44. A ma o ko olua mau lima la e hana aku ai Au i hana kamahao mawaena o na keiki a kanaka, a hiki i ka hoomaopopo ana o ka poe he nui i ko lakou mau hewa, i huli mai ai lakou i ka mihi, a i hiki mai ai lakou i ke aupuni o Koʻu Makua;

45. No ia mea, o na pomaikai Aʻu i haawi aku ai ia olua ua oi aku mamua o na mea a pau.

46. A mahope o ka loaa ana o keia ia olua, ina e malama ole olua i Kaʻu mau kauoha, aole e hiki ia olua ke hoola ia iloko o ke aupuni o Koʻu Makua.

47. Aia hoi, Naʻu, na Iesu Kristo, ko olua Haku a me ko olua Akua, a me ko olua Hoolapanai, ma o ka mana la o Kuu Uhane i olelo aku ai ia mea. Amene.