1. He oiaio, penei wahi a ka Haku ia oe, e Kuu kauwa, e Iosepa, oiai ua ninau mai oe ma Koʻu lima, e ike a e hoomaopopo ma kahi hea la Au, ka Haku, i hoapono ai i Kaʻu mau kauwa o Aberahama, Isaaka a me Iakoba, a pela no hoi me Mose, Davida, a me Solomona, Kaʻu mau kauwa, ma ka mea e pili ana i ke kumupaa a me ka loina o ka loaa ana ia lakou na wahine mare a me na haiawahine he lehulehu;

2. Aia hoi, e nana, Owau no ka Haku kou Akua, a e pane aku ana ia oe e pili ana i keia mea.

3. Nolaila, e hoomakaukau i kou naau e hookipa a e hoolohe i na ao ana Aʻu e aneane nei e haawi aku ia oe; no ka mea, o ka poe a pau ia lakou i hoike ia aku ai keia kanawai e hooko ia mea e pono ai;

4. No ka mea, aia hoi, ke hoike aku nei Au ia oe i kekahi berita hou a mau loa; a ina e kupaa ole oe ma ua berita la, alaila e hoahewa ia oe; no ka mea, aole kekahi mea hiki ke hoole i keia berita a e ae ia e komo iloko o Koʻu nani;

5. No ka mea, o ka poe a pau e loaa ana kekahi pomaikai mai Koʻu mau lima aku, e malama i ke kanawai i hookahua ia ai no ia pomaikai a me na mea e pili ana ia mea, e like me ia i kukulu ia ai mai ka manawa mamua aku o ka hookumu ia ana o ke ao nei;

6. Ano ka mea e pili ana i ka berita hou a mau loa, ua hookumu ia ia no ka piha o Koʻu nani; a o ka mea e loaa ana ka piha o ia mea, e malama i ke kanawai e pono ai, a i ole e hoahewa ia oia, wahi a ka Haku ke Akua.

7. A he oiaio, ke olelo aku nei Au ia oe, o na mea e pili ana i keia kanawai oia keia: O na berita, na aelike, na olelo hoopaa, na mea i aelike ia e hooko ia aku ai, na olelo hoohiki, na aelike-laa, na lawelawe ana, na hoohui ana, na launa ana, a i ole, na kaulona ana a pau, i hana ole ia a ae ia, a sila ia, ma ka Uhane Hemolele o ka olelo hoopomaikai, no keia wa a no ka wa mau loa pu, e ka mea i poni ia, a ma ke ano hemolele loa hoi, ma ka hoikeana a me ke kauoha ma o ka mana la o Koʻu mea i poni ia, ka mea Aʻu i koho ai maluna o ka honua e paa i keia mana, (a ua koho Au i Kuu kauwa, ia Iosepa, e paa i keia mana i keia mau la hope nei, a he hookahi wale no ma ka honua nei i ka wa hookahi maluna ona i hooili ia ai keia mana a me na ki o keia Oihanakahuna,) aole e ko ana, aole waiwai, a i ole mana, i ke alahouana mai ka make mai a mahope aku hoi; no ka mea, o na aelike a pau i hana ole ia no keia hopena, e pau ana no ia i ka wa e make ai na kanaka.

8. Aia hoi, o Koʻu hale he hale ia o ka pololei me ke kuikahi, wahi a ka Haku ke Akua, a aole he hale o ka huikau.

9. E apono ana anei Au i kekahi mohai i hana ole ia ma Koʻu inoa? wahi a ka Haku;

10. A i ole, e hookipa mai ana anei Au mai kou mau lima mai i ka mea Aʻu i koho ole ai?

11. A e koho aku anei Au nou, ke ole ia ma ke kanawai, wahi a ka Haku, he oiaio, e like me Kaʻu a me ka Koʻu Makua i koho ai nou mamua aku o ke ao nei?

12. Owau ka Haku kou Akua, a ke haawi aku nei Au ia oe i keia kauoha, aole e hiki aku ana kekahi kanaka i ka Makua, ke ole ma Oʻu nei wale no, a i ole ma Kaʻu olelo, oia hoi, Koʻu kanawai, wahi a ka Haku;

13. A o kela a me keia mea iloko o ke ao nei, ina ua kukulu ia ia e kanaka, e na alii, a i ole e na keikialii, a i ole, e na mana, a i ole e na mea inoa hanohano, me ka nana ole owai la lakou, ke ole lakou ma Oʻu nei, a i ole ma Kaʻu olelo, wahi a ka Haku, e hoohiolo ia ilalo, a aole e mau ana mahope o ka make ana o kanaka, aole hoi i ka wa o ke alahouana, aole hoi mahope aku, wahi a ka Haku kou Akua;

14. No ka mea, o kela a me keia mea e mau ana ma Oʻu nei no ia, a no na mea aole ma Oʻu nei, e hoonaueue ia no auanei a e hoopau ia.

15. Nolaila, ina e mare kekahi kanaka i kekahi wahine ma ke ao nei, a aole oia i mare aku ia ia ma Oʻu nei, aole hoi ma Kaʻu olelo, a berita aku oia me ia e like ka loihi me kona noho ana ma keia ao, a pela no hoi ua wahine la ia ia, aole e mana ka laua berita a mare ana hoi i ko laua make ana, a i ko laua kaawale ana mai ke ao nei aku; nolaila, aole laua i paa ma kekahi kanawai i ko laua wa e kaawale ai mai ke ao nei aku:

16. Nolaila, i ka wa o laua e kaawale ai mai ke ao nei aku, aole laua e mare, aole hoi e haawi ia no ka mare ana; aka, e koho ia i mau anela iloko o ka lani, oia poe anela hoi he mau kauwa lawelawe, e lawelawe no ka poe kupono no ka nani i nui loa ae a oi aku ka maikai a me ka mau loa:

17. No ka mea, aole keia poe anela i kupaa ma Koʻu kanawai, nolaila aole hiki ke hoomahuahua ia lakou, aka, e noho kaawale a pakahi, me ka hookiekie ole ia, iloko o ko lakou kulana i hoola ia ai, no ka wa mau loa, a mai keia manawa aku aole he mau akua, aka, he mau anela no ke Akua, no ka wa mau loa a mau loa.

18. A eia hou, he oiaio, ke olelo aku nei Au ia oe, ina e mare kekahi kanaka i kekahi wahine, a hana i berita me ia no keia wa a no ka wa mau loa, ina aole ma Oʻu nei ua berita la, a i ole, ma Kaʻu olelo, oia hoi Koʻu kanawai, a aole i sila ia e ka Uhane Hemolele o ka olelo hoopomaikai, ma o ka mea la Aʻu i poni a i koho ai no keia mana, alaila, aole ia i ku i ke kanawai, aole hoi e mana i ko laua wa e kaawale aku ai mai ke ao nei aku, no ka mea, aole laua i hoohui ia e Aʻu, wahi a ka Haku, aole hoi ma Kaʻu olelo. I ko laua wa e kaawale aku ai mai ke ao nei aku aole hiki ke apono ia ia i laila, no ka mea, ua hoonohonoho ia na anela a me na akua ilaila, ka poe e hiki ole ai ia laua ke ae ae: nolaila, aole hiki ia laua ke loaa Koʻu nani, no ka mea, o Koʻu hale he hale ia o ka pololei me ke kuikahi, wahi a ka Haku ke Akua.

19. A eia hou, he oiaio, ke olelo aku nei Au ia oe, ina e mare kekahi kanaka i kekahi wahine ma Kaʻu olelo, oia hoi, Koʻu kanawai, a ma ka berita hou a mau loa, a ua sila ia aku ia ia laua ma ka Uhane Hemolele o ka olelo hoopomaikai, e ka mea i poni ia, ka mea Aʻu i koho aku ai no keia mana a me na ki o keia Oihanakahuna, a e olelo ia aku ia ia laua, E puka mai no olua i ke ala mua ana; a ina mahope aku ia o ke ala mua ana, i ke alahouana mahope aku; a e loaa na noho-alii, na aupuni, na aupuni o na keikialii, a me na mana, na wahi e hoomalu ai, na kiekiena a me na hohonu a pau; alaila, e palapala ia iloko o ka buke o ke ola o ke Keikihipa, aole oia e pepehikanaka, a ma o ia mea la e hookahe ai i ke koko hala ole, a ina e kupaa olua ma Koʻu berita, a aole e pepehikanaka, a ma o ia mea la e hookahe ai i ke koko hala ole, e hana ia aku no ia laua i na mea a pau o kela a me keia ano a Kaʻu kauwa i kau aku ai maluna o laua, no keia manawa a iloko o ka wa mau loa, a he mana piha hoi i ko laua wa e kaawale aku ai mai ke ao nei aku; a e kaalo no laua i na anela a me na akua i hoonoho ia malaila, i ko laua hookiekie ia ana a me ka hoonani ia ana ma na mea a pau, e like me ia i sila ia ai maluna o ko laua mau poo; a o ua nani la oia no ka piha pono a me ka hoomau ia ana o na hua no ka wa mau loa a mau loa.

20. Alaila e lilo no laua i mau akua, no ka mea, aole o laua hopena; nolaila, e mau ana laua mai ka mau loa a i ka mau loa, no ka mea, e mau ana laua. Alaila e lilo no laua maluna o na mea a pau, no ka mea, ua lilo na mea a pau malalo iho o laua. Alaila, e lilo no laua i mau akua, no ka mea, ua loaa ia laua ka mana a pau, a ua lilo na anela malalo iho o laua.

21. He oiaio, he oiaio, ke olelo aku nei Au ia oe, ke ole oe e kupaa ma Koʻu kanawai, aole e hiki ia oe ke loaa keia nani;

22. No ka mea, he haiki ka ipuka a he ololi ke ala e hiki aku ai i ka hookiekie ia ana a me ka hoomau ia ana o na ola, a he kakaikahi ka poe e loaa ana ia mea, no ka mea, aole oe i hookipa mai Iaʻu i ke ao nei, aole hoi oe i ike mai Iaʻu.

23. Aka, ina e hookipa mai oe Iaʻu i ke ao nei, alaila, e ike mai oe Iaʻu, a e loaa kou hookiekie ia ana, a ma Koʻu wahi e noho ai, malaila pu no hoi oe.

24. O keia na ola mau loa, o ka ike i ke Akua naauao a oiaio hookahi, a me Iesu Kristo ka Mea Ana i hoouna mai ai. Owau no Ia. Nolaila, e hookipa oe i Koʻu kanawai.

25. He akea ka ipuka a he laula ke ala e hiki aku ai i na make; a he nui ka poe e komo aku ana malaila, no ka mea, aole lakou i hookipa mai Iaʻu, aole hoi i kupaa ma Koʻu kanawai.

26. He oiaio, he oiaio, ke olelo aku nei Au ia oe, ina e mare kekahi kanaka i kekahi wahine i ku i Kaʻu olelo, a sila ia laua ma ka Uhane Hemolele o ka olelo hoopomaikai, e like me Kaʻu i koho ai, ina e hana kekahi o laua i kekahi hewa, a i ole e uhaki i ka berita hou a mau loa ma kekahi ano, a me kela me keia ano o ke kuamuamu ana, a ina aole laua e pepehikanaka, a ma o ia mea la e hookahe ai i ke koko hala ole,—eia nae, e ala mai laua i ke ala mua ana, a komo aku iloko o ko laua hookiekie ia ana; aka, e luku ia laua ma ka io, a e haawi ia aku i na hoehaeha ana a Satana, a hiki i ka la o ka hoolapanai ana, wahi a ka Haku ke Akua.

27. O ka hoino ana i ka Uhane Hemolele, ka mea e kala ole ia ana ma keia ao, aole hoi, mawaho aku o keia ao, aia ia ma kou pepehikanaka ana, a ma o ia mea la e hookahe ai oe i ke koko hala ole, a ae aku i Koʻu make mahope iho o ka loaa ana ia oe o Koʻu berita hou a mau loa, wahi a ka Haku ke Akua; a o ka mea e kupaa ole ana ma keia kanawai, aole loa e hiki ke komo aku iloko o Koʻu nani, aka, e hoahewa ia no, wahi a ka Haku.

28. Owau ka Haku kou Akua, a e haawi aku ana Au ia oe i ke kanawai o Koʻu Oihanakahuna Hemolele, e like me ia i kukulu ia ai e Aʻu a me Koʻu Makua mamua aku o ke ao nei.

29. Ua loaa ia Aberahama na mea a pau, o kela me keia mea ana i loaa ai, ma ka hoikeana a me ke kauoha, ma Kaʻu olelo, wahi a ka Haku, a ua komo aku iloko o kona hookiekie ia ana, a ke noho nei iluna o kona nohoalii.

30. Ua loaa ia Aberahama na olelo hoopomaikai e pili ana i kana mamo a me ka hua o kona puhaka,—mai kona puhaka mai oe, oia hoi, o Kaʻu kauwa, o Iosepa,—na mea e mahuahua mau ana oiai lakou ma ke ao nei; a no ka mea e pili ana ia Aberahama a me kana poe hua, a mahuahua mau ana lakou mawaho aku o ke ao nei: e mahuahua mau ana lakou ma keia ao a mawaho aku o keia ao hoi, me ka hiki ole ke helu ia e like la me na hoku; a i ole, ina e helu oe i ke one o kahakai, aole e hiki ana ia oe ke helu ia lakou.

31. Nou no hoi keia olelo hoopomaikai, no ka mea, na Aberahama mai oe, a ua haawi ia ka olelo hoopomaikai ia Aberahama; a ma keia kanawai ka hoomau ia ana o na hana a Koʻu Makua, ma o ia mea la e hoonani ai Oia ia Ia iho.

32. Nolaila, e hele oe, a e hana i na hana a Aberahama; e komo oe iloko o Koʻu kanawai, a e hoola ia oe.

33. Aka, ina aole oe e komo ana iloko o Koʻu kanawai, aole e hiki ia oe ke loaa na olelo hoopomaikai a Koʻu Makua, Ana i haawi ai ia Aberahama.

34. Kauoha aku la ke Akua ia Aberhama, a haawi aku la o Sara ia Hagara i wahine mare na Aberahama. A no ke aha oia i hana ai pela? No ka mea, oia ke kanawai; a mai ia Hagara mai i puka mai ai na kanaka he nui. Nolaila, o keia iho la ka hooko ana i na olelo hoopomaikai me kekahi mau mea e ae.

35. Nolaila, aia anei o Aberahama malalo o ka hoahewa ia? He oiaio, ke olelo aku nei Au ia oe, Aole; no ka mea, Naʻu, na ka Haku, i kauoha pela.

36. Ua kauoha ia o Aberahama e mohai i kana keiki, o Isaaka; aka nae, ua palapala ia, Mai pepehikanaka oe. Eia no nae, aole o Aberahama i hoole, a ua helu ia ia nona no ka pono.

37. Ua loaa ia Aberahama na haiawahine, a hanau mai la lakou he mau keiki nana, a ua helu ia ia nona no ka pono, no ka mea, ua haawi ia lakou nana, a kupaa iho la oia ma Koʻu kanawai; a pela no hoi o Isaaka a me Iakoba aole laua i hana i kekahi mau mea e ae mawaho aku o na mea o laua i kauoha ia ai, a mamuli o ka laua hana ole ana i kekahi mea e ae mawaho aku o ka mea o laua i kauoha ia ai, ua komo aku laua iloko o ko laua hookiekie ia ana, e like la me na olelo hoopomaikai, a ke noho nei maluna o na nohoalii, a aole he mau anela, aka, he mau akua.

38. Loaa iho la no hoi ia Davida na wahine mare a me na haiawahine he nui, a pela no hoi o Solomona, a me Mose, Kaʻu kauwa, a pela no hoi kekahi poe e ae he nui o Kaʻu mau kauwa, mai ka hookumu ia ana o ke ao nei a hiki i keia wa; a aole lakou i hana hewa ma kekahi mea, koe wale no ma na mea i loaa ia lakou aole nae mai Oʻu aku nei.

39. O na wahine mare a me na haiawahine a Davida ua haawi ia aku ia ia e Aʻu, ma ka lima o Natana, Kaʻu kauwa, a me kekahi poe e ae o na Kaula e paa ana i na ki o keia mana; a aole ma kekahi o keia mau mea i hana hewa mai ai oia Iaʻu, koe wale no ma ka mea e pili ana ia Uria a me kana wahine mare; a nolaila ua haule oia mai kona hookiekie ia ana, a loaa kona mahele; a aole e loaa ana lakou ia ia mawaho ae o keia ao, no ka mea, ua haawi aku la Au ia lakou i kekahi mea okoa ae, wahi a ka Haku.

40. Owau no ka Haku kou Akua, a ua haawi aku Au ia oe, e Kuu kauwa, e Iosepa, i kekahi oihana, a ke hoihoi mai nei i na mea a pau. E noi i kau mea i makemake ai a e haawi ia aku ia ia oe, e like la me Kaʻu olelo.

41. A oiai ua noi mai oe Iaʻu e pili ana i ka moekolohe, he oiaio, he oiaio, ke olelo aku nei Au ia oe, ina e loaa i kekahi kanaka he wahine mare iloko o ka berita hou a mau loa, a ina e loaa pu oia me kekahi kanaka e aku, he mea hoi Aʻu i koho ole ai nana ma ka poni hemolele ana, ua moekolohe oia a e luku ia no ia.

42. Ina aole ua wahine la iloko o ka berita hou a mau loa, a loaa pu oia me kekahi kanaka e aku ua moekolohe no oia;

43. A ina e loaa pu kana kane me kekahi wahine okoa aku, a aia ua kanaka la malalo o kekahi aelike-laa, ua uhaki ua kanaka la i kana aelike-laa, a ua moekolohe hoi;

44. A ina aole ua wahine la i moekolohe, aka, ua hala ole, a aole i uhaki i kana aelike-laa, a ua ike maopopo oia ia mea, a hoike aku Au ia mea ia oe, e Kaʻu kauwa, e Iosepa, alaila e loaa ia oe ka mana, ma ka mana o Kuu Oihanakahuna Hemolele e lawe i ua wahine la a haawi aku i ka mea i moekolohe ole, a i kupaa nae; no ka mea, e hoolilo ia oe i luna maluna o na mea he nui;

45. No ka mea, ua hooili Au maluna ou i na ki a me ka mana o ka Oihanakahuna, a ma o ia mea la Au i hoihoi mai ai i na mea a pau, a e hoike ana i na mea a pau ia oe iloko o ka manawa kupono.

46. A he oiaio, he oiaio, ke olelo aku nei Au ia oe, o ka mea au e sila ai ma ka honua nei e sila ia no ia iloko o ka lani; a o ka mea au e hoopaa ai ma ka honua nei, ma Koʻu inoa, a ma Kaʻu olelo, wahi a ka Haku, e hoopaa mau loa ia no ia iloko o na lani; a o na hewa o kela me keia mea au e kala ai ma ka honua nei e kala mau loa ia no ia iloko o na lani; a o na hewa o kela me keia mea au e hookoe ai e hookoe ia no ia ma ka lani.

47. A eia hou, he oiaio, ke olelo nei Au, o ka mea au e hoopomaikai ai, oia Kaʻu e hoopomaikai ai, a o ka mea au e hoino ai, oia Kaʻu e hoino ai, wahi a ka Haku; no ka mea, Owau ka Haku, kou Akua.

48. A eia hou, he oiaio, ke olelo aku nei Au ia oe, e Kaʻu kauwa, e Iosepa, o ka mea au e haawi ai ma ka honua nei, a i ke kanaka au e haawi ai i kekahi wahine ma ka honua nei, ma Kaʻu olelo, a i ku i Koʻu kanawai, e hiki mai ana na pomaikai a me Koʻu mana maluna ona, aole nae na hoino ana, wahi a ka Haku, a aole ona hoahewa ia ana ma ka honua, a ma ka lani;

49. No ka mea, Owau ka Haku kou Akua, Owau pu ana me oe a hiki i ka hopena o ke ao nei, a iloko o ka wa mau loa; no ka mea, he oiaio, ke sila nei Au maluna ou i Kou hookiekie ia ana, a ke hoomakaukau nei i nohoalii nou iloko o ke aupuni o Koʻu Makua, me Aberahama kou makua.

50. Aia hoi, ua ike Au i kau mau mohai, a e kala ana Au i kou mau hewa a pau. Ua ike Au i kau mau mohai ma ka hoolohe ana i ka mea Aʻu i hai aku ai ia oe. Nolaila, e hele; a e hoomakaukau ana Au i ala nou e pakele ai, e like me Koʻu i apono ai i ka mohai ana a Aberahama i kana keiki, ia Isaaka.

51. He oiaio, ke olelo aku nei Au ia oe, Ke haawi aku nei Au i kekahi kauoha i Kaʻu kauwawahine, ia Ema Kamika, kau wahine mare, ka mea Aʻu i haawi aku ai nau, e kaohi oia ia ia iho, a e lawe ole i kela mea Aʻu i kauoha aku ai ia oe e haawi aku ia ia; no ka mea, Naʻu ia i hana, wahi a ka Haku, i mea e hoao ai ia oukou a pau, e like me Kaʻu i hana aku ai ia Aberahama, a i hiki ai Iaʻu ke koi aku i kekahi alana mai kou lima mai, ma kekahi berita a me ka mohai;

52. E hookipa mai Kaʻu kauwawahine, o Ema Kamika, i na wahine a pau i haawi ia na Kuu kauwa na Iosepa, ka poe hoi i maemae a haumia ole imua Oʻu: a o ka poe o lakou i maemae ole, a i olelo nae he maemae lakou, e luku ia aku no, wahi a ka Haku ke Akua;

53. No ka mea, Owau ka Haku kou Akua, a e hoolohe oe i Koʻu leo; a ke haawi aku nei Au i Kaʻu kauwa, ia Iosepa, e hoolilo ia oia i luna maluna o na mea he nui, no ka mea, ua kupaa oia ma na mea kakaikahi; a mai keia wa aku e hooikaika no Au ia ia.

54. A ke kauoha nei Au i Kaʻu kauwawahine, ia Ema Kamika, e kupaa a e pili aku i Kaʻu kauwa; ia Iosepa, a aole i kekahi mea e ae. Aka, ina aole oia e kupaa ma keia kauoha, e luku ia no oia, wahi a ka Haku; no ka mea, Owau no ka Haku kou Akua, a e anai no Au ia ia [Ema], ina aole oia e kupaa ma Kuu kanawai:

55. Aka, ina aole oia e kupaa ma keia kauoha, alaila, e hana no Kuu kauwa, o Iosepa, i na mea a pau nona, he oiaio, e like me kana i olelo ai; a e hoopomaikai no Au ia ia a e hoomahuahua ia ia, a e haawi aku ia ia he pahaneri ma keia ao, o na makuakane a me na makuawahine, na kaikuaana, na kaikaina a me na kaikuahine, na hale a me na aina, na wahine mare a me na keiki, a me na leialii o na ola mau loa iloko o na ao mau loa.

56. A eia hou, he oiaio, ke olelo nei Au, E kala aku Kuu kauwawahine i Kuu kauwa, ia Iosepa, no kona mau lawehala ana, alaila e kala ia oia [Ema] no kona mau lawehale ana, ma ka mea ona i lawehala mai ai Iaʻu; a e hoopomaikai no Au, ka Haku kou Akua, ia ia [Ema,] a e hoomahuahua ia ia, a e hoohauoli i kona naau.

57. A eia hou, ke olelo nei Au, Mai waiho aku Kaʻu kauwa, o Iosepa, i kona waiwai maiwaho ae o kona mau lima, o hele mai kekahi enemi a anai ia ia, no ka mea, ke imi nei o Satana e anai; no ka mea, Owau ka Haku kou Akua, a oia [Iosepa] Kaʻu kauwa; a aia hoi, e nana, Owau pu me ia, e like me Aʻu me Aberahama, kou makuakane, he oiaio, a hiki i kona hookiekie ia ana a me kona nani.

58. Ano, e pili ana i ke kanawai o ka Oihanakahuna, aia he nui wale o na mea e pili ana ia mea.

59. He oiaio, ina e kahea ia kekahi kanaka e Kuu Makua, e like la me Aarona, ma Koʻu leo ponoi, a ma ka leo o ka Mea Nana Au i hoouna mai, a ua haawi aku Au ia ia i na ki o ka mana o keia Oihanakahuna, ina e hana oia i kekahi mea ma Koʻu inoa, a i ku i Koʻu kanawai, a ma Kaʻu olelo, aole oia e hana hewa ana, a e hoapono no Au ia ia.

60. Nolaila, mai kue kekahi mea i Kaʻu kauwa, ia Iosepa; no ka mea, e hoapono no Au ia ia; no ka mea, e lawelawe ana oia i ka mohai Aʻu i koi ai mai kona mau lima mai; no kona mau lawehala ana, wahi a ka Haku kou Akua.

61. A eia hou, no ka mea e pili ana i ke kanawai o ka Oihanakahuna, Ina e mare kekahi kanaka i kekahi wahine puupaa, a makemake e mare i kekahi hou aku, a haawi mai ka mua i kona ae, a ina e mare oia i ka lua, a he mau wahine puupaa laua, a aole i aelike-laa me kekahi kanaka okoa ae, alaila, ua hoapono ia oia; aole e hiki ia ia ke moekolohe, no ka mea, ua haawi ia laua nana; no ka mea, aole e hiki ia ia ke moekolohe me ka mea nana ponoi, aole nae na kekahi mea e ae:

62. A ina he umi mau wahine puupaa i haawi ia nana ma keia kanawai, aole hiki ia ia ke moekolohe, no ka mea, nana lakou, a ua haawi ia lakou nana: nolaila, ua hoapono ia oia.

63. Aka, ina he hookahi a i ole o kekahi o na wahine puupaa he umi, mahope iho o kona mare ia ana, e noho pu me kekahi kanaka okoa ae, ua moekolohe ua wahine la, a e anai ia no; no ka mea, ua haawi ia lakou nana e hoomahuahua a e hoopiha i ka honua, e like me Kaʻu kauoha, a e hooko i ka olelo hoopomaikai i haawi ia e Koʻu Makua mamua o ka hookumu ia ana o ke ao nei, a no ko lakou hookiekie ia ana iloko o na ao mau loa, i hanau ai lakou i na uhane o kanaka, no ka mea, ma keia i hoomau ia ai ka hana a Koʻu Makua, i hoonani ia ai Oia.

64. A eia hou, he oiaio, he oiaio, ke olelo aku nei Au ia oe, Ina he wahinemare ka kekahi kanaka e paa ana i na ki o keia mana, a ao aku oia ia wahine i ke kanawai o Kuu Oihanakahuna e pili ana i keia mau mea, alaila e manaoio oia a e haawi aku nana, a i ole e anai ia no ua wahine la, wahi a ka Haku kou Akua, no ka mea, e anai no Au i ua wahine la; no ka mea, e hoonani no Au i Koʻu inoa maluna o ka poe a pau e hookipa a e kupaa ana iloko o Koʻu kanawai.

65. Nolaila, he ku i ke kanawai iloko Oʻu, ina e hookipa ole ua wahine la i keia kanawai, e loaa i ke kane na mea a pau o kela a me keia mea Aʻu, ka Haku kona Akua, e haawi aku ai ia ia, no ka mea, aole haawi aku ua wahine la na ke kane e like la me Kaʻu olelo; alaila, e lilo no ua wahine la i mea lawehala, a ua pakele ke kane mai ke kanawai ae a Sara, ka mea i haawi aku ia Aberahama i ku i ke kanawai, i Koʻu wa i kauoha ai ia Aberahama e lawe ia Hagara i wahine mare nana.

66. A ano, e pili ana i keia kanawai, he oiaio, he oiaio, ke olelo aku nei Au ia oe, e hoike hou aku ana Au ia oe ma keia hope aku; nolaila, ua lawa keia no keia manawa. Aia hoi, Owau no ka Alepa a me ka Omega. Amene.
HE PAKUINA.