1. Aia hoi, penei wahi a ka Haku ia olua, e Kuu mau kauwa, e Iosepa Kamika, opio, a me Sidane Rigedona, ua hiki io mai ka manawa, a he mea ia e pono ai a kupono iloko Oʻu e wehe olua i ko olua mau waha ma ka hai ana i Kuu Euanelio, i na mea o ke aupuni, e hoakaka ana i na mea pohihihi ona mailoko mai o na Palapala Hemolele, e like me kela hapa o ka Uhane a me ka mana e haawi ia aku ana ia olua, oia hoi, e like me Koʻu makemake.

2. He oiaio, ke olelo aku nei Au ia olua, e hai aku i ko ke ao nei ma na aina e pili kokoke mai ana, a iloko no hoi o ka Ekalesia, no kekahi wa, oia hoi, a hoike ia aku ia ia olua.

3. He oiaio, he misiona keia no kekahi wa Aʻu e haawi aku nei ia olua,

4. No ia mea, e hana olua ma Koʻu malawaina. E kahea aku i na kanaka o ka honua, a e hoike aku, a e hoomakaukau i ke ala no na kauoha a me na hoikeana e hiki mai ana.

5. Ano, aia hoi, he naauao keia; o ka mea e heluhelu ana, e hoomaopopo iho oia a e malama no hoi;

6. No ka mea, i ka mea e malama ana ia mea e haawi ia aku auanei ia ia a oi aku, oia hoi ka mana;

7. No ia mea, e hoohoka i ko olua mau enemi, e kahea ia lakou e hui pu me olua ma ke akea a ma kahi malu, a ina e kupaa olua, e hoike ia auanei ko lakou hilahila.

8. No ia mea, e lawe mai lakou i ko lakou mau kumu manao ikaika e kue i ka Haku.

9. He oiaio, penei wahi a ka Haku ia olua, aole e lanakila kekahi mea hoeha i hana ia e kue ia olua;

10. A ina e hookiekie kekahi kanaka i kona leo e kue mai ia olua, e hoohoka ia auanei ia ma Koʻu manawa kupono;

11. No ia mea, e malama i Kaʻu mau kauoha, he oiaio a he pololei lakou. Pela io no. Amene.