1. Penei, wahi a ka Haku, he oiaio, he oiaio, ke olelo aku nei Au ia oe, e Kaʻu keiki, ua kala ia kou mau hewa e like me kou noi ana, no ka mea, ua pii mai kau mau pule a me na pule a kou mau hoahanau iloko o Koʻu mau pepeiao;

2. Nolaila, ua pomaikai oe mai keia manawa aku, ka mea e paa ana i na ki o ke aupuni i haawi ia ia oe; oia ke aupuni e hiki mai ana no ka manawa hope loa.

3. He oiaio, ke olelo aku nei Au ia oe, aole loa e lawe ia aku na ki o keia aupuni mai ia oe aku, oiai oe ma ke ao nei, aole hoi ma ke ao e hiki mai ana:

4. Eia nae, ma ou la e haawi ia aku ai na kauoha ia hai; ae, he oiaio, i ka Ekalesia.

5. A o ka poe a pau e loaa ana na kauoha a ke Akua, e ao lakou i ke ano o ko lakou malama ana ia mau mea, o manao ia ua mau mea nei he liilii, a kauwalako ia lakou malalo o ka hoahewa ia ana ma o ia mea la; a okupe a hina i ka wa e haule mai ka ino, a nou mai ka makani, a haule mai ka ua, a pa maluna o ko lakou hale.

6. A eia hou, he oiaio, ke olelo aku nei Au i kou mau hoahanau, ia Sidane Rigedona a me Federika G. Wiliama, ua kala ia ko laua mau hewa no hoi, a ua helu ia laua ma ke ano likealike me oe ma ke paa ana i na ki o keia aupuni hope loa;

7. Pela like hoi, ma o kou lawelawe ana la, na ki o ke kula o na kaula, ka mea Aʻu i kauoha aku ai e kukulu ia,

8. I hiki ai ia lakou, ma o ia mea nei, ke hoohemolele ia ma ka lakou hana ma ka Oihanakahuna no ka hoola ana ia Ziona a me na lahuikanaka o Iseraela, a me ka poe Genetile, e like me ka nui o ka poe e manaoio mai ana,

9. I hiki ai ia lakou ke loaa ka olelo ma o kou lawelawe ana la, a ma ko lakou lawelawe ana la, e hele aku ai ka olelo i na welelau o ka honua, i ka poe Genetile ka mua, alaila, aia hoi, e nana, e huli no lakou i ka poe Iudaio;

10. Alaila, e hiki mai no ka la, ka manawa o ka lima o ka Haku e hoike ia mai iloko o ka mana i ka hoohuli ana mai i na lahuikanaka, na lahui pegana, ko ka hale o Iosepa, i ka Euanelio o ko lakou hoola ia ana.

11. No ka mea, e hiki mai ana keia ma kela la, e lohe kela kanaka keia kanaka i ka piha o ka Euanelio ma kona olelo makuahine a ma kona olelo ponoi, ma o ka poe la i hoolilo ia i keia mana ma ka lawelawe ana o ka Uhane Kokua i pahola mai maluna o lakou no ka hoike ana mai ia Iesu Kristo.

12. A ano, he oiaio, ke olelo nei Au ia oe, ke haawi aku nei Au ia oe i kekahi kauoha, oia hoi, e hoomau oe ma ka hana o ka Oihanakahuna a me ka noho Peresidena ana,

13. A i ka manawa e pau ai kou unuhi ana i na Kaula, e noho hoomalu ai oe mai ia wa aku maluna o ka hana o ka Ekalesia a me ke kula [o na kaula];

14. A ia manawa aku ia manawa aku, e like me ka mea e hoike ia e ka Uhane Kokua, e loaa ia oe na hoikeana e wehe ae i na mea pohihihi o ke aupuni,

15. A e hooponopono i na apana o ka Ekalesia, a e huli a imi ikaika i ka ike a e hookamaaina me na buke maikai a pau, a me na olelo, a me na kanaka.

16. A o keia ka oukou hana a misiona ma ko oukou ola ana a pau, e noho hoomalu ma ka ahakuka, a e hooponopono i na mea a pau o keia Ekalesia a aupuni hoi.

17. Mai hilahila, aole hoi e hoohoka ia; aka, e ao ia iloko o ko oukou noonoo hookiekie a me ka hookano, no ka mea, e lawe mai ana ua mea nei i kekahi pahele maluna o ko oukou mau uhane.

18. E hooponopono i ko oukou mau hale; e hookaawale aku i ka molowa a me ka maemae ole mai ia oukou aku.

19. Ano, he oiaio, ke olelo aku nei Au ia oe, e hoomakaukau koke ia, e like me ka hiki, he wahi no ka ohana o kou hoakuka a kakauolelo, oia hoi, o Federika G. Wiliama:

20. A e ae aku i Kaʻu kauwa elemakule, ia Iosepa Kamika, makua, me kona ohana e hoomau aku ma kahi ana e noho nei i keia wa, a aole e kuai ia aku ia wahi, a hiki mai ka wa e olelo mai ai ka waha o ka Haku.

21. A e ae aku i kou hoakuka, oia hoi, ia Sidane Rigedona, e hoomau ma kahi ana e noho nei i keia manawa, a hiki mai ka wa e olelo mai ai ka waha o ka Haku.

22. A e imi ikaika ka Bihopa e loaa kekahi agena, oia hoi he kanaka i loaa na waiwai ma kahi hoahu—he kanaka no ke Akua me ka manaoio ikaika;

23. I hiki ai ia ia, ma o ia mea la, ke hookaa aku i kela a me keia aie; i lilo ole ai ka hale-hoahu o ka Haku i mea e hoowahawaha ia mai imua o na maka o na kanaka.

24. E huli ikaika, e pule mau, a e manaoio, alaila, e hana pu mai na mea a pau no ko oukou pono, ina e hele me ka pono a hoomanao i ka berita a oukou i berita pu ai kekahi me kekahi.

25. E uuku ko oukou mau ohana, oia hoi, ko Kaʻu kauwa elemakule, o Iosepa Kamika, makua, e pili ana i ka poe aole no ko oukou mau ohana;

26. I lawe ole ia ai mai ia oukou aku, na mea i hoolako ia no oukou e hooko ai i Kaʻu hana, a haawi ia i kekahi poe i kupono ole,

27. A ma o ua mea nei e akeakea ia ai oukou ma ka hooko ana i ua mau mea la, Aʻu i kauoha aku ai ia oukou.

28. A eia hou, he oiaio, ke olelo aku nei Au ia oe, o Koʻu makemake ia e loaa i Kaʻu kauwawahine, ia Viena Ieka kekahi kala e uku aku ai kona lilo, a e hele aku i ka aina o Ziona;

29. A o ke koena o ke kala e hoolaa ia Noʻu, a e uku ia aku oia iloko o Koʻu wa kupono.

30. He oiaio, ke olelo aku nei Au ia oe, he mea pono ia i Koʻu mau maka, e hele aku oia i ka aina o Ziona, a e loaa he hooilina mai ka lima mai o ka Bihopa,

31. I noho paa ai oia iloko o ka maluhia, ina e kupaa oia, a aole palaualelo ma kona mau la mai ia manawa aku.

32. A aia hoi, he oiaio, ke olelo aku nei Au ia oe, e kakau oe i keia kauoha, a e olelo aku i kou mau hoahanau ma Ziona, me ka haawi ana aku i ke aloha, ua kahea no hoi Au ia oe e noho hoomalu maluna o Ziona i Koʻu wa kupono:

33. Nolaila, e hoopau lakou i ka hooluhi ana Iaʻu e pili ana i keia mea.

34. Aia hoi, ke i aku nei Au ia oe ke hoomaka nei kou mau hoahanau ma Ziona e mihi, a ke hauoli nei na anela maluna o lakou;

35. Eia nae, aole Oʻu oluolu me kekahi mau mea he nui, aole Oʻu oluolu me Kaʻu kauwa, o Wiliama E. Makalelina, aole hoi me Kaʻu kauwa, o Sidane Kilibati; a me ka Bihopa no hoi, a he nui na mea o kekahi poe e ae e mihi ai;

36. Aka, he oiaio, ke i aku nei Au ia oe, e paio ana Au, ka Haku, me Ziona, a e nonoi haahaa ana i kona poe ikaika, a e ao ikaika ana ia ia a lanakila ae oia a lilo i maemae imua Oʻu:

37. No ka mea, aole oia e hoonee ia aku ana mai kona wahi aku. Ua olelo aku la Au, ka Haku, ia mea. Amene.