1. He oiaio, he oiaio, ke olelo aku nei Au ia oukou, e Kaʻu mau kauwa, e like me ko oukou kala ana aku i kekahi i kekahi i ko oukou mau hewa, pela no Au, ka Haku, e kala aku nei ia oukou;

2. Aka nae, aia kekahi poe mawaena o oukou i nui loa ka hana hewa ana; he oiaio, ua hana hewa no hoi oukou a pau, aka, he oiaio, ke olelo aku nei Au ia oukou, e makaala mai neia manawa aku, a e hookaawale mai ka hewa aku, o haule mai auanei na hoopai ikaika maluna o ko oukou mau poo;

3. No ka mea, i ka mea i haawi ia a nui he nui ke koi ia mai ia ia mai; a o ka mea e hana hewa ana i ka malamalama i oi ae e loaa no ia ia ka hoahewa i oi ae.

4. Ke kahea mai nei oukou ma Koʻu inoa no na hoikeana, a ke haawi aku nei Au ia mau mea ia oukou; a ina e malama ole oukou i Kaʻu mau olelo Aʻu e haawi aku nei ia oukou, e lilo oukou i poe lawehala, a o ke kaulike a me ka hoopai ana ka uku i hoopaa ia i Koʻu kanawai;

5. Nolaila, o ka mea Aʻu e olelo nei i ka mea hookahi oia Kaʻu e olelo nei i na mea a pau, E kiai, no ka mea, ke hoomahuahua nei ka mea kue i kona mau wahi e nohoalii ai a ke nohoalii nei ka pouli;

6. A ke hoaa ia nei ka inaina o ke Akua i ka poe kanaka o ka honua; a aole loa hookahi e hana nei i ka pono, no ka mea, ua hilihewa na mea a pau mai ke alanui ae.

7. A ano, he oiaio, ke olelo aku nei Au ia oukou, aole Au, ka Haku, e kau ana i kekahi hoahewa maluna o oukou; e hele ma ko oukou mau alahele a mai hana hewa hou aku; aka, i kela kanaka e hana hewa ana e hoi hou mai no na hewa mua, wahi a ka Haku ko oukou Akua.

8. A eia hou, ke olelo aku nei Au ia oukou, ke haawi aku nei Au ia oukou i kekahi kauoha hou, i hiki ai ia oukou ke hoomaopopo i Koʻu makemake e pili ana no oukou,

9. A i ole, ma kekahi olelo ana, ke haawi aku nei Au ia oukou i na kuhikuhi ana i ke ano o ka oukou hana ana imua Oʻu, i hoi mai ai ia ia oukou no ko oukou hoola ia ana.

10. Ua paa no Au, ka Haku, ke hana oukou i ka mea Aʻu i olelo aku ai, aka, i ka wa a oukou e hana ole ai i ka mea Aʻu e olelo aku ai, alaila aohe o oukou olelo hoopomaikai.

11. Nolaila, he oiaio, ke olelo aku nei Au ia oukou, he mea e pono ai i Kaʻu kauwa ia Eluene Paterige, a ia Nuela K. Witine, ia A. Sidane Kilibati, a me Sidane Rigedona, a me Kaʻu kauwa o Iosepa Kamika, a me Ioane Witima a me Oliva Kaudare, a me Wiliama W. Pelepa, a me Makini Hailaki, e hoopaa ia lakou me kekahi apo paa a me kekahi berita i hiki ole ke uhaki ia ma o ka hana hewa ana la, (ke ole e hiki mai ka hoopai mahope koke iho,) ma ko oukou mau kulana kahu malama waiwai like ole,

12. E hookele i na mea e pili ana i ka poe ilihune, a me na mea a pau e pili ana i ka oihana Bihopa ma ka aina o Ziona a ma ka aina o Ketalana hoi.

13. No ka mea, ua hoolaa aku Au i ka aina o Ketalana, iloko o Koʻu manawa kupono no ka pomaikai o ka Poe Hoano o ka Mea Kiekie Loa, a i Mahele-aina o Ziona;

14. No ka mea, he mea e pono ai no Ziona e mahuahua ma ka nani, a me ka hemolele; he mea e pono ai e hoakea ia kona mau palena; e hooikaika ia kona mau Mahele-aina e pono ai; ae, he oiaio, ke olelo aku nei Au ia oukou e ala no o Ziona e pono ai a e komo iho i kona mau aahu nani:

15. Nolaila, ke haawi aku nei Au ia oukou i keia kauoha, e hoopaa ia oukou iho ma keia berita, a e hana ia e ku i na kanawai o ka Haku.

16. Aia hoi, eia no hoi ka naauao iloko Oʻu no ko oukou pono.

17. A e likealike oukou, a i ole, ma kekahi olelo ana, e loaa likealike ia oukou na kuleana maluna o na waiwai, no ka pono o ka hookele ana i na mea e pili ana i ka oukou mau oihana kahu malama waiwai, e loaa i kela a me keia kanaka e like me kona mau hemahema a me kona mau nele, ina nae he pololei kona mau hemahema;

18. A o keia mau mea a pau no ka pomaikai o ka Ekalesia o ke Akua ola, i hiki ai i kela a me keia kanaka ke hoonui i kona talena, i loaa ai i kela a me keia kanaka kekahi mau talena hou aku, he oiaio, he pa-haneri hoi, e waiho ia iloko o ko ka Haku hale-hoahu, a e lilo i waiwai pili laula no ka Ekalesia holookoa.

19. E imi ana kela a me keia kanaka i ka pomaikai no kona hoalauna, a e hana ana i na mea a pau me ka manao kaukahi i ka nani o ke Akua.

20. O keia hui Kaʻu i koho ai i hui mau loa no oukou, a me ko oukou mau panihakahaka, ina e hana hewa ole oukou;

21. A o ke kanaka e hana hewa ana e kue i keia berita, a hoopaakiki i kona naau ma ke kue ana ia mea, e hana ia aku ia ia e ku i na kanawai o Kuu Ekalesia, a e haawi ia ae i na hoehaeha ana a Satana a hiki i ka la o ka hoolapanai ana.

22. A ano, he oiaio, ke olelo aku nei Au ia oukou, a o keia ka naauao, e hana oukou i na mea e loaa ai no oukou iho na hoaloha mawaena o ko mamona poe pono ole, a aole lakou e luku ia oukou.

23. E waiho malie i ka hoopai ana me Aʻu, no ka mea, Noʻu ia, a Naʻu no e uku. O ka maluhia me oukou; a e mau no Koʻu hoopomaikai ana me oukou.

24. No ka mea, no oukou ke aupuni i keia manawa, a no ka wa mau loa, ina e haule ole oukou mai ko oukou kupaa ana. Pela io no. Amene.